Ọpụpụ 18 - Ika

Isi Nke Mmẹsatọ Jẹtro A Bịa D'a Hụn Mozizi

¹ Jẹtro, hụn wụ onyẹ nchụn-ẹjan alị Midianị, hụn wụzị nẹdi nwunyẹ Mozizi nọ nwan nụ ihiẹn ile Osolobuẹ mẹni Mozizi lẹ ndị nke ẹ, ndị Izrẹlụ, lẹzi kẹ Osolobuẹ dọn wepụha ndị Izrẹlụ imẹ Ijiptu.

² Mozizi zi nwunyẹ ẹ wụ Zipora buru ọgọ a wụ Jẹtro, Jẹtro nọ nabanhan Zipora

³ lẹ ụmụ a ikẹnnyẹ ẹbụọ. Ẹfan nwa a ohu wụ Gẹshọm — makẹni Mozizi sị, “E họnringụọ m abịamabịa bi alị ọzọ.”

⁴ Ẹfan hụn ẹbọ wụ Ẹliẹza, makẹni Mozizi sị, “Osolobuẹ hụn nẹdi m fe e yeni m ẹka; ọ zụọpụha m ọnụ ọpịa-agha Fẹro.”

⁵ Jẹtro hụn wụ ọgọ Mozizi lẹ ụmụ Mozizi ikẹnnyẹ ẹbụọ lẹ nwunyẹ Mozizi nọ nwan bịa d'e kunrun Mozizi imẹ atụ, ebe o ziẹntọ ẹhụ ugu Osolobuẹ.

⁶ Nị wẹ d'e ru ẹ, Jẹtro zi wẹ d'a gwa Mozizi, sị, “Mmẹ wụ Jẹtro nẹdi nwunyẹ i lala d'a hụn ị, mmẹ lẹ nwunyẹ i lẹ ụmụ a ẹbụọ wị.”

⁷ Ya Mozizi nọ jẹnmẹ d'e kunrun ọgọ a. Ogẹn o gi ru ẹ, ọ nọ hulụa anị, susu ẹ ọnụ. E kelegụ wẹ ibe wẹ, wẹ nọ ban ọdụ Mozizi.

⁸ Mozizi nọ gwachanrịn ọgọ a ihiẹn ile Osolobuẹ gi ufiri ndị Izrẹlụ mẹ Fẹro lẹ ndị Ijiptu, gwazịkwọ a afụnfụn ile wẹ ta ụzọ lẹzi kẹ Osolobuẹ dọn zụọpụha wẹ.

⁹ Ọ sụọ Jẹtro ọda-ọda ogẹn o gi nụ ihiẹn-ọma ile Osolobuẹ mẹni ndị Izrẹlụ ebe ọ nọ gbapụha wẹ ẹka ndị Ijiptu.

¹⁰ Ọ nọ sị, “Ọjịja-mma ya rịnị Osolobuẹ, hụn gbapụha ị ẹka ndị Ijiptu lẹ ẹka Fẹro, Osolobuẹ hụn gbapụha ndị Izrẹlụ ẹka ndị Ijiptu.

¹¹ A marịngụọ m nwan nị Osolobuẹ ka mmọn ile w'e fe efee, makẹni imẹ ihiẹn ndị ahụn te rị e bu wẹ isi k'ọ nọ nwan karị wẹ ẹka.”

¹² Ya Jẹtro nẹdi nwunyẹ Mozizi nọ wẹhẹ anụmanụ, gi ẹ chụnyeni Chuku ẹjan w'a kpọ ọkụn lẹ ẹjan ndị ọzọ; Ẹrọnụ lẹ ndị-ichẹn Izrẹlụ ile nọ bịa d'e du nẹdi nwunyẹ Mozizi ri ihiẹn-oriri ihun Chuku.

¹³ Eki e fọn, Mozizi nọ weri ocho, dọnzimẹni ndị Izrẹlụ oku. Wẹ ile e turu ebẹhụ, fihunmẹ ẹ, e che n'o ru onyẹ-onyẹ, gha ụtụntụn d'e ru ẹnyasị.

