Ọpụpụ 34 - Ika

Isi Nke Mmẹnọ Kwasị Ọgụn Osolobuẹ E Deyezi Wẹ Iwu Ẹ

¹ Osolobuẹ nọ sị Mozizi, “Tụpụha ibe ọmụma ẹbụọ hụn nọ kẹ ndị ibuzọ, kẹni m hụn ụzọ deye wẹ Iwu ndị ahụn m deye ndị ibuzọ hụ i tikpọ.

² Kwademẹ, ụzụtụntụn y'e nyinhẹn Ugu-Saịnaị.

³ Onyẹ ọwụlẹ esọnhẹnkwọlẹ ị; anịkwọlẹ m hụn onyẹ ọwụlẹ ugu ahụn; kẹ igunrun atụnrụn kẹ efin anọkwọlẹ ihun ugu hụ kpa nni.”

⁴ Ya Mozizi nọ tụpụha ibe ọmụma ẹbụọ hụn nọ kẹ ndị ibuzọ, zọshi enu Ugu-Saịnaị kẹ Osolobuẹ dọn gwa a; o buhụ ibe ọmụma ẹbụọ ahụn.

⁵ Ya Osolobuẹ nọ gi orukpu hidan, wuzoyen'ẹ ebẹhụ, kpọ ẹfan a wụ Osolobuẹ.

⁶ Ọ ghafe ihun Mozizi, a sị, “Mmẹ wụ Osolobuẹ; mmẹ wụ Osolobuẹ — Chuku omikẹn lẹ ẹfọma, hụn ghalẹni e bukẹnrin olulu; hụn e nwọn ihiẹn-ọsụsụọ ọda-ọda, e mẹsọnmẹ ihiẹn run'ẹ,

⁷ e mẹni onyẹ nkẹ ẹ d'e rudẹ agbọ nnụ-nnụ, a gbagharị eje-ihiẹn, nnupụ-isi lẹ njọ — bụ ara nị onyẹ mẹ eje-ihiẹn la ọfẹ; o gi njọ nẹdi mẹ e sọn ụmụ lẹ ụmụ-ụmụ d'e ru agbọ nke ẹtọ lẹ nke ẹnọ.”

⁸ Ya kẹ Mozizi nọ dannị Osolobuẹ alị ozigbo, kụn'a isi alị,

⁹ sị, “Euu Di-nwọnni ẹnyi, omẹni ihiẹn m a sụọghọ ị, dodo Di-nwọnni ẹnyi, sọnjẹn ẹnyi nwan. Ezioku-ezioku ndịnị wụ ndị isi-akwanran, ka gbagharị ẹnyi eje-ihiẹn lẹ njọ ẹnyi mẹ, y'e weri ẹnyi nọkẹ ndị nke i.”

¹⁰ Osolobuẹ nọ sị a, “M jẹnkọ nwan d'e tumẹ nkwerigbama ẹgbata mmẹ lẹ ndị nke i ile. M jẹnkọ d'e mẹsọnmẹ ihiẹn atụmẹnya m mẹtulẹni imẹ alị ọwụlẹ rị ụwa. Ndị alị ndịnị ụnụ bi imẹ wẹ sikọ d'a hụn ẹka-ọrụn Osolobuẹ, makẹni m jẹnkọ d'a rụnnị ọnụ okẹn ihiẹn a tụ egun.

¹¹ Dọnmẹ iwu m rị e ye i tannị. M k'a chụpụnị ụnụ ndị Amọ, ndị Kenaanị, ndị Hẹti, ndị Pẹrẹzi, ndị Hivu lẹ ndị Jebusu.

¹² Kpachanpụkwọ nị ẹnya, makẹ ụnụ lẹ ndị bi alị ụnụ shikọ gha kwerigbama, amamgbe w'a wụrụnị ụnụ ọnyan.

¹³ Kụtusọnmẹ ni ukpo ndị wẹ nọ a rụa mmọn; kụkpọpụ nị ọmụma ndị wẹ dọn nsọ; gbutukwama nị osisi ndị hụ wẹ zumẹsọnmẹ ni mmọn ahụn wụ Ashẹra.

¹⁴ Efekwọlẹ ni mmọn ọwụlẹ cheni m, makẹni mmẹ, Osolobuẹ hụn ẹfan a wụ ‘Hụn Ẹnya A Fụ’, wụ Chuku hụn ẹnya a fụ.

¹⁵ “Kpachanpụkwọ nị ẹnya, makẹ ụnụ lẹ ndị hụn bi alị hụ gha e kwerigbama. Makẹni w'e gbasọnmẹ mmọn wẹ ndị ahụn rịkẹ ịgbaraja, chụnyeni wẹ ẹjan, o ru a kpọ wẹ ụnụ, ụnụ e sọn wẹ ri ihiẹn wẹ gi chụn ẹjan.

¹⁶ O ru ụnụ a nụmanị ụmụ ụnụ ikpoho wẹ, ikpoho wẹ a gbasọnmẹ mmọn wẹ kẹ ịgbaraja ife-mmọn, dọ ụmụ ụnụ ye ife-mmọn ndị ahụn wẹ nwẹn e fe.

¹⁷ “Akpụrụkwọlẹ ni mmọn igwe.

