Ọpụpụ 12 - Ika

Isi Nke Mmẹbụọ Nghafe

¹ Ya kẹ Osolobuẹ nọ nọ imẹ alị Ijiptu ebẹhụ sị Mozizi lẹ Ẹrọnụ,

² “Ifọnni m gi rị e wepụha ụnụ jẹnkọ a wụrụnị ụnụ ifọn ibuzọ imẹ ahụa.

³ Gwa ndị ebọn Izrẹlụ ile nị nke akpọhịn iri imẹ ifọnni, okẹnnyẹ ọwụlẹ jẹnkọ d'a họtọnị ezi-lẹ-ụlọ a anụ wẹ sikọ d'e gbu; ezi-lẹ-ụlọ ọwụlẹ jẹnkọ d'a họtọsọnmẹ anụ ohu-ohu.

⁴ Ikpụlọ ọwụlẹ hụn o mẹni ndị rịn'a as'ẹka richanrịn anụ ohu, wẹ lẹ ezi-lẹ-ụlọ ọzọ nọkunmẹni wẹ k'a kịgbamarịrị keri anụ ohu, wẹ marịngụ mmadụ ole jẹnkọ d'e rin'ẹ lẹ hụn onyẹ-onyẹ k'a s'ẹka ri.

⁵ “Anụ wẹ k'a họtọ jẹnkọ d'a wụrịrị okẹn rị ahụa ohu hụn ẹhụ a ile zu oke; wẹ nwọn ikẹn weri atụnrụn mọbụ ewu.

⁶ Lepụ anụ hụ ẹnya d'e ru nke akpọhịn mmẹnọ imẹ ifọn hụ, ogẹn ụnụ ndị Izrẹlụ ile k'e e gi gbu wẹ ebe ọhị nọ gbama ṅẹnrẹn-ṅẹnrẹn.

⁷ Wẹ k'e weri ẹdeke ẹ ẹkẹrẹ tesọnmẹ amanran-ụzọ lẹ lintẹlụ rị elu ụzọ ụnọ ndị wẹ sikọ d'a nọ ri anụ hụ.

⁸ Imẹ uhinhin ohu ahụn kẹ wẹ k'a hụnma anụ hụ, ri, ya lẹ ẹhụhụọ e lu ilu lẹ brẹdi yisti rịlẹni.

⁹ Erikwọlẹ n'a ndụn mọbụ shi ẹ eshi, ka hụnma n'a: buru n'ẹ ẹrịra dọye ọkụn hụnma — ya lẹ isi ẹ lẹ ụkụ a lẹ ihiẹn ile rị imẹ ẹ.

¹⁰ Anịkwọlẹ ni anụ hụ bọ-ọra; hụn eki fọnkunrun, ụnụ a dụn a ọkụn.

¹¹ Ẹnịna kẹ ụnụ k'a dọn ri ẹ: ụnụ sikọ d'e kẹnmẹgụ ukun, yirigụ akpụkụ, werigụ ọkpọ — ụnụ kebe rimẹ; ụnụ k'e ri ẹ ẹjije-ẹjije. Nghafe Osolobuẹ rọ.

¹² “M jẹnkọ d'a ghagbarị alị Ijiptu uhinhinni, gbupụ okẹnnyẹ ibuzọ ọwụlẹ — kẹ ịhịan kẹ anụ, hangbu mmọn ile ndị Ijiptu e fe eṅẹn. Mmẹ wụ Osolobuẹ.

¹³ Ẹdeke ahụn k'a rị ọnụmụzọ ụnụ k'a wụrụ ahịma ụnụ ye ụlọ ndị hụ ụnụ rị; m hụn ẹdeke ahụn, a ghafe m ụnụ; nsọngbuni e gbuni erukọ ụnụ ẹhụ ogẹn m'e gi mẹ Ijiptu ihiẹn m k'e mẹ ẹ.

A Nyanhan Nị Ụhụọhịn-nghafe

¹⁴ “Ụnụ k'a gha a nyanhan ụhụọhịnnị; e gi n'ẹ e mẹni Osolobuẹ mmẹmmẹ agbọ ụnụ ile lalanị. Iwu ụnụ jẹnkọ d'e dọnmẹ jẹnrin ejẹn rọ.

Mmẹmmẹ Brẹdi yisti rịlẹni

¹⁵ “Osolobuẹ nọ sị: Ụnụ jẹnkọ d'a gha e ri brẹdi nwọnlẹni yisti o gi a fụ akpọhịn ẹsa. O ru ụhụọhịn ibuzọ rịn'a, ụnụ e wepụ yisti rị iwe ụnụ, makẹni onyẹ ri ihiẹn ọwụlẹ yisti rị gha ụhụọhịn ibuzọ d'e ru nke ẹsa, e bepụ w'a imẹ igunrun ndị Izrẹlụ.

¹⁶ “Ụnụ jẹnkọ d'e zu ozuzu rị nsọ ụhụọhịn nke ibuzọ lẹ nke ẹsa. Arụnkwọlẹ ni ọrụn ọwụlẹ ọrọgbọ akpọhịn ẹsa hụ, mmanị ishi ihiẹn-oriri sụọ; ịya sụọ kẹ ụnụ sikọ d'e mẹ.

