Ọpụpụ 25 - Ika

Isi Nke Isẹn Kwasị Ọgụn Ihiẹn Ndị Izrẹlụ Ye Nị Wẹ Gi Tụn Ọdụ-nsọ

¹ Osolobuẹ nọ sị Mozizi,

² “Gwa ndị Izrẹlụ wẹ wẹhẹsọnmẹni m oyiye. Obi ịhịan gba n'o ye ihiẹn y'a narịnnị m'a ya.

³ “Lee ihiẹn i jẹnkọ d'a nahan wẹ: goru, siliva, igwe-bronzu;

⁴ oruru e nwun bru-bru lẹ hụn e nwun pọpụ-pọpụ lẹ hụn e nwun ododo-ododo lẹzi oruru linẹ riẹnni lẹzikwọ ẹṅẹnrẹn ewu;

⁵ akpụkpọ ebulu wẹ gi ihiẹn e nwun ododo-ododo yegbu lẹ akpụkpọ enyi-ohimin lẹ osisi zeni wụ akashịa;

⁶ ofugbọn-olivu w'e gi mụ ukpẹ; ihiẹn ndị e shin ọhụnma w'e gi mẹmẹ udẹn-ntumẹ lẹ nsẹnsi e shin ọhụnma;

⁷ lẹzi ọmụma-ọnik'si lẹ ọmụma ndị ọzọ pụ-ichẹn e gbukeni wẹ jẹnkọ d'a nyanyesọnmẹ ihun ẹwuru-ẹfọdụ ndị nchụn-ẹjan k'e yiye elu ẹ lẹ Ẹkpa Elu-obi hụn onyẹ-isi wẹ k'a kụnmazị obi.

⁸ “Wẹ tụnnị m Ọdụ-nsọ, kẹni m biri imẹ igunrun wẹ.

⁹ I sikọ d'e mẹmẹ Ọdụ-nsọnị lẹ ihiẹn ile jẹnkọ d'a rịn'a n'ọ rịchanrịn kẹ m k'a dọn ghọsị ị.

Ẹkpẹti Nkwerigbama

¹⁰ “Sị wẹ gi osisi ze ọhụnma-ọhụnma, osisi akashịa, rụn ẹkpẹti: usue ẹkpẹti ahụn k'a wụ ọbụkụ ẹtọ lẹ hụn kazị mkpikpi, ụshịa a k'a wụ ọbụkụ ẹbụọ lẹ hụn rulẹni mkpikpi, ojijẹn-elu ẹ k'a wụ ọbụkụ ẹbụọ lẹ hụn rulẹni mkpikpi.

¹¹ Gi ezigbo goru wẹ buchelẹni ihiẹn ọzọ nyan a, kẹ imẹ ẹ kẹ azụụn a, y'e gizi goru gbihunmẹ ọnụ a.

¹² Gi goru kpụ ẹgba yesọnmẹ ụkụ a ẹnịnọ, ẹbụọ azụụnnị, ẹbụọ azụụnnị.

¹³ Gi osisi akashịa mẹmẹ ẹgbe, y'e gi goru nyankwama wẹ.

¹⁴ Fa ẹgbe ndị hụ ye okporo ẹgba ndị ahụn rịsọnmẹ ụkụ ẹkpẹti ahụn azụụnnị lẹ azụụnnị, nị wẹ gi wẹ e bu ẹkpẹti hụ.

¹⁵ Ẹgbe ndị hụ k'a nọdịferi imẹ ẹgba ndị ahụn rị ẹkpẹti hụ; a fịọpụkọ wẹ wẹ.

¹⁶ I sikọ d'e bu ọmụma ndị ahụn wụ Ọshẹri hụn m jẹnkọ d'e deyesọnmẹ Iwu buye i che imẹ ẹ.

¹⁷ “Gi ezigbo goru wẹ buchelẹni ihiẹn ọzọ mẹmẹ okun ẹkpẹti hụ, okun wẹ nọ a gbarị isi. Usue ẹ k'a wụ ọbụkụ ẹtọ lẹ hụn kazị mkpikpi, ụshịa a k'a wụ ụbụkụ ẹbụọ lẹ hụn kazị mkpikpi.

¹⁸ Gi goru wẹ tipịa kpụ chẹrobu ẹbụọ ye okun ẹkpẹti hụ isi ẹ ni lẹ isi ẹ ni:

¹⁹ kpụgbama okun ẹkpẹti hụ lẹ chẹrobu ndị hụ k'a rị a isini lẹ isini.

²⁰ Nku chẹrobu ndị ahụn k'e shi elu, shịakpu okun ẹkpẹti ahụn. Wẹ k'e chetarị ihun, wezi ihun kọma okun ahụn.

²¹ “Bu okun ahụn che elu ẹkpẹti hụ, y'e bu Ọshẹri hụn m k'e ye i che imẹ ẹkpẹti.

