Ọpụpụ 35 - Ika

Isi Nke Mmisẹn Kwasị Ọgụn Iwu Izu-Ikẹn

¹ Mozizi nọ kpọkikomẹ ndị Izrẹlụ ile, sị wẹ, “Lee ni ihiẹn ndị Osolobuẹ sị ụnụ mẹ:

² Akpọhịn isin kẹ ụnụ e gi a rụn ọrụn; kanị, nke akpọhịn ẹsa k'a wụrụnị ụnụ ụhụọhịn-nsọ, Ụhụọkịn Ezumikẹn wẹ gi e zu ikẹn gi ye Osolobuẹ ọghọ. Onyẹ ọwụlẹ rụn ọrụn ụhụọhịn hụ, wẹ k'e gbu ẹ.

³ Afiyekwọlẹ ni ọkụn ebe ọwụlẹ ụnụ bi Ụhụọhịn Ezumikẹn.”

Ihiẹn Wẹ K'e Gi Tụn Ọdụ-nsọ

⁴ Mozizi nọ sị ndị Izrẹlụ ile, “Lee ni ihiẹn Osolobuẹ ku:

⁵ Tụ nị nị Osolobuẹ ụtụ. Onyẹ ọwụlẹ obi ẹ ye n'ọ tụ, ya wẹhẹ: ihiẹn ndị wẹ sikọ d'a tụ wụ goru lẹ siliva lẹ igwe-ufie wụ bronzu;

⁶ lẹ oruru bru, oruru pọpụ lẹ oruru ododo lẹ ẹkwa-linẹni riẹnni; lẹ ẹṅẹnrẹn ewu;

⁷ lẹ akpụkpọ ebulu wẹ gi ihiẹn ododo yegbu lẹ akpụkpọ efin-ohimin; lẹ osisi akashịa;

⁸ lẹ ofugbọn-olivu w'e gi a mụ ukpẹ lẹ ihiẹn-akụnkụn e shin ọhụnma w'e gi mẹmẹ udẹn-nsọ lẹ hụn w'e gi mẹmẹ nsẹnsi e shin ọhụnma; lẹ

⁹ ọmụma ọnik'si lẹ ọmụma ndị ọzọ pụ-ichẹn hụn wẹ sikọ d'a kụnmaye ẹwuru-ẹfọdụ, kụnmayezi Ẹkpa elu-obi.

¹⁰ “Ndị omẹ-nka ile rị imẹ igunrun ọnụ sikọ d'a bịa d'e rụn ihiẹn ile Osolobuẹ gwa ụnụ:

¹¹ ya wụ, Ọdụ-nsọ hụ: Ọdụ rịn'a lẹ okpukpu ẹ lẹ akpa lẹ nkọn sọnn'ẹ; lẹ ibe-osisi ile rịn'a lẹ akp'osisi ile wẹ k'e gi fiẹnbepụ ibe-osisi ndị hụ; lẹ adansụn ile rịn'a lẹ ụkụ wẹ;

¹² lẹ Ẹkpẹti-nsọ lẹ akp'osisi wẹ gi e bu ẹ lẹ okun ẹ w'a nọ a gbarị isi lẹ Ẹkwa wẹ gi tankin ẹ;

¹³ lẹ teburu rịn'a lẹ ẹgbe wẹ k'e gi bu teburu hụ lẹ ihiẹn ile sọn teburu lẹzi brẹdi wẹ sikọ d'a gha e butọnị Osolobuẹ;

¹⁴ lẹ obu-ukpẹ lẹ ihiẹn sọnn'ẹ lẹzi ukpẹ ndị o jẹnkọ d'e bu lẹ ofigbọn-olivu wẹ gi a mụ a;

¹⁵ lẹ ukpo-nsẹnsị lẹ ẹgbe wẹ k'e gi bu ẹ lẹ udẹn-nsọ lẹ nsẹnsi hụn e shin ọhụnma; lẹ Ẹkwa-ọnụmụzọ wẹ k'e gi gbọn ọnụmụzọ Ọdụ-nsọ;

¹⁶ ukpo wẹ n'a dụn ẹjan ọkụn lẹ ngịgan a wẹ gi igwe-ufie wụ bronzu mẹmẹ lẹ ẹgbe w'e gi e bu ukpo hụ lẹ arịa ile sọnn'ẹ; lẹ afẹrẹ-mirin igwe-bronzu lẹ ụkụ a;

¹⁷ ẹkwa ile wẹ k'e gi tankin ezi Ọdụ-nsọ, adansụn ndị ahụn wẹ k'a tanye wẹ lẹ ụkụ wẹ lẹ ẹkwa wẹ gi tankin ọnụ-ụgba Ọdụ-nsọ;

¹⁸ kẹ mkpụkpọ ile wẹ k'e gi kpọdọn Ọdụ-nsọ lẹ enwẹn ẹ ye alị lẹ ndị wẹ k'e gi kpọdọn ẹkwa wẹ gi tankin ezi ẹ lẹzi eriri wẹ;

¹⁹ lẹ ẹwuru ndị ahụn wẹ k'a kpa w'e yi a rụn ọrụn imẹ Ọdụ-nsọ lẹ ezi ẹ: kẹ ẹwuru-nsọ Ẹrọnụ onyẹ nchụn-ẹjan kẹ ẹwuru ndị ụmụ a ikẹnnyẹ k'e yi a rụn ọrụn ndị nchụn-ẹjan.”

