Ọpụpụ 2 - Ika

Isi Nke Ẹbụọ A Mụ Wẹ Mozizi

¹ Ogẹn ahụn, o nwọn okẹnnyẹ ohu wụ onyẹ ebọn Livaị hụn lụzị onyẹ ebọn Livaị.

² Okpoho ahụn nọ tụrụ imẹ, mụn'a okẹnnyẹ. Okpoho hụ a hụn a nị nwata hụ ma mma ọda, ọ nọ zuemẹ ẹ ọrọgbọ ifọn ẹtọ.

³ Kanị, ogẹn o gilẹni sazị ẹka zuemẹ ẹ, ọ nọ weri ụkpalị wẹ gi ẹfịfịa-mirin mẹmẹ, tekwama a korota amamgbe mirin a ban a. Ọ nọ bu nwa-ndu hụ che imẹ ụkpalị ahụn, bu ụkpalị tọ imẹ ẹfịfịa rị mkpẹnrẹn iyi Naịlị.

⁴ Nwẹnẹ nwa-ndu ahụn hụn okpoho nọ nọdị ebe teye ẹkẹrẹ, e lee ihiẹn jẹnkọ d'e mẹn'ẹ.

⁵ Ya kẹ ada eze nọ bịa Iyi Naịlị d'a wụ. Ịgbagba e jẹnn'ẹ ozi hụ mkpẹnrẹn mirin e jẹnjẹn e jẹnlụa. Ọ nọ hụn ụkpalị hụ ebe ọ rị imẹ ẹfịfịa mirin ndị hụ. Ọ nọ zi nwagbọọ ohu imẹ wẹ d'e buhẹ ụkpalị hụ.

⁶ Ada eze nọ kpupụ a, e lee nwata-okẹnnyẹ; ọ hụ a kwan ẹkwan! Omikẹn nwata ahụn nọ mẹ ẹ. Ọ nọ sị, “Ọnwan k'a wụrịrị onyẹ ohu imẹ ụmụ ndị Hibru ahụn wẹ rị a ma e tuhu.”

⁷ Ya kẹ nwẹnẹ nwata hụ hụn okpoho nọ pụha, sị a, “Nị m jẹn d'a kpọha okpoho Hibru n'ọ pan'ị ya?”

⁸ Ọ nọ za a, sị, “Ẹghẹẹ, jẹn nwan.” Ya nwata-okpoho hụ nọ jẹn d'a kpọha nnẹ nwata hụ.

⁹ Ada eze nọ sị okpoho hụ, “Parị nwatanị, n'ị yeni m'ẹ ẹran; m jẹnkọ d'a kụ ị ụgwọ.” Ọ nọ panarịn a nwata ahụn d'e yemẹ ẹ ẹran.

¹⁰ Ogẹn nwandu hụ gi kama ẹhụ, ọ nọ wẹ ẹ jẹnni ada eze, ọ nọ họnrin nwa a, ọ gụn a Mozizi, sị “M gha imẹ mirin sepụha a.”

Mozizi A Gbashi Midianị

¹¹ Mgbe Mozizi gi kagụ ẹhụ, ọ pụ ụhụọhịn ohu, shi ebe ndị nke ẹ, ndị Hibru, rị; ọ hụ e lee wẹ ebe wẹ rị a rụn okẹn ọrụn ahụn wẹ wa ye wẹ olu. Ọ nọ hụn onyẹ Ijiptu rị e gbu onyẹ Hibru ili, onyẹ ohu imẹ ndị nkẹ ẹ.

¹² O lehunmẹ ẹnya, hụn a nị onwọnni onyẹ ri ebẹhụ, ọ nọ gbu onyẹ Ijiptu hụ, li ẹ ye imẹ ẹjan rị ebẹhụ.

¹³ Eki e fọn ọ nọzị jẹn d'a hụn wẹ. Ọ nọ hụn ikẹnnyẹ Hibru ẹbụọ rị a lụ ọgụn. Ọ nọ sị hụn chọ oku, “K'ị rị a mayeni onyẹ Hibru ibe i ọgụn?”

¹⁴ Okẹnnyẹ hụ nọ za a sị, “Onyẹ tumẹ i n'ị kịma ẹnyi, n'ị hanmanị ẹnyi eṅẹn? Ị chọ n'i gbu m kẹ i dọn gbu onyẹ Ijiptu hụ?” Ya kẹ egun nọ tụma Mozizi; ọ nọ sị enwẹn ẹ, “Ya wụ nị ihiẹn m mẹ a wagụọ!”

¹⁵ Ogẹn eze wụ Fẹro gi nụ ihiẹnni, ọ nọ chọma n'o gbu Mozizi. Kanị Mozizi nọ gbapụn'a, gbashi alị Midianị d'e biri. O ru ebẹhụ, ọ nọ nọdị ẹhụ ọmị.

¹⁶ Onyẹ nchụn-ẹjan ohu rị alị Midianị mụ ikpoho ẹsa. Wẹ nọ bịa d'a dọrị mirin jun afẹrẹ ye ewu lẹ atụnrụn nẹdi wẹ ra.

¹⁷ Kanị ikẹnnyẹ ndị e du atụnrụn imẹ alị a pụha ebẹhụ, chụpụ wẹ. Mozizi nọ shi d'a nọ wẹ ye azụụn, yezidẹ anụ wẹ mirin.

¹⁸ Ịgbagba ahụn a lụaha, Rẹwuẹlụ nẹdi wẹ nọ jụma wẹ, “Nanị k'o dọnzi kẹrẹhan ụnụ ẹnịna tannị?”

¹⁹ Wẹ nọ sị a, “O nwọn onyẹ Ijiptu zụọpụha ẹnyi ẹka ndị ahụn e dụ atụnrụn; ịya dọzịdẹni ẹnyi mirin, yezikwọ ewu lẹ atụnrụn mirin ra.”

²⁰ Ọ nọ sị ụmụ a ikpoho, “Elebe k'ọ rị nwan? Kị ụnụ lan'a nwan tọ? D'a kpọn'a, nị ẹnyi chọn'a ihiẹn-oriri.”

²¹ Omẹgụ, Mozizi nọ kweri sọn okẹnnyẹ ahụn biri ebẹhụ. Ọ nọ ye ẹ nwa a okpoho wụ Zipora lụma.

²² Zipora nọ mụ okẹnnyẹ. Mozizi nọ gụn a “Gẹshọm”, sị enwẹn ẹ, “Makẹni a wụrụgụọ m abịamabịa imẹ alị m marịnlẹni.”

²³ Ọ nọbe, eze Ijiptu nọ nwụnhụn. Ndị Izrẹlụ nkẹ hụkwọ a sụn udẹn makẹ ọnọdị igbọn ahụn wẹ rị imẹ ẹ; wẹ nọ kwan ẹkwan. Ẹkwan hụ wẹ rị a kwan ebe wẹ rị a chọ eyemẹka nọ ru Osolobuẹ ntịn imẹ elu-igwee.

²⁴ Osolobuẹ nọ nụ udẹn wẹ rị a sụn, nyanhan nkwa ahụn o kwe Ebraham lẹ Aziki lẹ Jekọpụ hụn kwọngbama ya lẹ wẹ.

²⁵ Osolobuẹ nọ lee ndị Izrẹlụ, ọnọdị wẹ nọ mẹtụ a.