Ọpụpụ 39 - Ika

Isi Nke Mmitenẹi Kwasị Ọgụn Ẹwuru Ndị Nchụn-ẹjan

¹ Wẹ nọ gi oruru bru lẹ nke pọpụ lẹ nke ufie hụn wẹ tụ mẹmẹ ẹwuru ndị wẹ gi a rụn ọrụn Ọdụ-nsọ ahụn. Wẹ nọzị mẹmẹni Ẹrọnụ ẹwuru rị nsọ nọkẹ kẹ Osolobuẹ dọn gwa Mozizi.

Ẹfọdụ W'e Kẹnmẹ Isi-uvun

² Wẹ nọ gi goru lẹ oruru bru lẹ oruru pọpụ lẹ hụn e nwun ufie-ufie lẹ oruru linẹni riẹnni kpa ẹwuru ẹfọdụ w'e yikwasị elu ẹwuru.

³ Wẹ nọ tipịa goru, kpọwa a gẹnrẹnrẹn-gẹnrẹnrẹn, kpagbama ya lẹ oruru bru lẹ nke pọpụ lẹ hụn e nwun ufie-ufie lẹ linẹni riẹnni: ọka kpa a.

⁴ Wẹ nọ kwa eriri ẹkwa-linẹni ẹbụọ ye isi-uvun ẹkwa ẹfọdụ hụ, ohu azụụnnị, ohu azụụnnị, kẹ n'ọ nị e kẹnmẹ.

⁵ Ihiẹn ohu hụ kẹ wẹ gi kpazị eriri ẹ rịn'a hụn wẹ kpa n'ọ ma mma: goru lẹ oruru bru lẹ oruru pọpụ lẹ hụn e nwun ufie-ufie lẹ oruru linẹni riẹnni, nọkẹ kẹ Osolobuẹ dọn gwa Mozizi.

⁶ Wẹ nọ kụnma ọmụma ọnik'si ẹbụọ hụ Osolobuẹ gwa Mozizi yesọnmẹ imẹ ihiẹn ndị wẹ gi goru kpa, tụyesọnmẹ ọmụma ndị ahụn ẹfan ụmụ Izrẹlụ kẹ w'e mẹmẹ ihiẹn wẹ gi e biye ẹka.

⁷ Wẹ nọ kpa wẹ lẹ ihiẹn goru buni wẹ yesọnmẹ isi-uvun ẹfọdụ, a wụrụ wẹ ọmụma we gi a nyanhan ụmụ Izrẹlụ, nọkẹ kẹ Osolobuẹ dọn gwa Mozizi.

Ẹkpa Elu-obi

⁸ Wẹ nọ mẹmẹ ẹkpa elu-obi hụ wẹ gi a jụ Osolobuẹ uche ẹ, kpa a n'ọ ma mma. Ihiẹn wẹ gi mẹmẹ ẹfọdụ kẹ wẹ gi mẹmẹ ẹ: goru lẹ oruru bru lẹ oruru pọpụ lẹ hụn e nwun ufie-ufie lẹ oruru linẹni riẹnni.

⁹ K'o suehan k'ọ shịahan: usue ẹ lẹ ụshịa a wụsọnmẹ ubẹka ẹtọ, wẹ magigụ a ẹbụọ n'o họnrin ẹkpa.

¹⁰ Wẹ nọ kụnma ọmụma pụ-ichẹn ogele ẹnọ ye ẹ. Ogele ibuzọ wụ rubi, tọpazị lẹ berilu;

¹¹ ogele nke ẹbụọ wụ tọkwọịzị, safaya lẹ ẹmaradị;

¹² ogele nke ẹtọ wụ jasịntị, ageti lẹ amitisti;

¹³ ogele nke ẹnọ wụ krisolaịtị, ọnik'si lẹ jaspa. Wẹ kụnma wẹ yesọnmẹ imẹ akpa goru.

¹⁴ Mmẹbụọ kẹ wẹ rị, ẹfan ụmụ-ikẹnnyẹ Izrẹlụ ohu-ohu rịsọnmẹ elu ohu-ohu; wẹ tụyesọnmẹ ẹfan ebọn ohu-ohu hụ kẹ w'e mẹmẹ ihiẹn wẹ gi e biye ẹka.