E Wẹhẹ Wẹ Ihiẹn W'e Gi Tụn Ọdụ-nsọ

²⁰ Ya ndị Izrẹlụ ile nọ gha ihun Mozizi pụ.

²¹ Ndị ile ọ rị nị wẹ ye lẹ ndị obi wẹ gba nị wẹ ye nọ wẹhẹni Osolobuẹ oyiye wẹ k'e gi rụn Ọdụ-ozuzu lẹ ihiẹn ile wẹ gi e fe ofufe imẹ ẹ lẹ ihiẹn wẹ k'e gi kpa ẹwuru nsọ ndị hụ wẹ.

²² Kẹ ikẹnnyẹ kẹ ikpoho hụ a bịa, ndị ile chọ nị wẹ ye, e wẹhẹ ihiẹn w'a kpọye ẹkwa lẹ ihiẹn-ntịn lẹ ọna mkpịnsịn-ẹka lẹ ihiẹn-mma ichẹn-ichẹn, ihiẹn-goru ile rị ichẹn-ichẹn. Wẹ ile nọ wẹhẹ goru wẹ d'e finfin ẹ ihun Osolobuẹ, ye ẹ ya, n'ọ wụrụ oyiye w'e finfin.

²³ Onyẹ ọwụlẹ nwọn oruru bru mọbụ pọpụ mọbụ ododo mọbụ ẹkwa-linẹni riẹnni mọbụ ẹṅẹnrẹn ewu mọbụ akpụkpọ ebulu wẹ gi ihiẹn e nwun ufie-ufie yegbu mọbụ akpụkpọ efin-ohimin nọ wẹhẹ wẹ.

²⁴ Ndị oyiye wẹ wụ siliva mọbụ igwe-bronzu nọ wẹhẹ ẹ d'e ye Osolobuẹ oyiye; onyẹ ọwụlẹ nwọn osisi akashịa w'e gi rụn ihiẹn ọwụlẹ imẹ ihiẹn ndị ahụn wẹ jẹnkọ d'a rụn nọ wẹhẹ ẹ.

²⁵ Okpoho ọwụlẹ ma tụ oruru nọ gi ẹka tụ oruru, wẹhẹ hụn ọ tụ: oruru bru mọbụ nke pọpụ mọbụ nke ufie mọbụ ẹkwa linẹni riẹnni ọ kpa.

²⁶ Ikpoho ile chọnị, ndị ma gi ẹṅẹnrẹn ewu tụ oruru nọ gi ẹṅẹnrẹn ewu hụ ndị hụ wẹhẹ tụ oruru.

²⁷ Ndị isi e wẹhẹsọnmẹ ọmụma ọnik'si lẹ ọmụma ndị ọzọ pụ-ichẹn hụn wẹ k'a kụnmasọnmẹ Ẹwuru-ẹfọdụ lẹ Ẹkpa elu-obi.

²⁸ E wẹhẹzi wẹ ihiẹn ndị e shin ọhụnma lẹ ofigbọn-olivu wẹ k'e gi mụ ukpẹ lẹ hụn wẹ k'e gi mẹmẹ udẹn-nsọ lẹ hụn w'e gi mẹmẹ nsẹnsi hụ e kun fuẹin.

²⁹ Ndị Izrẹlụ ile chọnị, kẹ ikẹnnyẹ kẹ ikpoho, nọ wẹhẹsọnmẹni Osolobuẹ oyiye ghapụha wẹ obi, hụn w'e gi rụn ihiẹn ile Osolobuẹ sị Mozizi gwa wẹ rụn.

Bẹzalẹlụ Lẹ Oholiabụ

³⁰ Ya Mozizi nọ sị ndị Izrẹlụ, “Lee n'ẹ, Osolobuẹ a họrịgụọ Bẹzalẹlụ nwa Uri nwa Họ, onyẹ ebọn Juda;

³¹ o gigụọ Mmọn Osolobuẹ lẹ oyiye lẹ uche lẹ amamihiẹn ile wẹ gi a rụn ọrụn-nka ọwụlẹ mẹjun ẹ —

³² hụn o k'e gi saẹka gi goru, siliva lẹ igwe-bronzu kpụ ihiẹn rị ichẹn-ichẹn wẹ gi uche a kpụ,

³³ sazị ẹka tụ ọmụma ndị ahụn pụ-ichẹn, dọnyesọnmẹ wẹ, gi osisi rụn ihiẹn wẹ gi osisi a rụn, rụnsọnmẹ ụdị ọrụn-nka ile wẹ gi uche a rụn.

³⁴ O yegụọzị ya lẹ Oholiabụ nwa Ahisamakị onyẹ ebọn Danị ikẹn w'e gi saẹka kuzi ndị ọzọ.

³⁵ O gigụọ amamihiẹn gbajun wẹ hụn w'e gi saẹka rụn ọrụn-nka ile, e ropụha ihiẹn, a kpa oruru bru lẹ pọpụ lẹ ufie e yesọnmẹ ẹkwa, a rụn ọrụn ẹkwa-linẹni, a rụn ọrụn-nka lẹ ihiẹn ile wẹ gi akọ e mẹmẹ.”