¹⁴ Mgbe nẹdi nwunyẹ Mozizi gi hụn ihiẹnni ile Mozizi rị e mẹni wẹ, ọ nọ sị, “Kị wụdẹ nwan ihiẹnni ị rị e mẹni wẹ? Kị haịn yụ sụọ gi e dọnzini ndịnị oku, wẹ ile e fihunmẹ i, gha ụtụntụn d'e ru ẹnyasị?”

¹⁵ Mozizi nọ sị a, “Makẹni w'a bịa d'e kunrun m nị wẹ marịn uche Osolobuẹ.

¹⁶ Ikpe ọwụlẹ seni, mmẹ kẹ wẹ e buhẹn'ẹ; a hannị m wẹ eṅẹn, a gwa wẹ uhi Osolobuẹ yi lẹ iwu ndị o ye.”

¹⁷ Ya nẹdi nwunyẹ Mozizi nọ sị a, “Ihiẹnni ị rị e mẹ arị mma.

¹⁸ O ru ẹhụ a gbọrọ kẹ ịyụ kẹ ndịnị rị a bịa d'e kunrunn'i. Ọrụn rịn'a karị ị ẹka; yụ sụọ a s'ẹka rụngụ a.

¹⁹ Gọn m nwan ntịn, nị m dụn ị ọdụn, Osolobuẹ ya nọyezikwọ n'ị: a nọkin ẹnya wẹ ebe Osolobuẹ rị kẹ i dọn rị e mẹ, e bu ikpe wẹ e jẹnn'ẹ;

²⁰ a kuzisọnmẹ wẹ uhi Osolobuẹ yi lẹ iwu Osolobuẹ, a ghọsị wẹ kẹ w'a dọn e bi lẹ ọrụn runi wẹ.

²¹ Ka gha imẹ wẹ ile họrị ndị k'a saẹka kị — ikẹnnyẹ hụn a tụ egun Chuku, ikẹnnyẹ wẹ gi e dọn ẹnya hụn ghalẹni e ri egho azụụn; y'e tumẹsọnmẹ wẹ nị wẹ kị wẹ; ndị k'a kị madụ nnụ-uku nnụ-uku, ndị k'a kị ọgụn-isẹn ọgụn-isẹn, ndị k'a kị iri-kwasị-ọgụnnaị iri-kwasị-ọgụnnaị lẹ ndị k'a kị iri-iri.

²² Sị wẹ dọnzimẹni wẹ ụmụ-oku a pụha ogẹn ile, ka sị wẹ e wẹhẹsọnmẹn'i oku karị wẹ ẹka. Omẹni oku mẹ ẹkẹrẹ rọ, wẹ gi ẹka wẹ hannị wẹ eṅẹn, ibu i e belụa, makẹni ịyụ lẹ wẹ gba e bu ẹ.

²³ I mẹ ẹrịra, omẹni Osolobuẹ e kwerighọ, ibu a n'ị bu; ndịnị lẹ enwẹn wẹ e gizikwọ ịghọghọ a la iwe wẹ.”

²⁴ Mozizi nọ gi oku nẹdi nwunyẹ ẹ gwa a dọn, mẹ ihiẹn ile ọ sị a mẹ.

²⁵ Ọ gha imẹ ndị Izrẹlụ ile họrị ikẹnnyẹ k'a saẹka kị, tumẹ wẹ nị wẹ kị, ndị k'a kị madụ nnụ-uku, nnụ-uku, ndị k'a kị ọgụn-isẹn ọgụn-isẹn, ndị k'a kị iri-kwasị-ọgụnnaị iri-kwasị-ọgụnnaị lẹ ndị k'a kị iri-iri.

²⁶ Wẹ nọ wụrụ ndị e dọnzini wẹ oku ogẹn ile, e buhẹn'i Mozizi oku ndị hụn zeni — kanị w'e gi ẹka wẹ e dọnzi ụmụ-oku zelẹni.

²⁷ Ya Mozizi nọ du Jẹtro nẹdi nwunyẹ ẹ ụla, Jẹtro nọ lashi alị a.