Ọpụpụ 32 - Ika

Isi Nke Mmẹbụọ Kwasị Ọgụn A Kpụrụ Wẹ Nwa-efin, Fe Ẹ

¹ Kanị ogẹn ndị Izrẹlụ gi hụn a nị Mozizi e bie d'e hidan elu ugu, wẹ nọ ruhunmẹ Ẹrọnụ, sị a, “D'e mẹmẹni nwan ẹnyi mmọn hụn k'e duni ẹnyi. O mẹ nke Mozizi, okẹnnyẹ ahụn gha alị Ijiptu dupụha ẹnyi, ẹnyi amarịn ihiẹn mẹn'ẹ.”

² Ẹrọnụ nọ sị wẹ “Gbụpụhasọnmẹ ni ihiẹn-ntịn goru inyẹnmẹ ụnụ lẹ ụmụ ụnụ ikẹnnyẹ lẹ ikpoho yi kpọnhẹnni m.”

³ Ya wẹ ile nọ gbụpụ ihiẹn-ntịn wẹ yi, kpọnhẹnni Ẹrọnụ.

⁴ Ọ nọ narịn wẹ ihiẹn wẹ ye ẹ, weri ihiẹn-ọrụn, gi goru ahụn kpụ mmọn yi nwa-efin. Ya wẹ nọ sị, “Ndị Izrẹlụ, e lee ni okẹn mmọn ụnụ hụn wepụha ụnụ imẹ alị Ijiptu.”

⁵ Mgbe Ẹrọnụ gi hụn ihiẹn rị e mẹni, ọ nọ mẹmẹ ukpo nchụn-ẹjan ye ihun nwa-efin ahụn, sị wẹ, “Ekile, ẹnyi sikọ d'e mẹni Osolobuẹ mmẹmmẹ.”

⁶ Eki e fọn, wẹ ile nọ zọtẹnhin, chụn ẹjan w'a dụn ọkụn, ye oyiye ekele. O mẹgụ, wẹ nọ dịnọ alị ri, ra; e lihi wẹ, gbama ikiri.

⁷ Ya kẹ Osolobuẹ nọ sị Mozizi, “Hidan, nị ndị nke i hụn ị gha Ijiptu wepụha a rụgụọ.

⁸ A latọgụọ wẹ rị ihiẹn m gwa wẹ, kpụrụ okẹn-mmọn yi nwa-efin. E kegụọnị w'a isi alị, kwayen'ẹ ese, a sị, ‘Ndị Izrẹlụ, e lee ni okẹn mmọn ụnụ, hụn wepụha ụnụ imẹ alị Ijiptu.’

⁹ “Osolobuẹ nọ sị Mozizi, ‘A hụngụọ m ndịnị: ndị isi-ikẹn kẹ wẹ wụ.

¹⁰ Hatu m nwan ye, nị m gi olulu mẹ wẹ ihiẹn, gi ẹ tikpọpụ wẹ, e gi m'i họnrin okẹn alị!!’ ”

¹¹ Kanị Mozizi nọ rịọ Osolobuẹ wụ Chuku ẹ, sị, “Euu, Osolobuẹ, nanị y'e dọnzi nwan gi olulu sọn ndị nke i hụn i gi ikẹn hi-ogbe lẹ ẹka hi-ogbe wepụha imẹ alị Ijiptu?

¹² O ru ndị Ijiptu e sị, ‘O wepụha wẹ n'o mẹ wẹ eje-ihiẹn, n'o gbu wẹ tọ elu ugu ndịnị, kẹn'o kpọnchanpụ wẹ elu-ụwa.’ Dodo, bubehi nwan olulu; etikpọlẹ ndị nke i.

¹³ Nyanhankwọ idibo i wụ Ebraham, Aziki lẹ Izrẹlụ, ndị i kunni enwẹn i, sị, ‘M k'e mẹ ụmụ ọnụ bu ọda kẹ kokisẹ rị igwere, ye ụmụ ụnụ alịnị ile m kwe nkwa a, ọ wụrụ nke wẹ jẹnrin ejẹn.’ ”

¹⁴ Ya Osolobuẹ nọzilẹni mẹ ihiẹn ọ sị o k'e mẹ wẹ; o tikpọzịnị wẹ k'o te dọn ku.

¹⁵ Ya Mozizi nọ gbehutọ, gha ugu ahụn hidan; o gihụ ibe ọmụma ẹbụọ ahụn Ashịa-ẹri ẹka. Wẹ deyesọnmẹ wẹ ihiẹn ihun lẹ azụụn.

¹⁶ Osolobuẹ gi ẹka a tụ ibe ọmụma ẹbụọ hụ; ịya de ihiẹn ndị ahụn ye ibe-ọmụma ndị ahụn.

¹⁷ Ogẹn Joshụa gi nụ ụzụn ndị Izrẹlụ rị e yi oro, ọ nọ sị Mozizi, “Ụzụn agha rị ebẹhụ ndị nke ẹnyi ziẹntọ.”

