Ọpụpụ 17 - Ika

Isi Nke Mmẹsa Mirin A Gha Ọmụma Pụha

¹ Omẹgụ, ndị Izrẹlụ ile nọ gha Atụ Sini buli, ejẹn, eziẹntọ — ebe-lẹ-ebe Osolobuẹ gwa wẹ. Wẹ nọ ziẹntọ Rẹfidim, tumẹsọnmẹ ọdụ wẹ ebẹhụ. Kanị, ahụnnị wẹ mirin ra.

² Wẹ nọ sọn Mozizi kpemẹ, sị, “Yekwọ ẹnyi mirin ra!” Mozizi nọ za wẹ, sị, “Kị ụnụ rị e duni m e kpe? Kị ụnụ rị a chọnị ihiẹn rị Osolobuẹ ọnụ?”

³ Kanị, ẹgụn mirin hụkwọ a gụn ndị hụ; wẹ nọ dusọnmẹ Mozizi e kpe, a sị, “Kịnị haịn i gi gha alị Ijiptu wepụha ẹnyi n'i gi ẹgụn mirin gbupụ ẹnyi lẹ ụmụ ẹnyi lẹ anụ ẹnyi?”

⁴ Ya kẹ Mozizi nọ kwanghọsị Osolobuẹ, sị a, “Nanị m'e mẹ ndịnị? Nị wẹ gi tan ọmụma magbu m!”

⁵ Osolobuẹ nọ sị Mozizi, “D'e buruni ndịnị ụzọ. Họrị ndị ị k'a họrị imẹ ndị-isi Izrẹlụ, y'e weri ọkpọ ahụn i gi fịan mirin Naịlị — y'e jẹnmẹ.

⁶ M k'e wuzo ebẹhụ, ihun ụnụ ile, ẹhụ ọmụma ahụn rị Horẹbụ. Fịan ọmụma ahụn ọkpọ hụ; mirin k'a gha imẹ ẹ pụha nị wẹ ra.” Ya Mozizi nọ nọ idẹnya ndị-ichẹn Izrẹlụ mẹ ẹrịra.

⁷ Wẹ nọ kpọ ebahụn Masa lẹ Mẹriba. Masa wụ “nlele” Mẹriba wụ “ikpe.” Makẹni, ndị Izrẹlụ nọ ebẹhụ du Mozizi kpe, lelezikwọ Osolobuẹ ghahanị ịsị, “Osolobuẹ hụdẹ imẹ igunrun ẹnyi ra ọ rịa?”

E Mẹri Wẹ Ndị Amalẹki Mayeni Wẹ

⁸ Ndị alị Amalẹki bịa Rẹfidim ebẹhụ ndị Izrẹlụ ziẹntọ, maye ndị Izrẹlụ.

⁹ Ya kẹ Mozizi nọ sị Joshụa, “Họrị ikẹnnyẹ imẹ ẹnyi, y'e weri wẹ d'a lụsọn ndị Amalẹki agha. Ekile, mmẹ nwẹn jẹnkọ d'e bu ọkpọ Osolobuẹ ẹka turu elu òke.”

¹⁰ Ya Joshụa nọ lụsọn ndị Amalẹki agha kẹ Mozizi dọn gwa a, Mozizi lẹ Ẹrọnụ lẹ Họ e nyinrin enu òke.

¹¹ Hụn ahụn ile ẹka Mozizi ẹbụbụọ rị elu, ndị Izrẹlụ hụ e mẹri; kanị, o wetu ẹka, ndị Amalẹki e mẹrimẹ.

¹² Ogẹn ẹka gi rọ Mozizi, wẹ nọ bu ọmụma tọn'a, o gi ẹ nọdị alị. Ẹrọnụ lẹ Họ nọ kwọndọn ẹka Mozizi ẹbụọ elu: onyẹ ohu kwọndọn azụụnnị, onyẹ ohu kwọndọn azụụnnị, nke wụnị ẹka a ẹbụọ emẹhunmẹni anwụn e we rọ.

¹³ Ẹnịna kẹ Joshụa dọn gi ọpịa-agha mẹrichanrịn ndị-agha Amalẹki.

¹⁴ Ya kẹ Osolobuẹ nọ sị Mozizi, “Detu ihiẹnni imẹ ẹkụkwọ, kẹni wẹ hụn ụzọ a nyanhan a. Hụnkwọ a n'ị gụn a nị Joshụa nụ a; makẹni m jẹnkọ d'e finchanpụ Amalẹki elu-ụwa, anyanhankọzị wẹ wẹ.”

¹⁵ Mozizi nọ tụn ukpo w'a nọ a chụn ẹjan, kpọ a, “Osolobuẹ wụ Ahịma m.”

¹⁶ Mozizi sị, “Ẹghẹẹ, makẹni wẹ weshi ẹka ẹbụbụọ elu zinmẹ ukpo-Osolobuẹ, Osolobuẹ k'a gha a lụsọn ndị Amalẹki agha gha agbọ pụ agbọ.”