Ọpụpụ 30 - Ika

Isi Nke Iri Kwasị Ọgụn Ukpo Nsẹnsi

¹ “Gi osisi zeni wụ akashịa mẹmẹ ukpo w'a nọ a mụ nsẹnsi.

² Usue ẹ lẹ ụshịa k'e mẹ ahanmahan: usue ẹ k'a wụ ọbụkụ ohu lẹ mkpikpi, ụshịa a ọbụkụ ohu lẹ mkpikpi; ojijẹn-elu ẹ a wụrụ ọbụkụ ẹtọ. Ịya lẹ mpịn ndị rịn'a jẹnkọ d'a wụ ibe-osisi ohu.

³ Gi ezigbo goru wẹ buchelẹni ihiẹn ọzọ nyanchanrịn elu ẹ lẹ ẹhụ a ile lẹ mpịn a ile, y'e gi goru gbihunmẹ ẹ.

⁴ Gba ẹgba ẹbụọ ye ukpo hụ okpuru goru ahụn i gi gbihunmẹ ẹ, ẹgba ohu azụụnnị, ohu azụụnnị, hụn k'e kwọndọn ẹgbe wẹ k'e gi bu ẹ.

⁵ Gi osisi akashịa mẹmẹ ẹgbe ndị hụ, y'e gi goru nyankwama wẹ.

⁶ “Bu ukpo hụ w'a nọ a mụ nsẹnsi che ihun Ẹkwa Mgbọnbepụ hụ gbọnkin Ẹkpẹti Ashịa-ẹri lẹ okun ẹ wẹ nọ a gbarị isi imẹ ebahụn mmẹ lẹ ịyụ k'a nọ zu.

⁷ Ẹrọnụ k'a mụrịrị nsẹnsi e shin ọhụnma elu ẹ ụzụtụntụn ọwụlẹ, ọ gha a kwademẹ ukpẹ ndị hụ.

⁸ O k'a mụyezi nsẹnsi elu ẹ ọhị gbama, ọ gha a mụye ukpẹ ndị hụ, e gi wẹ ẹ mụyeni Osolobuẹ nsẹnsi agbọ ụnụ ile.

⁹ Anọkwọlẹ elu ukpo ahụn mụ nsẹnsi ọzọ ọwụlẹ mọbụ oyiye ọzọ ọwụlẹ w'a dụn ọkụn mọbụ oyiye ọka ọwụlẹ; ehukwọlẹ oyiye manya ọwụlẹ ye enu ẹ.

¹⁰ Mgbe ohu ahụa, Ẹrọnụ sikọ d'a nọ mpịn a ẹnọ hụ mẹ ihiẹn w'e gi wepụ njọ. O sikọ d'e gi ẹdeke ẹjan hụ wẹ gi e wepụ njọ mẹ ẹ ahụa-ahụa agbọ ụnụ ile lalanị. Ukpo-nsẹnsinị rịchanrịn Osolobuẹ nsọ ẹnya.”

Egho Wẹ Gi A Gbarị Isi

¹¹ Osolobuẹ nọ sị Mozizi,

¹² “I gụn ndị Izrẹlụ, onyẹ-onyẹ imẹ wẹ k'a kụrịrị Osolobuẹ ụgwọ o gi gbarị isi ẹ ogẹn wẹ gi gụn a, amamgbe eje-ihiẹn e kunrun wẹ yeni ọgụngụn wẹ rị a gụn wẹ.

¹³ Ihiẹn onyẹ-onyẹ k'a kụ, wẹ gụngụ a, wụ nkirishi egho-shẹkẹlụ ohu. Shẹkẹlụ Ọdụ-nsọ hụn wụ nwa-shẹkẹlụ ọgụn kẹ w'e gi ma a. Nkirishi shẹkẹlụnị k'a wụ ụtụ ụnụ rị a tụnị Osolobuẹ.

¹⁴ Ndị ile wẹ gụn, ndị ile ru ahụa ọgụn mọbụ karị, k'a tụnị Osolobuẹ ụtụnị.

¹⁵ Nke ọdanfịn akarịkọ nkirishi egho-shẹkẹlụ, nke ogbẹnnyẹ ebepụkọ, ụnụ gha a tụnị Osolobuẹ ihiẹnni ụnụ gi a gbarị isi ụnụ.

¹⁶ Narịn ndị Izrẹlụ eghoni wẹ gi a gbarị isi, y'e gi ẹ a rụn ọrụn Ọdụ-ozuzu. O k'a wụ ihiẹn Osolobuẹ gi a nyanhan ụnụ ndị Izrẹlụ, wụrụ ihiẹn ụnụ gi gbarị isi ụnụ.”

Afẹrẹ Wẹ Gi A Chan Ụkụ Nẹ Ẹka

¹⁷ Osolobuẹ nọ sị Mozizi,

¹⁸ “Mẹmẹ afẹrẹ igwe-bronzu shịanị lẹ ụkụ a. Wẹ k'e gi ẹ a chan ụkụ lẹ ẹka. Bu ẹ che ẹgbata Ọdụ-ozuzu lẹ ukpo nchụn-ẹjan, kwọ mirin ye imẹ ẹ.