¹⁷ “Mẹsọnmẹ ni Mmẹmmẹ brẹdi nwọnlẹni yisti o gi a fụ, makẹni ụhụọhịn hụ daị kẹ m gha alị Ijiptu wepụha ebọn ụnụ ile. Gi ni mmẹmmẹ ụnụ gi a nyanhan tannị họnrin iwu ụnụ k'e dọnmẹferi agbọ ụnụ ile lalanị.

¹⁸ Ifọn ibuzọnị, ụnụ jẹnkọ d'e risọnmẹ brẹdi nwọnlẹni yisti o gi a fụ, gha ẹnyasị nke akpọhịn mmẹnọ rịn'a d'e ru ẹnyasị nke akpọhịn ohu kwasị ọgụn rịn'a.

¹⁹ Yisti y'a rịkwọlẹ iwe ụnụ ọrọgbọ akpọhịn ẹsa hụ. Onyẹ ri ihiẹn ọwụlẹ yisti rị, e bepụ w'a imẹ igunrun ndị Izrẹlụ — kẹ nwa-di-alị rọ kẹ abịamabịa rọ.

²⁰ Erikwọlẹ ni ihiẹn yisti rị imẹ ẹ; ebe-lẹ-ebe ụnụ bi, brẹdi nwọnlẹni yisti o gi a fụ kẹ ụnụ k'e ri ọrọgbọ ahụn ile.”

Nghafe Hụn Osolobuẹ Ghafe alị Ijiptu

²¹ Ya kẹ Mozizi nọ kpọgbama ndị-isi Izrẹlụ ile, sị wẹ, “Jẹnmẹ ni ozigbo d'a họrịsọnmẹni ezi-lẹ-ụlọ ụnụ anụ gbu nị ụnụ gi mẹ mmẹmmẹ Nghafe.

²² Onyẹ-onyẹ ya kpagiri ẹrurushin hisopu, gi ẹ deri ẹdeke anụ hụ rị imẹ afẹrẹ tesọnmẹ elu ọnụmụzọ lẹ ụsụọ a ẹbụbụọ. Onyẹ ọwụlẹ apụkwọlẹ ezi eki e we fọn.

²³ Makẹni Osolobuẹ jẹnkọ d'a ghagbarị alị Ijiptu d'e gbu ndị Ijiptu; ọ hụn ẹdeke ahụn elu ọnụmụzọ lẹ ụsụọ a ẹbụbụọ, ọ ghafe ọnụmụzọ hụ, ọ nịkọ Ụkọ-ọnwụn ahụn rị e gbuni banhan iwe ọnụ d'e gbu ọnụ.

²⁴ “Ụnụ lẹ ụmụ ụnụ k'a rị e mẹ mmẹmmẹni m sị ụnụ mẹ jẹnrin ejẹn.

²⁵ Ụnụ banye alị ahụn Osolobuẹ kwe ụnụ nkwa a, hụn o jẹnkọ d'e ye ụnụ, e mẹ ni mmẹmmẹni.

²⁶ Ụmụ ụnụ jụma ụnụ, ‘Kị ụnụ gi mmẹmmẹni e ku?’

²⁷ Ụnụ a sị wẹ, ‘Ẹjan Nghafe ẹnyi rị a chụnyeni Osolobuẹ rọ, makẹni Osolobuẹ ghafe ụnọ ẹnyi ndị Izrẹlụ imẹ alị Ijiptu ogẹn o gi rị e gbu ndị Ijiptu, o dọnmẹ ndị rị iwe ẹnyi ndụn.’ ” Mozizi e kugụ, ya kẹ ndị Izrẹlụ nọ kụ isi alị.

²⁸ Ya kẹ wẹ nọ mẹchanrịn ihiẹn Osolobuẹ gwa Mozizi lẹ Ẹrọnụ.

Ọnwụn Ikẹnnyẹ-ibuzọ Ndị Ijiptu

²⁹ Etintinnaị abalị, Osolobuẹ nọ gbu ikẹnnyẹ ibuzọ rị Ijiptu, gha okẹnnyẹ ibuzọ onyẹ rị ukpo-eze mụ d'e ru okẹnnyẹ ibuzọ onyẹ-ngan rị ụlọ-ngan mụ, uwẹ lẹ okẹn ibuzọ anụ wẹ mụ.

³⁰ Fẹro lẹ ịhaịmẹ ẹ lẹ ndị Ijiptu ile e tẹnhin imẹ uhinhin, oro ẹkwan e jun alị Ijiptu, makẹni onwọnni ụlọ ọwụlẹ ịhịan nwụnlẹni.

Fẹro E Kweri Nwan Nị Izrẹlụ La

³¹ Uhinhin ahụn, Fẹro nọ zi wẹ d'a kpọ Mozizi lẹ Ẹrọnụ; ọ nọ sị, “Ozigbo-ozigbo, pụnị nị ndị nke m — kẹ ụnụ kẹ ndị Izrẹlụ! Jẹnmẹ ni d'e fe Osolobuẹ kẹ ụnụ dọn ku.