¹⁸ Mozizi nọ sị a, “Ẹlẹ ụzụn ndị mẹri agha; ẹlẹ ụzụn ndị wẹ mẹri; olu ẹbụ kẹ m rị a nụ.”

¹⁹ Mgbe Mozizi gi rumẹ ebẹhụ wẹ ziẹntọ, hụn nwa-efin ahụn wẹ kpụ lẹ egu wẹ rị e tẹn, olulu nọ bu ẹ, ọ tuhu ibe ọmụma ẹbụọ hụ o gi ẹka, kụkpọchanrịn tọ ukun ugu hụ.

²⁰ Ọ nọ weri nwa-efin ahụn wẹ kpụ, dụn a ọkụn; o gweriẹn ẹ, ghịgha a ye elu mirin, wa a ye ndị Izrẹlụ olu ra.

²¹ Ọ nọ sị Ẹrọnụ, “Kị ndịnị mẹ i, i gi han wẹ mẹ okẹn njọ nọ ẹnịna?”

²² Ẹrọnụ nọ sị a, “Diọkpa, dodo ekpelẹ. Y'a marịnghọ kẹ eje-ihiẹn a dụ ndịnị.

²³ Wẹ sị m, ‘Mẹmẹni ẹnyi mmọn ndị hụn k'e duni ẹnyi. O mẹ nke Mozizi, okẹnnyẹ ahụn gha Ijiptu dupụha ẹnyi, ẹnyi amarịn ihiẹn mẹn'ẹ’.

²⁴ Ya m nọ sị wẹ, ‘Onyẹ ọwụlẹ yi ihiẹn goru ya gbụpụ a.’ Wẹ nọ ye m ihiẹn-goru ndị hụ, m nọ tụ wẹ ye ọkụn, nwa-efinni a pụha!”

²⁵ Ogẹn Mozizi gi hụn a nị ihiẹnni e rigụọ ndị ahụn isi lẹni Ẹrọnụ a nịgụọ wẹ mẹmẹmẹ kẹ ndị ẹra, hụn ndị iṅẹnrẹn wẹ e gi mụ wẹ ẹmụ —

²⁶ ọ nọ turu ebe wẹ gha a banye ebẹhụ wẹ ziẹntọ, sị, “Onyẹ ọwụlẹ wụ nke Osolobuẹ, bịa d'e kunrun m!” Ya ndị ebọn Livaị ile nọ ruhẹ ebe ọ rị.

²⁷ Ọ nọ sị “Lee ni ihiẹn Osolobuẹ, hụn wụ Chuku Izrẹlụ ku: ‘Okẹnnyẹ ọwụlẹ ya buru ọpịa-agha faye ọbụọ, ya jẹnhunmẹmẹ imẹ ndị nke ẹnyi ile ziẹntọ ebeni, gha isini d'e ru isinẹi, ya gbumẹ umunẹ ẹ ikẹnnyẹ lẹ ndị ọwụ a lẹ ndị bikunmẹn'ẹ.’ ”

²⁸ Ndị Livaị nọ mẹ ihiẹn Mozizi ku, ihiẹn nọ kẹ madụ nnụ-uku ẹtọ nọ nwụnhụn ụhụọkịn ahụn.

²⁹ Ya Mozizi nọ sị wẹ, “Ụnụ e wegụọ enwẹn ụnụ ye Osolobuẹ tannị, hụnnị ụnụ gbaye oku ẹ, mayedẹ ụmụ ụnụ ikẹnnyẹ lẹ umunẹ ụnụ ikẹnnyẹ; ọ gọzigụọ ụnụ tannị.”

Mozizi A Rịọdọnni Ndị Izrẹlụ

³⁰ Eki e fọn, Mozizi nọ sị ndị Izrẹlụ, “Ụnụ e mẹọlẹ okẹn njọ. Kanị m sikọ elu uguni d'e kunrunzi Osolobuẹ; ikẹnkwọ nị m s'ẹka rịọ a hụn o gi gbagharị ụnụ njọ ụnụ mẹ.”

³¹ Ya Mozizi nọ kin azụụn d'e kunrun Osolobuẹ, sị a, “Euu, ndịnị e mẹọlẹ okẹn njọ! A kpụrụgụọ wẹ mmọn goru.

³² Dodo nwan, gbagharị wẹ njọ; omẹni y'a gbagharịkọ wẹ, finchanpụ nwan ẹfan m imẹ ẹkụkwọ i de.”

³³ Osolobuẹ nọ sị Mozizi, “Onyẹ hụn mẹ m njọ kẹ m sikọ d'e finchanpụ ẹfan a imẹ ẹkụkwọ m.

³⁴ Jẹnmẹ nwan; duru wẹ shi ebẹhụ m ku; lee ẹ, mmọn-ozi m k'e burun'i ụzọ. K'osilẹrị, ogẹn ru m'e gi ye afụnfụn, m k'e yekwọ wẹ afụnfụn njọ wẹ.”

³⁵ Osolobuẹ nọ wẹhẹni wẹ okẹn nsọngbu makẹ nwa-efin ahụn wẹ kpụ, nwa-efin ahụn Ẹrọnụ kpụ.