Ọpụpụ 22 - Ika

Isi Nke Ẹbụọ Kwasị Ọgụn Ihiẹn Ịhịan

¹ “Onyẹ zu efin mọbụ atụnrụn, gbu ẹ mọbụ re ẹ, o k'e girịrị efin isẹn kụ ụgwọ efin hụ, gi atụnrụn ẹnọ kụ ụgwọ atụnrụn ahụn.

² “Wẹ nwụn ohin ebe ọ rị e gbukpọ n'ọ banye iwe ịhịan, n'a kụgbu w'ẹ, ẹdeke ẹ arịkọ isi onyẹ kụgbun'ẹ;

³ kanị, omẹni eki e fọngụọ, n'ọ kụgbu ẹ ebe eki rị elu, ẹdeke ẹ k'a rị hụn kụgbun'ẹ isi. “Onyẹ-ohin k'a kụrịrị ụgwọ ihiẹn o zun; omẹni onwọnni ihiẹn o nwọn, e re wẹ ya lẹ enwẹn ẹ gi kụ ụgwọ ihiẹn o zun.

⁴ “Omẹni anụ hụ o zu hụkwọ ndụn ogẹn wẹ gi hụn a ẹka a, ọsụọn'a efin mọbụ jaki mọbụ atụnrụn rọ, ọ k'e gi ẹbụọ kụ ụgwọ a.

⁵ “Omẹni ịhịan kịjẹn anụ a ogige mọbụ ugbo d'a kpa nni, ọ nị wẹ kpaghafe, shi ogige onyẹ ọzọ d'a kpa nni, o k'e gi ihiẹn kachanrịn mma imẹ ugbo ẹ mọbụ alị vaịnị a kụ ụgwọ.

⁶ “Omẹni ọkụn a dụnban osisi-ogun wẹ gi gbọ okẹn, gha ebẹhụ dụnban ugbo onyẹ ọzọ — dụn ọka wẹ betọ mọbụ ukun ọka turuni mọbụ ugbo hụ ile, onyẹ yi ọkụn ahụn k'a kụrịrị ụgwọ.

⁷ “Omẹni ịhịan ye ibe ẹ egho mọbụ ihiẹn ọzọ dọnmẹn'ẹ, ohin a nọ iwe hụn dọnmẹn'ẹ zunrun ẹ, wẹ hụn ohin ahụn, o k'e girịrị ẹbụọ kụ ụgwọ ohu ahụn o zun.

⁸ Kanị omẹni ahụnnị wẹ ohin hụ, onyẹ wẹ nọ iwe ẹ zunrun ẹ k'a bịarịrị d'e kunrun ndị oku rị ẹka, e gi wẹ ẹfan Osolobuẹ chọpụha kẹ o buọlẹ ẹka che ihiẹn ibe ẹ.

⁹ “Ikpe ile gbasharị ihiẹn ọwụlẹ wẹ rị a zụọ, kẹ efin kẹ jaki kẹ atụnrụn kẹ ẹkwa kẹzi ihiẹn ọzọ ọwụlẹ tuhuni, hụnnị sị, ‘Mmẹ nwọn ẹ’, hụn ẹbọ sị, ‘Nke m rọ’. Wẹ ẹbụọ sikọ d'e jẹnburu ndị oku rị ẹka. Hụn ndị oku rị ẹka sị ya kẹ ikpe ma k'e ye hụn ẹbọ ẹbụọ.

¹⁰ “Omẹni ịhịan ye ibe ẹ jaki mọbụ efin mọbụ atụnrụn mọbụ anụ ọzọ lepụ ẹnya, anụ ahụn a nwụnhụn mọbụ rụ ẹhụ mọbụ nị e buru w'ẹ, onwọnni onyẹ marịnnị,

¹¹ wẹ sikọ d'e gi ikun ẹfan Osolobuẹ dọnzini wẹ oku ahụn: hụnyẹ e gi ẹ ku nị ẹka a arị ihiẹn mẹ ihiẹn wẹ ye ẹ dọnmẹ. Hụn nwọn ihiẹn hụ ya weri ẹ ẹrịra, la oku tọ; hụnyẹ akụkọ ụgwọ ọwụlẹ.

