Ọpụpụ 3 - Ika

Isi Nke Ẹtọ Kẹ Osolobuẹ Dọn Kpọ Mozizi

¹ Mozizi hụ e du anụ ọgọ a wụ Jẹtro, onyẹ nchụn-ẹjan alị Midianị. Ọ nọ dumi igunrun anụ ahụn imẹ atụ, du wẹ rukwọrị Horẹbụ wụ Saịnaị, ugu Chuku.

² Ebẹhụ kẹ mmọn-ozi Osolobuẹ nọ pụha nọkẹ ọkụn rị e nwun imẹ akụ-ọfịa. Mozizi nọ hụn a nị ọkụn rị e nwun imẹ ọfịa ahụn kanị ọ rịnị a dụn a.

³ Ọ nọ sị enwẹn ẹ, “M k'a nọkunmẹ ẹ nị m hụn ahụnleleni, marịn ihiẹn ọkụnnị gilẹni a dụn ọfịa hụ.”

Kẹ Osolobuẹ Dọn Kpọ Mozizi

⁴ Ogẹn Osolobuẹ gi hụn a nị Mozizi e jẹnzụnhan d'e lee, Chuku nọ gha imẹ akụ-ọfịa hụ kpọ a, “Mozizi! Mozizi!!” Mozizi nọ za, sị, “Lee m ebeni.”

⁵ Osolobuẹ nọ sị a, “Ejẹnzụnhanzịlẹ. Gbụpụ akpụkụ ị, makẹni alị i turu rị nsọ!”

⁶ Ọ nọzị sị Mozizi, “Mmẹ wụ Chuku nẹdi i fe, Chuku Ebraham, Chuku Aziki lẹ Chuku Jekọpụ.” Ogẹn Mozizi gi nụ ihiẹnni, ọ nọ kpukin ihun ẹ, makẹni egun anịn'a bu ẹnya zinmẹ Osolobuẹ.

⁷ Osolobuẹ nọ sị, “A hụngụọ m ụya ndị nke m rị e ri imẹ alị Ijiptu. A nụọlẹ m ẹkwan wẹ rị a kwan ẹka ndị rị a kpa wẹ nọkẹ igbọn. A marịngụọ m afụnfụn wẹ rị a ta.

⁸ A bịaọlẹ m nwan d'a gbapụha wẹ ẹka ndị Ijiptu lẹzi nị m gha imẹ alị ahụn wepụha wẹ, webanhan wẹ alị rị mma, shịa ẹfọ, alị mirin-ẹran lẹ mirin-ẹnwụn rị e hu imẹ ẹ, alị hụn ndị Kenaanị, ndị Hẹti, ndị Amọ, ndị Pẹrẹzi, ndị Hivu lẹ ndị Jebusu bi nwan.

⁹ A nụọlẹ m nwan ẹkwan ndị Izrẹlụ rị a kwan; a hụngụọzị m kẹ ndị Ijiptu gi rị a bịangbu wẹ.

¹⁰ Jẹnmẹ nwan, m rị e zi i d'e kunrun Fẹro eze Ijiptu, n'ị hụn ụzọ wepụha ndị nke m wụ ndị Izrẹlụ imẹ Ijiptu.”

¹¹ Kanị Mozizi nọ sị Chuku, “Onyẹ kẹ m wụ hụn m gi e jẹn d'e kunrun Fẹro, d'a gha Ijiptu wepụha ndị Izrẹlụ?”

¹² Chuku nọ za sị, “M jẹnkọ d'a nọyen'i. Ihiẹn sikọ d'a ghọsị ị nị mmẹ zi i wụ ọnwan: ị ghagụ Ijiptu wepụha wẹ, ụnụ k'a nọ uguni fe m.”

¹³ Kanị Mozizi nọ sị Chuku, “M jẹn d'a sị ndị Izrẹlụ, ‘Chuku ndị nẹdi ụnụ kanị zihẹ m d'e kunrun ụnụ’, nị a jụma wẹ m, ‘Kị wụ ẹfan a?’ Kị m k'a sị wẹ?”

¹⁴ Chuku nọ sị Mozizi, “Onyẹ M Wụ Kẹ M Wụ. Ihiẹnni k'i jẹnkọ d'a gwa wẹ: ‘Onyẹ M Wụ zihẹ m d'e kunrun ụnụ.’ ”

¹⁵ Chuku nọzị sị a, “Gwa ndị Izrẹlụ, ‘Osolobuẹ hụn wụ Chuku ndị nẹdi ụnụ, Chuku Ebraham, Chuku Aziki, Chuku Jekọpụ zihẹ m d'e kunrun ụnụ.’ Ọnwan wụ ẹfan m jẹnrin ejẹn, ẹfan agbọ ile jẹnkọ d'e gi a nyanhan m.

¹⁶ “Jẹn d'a kpọkikomẹ ndị isi Izrẹlụ, y'a sị wẹ, ‘Osolobuẹ, Chuku ndị nẹdi ụnụ kanị, Chuku Ebraham lẹ Aziki lẹ Jekọpụ e mẹgụọ m hụn a, ọ nọ sị m: a hụngụọ m kẹ ọ rị ụnụ lẹ ihiẹn ndị Ijiptu rị e mẹ ụnụ.

¹⁷ E kweọlẹ m nkwa nị m jẹnkọ d'e wepụha ụnụ imẹ ụya ụnụ rị e ri imẹ alị Ijiptu, we ụnụ shi alị ndị Kenaanị, ndị Hẹti, ndị Amọ, ndị Pẹrẹzi, ndị Hivu lẹ ndị Jebusu, alị mirin-ẹran lẹ mirin-ẹnwụn rị e hu.’

¹⁸ “Ndị-isi Izrẹlụ jẹnkọ d'e gọn i ntịn. Ogẹn ahụn, yụ lẹ ndị-isi Izrẹlụ jẹnkọ d'a wịrị d'e kunrun eze Ijiptu wụ Fẹro d'a sị a, ‘Osolobuẹ, Chuku ndị Hibru, e kunrungụọ ẹnyi. Nị nwan ẹnyi jẹn ijẹn akp'ọhịn ẹtọ imẹ atụ d'a chụnyeni Osolobuẹ wụ Chuku ẹnyi ẹjan.’

¹⁹ Kanị, a marịnghọ m nị eze alị Ijiptu anịkọ ụnụ pụ mmanị wẹ wa a ye ẹ olu.

²⁰ Ya wụ, m jẹnkọ d'a kpachanpụ ẹnya mẹshi ndị Ijiptu ikẹn ghahanị ihiẹn ile a tụ ẹnya m k'e mẹ imẹ igunrun wẹ. M mẹgụ a, Fẹro k'a chụpụdẹ ụnụ achụpụ.

²¹ “M k'e mẹtụ ndị Ijiptu ẹka obi, e lee wẹ ndị Izrẹlụ ẹnya ihun, nke wụ nị ụnụ pụkọnị, ụnụ agbakọ ẹka.

²² Okpoho Izrẹlụ ọwụlẹ sikọ d'a rịọ okpoho Ijiptu ọwụlẹ bikunmẹn'ẹ lẹ okpoho Ijiptu ọwụlẹ rị iwe ẹ siliva lẹ goru, rịọzịkwọ wẹ ẹkwa, yimẹ ụmụ ụnụ ikẹnnyẹ lẹ ikpoho; ụnụ k'e gi ụzọnị bunarịn ndị Ijiptu ihiẹn wẹ.”