²² Elu ebẹhụ okun ahụn wẹ nọ a gbarị isi rị, ẹgbata chẹrobu ẹbụọ ahụn nwọn nku rị elu ẹkpẹti-Ọshẹri ahụn, kẹ mmẹ lẹ ịyụ k'a nọ zu kẹni m gwa ị ihiẹn ile m chọ nị ndị Izrẹlụ e mẹ.

Teburu Wẹ Gi E Butọnị Osolobuẹ Brẹdi

²³ “Gi osisi zeni, osisi akashịa, mẹmẹ teburu: usue ẹ ya wụrụ ọbụkụ-ẹtọ, ụshịa a ya wụrụ ọbụkụ ohu lẹ mkpikpi, ojijẹn-elu ẹ ya wụrụ ọbụkụ ẹbụọ lẹ hụn rulẹni mkpikpi.

²⁴ Gi goru wụ goru sụọ nyankwama a, y'e gi goru gbihunmẹ ẹ.

²⁵ Gi ibe osisi shịahan kẹ ọb'ẹka kiri teburu hụ, y'e gi goru nyan ibe osisi hụ.

²⁶ Gi goru kpụ ẹgba ẹnọ ye ntịn teburu ahụn ẹnọ, ebe ụkụ a ẹnịnọ rịsọnmẹ.

²⁷ Ẹgba goru ndị ahụn jẹnkọ d'a rị osisi hụ wẹ gi kiri teburu hụ kẹni wẹ fa ẹgbe w'e gi e bu teburu hụ ye imẹ wẹ.

²⁸ Gi osisi akashịa mẹmẹ ẹgbe ndị ahụn, y'e gi goru nyankwama wẹ, e gi wẹ wẹ e bu teburu hụ;

²⁹ y'e gi ezigbo goru wẹ buchelẹni ihiẹn ọzọ mẹmẹ afẹrẹ-unyẹgbe lẹ mkpu lẹ afẹrẹ-mgbugbu hụn wẹ lẹ teburu hụ wị — hụn w'e gi e huye oyiye.

³⁰ “E bu Brẹdi W'e Wepụhanị m a tọ ihun m elu teburuni ogẹn ile.

Obu-Ukpẹ Nọ Kẹ Osisi Nwọn Agalaba

³¹ “Gi ezigbo goru wẹ buchelẹni ihiẹn ọzọ hụn wẹ tipịa mẹmẹ obu-ukpẹ. Kẹ ukun ẹ kẹ ogwe ẹ kẹ mkpu ẹ ile hụn nọkẹ mkpụkpụma lẹ obobo amọndụ k'a wụ ibe ohu.

³² Obu-ukpẹ hụ k'a wa agalaba isin — ẹtọ azụụnnị, ẹtọ azụụnnị.

³³ Mkpu ẹtọ-ẹtọ rịsọnmẹ kẹ obobo amọndụ — hụn obobo ẹ lẹ mkpụkpụma a rị a — jẹnkọ d'a rịsọnmẹ agalaba ọwụlẹ imẹ agalaba isin ahụn rịn'a hụn gha ogwe ẹ suepụha.

³⁴ Mkpu ẹnọ rịsọnmẹ kẹ obobo amọndụ hụn obobo ẹ lẹ mkpụkpụma rị a jẹnkọ d'a rị ogwe obu-ukpẹ ahụn.

³⁵ Mkpụkpụma ohu k'a rị okpuru agalaba ẹbụọ-ẹbụọ wịsọnmẹ suepụha obu-ukpẹ: ohu okpuru ẹbụọ ibuzọ, ohu okpuru ẹbụọ mẹ wẹ ẹnọ, ohu okpuru ẹbụọ mẹ wẹ isin.

³⁶ Mkpụkpụma ndị ahụn lẹ agala ndị hụ lẹ ogwe obu-ukpẹ hụ k'a wụchanrịn ibe ohu, ezigbo goru wẹ buchelẹni ihiẹn ọzọ hụn wẹ tipịa.

³⁷ “Y'e mẹmẹ nwan ukpẹ ẹ ẹsa, dọnyesọnmẹ wẹ elu obu-ukpẹ ahụn, kẹni w'e nwunye agbagada hụ rị a ihun.

³⁸ Nwa-mbu wẹ gi a fị a lẹ unyẹgbe ẹ jẹnkọ d'a wụ goru wẹ buchelẹni ihiẹn ọzọ.

³⁹ Goru wẹ buchelẹni ihiẹn ọzọ hụn nyịnhan kẹ ẹkpa nnu ohu lẹ mkpikpi kẹ wẹ k'e gi mẹmẹ obu-ukpẹ ahụn lẹ ihiẹn ile rịn'a.

⁴⁰ Hụnkwọ a n'i mẹmẹ wẹ kẹ wẹ dọn nwan ghọs'ị elu-ugu.