Ọpụpụ 19 - Ika

Isi Nke Mmitenẹi Osolobuẹ Lẹ Izrẹlụ A Nọ Elu Ugu-Saịnaị Kwetarị Nkwa

¹ Hụn mẹ ifọn ẹtọ ndị Izrẹlụ gha Ijiptu pụha, ụhụọhịn ahụn daị, wẹ nọ ru atụ Saịnaị.

² Rẹfidim kẹ ndị Izrẹlụ gha buli, pụha atụ Saịnaị. Ya wẹ nọ ziẹntọ atụ ahụn, ihun Ugu Saịnaị.

³ Ya kẹ Mozizi nọ shi elu ugu d'e kunrun Chuku. Osolobuẹ nọ gha ugu hụ kpọ a, sị, “Ọnwan wụ ihiẹn i k'a gwa ikpụlọ Jekọpụ, ihiẹn ị k'a sị ndị Izrẹlụ:

⁴ ‘Ụnụ lẹ enwẹn ụnụ a hụngụọ ihiẹn m mẹ Ijiptu lẹ kẹ m dọn bu ụnụ kẹ ugọn dọn e bu nwa a, buhẹ ụnụ ebe m rị.

⁵ O mẹ nwan nị ụnụ e humẹchanrịnnị m isi, dọnmẹ nkwerigbama m jẹnkọ d'e tumẹ ẹgbata mmẹ lẹ ụnụ, imẹ anị ile rịnị, ụnụ sụọ k'a wụrụ ihiẹn m hụn pụ-ichẹn, makẹni ụwa ile wụ nke m.

⁶ Ụnụ a wụrụnị m alị-eze ndị nchụn-ẹjan lẹ alị rị nsọ.’ Ya k'i k'a gwa ndị Izrẹlụ.”

⁷ Mozizi nọ kin azụụn, kpọgbama ndị-isi Izrẹlụ, gwachanrịn wẹ ihiẹn ndịnị ile Osolobuẹ sị a ku.

⁸ Wẹ ile nọ kugbama, sị, “Ẹnyi k'e mẹchanrịn ihiẹn ile Osolobuẹ ku.” Ya Mozizi nọ bịazị d'a gwa Osolobuẹ ihiẹn wẹ ku.

⁹ Osolobuẹ nọ sị Mozizi, “M k'e gi orukpu kin-ẹnya bịa d'e kunrun i, kẹni ndị Izrẹlụ nụ kẹ mmẹ lẹ ịyụ rị e ku, lẹni wẹ gi i dọn ẹnya jẹnrin ejẹn.” Mozizi nọ gwa Osolobuẹ ihiẹn wẹ ku.

¹⁰ Osolobuẹ nọ sị Mozizi, “D'e kunrun wẹ, n'ị dọn wẹ nsọ tannị lẹ eki. Sị wẹ sụ ẹkwa wẹ,

¹¹ wẹ kwademẹni nke akpọhịn ẹtọ, makẹni ụhụọhịn ahụn kẹ Osolobuẹ jẹnkọ d'e hidanye elu Ugu-Saịnaị idẹnya ndị Izrẹlụ ile.

¹² Gbọnhunmẹ uguni, y'a sị wẹ, ‘Kpachanpụkwọ nị ẹnya amamgbe ụnụ e nyinrin uguni mọbụ we ẹhụ hụarị a. Wẹ k'e gburịrị onyẹ ọwụlẹ ẹhụ a hụarị uguni.

¹³ Wẹ k'e girịrị ọmụma magbu ẹ mọbụ gi ụta gbagbu ẹ — onwọnkọkwọ ẹka k'e mẹtụn'a. Kẹ ịhịan rọ kẹ anụ rọ, edọnmẹkọ w'a ndụn.’ Opi mpịn ebulu hanbie sụọ kẹ w'a nọ nyin uguni.”

¹⁴ Mozizi nọ gha ugu ahụn hidan d'e kunrun wẹ. O dọn wẹ nsọ; a sụpụ wẹ ẹkwa wẹ.

¹⁵ Ya ọ nọ sị wẹ, “Kwademẹ ni enwẹn ọnụ makẹ nke akpọhịn ẹtọ; anọkunmẹkwọlẹ ni okpoho.”

¹⁶ O ru ụtụntụn nke akpọhịn ẹtọ, akpabọ nọ hanma, amụma hụ e be; orukpu nwọn ulu hụ elu-ugu hụ; wẹ nọ nụ opi rị a han ọda-ọda. Ẹhụ nọ mama wẹ ile nni ebẹhụ wẹ ziẹntọ.

¹⁷ Ya Mozizi nọ gha ebe wẹ ile tumẹsọnmẹ ọdụ wẹ duru wẹ pụha d'e sọn Osolobuẹ zu, wẹ nọ wuzo ukun ugu hụ.

¹⁸ Ẹnwụnrụn jun Ugu-Saịnaị, makẹni Osolobuẹ gi ọkụn hidanye ẹ. Ẹnwụnrụn ahụn hụ a lọshi elu rịkẹ ẹnwụnrụn ẹgboko wẹ rị e yi ọkụn; ugu ahụn hụ e zinzin ọda-ọda,

¹⁹ opi ahụn hụ a hankẹnmẹ ọhankẹnmẹ-ọhankẹnmẹ. Mozizi hụ e ku, Osolobuẹ hụ e gi olu akpara a shịarị a.

²⁰ Osolobuẹ hidanye elu Ugu-Saịnaị, kpọ Mozizi bịa elu-ugu hụ. Ya Mozizi nọ shi elu-ugu ahụn.

²¹ Osolobuẹ nọ sị a, “Hidan d'a gbakwọ wẹ mkpịnsịn-ẹka amamgbe w'a zụnghafe okẹn wẹ tumẹni wẹ, ebe wẹ rị e mẹ nị wẹ legha Osolobuẹ, ndị bu ọda a nwụnhụn.

²² Kẹ ndị nchụn-ẹjan hụn a nọkunmẹ Osolobuẹ k'e dọnrịrịdẹ enwẹn wẹ nsọ. Omẹni emẹni wẹ ẹ, Osolobuẹ k'e gbukwọ wẹ.”

²³ Mozizi nọ sị Osolobuẹ, “Asakọ wẹ ẹka nyinhẹn Ugu-Saịnaị, makẹni ịyụ lẹ enwẹn i a gbagụọ ẹnyi mkpịnsịn ẹka, sị, ‘Gbọnhunmẹ ni ugu ahụn, ụnụ a gbalan'a kẹ ihiẹn rị nsọ.’ ”

²⁴ Osolobuẹ nọ sị a, “Hidan d'e wẹhẹ Ẹrọnụ. Ka anịkwọlẹ ndị nchụn-ẹjan lẹ ndị họdụnị zụnghafe okẹn wẹ tumẹni wẹ ebe wẹ rị e mẹ nị wẹ nyinhẹn enu ebeni d'e kunrun Osolobuẹ. Wẹ mẹ ẹ, o k'e gbukwọ wẹ.”

²⁵ Ya Mozizi nọ hidan d'a gwa wẹ.