Ọpụpụ 29 - Ika

Isi Nke Itenẹi Kwasị Ọgụn Kẹ W'a Dọn Tumẹ Ẹrọnụ Lẹ Ụmụ A

¹ “Lee ihiẹn i jẹnkọ d'e mẹ gi dọn wẹ nsọ kẹni wẹ rụnmanị m ọrụn ndị nchụn-ẹjan: weri okoro okẹn-efin lẹ ebulu ẹbụọ ẹhụ zu oke

² lẹ ọka-witi riẹnni wẹ buchelẹni yisti mẹmẹ brẹdi lẹ donọtụ wẹ gi ofigbọn-olivu gwọ lẹ biskiti-wefa wẹ te ofugbọn-olivu.

³ “Bu wẹ che ụkpalị ohu, y'e bupụha a ihun m — wẹ lẹ okẹn-efin lẹ ebulu ẹbụọ hụ.

⁴ Y'e wẹhẹ Ẹrọnụ lẹ ụmụ a ikẹnnyẹ ọnụmụzọ Ọdụ-ozuzu, gi mirin wụ wẹ.

⁵ Gi ẹkwa ndị ahụn kẹn Ẹrọnụ ekikẹn, kẹ ẹwuru ọrụn nchụn-ẹjan hụ tueru alị kẹ ẹwuru ahụn tueghafe mkpụkụ ya lẹ ẹfọdụ a wị kẹ ẹfọdụ lẹ enwẹn ẹ kẹ Ẹkpa Elu-obi. Gi eriri-ukun hụ wụ nke ẹfọdụ kẹnmẹ ẹ ẹfọdụ hụ.

⁶ Bu okpu che ẹ isi; y'e kẹn okpu-eze hụ wụ ibe-goru nyanmanị okpu hụ.

⁷ Y'e weri udẹn-nsọ ahụn hukpu ẹ isi, gi tumẹ ẹ.

⁸ Y'e wẹhẹ ụmụ a ikẹnnyẹ, yimẹ wẹ ẹwuru ọrụn nchụn-ẹjan hụ tueru alị,

⁹ kẹnmẹ wẹ eriri-ukun, fụma wẹ okpu-isi. Ọrụn ndị nchụn-ẹjan jẹnkọ d'a wụsọnmẹ nke Ẹrọnụ lẹ ụmụ a ikẹnnyẹ: iwuni k'a rị jẹnrin-ejẹn. Ẹrịra kẹ y'e dọn tumẹ Ẹrọnụ lẹ ụmụ a ikẹnnyẹ.

¹⁰ “Y'e wẹhẹ okoro okẹn-efin ahụn ọnụmụzọ Ọdụ-ozuzu, Ẹrọnụ lẹ ụmụ a ikẹnnyẹ e bu ẹka kwasị a isi.

¹¹ Nọ ọnụmụzọ Ọdụ-ozuzu hụ, idẹnya Osolobuẹ, gbu ẹ.

¹² Gi mkpịnsịn-ẹka deri ẹdeke okoro okẹn-efin ahụn teyesọnmẹ mpịn ukpo nchụn-ẹjan hụ, y'e hu hụn họdụnị ye ukun ukpo nchụn-ẹjan hụ.

¹³ Y'a bụọ a, werichanrịn ụtọrọ ahụn ile kpumẹ ihiẹn ile rị a ẹfọ, weri mpịnpịn ahụn a rị a imegi, werizi akụnrụn a ẹbụbụọ lẹ ụtọrọ nyanhunmẹni wẹ; y'a dụn wẹ ọkụn elu ukpo nchụn-ẹjan hụ, e họnrin wẹ ẹnwụnrụn.

¹⁴ Ka we uru efin ahụn lẹ akpụkpọ a lẹ ihiẹn ile họdụnị gha ebe ụnụ ziẹntọ pụ d'a kpọ ọkụn. Ẹjan wẹ gi e fepụ njọ rọ.

¹⁵ “I sikọ d'e wepụha nwan ohu imẹ ebulu ẹbụọ hụ, Ẹrọnụ lẹ ụmụ a ikẹnnyẹ e bu ẹka kwasị a isi.

¹⁶ Gbu ẹ, y'e weri ẹdeke ẹ feyesọnmẹ ụsụọ ukpo nchụn-ẹjan hụ ile.

¹⁷ Y'a bụọ ebulu hụ, chanchan ihiẹn ile rị imẹ ẹ lẹ ụkụ a, dọngbama isi ẹ lẹ mkpamkpa a ndị họdụnị.

