Ọpụpụ 28 - Ika

Isi Nke Ẹsatọ Kwasị Ọgụn Ẹwuru Ndị Nchụn-Ẹjan

¹ “Gha imẹ ndị Izrẹlụ weri Ẹrọnụ nwẹnẹ i tumẹ, n'ọ hụn ụzọ rụnmanị m ọrụn ịchụn-ẹjan, ya lẹ ụmụ a ikẹnnyẹ, Nadabụ lẹ Abihu, lẹ Ẹliẹza lẹ Itama.

² “I jẹnkọ d'e mẹmẹni Ẹrọnụ nwẹnẹ i ẹwuru-nsọ pụ-ichẹn hụn k'e ye ẹ ọghọ lẹ ikpẹn.

³ Gwa ndị ọkaa ile, ndị m ye akọ-lẹ-uche w'e gi mẹ ihiẹn ndị nọ ẹnịna, wẹ k'e mẹmẹni Ẹrọnụ ẹkwa ndị w'e gi dọn ẹ nsọ, n'ọ hụn ụzọ rụnmanị m ọrụn ịchụn-ẹjan.

⁴ Lee ẹkwa ichẹn-ichẹn wẹ jẹnkọ d'a kwa: Ẹkpa Elu-obi, ẹfọdụ w'e yiyechanrịn elu ẹ, ẹwuru tueghafe mkpụkụ, ẹwuru ọrụn nchụn-ẹjan tueru alị wẹ kpa, okpu isi ohu lẹ eriri ohu. Ẹrọnụ nwẹnẹ i lẹ ụmụ a ikẹnnyẹ kẹ wẹ k'a kwanị ẹkwa-nsọ ndịnị, nị wẹ hụn ụzọ a rụnnị m ọrụn ndị a chụn ẹjan.

⁵ Wẹ sikọ d'e weri goru lẹ oruru bru lẹ nke pọpụ lẹ nke ododo lẹ ẹkwa-linẹni riẹnni gi kwa wẹ.

Ẹwuru Ẹfọdụ W'e Kẹnmẹ Isi-uvun

⁶ “Wẹ gi ẹkwa-linẹni riẹnni kwa ẹwuru ẹfọdụ, kpayesọnmẹ ẹ ihiẹn goru lẹ oruru bru lẹ nke pọpụ lẹ nke ododo, kpayesọnmẹ wẹ ọhụnma.

⁷ O sikọ d'a wụ ibe-ẹkwa ihun lẹ ibe-ẹkwa azụụn hụn rusọnmẹ isi-uvun azụụnnị lẹ azụụnnị; wẹ sikọ d'e nwọn ebe rị isi-uvun wẹ gi e wegbama wẹ.

⁸ Ẹwuru-ẹfọdụnị jẹnkọ d'e nwọn nfifie-ukun nke ẹ wẹ kpa n'ọ ma mma, hụn k'a wụzị ẹkwa-linẹni wẹ kpayesọnmẹ ihiẹn-goru lẹ oruru bru lẹ nke pọpụ lẹ nke ododo.

Ọmụma Ẹbụọ Pụ-ichẹn Hụn K'a Rị Isi-uvun

⁹ “Weri ọmụma ọnik'si ẹbụọ, y'a tụ ẹfan ebọn ichẹn-ichẹn rị Izrẹlụ ye elu wẹ:

¹⁰ tụ ẹfan isin imẹ wẹ ye ọmụma ohu, y'a tụ ẹfan isin họdụnị ye hụn ẹbọ; tụyesọnmẹ wẹ kẹ wẹ dọnsọnmẹ dịan.

¹¹ Tụ ẹfan ebọn Izrẹlụ ndị ahụn ye enu ọmụma ẹbụọ hụ kẹ w'a tụ ihiẹn wẹ gi e biye ẹka; gi goru mẹmẹni wẹ akpa nọsọnmẹ kẹ ẹru w'e gi kwọndọn wẹ;

¹² y'a kpa wẹ ye isi-uvun ẹfọdụ azụụnnị lẹ azụụnnị, a wụrụ wẹ ọmụma w'e gi a nyanhan ebọn Izrẹlụ ile. Ẹrọnụ k'a gha e bu ẹfan ndị hụ isi-uvun ihun Osolobuẹ, e gi ẹ a nyanhann'a ndị Izrẹlụ.