³² Weri ni atụnrụn ụnụ lẹ ewu ọnụ lẹ efin ọnụ kẹ ụnụ dọn ku — ụnụ e jẹnmẹ; mẹzikwọnị nị m ekpere!”

³³ Ndị Ijiptu hụ a rịọ ndị Izrẹlụ wẹ mẹmẹkẹnrin nị wẹ gha alị ahụn pụ, a sị, “Ẹnyi e d'a nwụnchanrịn ma!”

³⁴ Ya ndị Izrẹlụ nọ nwan buru ọka wẹ gwe ẹrịra wẹ gwọtọ a — wẹ kelẹni buche ẹ yisti o gi a fụ, gi ẹwuru fụma ya lẹ ihiẹn wẹ gi a gwọ a, bu ẹ che uvun.

³⁵ Ndị Izrẹlụ mẹ ihiẹn Mozizi gwa wẹ, na ndị Ijiptu ihiẹn-siliva lẹ ihiẹn-goru lẹ ẹkwa.

³⁶ Makẹni Osolobuẹ e mẹtụgụọ ndị Ijiptu ẹka obi hụn w'e gi mẹni ndị Izrẹlụ ọhụnma, wẹ hụ e ye wẹ ihiẹn wẹ rịọ. Ẹnịna kẹ ndị Izrẹlụ gi narịn ndị Ijiptu akụ-lẹ-ụba wẹ.

Ndị Izrẹlụ A Gha Alị Ijiptu Pụ

³⁷ Ndị Izrẹlụ nọ gha Ramsisi buli, shikọ Sukọtụ. Ikorọbịa rị imẹ wẹ rị ihiẹn nọ kẹ nnụ-uku ọgụn-iri-kwasị-nnụ (600,000) — cheni ndị ọzọ.

³⁸ Imẹrinmẹ ndị ọzọ rị ichẹn-ichẹn wụlẹni ndị Izrẹlụ sọnmẹzikwọ wẹ, ya lẹ anụ bu ọda wẹ kị — kẹ atụnrụn kẹ ewu kẹ efin.

³⁹ Wẹ nọ shi brẹdi hụ wẹ gwọtọ hụn wẹ bu gha alị Ijiptu pụha, brẹdi wẹ buchelẹni yisti brẹdi gi a fụ; yisti arịa makẹni wẹ chụpụ wẹ ọkụn-ọkụn alị Ijiptu, ọ kẹrẹnini wẹ mẹmẹ ihiẹn wẹ sikọ d'e ri.

⁴⁰ Ahụa iri kwasị ọgụn kwasị nnụ (430) kẹ ụmụ Izrẹlụ bi alị Ijiptu.

⁴¹ Ụhụọhịn ahụn o zu ahụa iri kwasị ọgụn kwasị nnụ daị, ebọn ile rị imẹ ndị nke Osolobuẹ nọ gha alị Ijiptu pụ.

⁴² Makẹni Osolobuẹ che nche abalị uhinhin ahụn wepụha wẹ imẹ alị Ijiptu, ndị Izrẹlụ ile jẹnkọ d'a a gha e cheni Osolobuẹ nche abalị uhinhinni ahụa-ahụa jẹnrin ejẹn.

Mmẹmmẹ Nghafe Lẹ Iwu Ẹ

⁴³ Osolobuẹ sị Mozizi lẹ Ẹrọnụ, “Lee ni iwu lẹ nsọ Oriri-nghafe: abịamabịa esọnkọ wẹ ri ẹ.

⁴⁴ Igbọn ọwụlẹ wẹ ṅọn eṅọn k'a s'ẹka ri ẹ, wẹ kwagụ a ugun,

⁴⁵ kanị abịamabịa bi alị ụnụ mọbụ onyẹ wẹ we ọrụn erikọ a.

⁴⁶ Imẹ ụlọ ohu hụ kẹ wẹ k'a nọ ripụ a. Ewepụkwọlẹ nị anụ a ezi. Akpagikwọlẹ ni ọkpụkpụ a.

⁴⁷ “Ndị Izrẹlụ ile k'e mẹrịrị mmẹmmẹni.

⁴⁸ “Abịamabịa bi alị ụnụ hụn chọ n'o du ụnụ mẹni Osolobuẹ Mmẹmmẹ-Nghafe sikọ d'e burịrị ụzọ kwagụ ikẹnnyẹ ile rị ikpụlọ a ugun. Ogẹn hụ k'o gi saẹka du ụnụ mẹ Mmẹmmẹ hụ rịkẹ nwa-di-alị. Okẹnnyẹ ọwụlẹ kwalẹni ugun erikọ a.

⁴⁹ Iwu ohuni rịnị kẹ nwa-di-alị kẹ abịamabịa bi imẹ igunrun ụnụ.”

⁵⁰ Ndị Izrẹlụ ile nọ mẹchanrịnhụ kẹ Osolobuẹ dọn gwa Mozizi lẹ Ẹrọnụ.

⁵¹ Ụhụọhịn ohu ahụn kẹ Osolobuẹ gha alị Ijiptu wepụha ebọn ile rị Izrẹlụ.