¹⁵ Wẹ nọ gi goru wẹ buchelẹni ihiẹn ọzọ mẹmẹni Ẹkpa elu-obi hụ eriri ẹbụọ wẹ gi e kọnye ẹ,

¹⁶ gi goru mẹmẹ akpa ẹbụọ nọ kẹ ẹru lẹ ẹgba ẹbụọ. Ya wẹ nọ gba ẹgba ndị ahụn ye ntịn ẹbụọ rị ibe elu ẹkpa elu-obi hụ,

¹⁷ a gan wẹ eriri goru ndị ahụn ye ẹgba ndị ahụn rị ntịn ẹbụọ rị ibe elu Ẹkpa Elu-obi hụ;

¹⁸ we isi ẹbụbụọ họdụ imẹ eriri goru ndị ahụn ganyesọnmẹ akpa goru ẹbụọ hụ rị isi-uvun, gi ẹrịra kọnmẹ wẹ ihun ẹfọdụ hụn.

¹⁹ Wẹ nọ gi goru mẹmẹ ẹgba ẹbụọ, gba wẹ ye isini lẹ isini ibe azụụn Ẹkpa elu-obi, ẹhụ ntịn a ẹbụbụọ rị ibe alị, hụn wụ nị ẹgba ndị ahụn hụ e mẹtụ ẹfọdụ.

²⁰ Wẹ nọzị gi goru kpụ ẹgba ẹbụọ, kpa wẹ yesọnmẹ azụụnnị lẹ azụụnnị ihun ẹwuru-ẹfọdụ hụ, kanị o ruchanrịnnị nfifie-ukun ẹfọdụ.

²¹ Wẹ nọ gi eriri bru kẹn ẹgba ẹbụọ hụn rị ibe azụụn ẹkpa elu-obi ye ndị rị azụụnnị lẹ azụụnnị ihun ẹwuru-ẹfọdụ, elu ebe nfifie ẹ rị, makẹ ẹkpa elu-obi gha e feke; wẹ mẹmẹhụ kẹ Osolobuẹ dọn gwa Mozizi.

Ẹwuru Tueghafe Mkpụkụ

²² Wẹ nọ gi ẹkwa bru sụọ kpachanrịn Ẹwuru hụ tueghafe mkpụkụ hụn ya lẹ ẹfọdụ wị. Onyẹ a kpa ẹkwa kpa a.

²³ Oghe w'a gha e woye ẹ isi rị ahanmahan a, e gbihunmẹ wẹ oghe hụ wụ olu ẹ, makẹ ọ gha a dọka.

²⁴ Wẹ nọ gi oruru bru lẹ nke pọpụ lẹ hụn e nwun ufie-ufie kpa ogbe pomegraneti kụnhunmẹchanrịn ntịn ẹwuru ahụn,

²⁵ gi ezigbo goru wẹ buchelẹni ihiẹn ọzọ kpụ mgbịrịgban mẹsọnmẹ ẹkẹrẹ-ẹkẹrẹ, kụnhunmẹzi wẹ yesọnmẹ ntịn ẹwuru hụ, ẹgbata ogbe pomegraneti ndị hụ.

²⁶ Mgbịrịgban-goru ndị hụ lẹ ogbe pomegraneti dugwasọnmẹ ibe wẹ kụnhunmẹ ntịn ẹwuru ọrụn onyẹ-isi nchụn-ẹjan. Wẹ mẹmẹ ẹ hụ kẹ Osolobuẹ dọn gwa Mozizi.

Ẹwuru-tuniki Tueru Alị

²⁷ Wẹ nọ gi ẹkwa wẹ gi linẹni riẹnni kpa mẹmẹni Ẹrọnụ lẹ ụmụ a ẹwuru ọrụn nchụn-ẹjan tueru alị. Onyẹ ma kpa ẹkwa kpa a,

²⁸ gi ẹkwa linẹni riẹnni mẹmẹni wẹ okpu, gi linẹni mẹmẹni wẹ okpu-isi, gi ẹkwa linẹni riẹnni mẹmẹni wẹ apa tueru ọgbọdọgbọ,

²⁹ gizi oruru linẹni riẹnni lẹ oruru-mmaka bru lẹ nke pọpụ lẹ hụn e nwun ufie-ufie mẹmẹ nfifie ẹwuruni tueru alị. Onyẹ a kpa ihiẹn e ye ẹkwa kpa a. Wẹ mẹmẹhụ kẹ Osolobuẹ dọn gwa Mozizi.

