Ọpụpụ 20 - Ika

Isi Nke Ọgụn Iwu Iri Osolobuẹ Ye

¹ Chuku nọ ku oku ndịnị ile:

² “Mmẹ wụ Osolobuẹ, Chuku ụnụ, hụn wepụha ụnụ imẹ alị Ijiptu, alị ụnụ nọ wụ igbọn.

³ “Enwọnkwọlẹ ni mmọn lẹ iyi ọwụlẹ cheni m.

⁴ “Elerikwọlẹ ni ihiẹn ọwụlẹ mẹmẹrin mmọn, kẹ ihiẹn rị elu-igwee kẹ ihiẹn rị elu-ụwa kẹ ihiẹn rị imẹ mirin;

⁵ akpọkwọlẹni ni wẹ isi alị mọbụ fe wẹ; makẹni mmẹ, hụn wụ Osolobuẹ, Chuku ụnụ, wụ Chuku ẹnya a fụ omẹni wẹ ye onyẹ ọzọ ihiẹn runi m. M'e gi njọ ndị ize m e ze e sọn ụmụ wẹ d'e rudẹ agbọ nke ẹtọ lẹ nke ẹnọ.

⁶ Kanị, ndị ihiẹn m a sụọ rị e dọnmẹ iwu m, m'e mẹni wẹ lẹ ụmụ wẹ kẹ ndị nke m d'e rudẹ agbọ nnụ-uku ole-lẹ-ole.

⁷ “Egikwọlẹ ni ẹfan Osolobuẹ wụ Chuku ụnụ mẹ ihiẹn furulẹni; makẹni, Osolobuẹ ahatukọkwọ onyẹ ọwụlẹ gi ẹfan a mẹ ihiẹn furulẹni.

⁸ “A nyanhan nị Ụhụọhịn Ezumikẹn kẹni ụnụ e dọnmẹ ẹ nsọ.

⁹ Akpọhịn isin kẹ y'e gi a lụkpọ, a rụn ọrụn ị ile,

¹⁰ kanị, nke akpọhịn ẹsa rịn'a wụ Ezumikẹn wẹ gi e ye Osolobuẹ wụ Chuku i ọghọ. Arụnkwọlẹ ọrụn ọwụlẹ ụhụọhịn hụ: kẹ yụ kẹ ụmụ ị ikẹnnyẹ kẹ ụmụ ị ikpoho, kẹ igbọn i okẹnnyẹ kẹ igbọn i okpoho, kẹ anụmanụ ị kẹ abịamabịa rị alị ọnụ.

¹¹ Makẹni akpọhịn isin kẹ Osolobuẹ gi ke elu-igwere lẹ ụwa lẹ ohimin lẹ ihiẹn ile rị imẹ wẹ, kanị nke akpọhịn ẹsa rịn'a, ọ nọ zu ikẹn. Ya kẹ Osolobuẹ nọ gọzi Ụhụọhịn Ezumikẹn, dọn ẹ nsọ.

¹² “Gbaye nẹdi i lẹ nnẹ i, kẹn'i tọ imẹ anị ahụn Osolobuẹ wụ Chuku i rị e ye i.

¹³ “Egbulẹ ọchụ.

¹⁴ “Analẹ nwunyẹ ịhịan; azọlẹ ụkụ ye ọfịa.

¹⁵ “Ezunlẹ ohin.

¹⁶ “Ebuokinlẹ ibe i ọnụ.

¹⁷ “Anịlẹ ụlọ ibe i la ị ẹnya, mọbụ nwunyẹ ibe i mọbụ nwata-okẹnnyẹ rị iwe ẹ mọbụ nwata-okpoho rị iwe ẹ mọbụ efin ẹ mọbụ jaki ẹ — mọbụ ihiẹn ọwụlẹ wụ nke ibe i.”

¹⁸ Kẹ ndị Izrẹlụ rị a hụn akpara lẹ amụma ahụn, a nụ opi ahụn rị a hannị lẹ ugu hụ rị a lọpụha ẹnwụnrụn, ẹhụ hụ a ma wẹ nni yeni egun. Wẹ nọ be alị tọnị ugu ahụn,

¹⁹ sị, Mozizi, “Dodo, gi ọnụ ị gwa ẹnyi oku, nị ẹnyi gọnghọ ntịn. Osolobuẹ ya dodo egilẹ ọnụ a gwa ẹnyi oku, amamgbe ẹnyi a nwụnhụn!”

²⁰ Mozizi nọ sị wẹ, “Atụlẹ ni egun. Osolobuẹ bịa d'e lele ọnụ, kẹni egun Osolobuẹ tụma ụnụ, mẹ ọnụ gbanị njọ ọsọ.”

²¹ Ndị Izrẹlụ nọtehụkwọ, kanị Mozizi nọ nọkunmẹ ẹkpa ishi hụ Osolobuẹ rị.

Ukpo W'a Nọ Chụnyeni Osolobuẹ Ẹjan

²² Ya kẹ Osolobuẹ nọ nwan sị Mozizi, “Lee ihiẹn i jẹnkọ d'a gwa ndị Izrẹlụ: ‘Ọnụ a hụngụọ a nwan nị elu-igwee kẹ m gha gwa ụnụ oku.

²³ Ya wụ, akpụkwọlẹ ni mmọn-lẹ-iyi ọwụlẹ cheni m, kẹ nke siliva kẹ nke goru.

²⁴ “ ‘Gi ni ẹjan gbeni m ukpo w'a nọ a chụn ẹjan, ụnụ a nọ elu ẹ a chụn ẹjan ụnụ: ẹjan w'a dụn ọkụn lẹ ẹjan wẹ gi e ye ekele lẹ atụnrụn lẹ ewu lẹ efin ụnụ. Gbe n'ẹ ye ebe ọwụlẹ m jẹnkọ d'a họrị nị w'a nọ a kpọku ẹfan m; m k'a bịa ebẹhụ d'e kunrun ụnụ, gọzi ọnụ.

²⁵ Omẹni ọmụma kẹ ụnụ e gi mẹmẹni m ukpo nchụn-ẹjan, egikwọlẹ ni ọmụma wẹ be, makẹni ụnụ gi ihiẹn ọwụlẹ be ẹ, ụnụ e mẹrụgụọ a.

²⁶ Aghakwọlẹ ni mgbanyinrin e nyinrin ukpo nchụn-ẹjan m, makẹ ụnụ gha e kpu ọtọ ọnụ a tọ oghe.’