¹⁸ Ya kpọchanrịn nwan ebulu hụ ọkụn elu ukpo nchụn-ẹjan. Ẹjan wẹ kpọnị Osolobuẹ ọkụn rọ hụn ishin ẹ a sụọ Osolobuẹ ụsụọ, oyiye wẹ gi ọkụn ye Osolobuẹ.

¹⁹ “Weri ebulu hụn ẹbọ; Ẹrọnụ lẹ ụmụ a ikẹnnyẹ wẹ bu ẹka kwasị a isi.

²⁰ Y'e gbu ẹ, weri ẹdeke ẹ te Ẹrọnụ lẹ ụmụ a ikẹnnyẹ ibe alị ntịn ẹka-ihiẹn lẹ eze-ẹka ẹka-ihiẹn lẹ eze-ụkụ ẹka-ihiẹn. Y'e fe ẹdeke ye ụsụọ ukpo nchụn-ẹjan hụ ile.

²¹ Y'a gha ẹdeke ahụn rị ukpo nchụn-ẹjan lẹ udẹn-nsọ werisọnmẹ ẹkẹrẹ gi fekpu Ẹrọnụ lẹ ẹwuru ndị hụ o yi lẹ ụmụ a ikẹnnyẹ lẹ ẹwuru wẹ, ogẹn ahụn, Ẹrọnụ lẹ ụmụ a ikẹnnyẹ lẹ ẹwuru wẹ a rị nsọ.

²² “Wepụha ụtọrọ ebulu hụ lẹ ọdụndụn a ụtọrọ jun lẹ ụtọrọ kpumẹsọnmẹ ihiẹn rị imẹ ẹ, uwẹ lẹ mpịnpịn ahụn rị elu imegi ẹ lẹ akụnrụn a ẹbụbụọ lẹ ụtọrọ rị elu wẹ lẹzi ọrụ-ụkụ ẹka-nni ẹ — makẹni ọnwan wụ ebulu wẹ gi e tumẹ wẹ.

²³ Nọ imẹ ụkpalị hụ i wepụha nwan ihun Osolobuẹ brẹdi ichẹn-ichẹn wẹ buchelẹni yisti rị weri ogbe brẹdi ohu lẹ donọtụ ohu wẹ gi ofugbọn gwọ lẹ biskiti ohu.

²⁴ Y'e bu ihiẹn ndịnị ile che Ẹrọnụ lẹ ụmụ a ikẹnnyẹ ubẹka, finfin ẹ nwan ghọsị Osolobuẹ n'ọ wụrụ oyiye w'e finfin.

²⁵ Y'a gha ubẹka wẹ werizi wẹ d'a dụn wẹ lẹ ẹjan ahụn wẹ sikọ d'a dụ ọkụn ọkụn, gi ẹ họnrin ishin k'a sụọ Osolobuẹ, oyiye wẹ gi ọkụn ye Osolobuẹ.

²⁶ “Weri ẹran ebulu hụ wẹ gi tumẹ Ẹrọnụ, y'a nọ ihun Osolobuẹ finfin ẹ ghọsị Osolobuẹ, n'ọ wụrụ oyiye w'e finfin; ẹran a hụ sikọ d'a wụ nke i, Mozizi.

²⁷ “Imẹ anụ ebulu hụ wẹ gi tumẹ wẹ, wepụha ẹrannị i finfinghọsị Osolobuẹ lẹ ọrụ-ụkụ a hụ wẹ weshin'ẹ elu n'ọ wụrụ ihiẹn rị nsọ imẹ ihiẹn wụ nke Ẹrọnụ lẹ ụmụ a ikẹnnyẹ.

²⁸ Ndị Izrẹlụ k'a gha e ye Ẹrọnụ lẹ ụmụ a ikẹnnyẹ ihiẹnni jẹnrin ejẹn. Ya wụrụnị ndị Izrẹlụ hụn w'e gi a kwadọn ọrụn Osolobuẹ imẹ ẹjan-ekele ọwụlẹ wẹ ye Osolobuẹ.

²⁹ “Ẹwuru-nsọ Ẹrọnụ k'a wụrụ nke ụmụ a k'a wụ ndị-isi nchụn ẹjan ọ nwụnhụn, kẹni wẹ e yiri wẹ wẹ gha e hukpu wẹ udẹn ntumẹ lẹ ebe wẹ rị e tumẹ wẹ.

³⁰ Nwa a okẹnnyẹ hụn k'e họnrin onyẹ-isi nchụn-ẹjan ọ nwụnhụngụ, nwa a hụn k'a banye Ọdụ-ozuzu d'a rụn ọrụn imẹ Ebe rị Nsọ sikọ d'e yi ẹwuru ndị ahụn akpọhịn ẹsa.

