Ọpụpụ 13 - Ika

Isi Nke Mmẹtọ We Okẹnnyẹ Ibuzọ Kwanị Osolobuẹ

¹ Osolobuẹ gwa Mozizi oku, sị,

² “We ni okẹnnyẹ ibuzọ ọwụlẹ kwanị m. Nwa ibuzọ ọwụlẹ gha ẹfọ pụha imẹ igunrun ndị Izrẹlụ wụ nke m, kẹ ịhịan kẹ anụ.”

³ Mozizi nọ sị ndị Izrẹlụ, “A nyanhan nị ụhụọhịnnị: ụhụọhịn ụnụ gha alị Ijiptu pụha, ụlọ ahụn ụnụ nọ wụ igbọn, makẹni Osolobuẹ gi ikẹn hi-ogbe wepụha ụnụ. Erikwọlẹ ni ihiẹn ọwụlẹ wẹ gi yisti shi.

⁴ Tannị, imẹ ọnwan Abibu, kẹ ụnụ pụkọ Ijiptu.

⁵ “Ogẹn Osolobuẹ k'e gi webanhan ụnụ alị ndị Kenaanị, ndị Hẹti, ndị Amọ, ndị Hivu lẹ ndị Jebusu, alị ahụn o kun enwẹn ẹ kwe ndị nẹdi ụnụ nkwa n'o sikọ d'e ye ụnụ ya, alị hụn mirin-ẹran lẹ mirin-ẹnwụn jun, e hu kẹ mirin, e gi ni ifọnni e mẹ mmẹmmẹni ahụa-ahụa.

⁶ Ri ni brẹdi nwọnlẹni yisti o gi a fụ ọrọgbọ akpọhịn ẹsa; nke akpọhịn ẹsa, ụnụ e mẹ mmẹmmẹ, gi ye Osolobuẹ ọghọ.

⁷ Brẹdi nwọnlẹni yisti o gi a fụ sụọ kẹ ụnụ k'e ri ọrọgbọ akpọhịn ẹsa hụ. W'a hụnkwọlẹ yisti imẹ igunrun ụnụ; y'a rịkwọlẹ ebe ọwụlẹ imẹ alị ụnụ.

⁸ O ru ụhụọhịn hụ, i jẹnkọ d'a kọwanị nwa ị, sị a, ‘M rị e mẹ ihiẹnni makẹ ihiẹn Osolobuẹ mẹni m ogẹn m gi gha alị Ijiptu pụha’.

⁹ Ọdịnalịnị jẹnkọ d'a nọ kẹ ahịma rị ị ẹka lẹ ihiẹn-nnyanhan rị ị ezimezi ihun, kẹni Iwu Osolobuẹ rịsọnmẹ i ọnụ ogẹn ile, makẹni Osolobuẹ gi ikẹn hi-ogbe wepụha ụnụ imẹ alị Ijiptu.

¹⁰ E mẹ nị mmẹmmẹni ogẹn hụn wẹ tumẹn'ẹ ahụa-ahụa.

Nwa-okẹnnyẹ Ibuzọ

¹¹ “Osolobuẹ webanhangụ ị alị ndị Kenaanị, yegụ ụnụ ya — k'o dọn kun enwẹn ẹ gi kwe ụnụ lẹ ndị nẹdi ụnụ nkwa,

¹² ụnụ sikọ d'e girịrị okẹnnyẹ ibuzọ ọwụlẹ gha ẹfọ pụha kwanị Osolobuẹ. Okẹn ibuzọ ọwụlẹ anụ ị mụ wụzị nke Osolobuẹ.

¹³ Gi ni nwa-atụnrụn gbarị okẹn ibuzọ ọwụlẹ jaki mụ. Kanị omẹni y'a gbarịkọ a, kpagi ẹ nwan olu. Ị k'a gbarịrịrị okẹnnyẹ ibuzọ ị.

¹⁴ “Ihun, nwa ị jụma ị, sị, ‘Kị wụ ọdịnalịnị?’ Y'a sị a, ‘Osolobuẹ gi ikẹn hi-ogbe wepụha ẹnyi alị Ijiptu, alị hụ ẹnyi te nọ wụ igbọn.

¹⁵ Ogẹn eze Ijiptu gi kpọkin obi, jụ n'ọ hatukọ ẹnyi, Osolobuẹ nọ gbukwama ikẹnnyẹ ibuzọ ile rị alị Ijiptu — kẹ ịhịan kẹ anụ. Ya haịn ẹnyi gi e gi okẹn-anụ ibuzọ ọwụlẹ gha ẹfọ pụha a chụnyeni Osolobuẹ ẹjan, e gi ihiẹn a gbarị okẹnnyẹ ibuzọ ọwụlẹ.’

¹⁶ Ọdịnalịnị jẹnkọ d'a wụ ahịma ụnụ yi ẹka lẹ ihiẹn i kẹnmẹye ezimezi ihun, hụn y'e gi a nyanhan nị Osolobuẹ gi ikẹn ẹ hi-ogbe wepụha ẹnyi alị Ijiptu.”

Ndị Izrẹlụ A Gha Alị Ijiptu Pụ

¹⁷ Ogẹn Fẹro eze Ijiptu gi hatu ndị Izrẹlụ, Osolobuẹ eweni wẹ gha ụzọ ahụn rị alị ndị Filistia, mkpẹnrẹn Ohimin Uku Mẹditerenia, ọsụọn'a nị ya ka nsue. Makẹni, Osolobuẹ sị, “Wẹ hụn tan agha, e rohutọ wẹ, lakin Ijiptu.”

¹⁸ Ya Osolobuẹ nọ we wẹ ghashi ụzọ ọzọ, ụzọ hụn rị imẹ atụ hụn dọn ihun ibe Ohimin-ufie. Ndị Izrẹlụ dọnpụha kẹ ndị-agha kẹ wẹ pụla alị Ijiptu.

¹⁹ Mozizi weri ọkpụkpụ Josẹfụ k'ọ pụkọ, makẹni Josẹfụ mẹ ndị Izrẹlụ kwe ẹ nkwa yen'ẹ, kunn'ẹ Osolobuẹ, sị, “Osolobuẹ k'a bịarịrị d'e yeni ụnụ ẹka. O ru ogẹn ahụn, ụnụ k'e kpọnrinrịrị ọkpụkpụ m ụnụ pụkọnị ebeni.”

²⁰ Ndị Izrẹlụ nọ nwan gha Sukọtụ pụ. E ru wẹ Ẹtam hụn rị mkpẹnrẹn atụ, wẹ nọ ziẹntọ ebẹhụ, tumẹsọnmẹ ọdụ.

²¹ Eki rị elu, Osolobuẹ e buruni wẹ ụzọ imẹ orukpu o gi e du wẹ, a ghọsị wẹ ụzọ; uhinhin, o buruni wẹ ụzọ imẹ ọkụn o gi e du wẹ, e ye wẹ ukpẹ, hụn o gi saẹka e jẹn kẹ uhinhin kẹ efinaị.

²² Kẹ orukpu ahụn e duni wẹ ebe eki rị elu kẹ ọkụn ahụn e duni wẹ uhinhin, onwẹni hụn ghatu ihun wẹ ebe ọ nọ e du wẹ pụ.