Ọpụpụ 33 - Ika

Isi Nke Mmẹtọ Kwasị ọgụn Osolobuẹ E Sị Ẹlẹ O K'e Sọnjẹn Wẹ

¹ Osolobuẹ nọ sị Mozizi, “Gha ebeni pụ, ịyụ lẹ ndị ị gha Ijiptu wepụha; jẹnmẹ ni alị hụ m kun enwẹn m kwe Ebraham lẹ Aziki lẹ Jekọpụ nkwa, sị, ‘M jẹnkọ d'e ye ụmụ ọnụ ya.’

² M k'e zi mmọn-ozi n'o buruni ụnụ ụzọ; m sikọ d'a chụpụ ndị Kenaanị, ndị Amọ, ndị Hẹti, ndị Pẹrẹzi, ndị Hivu lẹ ndị Jebusu.

³ Shi ni alị ahụn mirin-ẹran lẹ mirin-ẹnwụn jun, e hu. Kanị, esọnjẹnkọ m ụnụ, makẹni ndị isi-ikẹn kẹ ụnụ wụ, amamgbe m'e gbupụ ụnụ ụzọ.”

⁴ Ogẹn wẹ gi nụ okuni e gbu ẹhụ, ẹhụ nọ jụ wẹ ile oyi, onwọnzini onyẹ yiri ihiẹn-mma ọwụlẹ —

⁵ makẹni Osolobuẹ a gwagụọ Mozizi, “Sị ndị Izrẹlụ, ‘Ndị isi-ikẹn kẹ ụnụ wụ. M ma-ama sọnjẹn ụnụ, o ru ẹ e gbupụ m ụnụ. Gbụpụchanrịngụdẹ ni ihiẹn-mma ụnụ yi, nị m marịn ihiẹn m k'e mẹ ọnụ.’ ”

⁶ Ya mẹ ndị Izrẹlụ gi gbụpụ ihiẹn-mma wẹ elu-ugu Horẹbụ.

Ọdụ Mbụ Mozizi Mẹmẹrin

⁷ Ogẹn hụ, Mozizi a pụ ebe wẹ ziẹntọ e jẹnzụkazị d'e tumẹ ọdụ; ọ kpọ a “Ọdụ-ozuzu”. Onyẹ chọ n'ọ marịn uche Osolobuẹ, ọ pụ ebẹhụ wẹ ziẹntọ, shi ọdụ ahụn.

⁸ Ogẹn ọwụlẹ Mozizi shikọ ọdụ hụ, wẹ ile e turu ọnụmụzọ ọdụ wẹ, e lee Mozizi, d'e ru n'ọ banyechanrịn imẹ ọdụ hụ.

⁹ Mozizi banye ọdụ hụ, orukpu ahụn jẹn elu e duhunmẹni wẹ e hidan d'a nọdị ọnụmụzọ ọdụ ahụn, Osolobuẹ e du Mozizi ku oku;

¹⁰ ndị Izrẹlụ hụn orukpu hụ k'ọ mawuru ọnụmụzọ ọdụ ahụn, wẹ ile e ke isi alị ebẹhụ wẹ rịsọnmẹ ọnụmụzọ ọdụ.

¹¹ Osolobuẹ e du Mozizi e ku oku elee-m elee-i kẹ ịhịan lẹ ọwụ a dọn e ku oku. Wẹ kugụ Mozizi e kin azụụn ebe wẹ ziẹntọ — kanị, hụn e yen'ẹ ẹka wụ Joshụa nwa Nọnụ ara gha ọdụ ahụn pụ.

Mozizi A Hụn Ọghọ Osolobuẹ

¹² Mozizi nọ sị Osolobuẹ, “O teghọtan ị gwama m, ‘Duru ndịnị,’ bụ y'e ke gwa m onyẹ ị hanyeni m. Y'e kugụọ, sị, ‘Ẹfan ị rị m obi, ihiẹn i sụọ m.’

¹³ Omẹni ihiẹn m a sụọghọ ị, kuzi m ụzọ ị, nị m hụn ụzọ marịn ị ọhụnma kẹni ihiẹn m sụọsọnmẹ i. Nyanhankwọ nị ndị Izrẹlụnị wụ ndị nke i.”

¹⁴ Osolobuẹ nọ sị a, “Mmẹ lẹ enwẹn m k'e sọnjẹn i; m k'e mẹ obi ru i alị.”

¹⁵ Mozizi nọ sị a, “Omẹni yụ lẹ enwẹn i esọnjẹnkọ ẹnyi; emẹkwọlẹ ẹnyi gha ebeni buli kaka.

¹⁶ Nanị kẹ w'a dọn marịn nị ihiẹn mmẹ lẹ ndị nke i a sụọghọ ị mmanị yụ lẹ enwẹn i sọnjẹn ẹnyi? Kị mmẹ lẹ ndị nke i gizi nwan rị ichẹn ebe ndị ọzọ ile rị enu-ụwa rị?”

¹⁷ Osolobuẹ nọ sị Mozizi, “M k'e mẹ ihiẹn ahụn ị rịọkwasị m, makẹni ihiẹn i sụọ m lẹni ẹfan ị rị m obi.”

¹⁸ Ya Mozizi nọ sị a, “Ghọsị m nwan k'ị nọ.”

¹⁹ Osolobuẹ nọ sị a, “M sikọ nwan d'a ghafe ihun i, ghọsị ị mma m ile, kpọ ẹfan m wụ Osolobuẹ idẹnya ị: onyẹ m chọ nị m mẹni ọhụnma kẹ m k'e mẹni ọhụnma, onyẹ m chọ nị m mẹni omikẹn kẹ m k'e mẹni omikẹn.

²⁰ Kanị, y'a hụnkọ ihun m, makẹni ịhịan a hụnkọ m rị ndụn.”

²¹ Osolobuẹ nọzị sị, “O nwọn ebe nọkunmẹni m hụn i k'a nọ turu elu ọmụma.

²² M gi ọghọ m ghafekọ, e bu m'i che ebe ọmụma nọ nwọn oghe, e gi m ẹka kpumẹ i d'e ru mgbe m ghafegụ;

²³ e wepụ m nwan ẹka, y'a hụn azụụn m; kanị o mẹ nke ihun m, ahụnkọ w'a kaka.”