¹³ “Gi goru mẹmẹ akpa nọsọnmẹ kẹ ẹru;

¹⁴ y'e gi ezigbo goru wẹ buchelẹni ihiẹn ọzọ kpa eriri ẹbụ, y'a kụnma wẹ ohu-ohu ye akpa goru ndị ahụn nọ kẹ ẹru.

Ẹkpa Elu-obi

¹⁵ “Mẹmẹ Ẹkpa Elu-obi w'e gi a chọ uche Osolobuẹ. Ọkaa jẹnkọ d'e mẹmẹ ẹ. Gizi ẹkwa-linẹni riẹnni wẹ kpaye ihiẹn-goru lẹ oruru bru lẹ nke pọpụ lẹ nke ododo mẹmẹ ẹ, ihiẹn i gi mẹmẹ Ẹwuru Ẹfọdụ ahụn.

¹⁶ Usue ẹ lẹ ụshịa a k'a han, wẹ magigụ a n'o họnrin ẹkpa. O k'a shịahan kẹ ubẹka ẹtọ.

¹⁷ Kpa ọmụma pụ-ichẹn ye ogele ẹnọ elu ẹ. Ọmụma ẹtọ hụn k'a rị ogele ibuzọ wụ rubi, tọpazị lẹ berilu;

¹⁸ ogele nke ẹbụọ wụ tọkwọịzị, safaya lẹ ẹmaradị;

¹⁹ ogele nke ẹtọ wụ jasịntị, ageti lẹ amitisti;

²⁰ ogele nke ẹnọ wụ krisolaịtị, ọnik'si lẹ jaspa. Gi akpa goru nọsọnmẹ kẹ ẹru kpadọn wẹ.

²¹ “Ọmụma ndịnị sikọ d'e bu ẹfan ebọn mmẹbụọ Izrẹlụ; wẹ k'a tụyesọnmẹ wẹ ẹfan ebọn nọkẹ ihiẹn wẹ gi e biye ẹka; ebọn-ebọn ohu-ohu.

²² Gi ezigbo goru wẹ buchelẹni ihiẹn ọzọ kpa eriri ẹbụọ w'e gi kọnye Ẹkpa Elu-obi hụ.

²³ Gizi goru mẹmẹ ẹgba ẹbụọ k'a rị Ẹkpa Elu-obi ahụn, y'e bu ẹgba ndị ahụn che ntịn a ẹbụọ rị ibe elu.

²⁴ Gan eriri goru ẹbụọ hụ ye ẹgba ẹbụọ ahụn rị ntịn ẹbụọ elu Ẹkpa Elu-obi hụ,

²⁵ y'e we isi ẹbụọ họdụ eriri goru ndị ahụn ganyesọnmẹ isi-uvun ẹfọdụ.

²⁶ Y'e gi goru mẹmẹ ẹgba ẹbụọ, gba wẹ ye isini lẹ isini ibe azụụn Ẹkpa Elu-obi, ẹhụ ntịn a ẹbụbụọ rị ibe alị, ọ nọkunmẹ Ẹwuru ẹfọdụ.

²⁷ Gizi goru mẹmẹ ẹgba ẹbụọ kwayesọnmẹ azụụnnị lẹ azụụnnị ibe alị ihun ẹwuru-ẹfọdụ hụ, kanị o rugụkọ nfifie-ukun ẹfọdụ.

²⁸ Wẹ sikọ d'e gi eriri bru kẹn ẹgba ndị rịsọnmẹ azụụn Ẹkpa Elu-obi ye ndị rị ibe alị ihun ẹwuru-ẹfọdụ, ẹkpa elu-obi a nọkwasịchanrịn eriri-ukun Ẹfọdụ, makẹ Ẹkpa Elu-obi gha e mẹhunmẹ.

²⁹ “Ogẹn ọwụlẹ Ẹrọnụ banye Ebe rị Nsọ, o buhụ ẹfan ebọn Izrẹlụ ile elu obi ẹ, enu Ẹkpa Elu-obi ahụn, n'ọ hụn ụzọ wụrụ ihiẹn w'e gi a nyanhansọnmẹ wẹ ihun Osolobuẹ.

³⁰ Buzikwọ utẹn Osolobuẹ wụ Urim lẹ Tumim hụ wẹ gi a jụ a uche ẹ che imẹ Ẹkpa Elu-obi, kẹni wẹ hụn ụzọ a rị Ẹrọnụ elu obi ọ banye ebe Osolobuẹ rị, Ẹrọnụ a hụn ụzọ e buni ndị Izrẹlụ ihiẹn wẹ gi a chọ uche Osolobuẹ ebe Osolobuẹ rị ogẹn ile.