¹⁹ Ẹrọnụ lẹ ụmụ a ikẹnnyẹ k'a gha e gi mirin rị imẹ ẹ a chan ẹka lẹ ụkụ-alị wẹ.

²⁰ Wẹ banyekọnị imẹ Ọdụ-ozuzu, wẹ k'a chanrịrị ẹka lẹ ụkụ-alị wẹ makẹ wẹ gha a nwụn. Ẹrịra kẹ wẹ k'e mẹzi ẹ wẹ jẹnkọnị ukpo nchụn ẹjan ahụn d'e buye Osolobuẹ ihiẹn-oriri wụ ẹjan w'a dụn ọkụn.

²¹ Wẹ k'a chanrịrị ẹka lẹ ụkụ-alị wẹ makẹ wẹ gha a nwụn. Ẹrọnụ lẹ ebozo ẹ ile k'e mẹ ẹrịra jẹnrin ejẹn.”

Udẹn-ntumẹ

²² Osolobuẹ nọ sị Mozizi,

²³ “Weri ihiẹn-akụnkụn ndịnị e kunni kachanrịn mma: maa rịnranpụnị kilo isin, sinamọnụ e shin ọhụnma hụn hanzị kẹ nkirishi maa hụ, ya wụ kilo ẹtọ; werizi keni e kunni kilo ẹtọ lẹ

²⁴ kashịa kilo isin. Gikwọ kilo Ụnọ-nsọ ma wẹ, y'e hu galọnụ ofugbọn-olivu ohu cheni wẹ.

²⁵ Gi ihiẹn ndịnị mẹmẹ udẹn-nsọ wẹ gi e dọn ihiẹn nsọ, hụn wẹ gwọgbama n'ọ hụn ụzọ e shin ọhụnma; ọka-udẹn sikọ d'e mẹmẹ ẹ. O k'a wụrụ udẹn rị nsọ wẹ gi e tumẹ ntumẹ.

²⁶ Tanyesọnmẹ ẹ Ọdụ-ozuzu, Ẹkpẹti Ashịa-ẹri,

²⁷ teburu-nsọ lẹ ihiẹn ile sọnn'ẹ, obu-ukpẹ lẹ ihiẹn ile ịya lẹ ya wị, ukpo-nsẹnsị,

²⁸ ukpo wẹ nọ a dụn ẹjan ọkụn lẹ arịa a ile lẹ afẹrẹ-mirin uku ahụn lẹ ụkụ a.

²⁹ “Ya wụ, i k'e dọn wẹ nsọ, kẹni wẹ rịchanrịn nsọ; ihiẹn ọwụlẹ mẹtụnị wẹ k'e họnrin ihiẹn rị nsọ wẹ k'e gbu.

³⁰ “Tankpu Ẹrọnụ lẹ ụmụ a ikẹnnyẹ udẹn-nsọ ahụn, dọn wẹ nsọ, nị wẹ hụn ụzọ rụnma nị m ọrụn ndị nchụn-ẹjan.

³¹ Sị ndị Izrẹlụ, ‘Ọnwan k'a wụ udẹn-nsọ m wẹ gi e tumẹ ntumẹ agbọ ụnụ ile lalanị.

³² Egikwọlẹ n'a te kẹ udẹn; emẹmẹkwọlẹ ni hụn nọ kẹ ya. Ihiẹn rị nsọ rọ; o k'a wụrịrịnị ụnụ ihiẹn rị nsọ.

³³ Onyẹ mẹmẹ ihiẹn nọ kẹ ya mọbụ te onyẹ rị ogbe ya, wẹ k'e bepụ a imẹ ndị nke ẹ, ndị Izrẹlụ.’ ”

Nsẹnsị-nsọ

³⁴ Osolobuẹ nọ sị Mozizi, “Werisọnmẹ ihiẹn ndịnị e shin ọhụnma: mkpịnsịn ẹsue, onika lẹ gal'banum lẹ frankisẹnsị nwọnlẹni ihiẹn ọzọ wẹ buche ẹ; wẹ ile k'a wụ ahanmahan.

³⁵ Gwọgbama wẹ nị wẹ họnrin nsẹnsi e shin ọhụnma, onyẹ e mẹmẹ sẹnti mẹmẹ — nsẹnsi wẹ ye nnu, nsẹnsi unyin rịlẹni; nsẹnsi nsọ.

³⁶ “Weri ẹkẹrẹ gweriẹn, y'e kpọn ẹ ye ihun Ẹkpẹti Ashịa-ẹri imẹ Ọdụ-ozuzu ebẹhụ mmẹ lẹ yụ k'a nọ e zu. O k'a wụrụnị ụnụ ihiẹn rịchanrịn nsọ,

³⁷ Emẹmẹrinkwọlẹ ni nsẹnsi ọwụlẹ nọ kẹ hụnnị; weri n'ẹ nị ihiẹn rị Osolobuẹ nsọ k'ọ wụ.

³⁸ Onyẹ mẹmẹrin ụdị a n'o gi shin ọhụnma, wẹ k'e bepụ a imẹ ndị nke ẹ, ndị Izrẹlụ.”