¹⁸ “E mẹ ni Mmẹmmẹ brẹdi nwọnlẹni yisti o gi fụ. Ri ni brẹdi nwọnlẹni yisti akpọhịn ẹsa, kẹ m dọn gwa ụnụ. E mẹ n'ẹ ogẹn ahụn m kaye imẹ ọnwan Abibu, makẹni ọnwan ahụn kẹ ọnụ gi gha Ijiptu pụha.

¹⁹ “Nwa ibuzọ gha ẹkpa-nwa ọwụlẹ pụha wụ nke m; okẹn ibuzọ anụ ị mụ wụzị nke m: kẹ efin i kẹ atụnrụn lẹ ewu i.

²⁰ Gi nwa-atụnrụn gbarị nwa-ibuzọ jaki mụ. Kanị, omẹni y'a gbarịkọ a, y'a kpagi ẹ olu. Gbarịchanrịn nị ikẹnnyẹ ibuzọ ile ụnụ mụ. “Onyẹ ọwụlẹ agbakwọlẹ ẹka bịa ihun m.

²¹ “Akpọhịn isin kẹ ụnụ e gi a rụn ọrụn, kanị nke akpọhịn ẹsa, ụnụ k'e zurịrị ikẹn, kẹ ogẹn ikụn-ihiẹn ugbo kẹ ogẹn ịghọ ihiẹn-ugbo.

²² “E mẹ ni Mmẹmmẹ Izuka-nke-ẹsa hụn wụ Mmẹmmẹ Mkpụrụ-ibuzọ. Gi ni ọka-witi ibuzọ ụnụ ghọ mẹ ẹ; o ru njẹndemẹ ahụa ụnụ e mẹzikwọ Mmẹmmẹ Ịghọkwanma Ihiẹn-ugbo.

²³ “Mgbe ẹtọ ahụa kẹ ikẹnnyẹ ụnụ ile jẹnkọ d'a gha e zu ihun Osolobuẹ hụn nwọn ihiẹn ile, Chuku Izrẹlụ.

²⁴ M k'a chụpụnị ụnụ ndị alị ọzọ, mẹ alị ụnụ shịshịapụ; onwọnzikwọnị onyẹ ọwụlẹ ẹnya a sikọ d'a ban alị ụnụ mgbe ẹtọ hụ ụnụ e gi latọ ebe ile ụnụ bi alị ụnụ d'e zu ihun Osolobuẹ wụ Chuku ụnụ ahụa-ahụa.

²⁵ “Yisti arịkọkwọ ihiẹn ọwụlẹ i jẹnkọ d'e wecheni anụ i k'e gi ẹdeke ẹ chụnyeni m ẹjan; anịkwọlẹ anụ i gi chụn ẹjan Nghafe bọ-ọra.

²⁶ “Wẹhẹ ihiẹn-ugbo kachanrịn mma alị ị mịpụha Ụlọ Osolobuẹ wụ Chuku i. “Egikwọlẹ mirin-ẹran nnẹ ewu shi nwa a.”

²⁷ Osolobuẹ nọ sị Mozizi, “Detu oku ndịnị wẹ, makẹni m rị nwan e gi oku ndịnị e kwọngbama mmẹ lẹ ịyụ lẹ Izrẹlụ.”

²⁸ Akpọhịn ọgụnnaị kẹ Mozizi sọn Osolobuẹ nọdị ebẹhụ, efinaị ọgụnnaị lẹ uhinhin, o rini ihiẹn-oriri, ọ ranị mirin. Ọ nọ de oku ndị hụ kwọngbama wẹ lẹ Osolobuẹ, Iwu Iri ahụn, de wẹ ye ibe ọmụma ẹbụọ hụ.

Ihun Mozizi Rị E Gbukepụnị

²⁹ Mgbe Mozizi gi bu ibe ọmụma ẹbụọ hụ hidan Ugu-Saịnaị, ọ marịn nị ihun ẹ rị e gbuke o gi du Osolobuẹ ku.

³⁰ Ogẹn Ẹrọnụ lẹ Izrẹlụ ile gi hụn Mozizi, hụn nị ihun ẹ rị e gbuke, egun anịnị wẹ nọkunmẹ ẹ.

³¹ Kanị Mozizi nọ kpọzụnhan wẹ; ya Ẹrọnụ lẹ ndị ndu Izrẹlụ ile nọ kinhẹn d'e kunrun ẹ, ọ nọ du wẹ ku.

³² Ebẹhụ kẹ ndị Izrẹlụ ile họdụnị nọ nwan bịa d'a nọkunmẹ ẹ; ọ nọ yechanrịn wẹ iwu ile Osolobuẹ ye ẹ elu Ugu-Saịnaị.

³³ Ogẹn Mozizi gi gwachanrịngụ wẹ oku, ọ nọ gi ẹkwa kpumẹ ihun.

³⁴ Kanị, ogẹn ọwụlẹ o jẹnkọ ihun Osolobuẹ d'e sọn ẹ ku, o wepụ ya wụ ẹkwa d'e ru mgbe ọ gha ebẹhụ pụha. O mẹgụ, ọ pụha d'a gwa ndị Izrẹlụ ihiẹn Osolobuẹ gwa a,

³⁵ a hụn w'a nị ihun ẹ rị e gbuke; Mozizi e gizi ẹkwa hụ kpumẹ ihun d'e ru mgbe o jẹn d'e duzi Osolobuẹ ku.