¹² Kanị, omẹni ẹka onyẹ wẹ ye anụ hụ lepụ ẹnya kẹ wẹ nọ zuru ẹ, o jẹnkọ d'a kụrịrị onyẹ nwọnn'ẹ ụgwọ.

¹³ Omẹni anụ-ọfịa gbu ẹ, dọrinrin ẹ, ya wẹhẹ ẹ n'ọ wụrụn'a ọshẹri; o wẹhẹ ẹ, asịkọ w'a kụ ụgwọ anụ ahụn anụ gbu.

¹⁴ “Omẹni ịhịan narịn ibe ẹ anụ, anụ ahụn a rụ ẹhụ mọbụ nwụnhụn bụ onyẹ nwọnn'ẹ arị ebẹhụ, o k'a kụrịrị ụgwọ a.

¹⁵ Kanị, omẹni ẹnya onyẹ nwọnn'ẹ kẹ ihiẹn mẹn'ẹ nọ mẹ ẹ, hụn wẹ y'ẹ akụkọ ụgwọ a. Omẹni o nwọn egho ọ kụ n'o d'e weri ẹ, egho ahụn e zugụọ a.

Iwu Ichẹn-ichẹn

¹⁶ “Okẹnnyẹ rẹrẹ okpoho wẹ kelẹni badọn, mẹ mgba okpoho hụ, o k'e burịrị egho ẹ, lụma a.

¹⁷ Nẹdi nwata-okpoho ahụn jụchanrịn n'o yekọ a nwa a, okẹnnyẹ ahụn k'e bukwọ egho wẹ gi a lụ nwagbọọ.

¹⁸ “Edọnmẹkwọlẹ ni ogbomẹ ndụn.

¹⁹ “Onyẹ mẹ mgba anụ, wẹ k'e gburịrị a.

²⁰ “Onyẹ ọwụlẹ chụnyeni mmọn ọwụlẹ ẹjan karị Osolobuẹ, wẹ k'e gburịrị a.

²¹ “Emẹjakwọlẹ ni abịamabịa mọbụ bịangbu ẹ, makẹni ụnụ nwẹn te wụ abịamabịa imẹ alị Ijiptu.

²² “Emẹgbukwọlẹ ni okpoho di ẹ nwụn mọbụ onyẹ nwọnlẹni nẹdi mọbụ nnẹ.

²³ Ụnụ mẹ ẹ, n'a kwanghọsị wẹ m, m k'a nụrịrị ẹkwan wẹ.

²⁴ Onunu k'e bu m, e gi m ọpịa-agha gbupụ ụnụ, inyẹnmẹ ụnụ e họnrin ndị di wẹ nwụn, ụmụ ụnụ e họnrin ndị nwọnlẹni nẹdi.

²⁵ “I zinye onyẹ mkpa gi imẹ ụnụ ndị nke m egho, emẹkwọlẹ kẹ onyẹ e zinye egho — anakwọl'a ọmụnịnwa.

²⁶ Ị narịn ibe i ẹkwa a gi fieri ụgwọ, anwụn dan y'e wekinn'ẹ ya;

²⁷ makẹni ẹkwa a hụ sụọ k'o nwọn o gi e kpumẹ ẹhụ a. K'o k'e gizi nwan ranhịn? Ọ kwanghọsị m, m k'a nụ, makẹni m wụ onyẹ omikẹn.

²⁸ “Ekujakwọlẹ oku Osolobuẹ mọbụ kpọ onyẹ-ndu ndị nke ụnụ iyi.

²⁹ “Agharịkwọlẹ ịgha ọban ị lẹ manya lẹ ofigbọn-olivu ị pịnpụha e ye Osolobuẹ. I k'e yerịrị m okẹnnyẹ ibuzọ ị.

³⁰ Ẹrịra k'i k'e mẹzikwọ efin i lẹ atụnrụn ị. Hatu wẹ nị wẹ sọn nnẹ wẹ nọdị akpọhịn ẹsa, kanị hụn mẹ ẹ akpọhịn ẹsatọ y'e wẹhẹni m wẹ.

³¹ “Ụnụ k'a wụrịrị ndị nke m hụn rị nsọ. Erikwọlẹ ni anụ anụ-ọfịa gbu; tụn'a yeni nkitẹ.