³⁰ Wẹ nọ gi ezigbo goru wẹ buchelẹni ihiẹn ọzọ mẹmẹ ibe-goru hụ, okpu-eze hụ rị nsọ, tụye ihiẹn ihun ẹ kẹ w'e mẹmẹ ihiẹn wẹ gi e biye ẹka; ihiẹn wẹ tụye wụ: “Hụn Wẹ Gi Kwanị Osolobuẹ”.

³¹ Wẹ nọ kẹnmẹye ẹ eriri e nwun bru gi kẹn ẹ nyanmanị okpu hụ wẹ mẹmẹni Ẹrọnụ, nọkẹ kẹ Osolobuẹ dọn gwa Mozizi.

Mozizi E Jẹn D'e Lele Ọdụ Ahụn

³² Ẹrịra kẹ wẹ dọn rụnchanrịn ọrụn ile wẹ gi mẹmẹ Ọdụ-ozuzu ahụn. Ndị Izrẹlụ mẹchanrịn ihiẹn kẹ Osolobuẹ dọn gwa Mozizi.

³³ Wẹ nọ buhẹni Mozizi ihiẹn Ọdụ-nsọ — kẹ Ọdụ rịn'a kẹ ihiẹn ẹ ile — nkọn ẹ ile lẹ ibe-osisi ẹ ile lẹ akp'osisi ile wẹ gi e fiẹngipụ wẹ lẹ adansụn ile lẹ ụkụ adansụn ndị hụ;

³⁴ okpukpu ẹ wẹ gi akpụkpọ ebulu wẹ ye ihiẹn e nwun ufie-ufie kwa lẹ okpukpu ẹ nke ẹbụọ wẹ gi akpụkpọ efin-ohimin kwa lẹ Ẹkwa-mgbọnkin rịn'a;

³⁵ lẹ Ẹkpẹti hụ Ashịa-ẹri lẹ akp'osisi ndị wẹ gi e bu ẹ lẹ okun ẹ hụ wẹ nọ a gbarị isi;

³⁶ lẹ teburu lẹ ihiẹn ile sọnn'ẹ lẹ brẹdi ahụn wẹ butọnị Osolobuẹ elu ẹ;

³⁷ lẹ obu-ukpẹ hụ wẹ gi ezigbo goru wẹ buchelẹni ihiẹn ọzọ mẹmẹ lẹ ukpẹ ndị rịn'a wẹ dọnmẹ ogele lẹ ihiẹn ile sọnn'ẹ lẹ ofigbọn-olivu wẹ gi a mụ ukpẹ;

³⁸ lẹ ukpo-nsẹnsị hụ wẹ gi goru mẹmẹ, udẹn nsọ, nsẹnsi ahụn e shin ọhụnma lẹ ẹkwa wẹ gi tankin ọnụmụzọ Ọdụ-nsọ;

³⁹ ukpo hụ wẹ gi igwe-bronzu mẹmẹ wẹ n'a dụn ẹjan ọkụn lẹ ngịgan a wẹ gizi igwe-bronzu mẹmẹ lẹ akp'osisi wẹ gi e bu ẹ lẹ ihiẹn ile ya lẹ ukpo hụ wị; lẹ afẹrẹ-mirin uku hụ lẹ ụkụ a;

⁴⁰ ẹkwa ndị wẹ gi tankin ezi Ọdụ-nsọ lẹ adansụn ndị wẹ gi tan wẹ lẹ ụkụ wẹ lẹ ẹkwa rị ọnụ-mgbọn ihun-ezi Ọdụ-nsọ, eriri ẹ lẹ mkpụkpọ wẹ gi a kpọdọn ẹ alị; lẹ ihiẹn ile jẹnkọ d'a rị Ọdụ-nsọ, Ọdụ-ozuzu.

⁴¹ Lẹzi ẹwuru ndị hụ wẹ kpa w'e yi a rụn ọrụn imẹ Ọdụ-nsọ hụ, kẹ ẹwuru-nsọ ndị hụ Ẹrọnụ onyẹ nchụn-ẹjan jẹnkọ d'e yi kẹ ndị ụmụ a jẹnkọ d'e yi — wẹ gha a rụn ọrụn ndị nchụn-ẹjan.

⁴² Ndị Izrẹlụ rụnchanrịn ihiẹn ndịnị ile kẹ Osolobuẹ dọn gwa Mozizi.

⁴³ Mozizi e lehunmẹchanrịn ihiẹn wẹ rụn, ọ tụ a ẹnya, makẹni wẹ rụn a hụ kẹ Osolobuẹ dọn ku! Ya kẹ Mozizi nọ gọzi wẹ.