Ọpụpụ 24 - Ika

Isi Nke Ẹnọ Kwasị Ọgụn Izrẹlụ E Kweri Idọnmẹ Iwu Osolobuẹ

¹ Ya Osolobuẹ nọ sị Mozizi, “Bịa nị d'e kunrun Osolobuẹ, ịyụ lẹ Ẹrọnụ, Nadabụ lẹ Abihu lẹ mmadụ iri kwasị ọgụn-ẹtọ imẹ ndị-ichẹn Izrẹlụ. Ụnụ ile k'a gha ebe teyezini kụnị m isi alị;

² ịyụ wụ Mozizi sụọ k'a nọzụnhan ebe Osolobuẹ rị. Wẹ nwẹn anọzụnhankwọlẹ; ndị Izrẹlụ họdụnị esọnhẹnkwọlẹ i.”

³ Ogẹn Mozizi gi jẹn d'a gwa wẹ ihiẹn ile Osolobuẹ ku lẹ iwu ile o ye, wẹ ile nọ ku ihiẹn ohu, sị, “Ihiẹn ile Osolobuẹ sị ẹnyi mẹ, ẹnyi k'e mẹchanrịn wẹ.”

⁴ Ya Mozizi nọ detuchanrịn ihiẹn ile Osolobuẹ ku. Eki e fọn Ụzụtụntụn, ọ nọ zọlihi, rụn ukpo nchụn-ẹjan ye ukun ugu ahụn, buzi ọmụma mmẹbụọ sueni zumẹ — o gi nọkin ẹnya ebọn mmẹbụọ rị Izrẹlụ.

⁵ Ya ọ nọ zi ikorọbịa Izrẹlụ, wẹ nọ chụn ẹjan w'a dụn ọkụn, gisọnmẹ okoro efin chụnyeni Osolobuẹ ẹjan-ekele.

⁶ Mozizi nọ kebe ẹdeke efin ndị ahụn ẹbụọ, hu azụụn ohu ye imẹ afẹrẹ, fe hụn họdụnị ye ukpo nchụn-ẹjan ahụn ọ rụn.

⁷ Ya ọ nọ weri Ẹkụkwọ Nkwerigbama hụ o detu, gụnnị wẹ ile ya. Wẹ ile nọ sị, “Ihiẹn ile Osolobuẹ sị ẹnyi mẹ; ẹnyi k'e mẹchanrịn wẹ; ẹnyi k'e humẹ isi.”

⁸ Mozizi nọ nwan weri ẹdeke ahụn, fe ẹ kpu wẹ, sị, “Ọnwan wụ ẹdeke nkwerigbama ahụn hụn Osolobuẹ gi kwọngbama ụnụ lẹ ya, kẹ wẹ dọn detusọnmẹ ẹ ebeni.”

⁹ Mozizi lẹ Ẹrọnụ, lẹ Nadabụ lẹ Abihu, lẹzi ndị-ichẹn Izrẹlụ iri kwasị ọgụn ẹtọ ahụn nọ nyinrin ugu ahụn,

¹⁰ wẹ nọ hụn Osolobuẹ Izrẹlụ. Ihiẹn rị kẹ mgbankpo wẹ gi ọmụma-safaya rụn rị a okpuru ụkụ — e nwun zaị kẹ igwere.

¹¹ Kanị Osolobuẹ egbuni ndị-ichẹn Izrẹlụ ahụn; a hụn wẹ Osolobuẹ, e ri wẹ, ra.

¹² Osolobuẹ nọ sị Mozizi, “Nyinhẹn elu-ugu d'e kunrun m, n'i nọdị ebeni, nị m hụn ụzọ ye i ibe ọmụma m deye iwu lẹ ihiẹn ndị m sị wẹ mẹ, nị wẹ gi a kuzi wẹ.”

¹³ Ya kẹ Mozizi nọ weri Joshụa hụn e jẹnn'ẹ ozi, jẹnmẹ. Ọ nọ nyinrin ugu Chuku.

¹⁴ Nị Mozizi d'e jẹnmẹ, ọ sị ndị-ichẹn ahụn, “Cheri ni ẹnyi ebeni d'e ru mgbe ẹnyi kinhẹn. Ẹrọnụ lẹ Họ hụ a: onyẹ ọwụlẹ nwọn oku wẹ k'e dọnzi ya jẹn d'e kunrun wẹ.”

¹⁵ Ogẹn Mozizi gi nyinrin ugu ahụn, orukpu ahụn Osolobuẹ gi e hidan nọ kpumẹ ugu ahụn,

¹⁶ orukpu hụ Osolobuẹ gi a ghọsị enwẹn ẹ nọ hidanye Ugu-Saịnaị ahụn. Orukpu ahụn nọdị elu-ugu hụ ọrọgbọ akpọhịn isin; hụn mẹ akpọhịn ẹsa kẹ Osolobuẹ gha imẹ orukpu hụ kpọ Mozizi oku.

¹⁷ Ẹnya ndị Izrẹlụ, ọghọ hụn Osolobuẹ gi pụha nọhụ kẹ ọkụn hụn rị a dụnnị enu-ugu ahụn.

¹⁸ Mozizi e nyinrin ugu hụ, banye imẹ orukpu ahụn; efinaị lẹ uhinhin akpọhịn ọgụnnaị k'ọ nọdị elu ugu ebẹhụ.