Ọpụpụ 31 - Ika

Isi Nke Mmanaị Kwasị Ọgụn Bẹzalẹlụ Lẹ Oholiabụ

¹ Osolobuẹ nọ sị Mozizi,

² “Lee ẹ, a họrịgụọ m Bẹzalẹlụ nwa Uri nwa Họ, onyẹ ebọn Juda;

³ e bugụọ m Mmọn Osolobuẹ lẹ ẹka-ọrụn rị mma lẹ uche lẹ amamihiẹn ile wẹ gi a rụn ọrụn ẹka ọwụlẹ che imẹ ẹ ọda-ọda —

⁴ hụn o k'e gi marịn gi goru, siliva lẹ igwe-bronzu kpụ ihiẹn ma mma rị ichẹn-ichẹn;

⁵ o k'e gizi ẹ marịn be ọmụma ndị ahụn pụ-ichẹn, dọnyesọnmẹ wẹ lẹ igi osisi rụn ihiẹn ichẹn-ichẹn wẹ gi osisi a rụn lẹ ịrụnzị ụdị ọrụn ẹka ile rịnị.

⁶ “E tumẹgụọzị m Oholiabụ nwa Ahisamakị, onyẹ ebọn Danị, n'o yeni Bẹzalẹlụ ẹka. E bugụọzị m amamihiẹn wẹ e gi rụn ọrụn che imẹ ndị omẹ-nka ile nị wẹ hụn ụzọ mẹmẹ ihiẹn ile m s'ị mẹmẹ:

⁷ kẹ Ọdụ-ozuzu kẹ Ẹkpẹti Ashịa-ẹri lẹ okun ẹ hụ wẹ n'a gbarị isi, hụn wẹ gi kpumẹ ẹ kẹ ihiẹn ọzọ ile rị imẹ Ọdụ ahụn:

⁸ kẹ teburu lẹ ihiẹn ile sọnn'ẹ kẹ obu-ukpẹ ahụn wẹ gi goru wụchanrịn goru mẹmẹ lẹ ihiẹn ile sọnn'ẹ kẹ ukpo-nsẹnsị,

⁹ kẹ ukpo w'a nọ a dụn ẹjan ọkụn lẹ arịa ile sọnn'ẹ kẹ afẹrẹ-mirin ahụn lẹ ụkụ a;

¹⁰ lẹzi ẹwuru ndị ahụn wẹ sikọ d'a kpa: kẹ ẹwuru nsọ ndị hụ Ẹrọnụ onyẹ nchụn-ẹjan k'e yi lẹ ẹwuru ụmụ a ikẹnnyẹ k'e yi wẹ gha a rụn ọrụn ndị nchụn-ẹjan,

¹¹ kẹ udẹn-nsọ kẹ nsẹnsị-nsọ hụ e shin ọhụnma wẹ k'e buche Ebe rị Nsọ. Wẹ mẹmẹchanrịn wẹ kẹ m dọn gwa ị.”

Ụhụọhịn Ezumikẹn

¹² Osolobuẹ nọ sị Mozizi,

¹³ “Sị ndị Izrẹlụ, ‘Ụnụ k'e dọnmẹrịrị iwu m ye ụnụ banyeni ụhụọhịn Ezumikẹn ichẹn-ichẹn. Agbọ ile lalanị, ịya k'a ghọsị nkwerigbama rị ẹgbata mmẹ lẹ ụnụ, kẹni ụnụ marịn nị mmẹ wụ Osolobuẹ, hụn e mẹ ụnụ a rị nsọ.

¹⁴ “ ‘Zu ni ikẹn Ụhụọhịn Ezumikẹn makẹni ụhụọhịn ụnụ k'e dọnmẹ nsọ rọ. Onyẹ ọwụlẹ mẹrụn'a, wẹ k'e gburịrị a; onyẹ ọwụlẹ rụn ọrụn ụhụọhịn ahụn, wẹ k'e bepụrịrị a imẹ ndị nke ẹ.

¹⁵ Akpọhịn isin kẹ wẹ e gi rụn ọrụn, kanị nke akp'ọhịn ẹsa wụ Ụhụọhịn wẹ e gi zu ikẹn, hụn rị Osolobuẹ nsọ. Wẹ k'e gburịrị onyẹ ọwụlẹ rụn ọrụn ụhụọhịn hụ.

¹⁶ Ndị Izrẹlụ k'a gha e zu ikẹn Ụhụọhịn Ezumikẹn, mẹsọnmẹ ẹrịra agbọ ile lalanị makẹni iwu rọ.

¹⁷ O jẹnkọ d'a wụ ahịma rị ẹgbata mmẹ lẹ ndị Izrẹlụ jẹnrin-ejẹn, makẹni Osolobuẹ gi akpọhịn isin ke elu-igwee lẹ ụwa, nke akpọhịn ẹsa, ọ nọ zụ ikẹn.’ ”

¹⁸ Ya kẹ Osolobuẹ nọ nwan ye Mozizi ibe ọmụma ẹbụọ hụ Ashịa-ẹri, kẹ ọ gwagụ a oku elu Ugu Saịnaị, ibe ọmụma ẹbụọ Osolobuẹ gi mkpịnsịn-ẹka a deye ihiẹn.