Ẹkwa Ndị Ọzọ Ndị Nchụn Ẹjan E Yi

³¹ “Gi ẹkwa bru sụọ kwazị ẹwuru tueghafe mkpụkụ w'e yiye ẹfọdụ elu ẹ;

³² oghe wẹ gha e woye ẹ isi k'a rị ahanmahan a, e gbihunmẹ wẹ olu ẹ hụ makẹ ọ gha a dọka.

³³ Gi oruru bru lẹ nke pọpụ lẹ nke ododo kpa ogbe pomegraneti ghahunmẹchanrịn ntịn ẹwuru hụ, y'e bu mgbịrịgban-goru mẹsọnmẹ ẹkẹrẹ-ẹkẹrẹ, chesọnmẹ ẹgbata pomegraneti:

³⁴ mgbịrịgban-goru nta ndị hụ lẹ mkpụrụ-osisi pomegraneti ndị ahụn a dugwasọnmẹ ibe wẹ.

³⁵ Ẹrọnụ k'e yirịrị a ọ gha a rụn ọrụn onyẹ nchụn-ẹjan. K'ọ bankọ ihun Osolobuẹ imẹ Ebẹhụ rị Nsọ abankọ k'ọ pụkọ apụkọ, wẹ k'a gha a nụ ukwere mgbịrịgban-goru ndị hụ mẹsọnmẹ ẹkẹrẹ-ẹkẹrẹ, makẹ ọ gha a nwụnhụn.

Ibe Goru Rị Okpu Onyẹ-isi Nchụn-ẹjan

³⁶ “Gi goru wẹ buchelẹni ihiẹn ọzọ mẹmẹ ibe-goru, y'a tụye ẹ ihiẹnni: ‘Hụn Wẹ Gi Kwanị Osolobuẹ’. Tụ a kẹ w'a tụ ihiẹn wẹ gi e biye ẹka.

³⁷ Gi eriri bru wẹ kpa kẹn ẹ ye okpu ẹ. Ihun okpu hụ k'o sikọ d'a rị.

³⁸ O k'a rị Ẹrọnụ ezimezi ihun, o gi e bupụ ihiẹn ile ikpe e gi ma ndị Izrẹlụ ebe oyiye nsọ ile w'e ye rị. O k'a rịsọnmẹ Ẹrọnụ ezimezi ihun kẹni Osolobuẹ hụn ụzọ a narịn wẹ oyiye ndị ahụn.

Ẹwuru Tuniki Tueru Alị

³⁹ “Gi ẹkwa-linẹni riẹnni kpa ẹwuru ọrụn nchụn-ẹjan tueru alị, y'e gizi ẹkwa-linẹni kwa okpu; kpazịnị hụnnị nfifie shịanị ma mma.

⁴⁰ “Kwanị ụmụ-ikẹnnyẹ Ẹrọnụ ẹwuru ọrụn nchụn-ẹjan tueru alị lẹ nfifie shịanị lẹ okpu, kẹni ọghọ lẹ ikpẹn hụn ụzọ a rị wẹ ẹhụ.

⁴¹ I jẹnkọ d'e yimẹ Ẹrọnụ nwẹnẹ i lẹ ụmụ a ikẹnnyẹ ẹkwa ndịnị, y'e hukpu wẹ udẹn wẹ gi e tumẹ ịhịan, tumẹ wẹ. Y'e wepụha wẹ nị wẹ rụnmanị m ọrụn ịchụn-ẹjan.

⁴² “Gi ẹkwa-linẹni mẹmẹni wẹ apa tueru ọgbọdọgbọ nị w'e gi ẹ e kpumẹ ẹhụ.

⁴³ Ẹrọnụ lẹ ụmụ a ikẹnnyẹ k'e yirịrị a ogẹn ile wẹ sikọ d'a banye Ọdụ-ozuzu mọbụ nọkunmẹ ukpo-nsẹnsị imẹ Ebe Rị Nsọ d'a rụn ọrụn ofufe, makẹ ikpe gha a ma wẹ, a nwụnhụn wẹ. Ẹrọnụ lẹ ụmụ a k'e dọnmẹ iwuni jẹnrin-ejẹn.