Ọpụpụ 15 - Ika

Isi Nke Mmisẹn Ẹbụ Mozizi Lẹ Ndị Izrẹlụ Bụ

¹ Ya kẹ Mozizi lẹ ndị Izrẹlụ nọ bụnị Osolobuẹ ẹbụnị: “M k'a bụnị Osolobuẹ ẹbụ, makẹni o mẹriọlẹ mmẹri hi-ogbe. Kẹ anyịnyan kẹ onyẹ rị e nyinn'ẹ, ọ tụgụọ wẹ ye imẹ ohimin.

² Osolobuẹ wụ ikẹn m lẹ ẹbụ m; ọ zụọpụhagụọ m. Chuku m rọ, m jẹnkọ nwan d'a ja a mma; Chuku hụn nẹdi m fe rọ, m k'e tuchan a.

³ Odogun-agha kẹ Osolobuẹ wụ; ẹfan a wụ Osolobuẹ.

⁴ Kẹ ụgbọ-anyịnyan Fẹro kẹ ndị-agha a, ọ tụgụọ wẹ ile ye imẹ ohimin. Ndị ọkị-agha pụ-ichẹn Fẹro a ragbugụọ enwẹn wẹ imẹ Ohimin-ufie.

⁵ Ohimin ahụn mini e rukpumẹgụọ wẹ; e ruban wẹ alị a kẹ ogbe ọmụma.

⁶ “Euu, Osolobuẹ ẹka-nni i kpa ikẹn hi-ogbe. Euu, Osolobuẹ ẹka-nni i kụkpọchanrịn eṅẹnrẹn ahụn.

⁷ Okẹn ikpẹn i k'i gi mẹri ndị lụsọn i ọgụn. Ọnụma ị rị a dụn kẹ ọkụn k'i gi sọn wẹ, ọ nọ dụnpụ wẹ kẹ ẹfịfịa ọkpọ-nkụn.

⁸ Umẹrẹn i kunpụhụ, mirin ahụn e hubehi, họnrin elumelu; mirin te rị e hu ikẹn-ikẹn e turu ụzọ-ohu — rịkẹ ẹhụ-ụlọ; mirin ohimin a kpụkpụrụ imẹ ohimin.

⁹ “Eṅẹnrẹn ete nyanghọ isi, sị, ‘M jẹnkọ d'a chụ wẹ; m jẹnkọ d'a nwụndọn wẹ; m k'a narịn wẹ ihiẹn ile wẹ gi, we ẹ keyịya. M k'e gi wẹ rijun ẹfọ. M k'e sepụha ọpịa-agha m, gi ẹka m gbu wẹ.’

¹⁰ “Kanị ị nọ fụhụ ufere, ohimin e kpumẹ wẹ; wẹ nọ ruban kẹ igwe nyịngbu enwẹn ẹ imẹ okẹn mirin ahụn.

¹¹ “Euu Osolobuẹ, elee mmọn nọ kẹ yụ? Onyẹ nọ kẹ yụ — hụn rị nsọ pụ-ichẹn; hụn e mẹ ihiẹn a tụ egun w'a ja mma; hụn a rụn ọrụn atụmẹnya?

¹² “Y'a tịnpụ ẹka-nni i, alị nọ luepụ wẹ.

¹³ I k'e gi ihiẹn-ọsụsụọ ị ghalẹni a gụ du ndị ị gbapụha. I k'e gi ikẹn i du wẹ, du wẹ ru ebe-obibi nsọ ị.

¹⁴ “Alị ichẹn-ichẹn k'a nụ a, ẹhụ a mama wẹ nni; ndị Filistia k'a nụ ụfụ a rịkẹ onyẹ imẹ rị e mẹ.

¹⁵ Ezigbo egun k'a tụma ndị-isi alị Ẹdọm; ẹhụ k'a rị a ma ndị-isi alị Mụabụ nni. Ndị alị Kenaanị k'e dẹnhin;

¹⁶ okẹn egun k'a tụgbu wẹ. Euu Osolobuẹ, ẹka ị k'e mẹ wẹ gba nkịtịn nọkẹ ọmụma — d'e ru ni ndị nke i a ghafechanrịngụ, d'e ru ni ndị hụn i ṅọn a ghafegụ.

¹⁷ “I jẹnkọ d'e webanhan ndị nke i, kụn wẹ ye elu ugu ahụn ị họtọ, ebẹhụ i mẹmẹtọ n'i jẹnkọ d'e bi, ebẹhụ rị nsọ i gi ẹka ị mẹmẹ.

¹⁸ “Osolobuẹ jẹnkọ d'a kị jẹnrin ejẹn!”

Ẹbụ Miriam Bụ

¹⁹ Ẹshin Fẹro lẹ ụgbọ-anyịnyan a lẹ ndị-agha a e nyin ẹshin wịchanrịn ban ohimin hụ, Osolobuẹ e mẹ mirin ohimin ahụn hukin, rukpumẹ wẹ. Kanị ndị Izrẹlụ gi ụkụ gha akpakalị ahụn pụhanị fetu ohimin ahụn.

²⁰ Ya kẹ Miriam, okpoho onyẹ-amụma, nwẹnẹ Ẹrọnụ, nọ weri ẹgede-chakachaka, ikpoho ile nọ werisọnmẹ ẹgede sọn ẹ; wẹ hụ a kụ, e tẹn egu.

²¹ Miriam hụ a buyeni wẹ ẹbụnị: “Bụnị nị Osolobuẹ ẹbụ, makẹni o mẹriọlẹ mmẹri hi-ogbe. Kẹ anyịnyan kẹ onyẹ rị e nyinn'ẹ, ọ tụgụọ wẹ ye imẹ ohimin!”

Mirin E Lu Ilu

²² Ya Mozizi nọ gha Ohimin-ufie duru ndị Izrẹlụ pụ; wẹ nọ shi imẹ Atụ Shuru. E jẹnpụ wẹ akpọhịn ẹtọ imẹ atụ ahụn, ahụnnị wẹ mirin.

²³ Ogẹn wẹ gi ru Mara, mirin rị ebẹhụ anịnị wẹ ra makẹni o lu ilu. Ya haịn ẹfan ebẹhụ gi wụ “Mara”.

²⁴ Ya wẹ nọ dẹnnwịnwịnmanị Mozizi, a sị, “Kị ẹnyi k'a ra nwan?”

²⁵ Ya kẹ Mozizi nọ kpọku Osolobuẹ, Osolobuẹ nọ ghọsị a nkp'osisi. Ọ nọ tụ a ye imẹ mirin hụ, mirin nwẹn nọ sụọma ọhụnma. Osolobuẹ nọ nọ ebẹhụ tini wẹ iwuni, yini wẹ uhi — makẹni nlele k'o lele wẹ ebẹhụ:

²⁶ sị wẹ, “Ụnụ kpachanpụ ẹnya mẹsọnmẹ ihiẹn Osolobuẹ wụ Chuku ụnụ ku, e mẹ ihiẹn rị a mma ẹnya, e mẹzu iwu ẹ lẹ uhi ẹ ile, atụkọ m ụnụ emu ọwụlẹ m tụ ndị Ijiptu; makẹni mmẹ wụ Osolobuẹ hụn a zụọ ụnụ emu.”

²⁷ Omẹgụ, wẹ nọ ru Ẹlim, ebe isi-mirin mmẹbụọ lẹ isi nkụ iri kwasị ọgụn ẹtọ rị; ya wẹ nọ ziẹntọ, tumẹsọnmẹ ọdụ wẹ ye mkpẹnrẹn mirin ebẹhụ.