³¹ “Weri ebulu hụ wẹ gi tumẹ wẹ, y'a nọ ebe rị nsọ shi ẹ.

³² Ẹrọnụ lẹ ụmụ a ikẹnnyẹ jẹnkọ d'a nọ ọnụmụzọ Ọdụ-ozuzu ri anụ ebulu ahụn lẹ brẹdi ndị ahụn rị ụkpalị.

³³ Wẹ sụọ k'e rị ihiẹn ndị ahụn wẹ gi chụn ẹjan-njọ, hụn wẹ gi dọn wẹ nsọ tumẹ wẹ. Onwọnni onyẹ ọzọ k'e rini wẹ, makẹni wẹ rị nsọ.

³⁴ Anụ ebulu ahụn wẹ gi tumẹ wẹ mọbụ brẹdi hụ bọ ọra, wẹ k'a dụn a ọkụn; onyẹ ọwụlẹ erikwọl'a, makẹni ihiẹn rị nsọ rọ.

³⁵ “Mẹni Ẹrọnụ lẹ ụmụ a ikẹnnyẹ ihiẹn ile m gwa ị; akpọhịn ẹsa kẹ y'e gi dọn wẹ nsọ tumẹ wẹ.

³⁶ Ọrọgbọ akpọhịn ẹsa hụ, gi efin ohu-ohu chụnsọnmẹ ẹjan-njọ wẹ gi e wepụ njọ ụhụọhịn-ụhụọhịn. Chụn ẹjan wẹ gi e wepụ njọ gi dọn ukpo nchụn-ẹjan hụ nsọ, y'e hukpu ukpo ahụn udẹn-nsọ, gi dọn ẹ nsọ.

³⁷ Ọrọgbọ akpọhịn ẹsa kẹ y'e gi chụnsọnmẹ ẹjan hụ wẹ gi e wepụ njọ makẹ ukpo nchụn-ẹjan hụ, e dọn ẹ nsọ; ukpo nchụn-ẹjan ahụn sikọ d'e gi ẹ rịchanrịn nsọ, ihiẹn ọwụlẹ mẹtụn'a e họnrin ihiẹn w'a sọ wẹ k'e gbu.

³⁸ “Ihiẹn y'e gi chụn ẹjan elu ukpo nchụn-ẹjan wụ ụmụ-atụnrụn ẹbụọ rịsọnmẹ ahụa ohu-ohu.

³⁹ I gi ohu chụn ụzụtụntụn, y'e gi ohu chụn ebe ọhị nọ gbama.

⁴⁰ Ihiẹn wẹ e gi chụnye atụnrụn ibuzọ wụ ọka-witi wẹ gweriẹn hụn k'e jun mkpu-kọstadị nta ẹbụọ lẹ ofigbọn-olivu wẹ sụ asụ k'e jun mkpu-kọstadị nta ohu lẹ oyiye-manya k'e junzi mkpu-kọstadị nta ohu.

⁴¹ Ọhị gbama y'a chụnye atụnrụn hụn ẹbọ ahụn lẹzi oyiye-ọka lẹ ihiẹn-ọrịra nke ẹ, k'i dọn mẹ nke ụtụntụn: ọ wụrụ ihiẹn e shin ọhụnma, oyiye wẹ gi ọkụn ye Osolobuẹ.

⁴² “Agbọ ile lalanị, wẹ sikọ d'a gha a chụn ẹjan ndịnị w'a dụn ọkụn ogẹn ahụn wẹ kayen'ẹ, ihun Osolobuẹ ọnụmụzọ Ọdụ-ozuzu, ebẹhụ kẹ m'a nọ e kunrun i, a gwa ị oku;

⁴³ ebẹhụ kẹ mmẹ lẹ ndị Izrẹlụ k'a nọzị e zu; ọghọ rị m ẹhụ k'e dọn ebẹhụ nsọ.

⁴⁴ “Ẹrịra kẹ m'e gi dọn Ọdụ-ozuzu lẹ ukpo nchụn-ẹjan nsọ, dọnzikwọ Ẹrọnụ lẹ ụmụ a ikẹnnyẹ nsọ nị wẹ rụnmanị m ọrụn ndị nchụn-ẹjan;

⁴⁵ e biri m imẹ igunrun ndị Izrẹlụ, a wụrụ m Chuku wẹ,

⁴⁶ a marịn wẹ nị mmẹ wụ Osolobuẹ Chuku wẹ hụn gha alị ijiptu wepụha wẹ nị m hụn ụzọ biri imẹ igunrun wẹ. Mmẹ wụ Osolobuẹ, Chuku wẹ.