Ọpụpụ 36 - Ika

Isi Nke Mmisin Kwasị Ọgụn

¹ “Ya Mozizi nọ sị: Bẹzalẹlụ lẹ Oholiabụ lẹ onyẹ ọwụlẹ marịn ọrụn, onyẹ ọwụlẹ Osolobuẹ ye uche lẹ amamihiẹn w'e gi marịn rụn ọrụn ọwụlẹ w'e gi mẹmẹ Ọdụ-nsọ ahụn sikọ nwan d'a rụnma ọrụn hụ Osolobuẹ ku.”

² Ya Mozizi nọ nwan kpọ Bẹzalẹlụ lẹ Oholiabụ lẹ ndị ile e mẹ nka, ndị Osolobuẹ ye uche lẹ ndị ile wepụha obi wẹ nị wẹ sikọ d'a rụn ọrụn ahụn.

³ Wẹ nọ narịn Mozizi oyiye ile ndị Izrẹlụ wẹhẹ nị wẹ gi rụn Ọdụ-nsọ. Ụtụntụn ọwụlẹ ndị Izrẹlụ hụzịkwọ e wẹhẹ oyiye ghapụha wẹ obi d'e yecheni,

⁴ nke wụnị ndị omẹ-nka ile rị a rụn ọrụn Ọdụ-nsọ hụ nọ pụha, onwọnni onyẹ sị ọ hụnnị ihiẹn-ọrụn,

⁵ wẹ nọ jẹn d'e kunrun Mozizi, sị a, “Ihiẹn wẹ rị e wẹhẹ e higụọ, ọ karịgụọdẹ hụn w'e gi rụn ihiẹn Osolobuẹ ku.”

⁶ Mozizi nọ zi wẹ d'a hị a ghagbarị ebẹhụ ndị Izrẹlụ ziẹntọ, sị wẹ, “Kẹ ikpoho kẹ ikẹnnyẹ w'e mẹmẹzilẹ ihiẹn ọwụlẹ wẹhẹni wẹ gi tụn Ọdụ-nsọ.” Ya kẹ wẹ gi gbọndọn wẹ, ewẹhẹzini wẹ,

⁷ makẹni hụn wẹ wẹhẹgụ e zugụọ hụn w'e gi rụnchanrịn ọrụn ahụn, karịd'a.

A Rụn Wẹ Ọdụ-Ofufe W'a Kpụkpọrị

⁸ Ndị ile e mẹ nka imẹ ndị ọrụn hụ nọ gi ibe-ẹkwa iri kwa ẹkwa w'e gi tankin Ọdụ-nsọ ahụn: oruru-linẹni riẹnni kẹ wẹ gi kpa ibe-ẹkwa ndịnị, lẹ oruru-mmaka e nwun bru-bru lẹ hụn e nwun pọpụ-pọpụ lẹ hụn e nwun ufie-ufie; wẹ gizi ẹka omẹ-nka kpa ndị Chẹrobu ye ibe-ẹkwa ndịnị.

⁹ Ibe-ẹkwa hụ ile wụchanrịn ahanmahan: usue wẹ wụsọnmẹ yadị mmẹnọ-mmẹnọ, ụshịa wẹ yadị ẹbụọ-ẹbụọ.

¹⁰ Wẹ nọ kwagbama ibe-ẹkwa isẹn, kwagbamazị isẹn hụn ẹbọ ẹrịra.

¹¹ Wẹ nọ gi ẹkwa wẹ gi oruru bru kpa eriri mẹ ohi-ohi yesọnmẹ mkpẹnrẹn ẹkwa rị isi imẹ isẹn ibuzọ, mẹmẹzikwọ hụn rị isi nọkunmẹn'ẹ imẹ isẹn hụn ẹbọ ẹrịra.

¹² Eriri iri kwasị ọgụnnaị kẹ wẹ buche mkpẹnrẹn ibe-ẹkwa rị isi isẹn ibuzọ, buzi iri kwasị ọgụnnaị che mkpẹnrẹn hụn rị isi isẹn hụn ẹbọ; eriri ndị rị azụụnnị lẹ ndị rị azụụnnị chetarịsọnmẹ ibe wẹ ihun.

¹³ Ya wẹ nọ gi goru mẹmẹ akpa iri kwasị ọgụnnaị, gi kpadọnsọnmẹ ẹkwa Ọdụ-nsọ ahụn ile, o họnrin ọdụ ohu.

¹⁴ Wẹ nọ gi ẹkwa wẹ gi ẹṅẹnrẹn ewu kpa kwa okpukpu ibuzọ k'a rị elu Ọdụ-nsọ; ibe mmanaị kẹ wẹ kwa.

¹⁵ Usue wẹ ile wụsọnmẹ yadị mmisẹn-mmisẹn, ụshịa wẹ yadị ẹbụọ-ẹbụọ: wẹ mmanaị ahụn wụchanrịn ahanmahan.

¹⁶ Wẹ nọ kwagbama isẹn imẹ wẹ gi họnrin ohu, kwagbamazị isin họdụnị gi họnrin ohu.

¹⁷ Wẹ nọ mẹmẹ eriri iri kwasị ọgụnnaị mẹ ohi-ohi yesọnmẹ ntịn ibe-ẹkwa ikpanzụụn imẹ isẹn ibuzọ, iri kwasị ọgụn ye ntịn hụn kpazụụn imẹ isẹn hụn ẹbọ.

¹⁸ Wẹ nọ nwan gi igwe-bronzu mẹmẹ akpa iri kwasị ọgụnnaị gi kpadọnsọnmẹ okpukpu ibuzọnị n'ọ wụrụ ohu kpumẹ Ọdụ hụ.

