Biblia Todo Logo
Bìoball air-loidhne

- Sanasan -

Ọpụpụ 38 - Ika


Isi Nke Mmẹsatọ Kwasị Ọgụn Ukpo Wẹ N'a Dụn Ẹjan Ọkụn

1 Bẹzalẹlụ wẹ nọ gi osisi akashịa rụn ukpo nchụn-ẹjan: usue ẹ wụ ọbụkụ ẹsa lẹ nkirishi, ụshịa a ọbụkụ ẹsa lẹ nkirishi — k'o suehan k'ọ shịahan; ojijẹn-elu ẹ wụ ụbụkụ ẹnọ lẹ nkirishi.

2 Wẹ nọ tụ mpịn ohu-ohu yesọnmẹ ẹ ntịn ẹnịnọ — kẹ mpịn kẹ ukpo nchụn-ẹjan wụ ibe osisi ohu; wẹ nọ gi igwe-bronzu nyankwama ukpo nchụn-ẹjan ahụn.

3 Wẹ nọ gi igwe-bronzu mẹmẹchanrịn ihiẹn ile sọnn'ẹ, kẹ ite wẹ gi e kpọnpụ ntụn lẹ ọsẹkẹ sọnn'ẹ kẹ afẹrẹ w'e gi e fekpu ihiẹn kẹ ndụndụn wẹ gi a weri anụ kẹ ugbẹgbẹ ndị wẹ gi e ghe ihiẹn.

4 Wẹ nọ gi igwe-ufie wụ bronzu mẹmẹn'ẹ ngịgan, bu ẹ che okpuru ẹkpụ hụn ghahunmẹ ahanmahan ukpo ahụn.

5 Wẹ nọ gi bronzu mẹmẹ ẹgba ye ntịn ẹnịnọ ngịgan ahụn wẹ gi igwe-bronzu mẹmẹ, nị w'e kwọndọn akp'osisi ndị w'e gi bu ẹ.

6 Wẹ nọ gi osisi akashịa pịn akp'osisi ẹbụọ, gi bronzu nyanchanrịn wẹ.

7 Wẹ nọ fa akp'osisi ndị hụ ye ẹgba ndị hụ, akp'osisi ndị ahụn nọ rị ukpo hụ azụụnnị lẹ azụụnnị, hụn w'e gi e bu wẹ. Ihiẹn ibe-osisi gba okpokoro kẹ wẹ rụn a.


Afẹrẹ Wẹ Gi A Chanchan Ụkụ Lẹ Ẹka

8 Wẹ nọ gi ugbẹgbẹ wẹ gi igwe-bronzu mẹmẹ hụn ikpoho e jẹn ozi ọnụ-ụgba Ọdụ-ozuzu tụha mẹmẹ afẹrẹ bronzu wẹ gi a chanchan ụkụ lẹ ẹka, ya lẹ ụkụ a hụn wụzị igwe-bronzu.


Ezi Ọdụ-nsọ

9 Wẹ nọ nwan tan ibe-ẹkwa linẹni ndị ahụn gi mẹmẹpụha ezi Ọdụ-nsọ. Azụụn rị ẹbamịn ndịdan-mirin wụ yadị iri kwasị ọgụnnaị;

10 adansụn igwe-bronzu ọgụn lẹ ụkụ wẹ ọgụn wụzị igwe-bronzu kẹ wẹ gi kọnmẹ ẹkwa ndị hụ; nkọn wẹ lẹ ẹka wẹ gi e kwọndọn ibe wẹ wụ siliva.

11 Azụụn rị ẹbamịn-ugu rịn'a wụzị yadị ẹkwa iri kwasị ọgụnnaị, ya lẹ adansụn ọgụn lẹ ụkụ-adansụn ọgụn igwe-bronzu lẹ nkọn siliva lẹ ẹka siliva wẹ gi e kwọndọn ibe wẹ.

12 Azụụn rị ẹbamịn ọdịdan-ẹnyanwụn wụ ọbụkụ mmisẹn kwasị ọgụn-ẹtọ wẹ gizi ẹkwa tankin — ya lẹ osisi iri lẹ obu-ụkụ iri wẹ k'e zusọnmẹ osisi ndị ahụn ye lẹ nkọn siliva rịsọnmẹ osisi ndị hụ lẹ ẹka siliva wẹ gi e kwọndọn ibe wẹ.

13 Azụụn shikọ ọwụwa-ẹnyanwụn wụzị ọbụkụ mmisẹn kwasị ọgụn-ẹtọ; etintinnaị azụụnnị kẹ ọnụmụzọ rị:

14 yadị ẹkwa ẹsa lẹ nkirishi kẹ wẹ gi tankin ụsụọ a ohu, akp'osisi ẹtọ hụzị ụsụọnị hụn wẹ gi tan wẹ lẹ obu-ụkụ ẹtọ wẹ k'e zu osisi ndị ahụn e yesọnmẹ;

15 yadị ẹkwa ẹsa lẹ nkirishi kẹ wẹ gizi tankin ụsụọ a hụn ẹbọ cheni osisi ẹtọ rịzị ụsụọnị wẹ gi tan wẹ lẹ obu-ụkụ ẹtọ.

16 Ẹkwa linẹni riẹnni kẹ wẹ gi kwa ẹkwa hụ ile wẹ gi tankin ezi Ọdụ ahụn.

17 Igwe-bronzu kẹ wẹ gi kpụ obu-ụkụ ndị hụ w'e zuyesọnmẹ osisi ndị hụ, gi siliva kpụ nkọn lẹ ẹka wẹ gi e kwọndọn ibe wẹ; wẹ gizi siliva nyankwama osisi ndị hụ ibe elu. Ya wụ nị ẹgba siliva rịsọnmẹ osisi ndị hụ wẹ gi tan ezi Ọdụ-nsọ.