¹⁹ Wẹ nọzị gi ẹṅẹnrẹn ebulu wẹ gi ihiẹn ufie yegbu kwazị okpukpu mẹ ẹ ẹbụọ, gi akpụkpọ efin-ohimin mẹmẹ okpukpu mẹ wẹ ẹtọ.

²⁰ Wẹ nọ gi osisi akashịa mẹmẹ ibe-osisi wẹ sikọ d'e gi mẹmẹ ẹhụ Ọdụ-nsọ hụ.

²¹ Usue ibe-osisi ndị hụ wụsọnmẹ ụbụkụ mmisẹn, ụshịa wẹ wụsọnmẹ ọbụkụ ẹbụọ lẹ hụn rulẹni mkpikpi;

²² ibe ọwụlẹ nwọnsọnmẹ ọnụnụ ẹbụọ nọgbamanị w'a fịọye ụkụ wẹ. Ẹrịra kẹ wẹ mẹmẹsọnmẹ ibe-osisi ile jẹnkọ d'a rị Ọdụ-nsọ.

²³ Ibe-osisi ọgụn kẹ wẹ gi mẹmẹ ẹhụ Ọdụ-nsọ ẹbamịn ndịdan-mirin,

²⁴ gi siliva mẹmẹ ụkụ ọgụnnaị hụn k'a rị okpuru wẹ, ẹbụọ-ẹbụọ okpuru ibe-osisi ọwụlẹ: ụkụ ohu okpuru ọnụnụ ohu, ụkụ ohu okpuru ọnụnụ ohu.

²⁵ Azụụn a ahụn hụn ẹbọ, ẹbamịn-ugu: ibe osisi ọgụn kẹ wẹ mẹmẹzikwọnị azụụnnị,

²⁶ lẹ ụkụ siliva ọgụnnaị, ẹbụọ-ẹbụọ okpuru ibe-osisi ohu.

²⁷ Ibe-osisi isin kẹ wẹ mẹmẹni isi-njẹndemẹ Ọdụ ahụn, ẹbamịn ọdịdan ẹnyanwụn,

²⁸ mẹmẹzi ibe ẹbụọ jẹnkọ d'a rị mgbugi ẹ ẹbụọ azụụn ahụn rị ẹbamịn ọdịdan ẹnyanwụn.

²⁹ Wẹ nọ kịgbamachanrịn ibe-osisi ndị k'a rị mgbugi ẹbụọ ahụn gha ukun-alị d'e ru elu ẹ, gi ẹgba ohu gangbama wẹ ibe elu; ẹrịra kẹ wẹ mẹmẹ mgbugi ẹbụọ ndịnị.

³⁰ Ya wụ nị ibe-osisi ẹsatọ lẹ ụkụ siliva mmisin kẹ wẹ mẹmẹ, kẹni ẹbụọ-ẹbụọ rịsọnmẹ okpuru ibe-osisi ohu-ohu.

³¹ Wẹ nọ gizi osisi akashịa mẹmẹsọnmẹ akp'osisi ndị wẹ gi e fiẹngipụ ibe-osisi ndị ahụn: isẹn w'e gi kwọndọn ibe-osisi rị azụụn ohu Ọdụ ahụn,

³² isẹn e kwọndọn ndị rị azụụn hụn ẹbọ; isẹn e kwọndọn ibe-osisi rị isi-njẹndemẹ Ọdụ-nsọ, ẹbamịn ọdịdan ẹnyanwụn.

³³ Wẹ mẹmẹ akp'osisi wẹ k'e gi fiegipụ ibe-osisi ndị ahụn etintinnaị, gha isi ẹ ohu sueru isi ẹ hụn ẹbọ.

³⁴ Ya wẹ nọ gi goru nyankwama ibe-osisi ndị hụ, gizi goru mẹmẹ ẹgba w'a ghaye akp'osisi wẹ gi e fiẹngipụ wẹ; wẹ nọ gi goru nyankwama akp'osisi ndị hụ wẹ gi e fiẹngipụ wẹ.

³⁵ Wẹ nọ kwa Ẹkwa Mgbọnbepụ hụ rị imẹ ỌDỤ-NSỌ; ẹkwa linẹni riẹnni lẹ oruru bru lẹ nke pọpụ lẹ nke ufie kẹ wẹ gisọnmẹ kwa a, ọkaa ma kpa ihiẹn a kpa ndị Chẹrobu ye ẹ.

³⁶ Wẹ nọ gi osisi akashịa pịn adansụn osisi ẹnọ w'e gi tan Ẹkwa Mgbọnbepụ hụ, gi goru nyanchanrịn wẹ ẹnịnọ; gizi goru mẹmẹni wẹ nkọn; gi siliva mẹmẹni wẹ ụkụ ẹnọ.

³⁷ A kwazị wẹ ẹkwa-ọnụmụzọ wẹ k'e gi gbọn ọnụmụzọ Ọdụ-nsọ. Ẹkwa linẹni riẹnni lẹ oruru bru lẹ nke pọpụ lẹ hụn e nwun ufie-ufie wẹ gi kwa a. Onyẹ a kpa ihiẹn e ye ẹkwa mẹmẹ ẹ.

³⁸ Wẹ nọzị pịn osisi akashịa isẹn nwọnsọnmẹ nkọn hụn w'e gi tan ẹkwa-ọnụmụzọnị; wẹ nọ gi goru nyankwama elu osisi ndị hụ lẹ nkọn wẹ lẹ ẹka wẹ gi e kwọndọn ibe wẹ, gi igwe-bronzu mẹmẹni wẹ isẹn ụkụ isẹn.