18 Ẹkwa-linẹni riẹnni wẹ kpayesọnmẹ oruru bru lẹ oruru pọpụ lẹ oruru e nwun ufie-ufie kẹ wẹ gi tankin ebe w'a gha a ban Ọdụ hụ — onyẹ a kpa ihiẹn kpa a. Ụshịa a wụ yadị iri, ojijẹn-elu ẹ wụ yadị ẹbụọ lẹ mkpikpi nọkẹ ẹkwa ndị wẹ gi tanhunmẹ ezi Ọdụ hụ.

19 Osisi ẹnọ kẹ wẹ gi tan a; obu-ụkụ ẹnọ hụzị a hụn wẹ gi igwe-bronzu kpụ w'e zu wẹ e ye; wẹ gi siliva kpụ nkọn wẹ lẹ ẹka wẹ gi e kwọndọn ibe wẹ, gizi siliva nyankwamachanrịn wẹ ile ibe elu.

20 Mkpụkpọ ile wẹ gi kpọdọn kẹ Ọdụ-nsọ lẹ enwẹn ẹ kẹ mgbọn ẹ ye alị wụchanrịn igwe-bronzu.


Ihiẹn Ile Wẹ Gi Rụn Ọdụ-nsọ

21 Lee ihiẹn ban Ọdụ hụ, Ọdụ Ashịa-ẹri hụ — ndị Livaị rị okpuru Itama nwa Ẹrọnụ onyẹ nchụn-ẹjan gwa wẹ detu e makẹni Mozizi sị wẹ mẹ ẹ,

22 ogẹn Bẹzalẹlụ nwa Uri nwa Họ, onyẹ ebọn Juda gi mẹmẹchanrịngụ ihiẹn ile Osolobuẹ gwa Mozizi,

23 ya lẹ Oholiabụ nwa Ahisamakị, onyẹ ebọn Danị hụn wụ omẹ-nka ma chọ ihiẹn mma, omẹ-nka mazị gi oruru bru lẹ nke pọpụ lẹ nke ufie a kpa ihiẹn e ye ẹkwa linẹni riẹnni:

24 Goru ile wẹ gi rụn ihiẹn hụ ile wẹ rụn gbashịarịnị Ọdụ-nsọ, goru ile wẹ finfinghọsị Osolobuẹ weye ẹ nyịnhan kẹ ẹkpa simẹnti ọgụn (1,000kg); ihiẹn wẹ gi a ma a Ọdụ-nsọ kẹ wẹ gi ma a.

25 Nke siliva, siliva wẹ tụ ogẹn wẹ gi gụn ndị Izrẹlụ wụ ẹkpa uku ọgụn-isẹn lẹ akpụrụ mmisẹn kwasị ọgụn-mmẹtọ kwasị nnụ-uku ohu lẹ mkpikpi; shẹkẹlụ Ọdụ-nsọ kẹ wẹ gi ma a.

26 Akpụrụ egho bẹka ohu-ohu kẹ onyẹ-onyẹ hansọnmẹ. Bẹka ohu wụ nkirishi shẹkẹlụ — omẹni wẹ gi shẹkẹlụ Ọdụ-nsọ ma a; ịya kẹ onyẹ ọwụlẹ wẹ gụn, onyẹ ọwụlẹ ru ahụa ọgụn mọbụ karị, tụ. Ya wụnị ikẹnnyẹ han ihiẹnni rị iri-kwasị-ọgụnnaị lẹ nnụ-uku ẹtọ-lẹ-mkpikpi kwasị nnụ-uku ọgụn-iri-kwasị-nnụ (603,550).

27 Ẹkpa siliva ọgụn-isẹn rịn'a kẹ wẹ gi kpụ ụkụ ibe-osisi ndị rị Ọdụ-nsọ lẹ ụkụ adansụn ndị wẹ gi tan Ẹkwa-mgbọnkin rị imẹ ẹ: ụkụ ọgụn isẹn ri ẹkpa ọgụn isẹn — ohu-ohu risọnmẹ ẹkpa ohu-ohu;

28 akpụrụ shẹkẹlụ mmisẹn kwasị ọgụn-mmẹtọ kwasị nnụ-uku ohu lẹ mkpikpi (1,775) ahụn họdụnị kẹ wẹ gi kpụ nkọn yesọnmẹ adansụn ndị hụ, nyankwama wẹ ibe elu, mẹmẹzi ẹka wẹ.

29 Igwe-bronzu wẹ finfinghọsị Osolobuẹ weye ẹ makẹ ịrụn Ọdụ-nsọ wụ ẹkpa iri kwasị ọgụn-ẹtọ lẹ shẹkẹlụ nnụ-isin.

30 Ịya kẹ wẹ gi kpụ ụkụ ibe-osisi ndị wẹ gi tan ẹkwa rị ọnụmụzọ Ọdụ-ozuzu lẹ enwẹn ẹ — ya lẹ ukpo nchụn-ẹjan igwe-bronzu hụ lẹ ngịgan a wụzị igwe-bronzu lẹ ihiẹn ile sọn ukpo hụ,

31 lẹzi ụkụ adansụn ile wẹ gi tankin ezi Ọdụ hụ lẹ ọnụmụzọ a lẹ mkpụkpọ ile wẹ gi kpọdọn kẹ Ọdụ-nsọ lẹ enwẹn ẹ kẹ mgbọn ẹ ye alị.

© 2018, Mission for Language Translation/Ika Bible Translation Committee.

© 2018, Wycliffe Bible Translators, Inc.

Wycliffe Bible Translators, Inc.
Lean sinn:



Sanasan