Ọpụpụ 10 - Ika

Isi Nke Iri Ube-mkpịnsịn Nke Ẹsatọ: Igurube

¹ Osolobuẹ nọ sị Mozizi, “Jẹn d'e kunrun eze. A kpọkingụọ m obi ẹ lẹ obi ịhaịmẹ ẹ, kẹni m hụn ụzọ rụn ọrụn atụmẹnya ndịnị rị a ghọsị ikẹn m imẹ igunrun wẹ —

² kẹni ụnụ saẹka gwa ụmụ ụnụ lẹ ụmụ-ụmụ ụnụ kẹ m dọn gi ndị Ijiptu gu egu lẹ kẹ m dọn rụn ọrụn atụmẹnya ndịnị m gi ghọsị wẹ ikẹn m — kẹni ụnụ marịn nị m wụ Osolobuẹ.”

³ Ya Mozizi lẹ Ẹrọnụ nọ jẹnburu Fẹro, sị a, “Lee ihiẹn Osolobuẹ wụ Chuku ndị Hibru ku: ọ sị, ‘Elee mgbe kẹ y'a gbabehini m isi-akwanran? Hatu ndị nke m nị wẹ lama, kẹni wẹ fe m.

⁴ Ị jụ nị y'a hatukọ wẹ, m jẹnkọ d'e webanhan igurube alị ị ekile.

⁵ Wẹ k'e jun alị, kpumẹchanrịn a, nke wụnị eleghakọzị wẹ akpakalị. Wẹ k'e ripụ hụn nta ẹkwan-igwere gbuhọdụnị ụnụ — kẹ osisi ọwụlẹ rịzị imẹ ugbo ụnụ.

⁶ Wẹ k'a kpụjun ụlọ ile wụ nke i lẹ ụnọ ịhaịmẹ i lẹ ụlọ ndị Ijiptu ile; ihiẹn ndị nẹdi i lẹ ndị mụnị wẹ hụntulẹni kete wẹ bimẹlẹ alịnị.’ ” E kugụ wẹ, Mozizi nọ gbehutọ, gha ebe Fẹro rị pụ.

⁷ Ịhaịmẹ Fẹro nọ sị a, “Elee mgbe kẹ okẹnnyẹni e mẹbehi ẹnyi uke olu? Hatu nwan ndị Izrẹlụ nị wẹ lama, kẹni wẹ fe Osolobuẹ wụ Chuku wẹ. Y'e ke hụn a nị Ijiptu a lagụọ iwi?”

⁸ Ya kẹ wẹ nọ kpọbanhanzị Mozizi lẹ Ẹrọnụ ebe Fẹro rị. Fẹro nọ sị wẹ, “Jẹn ni; d'e fe ni Osolobuẹ wụ Chuku ụnụ. Kanị, onyẹ-lẹ-onyẹ imẹ ụnụ k'e jẹndẹ nwan?”

⁹ Mozizi nọ sị, “Ẹnyi wekọ ụmụ-ẹka ẹnyi lẹ ndị ẹgẹdi ẹnyi, ụmụ ẹnyi ikẹnnyẹ lẹ ụmụ ẹnyi ikpoho, atụnrụn ẹnyi lẹ ewu ẹnyi lẹ efin ẹnyi — makẹni ẹnyi sikọ d'e mẹni Osolobuẹ mmẹmmẹ.”

¹⁰ Fẹro nọ sị, “Osolobuẹ ya yekwọnị ụnụ ẹka ebe ụnụ nọ a sị m nị ụnụ lẹ ikpoho ụnụ lẹ ụmụ ụnụ wịrị! Eje-ihiẹn ụnụ romẹ a wagụọ nwan!

¹¹ Omẹkọ! Ikẹnnyẹ sụọ wẹ jẹn — wẹ jẹn nwan d'e fe Osolobuẹ, nị ofufe kẹ ụnụ sị wẹ nị ọnụ d'e fe.” Fẹro e kugụ ihiẹnni, wẹ nọ chụpụ Mozizi lẹ Ẹrọnụ ebe Fẹro rị.

¹² Osolobuẹ nọ sị Mozizi “Tịnpụ ẹka ị zinmẹ alị Ijiptu kẹni igurube jun alị Ijiptu d'e ripụ ihiẹn ile rị ugbo lẹ ọfịa, ihiẹn ile ẹkwan-igwere gbuhọdụ.”

¹³ Ya kẹ Mozizi nọ bu ọkpọ a zinmẹ alị Ijiptu, Osolobuẹ nọ han ufere gha ọwụwa-ẹnyanwụn fehẹmẹ, o fe imẹ anị Ijiptu efinaị hụ ile lẹ uhinhin hụ ile. Eki e fọn ụtụntụn, e lee igurube, ufere ahụn e buhẹgụọ wẹ!

¹⁴ Wẹ nọ jun alị Ijiptu ile, bejun alị ahụn ile. Igurube akpụtuni alị ahụn ẹrịra; ọ kpụkọzị a ẹrịra.

¹⁵ A kpụjun wẹ alị d'e ru nị alị e gimẹ ngi; wẹ nọ ripụ ihiẹn ile ẹkwan-igwere gbuhọdụ, ihiẹn ile rị ugbo lẹ mkpụrụ-osisi rị elu osisi. O nwọnni ẹhụhụọ-oyiyi họdụ enu osisi mọbụ elu ihiẹn-akụnkụn imẹ alị Ijiptu ile.

¹⁶ Ya kẹ Fẹro nọ kpọ Mozizi lẹ Ẹrọnụ ozigbo-ozigbo, sị, “E mẹọlẹ m Osolobuẹ wụ Chuku ụnụ njọ, mẹzikwọ ụnụ nwẹn njọ.

¹⁷ Gbagharịzị nị m nwan njọ m mgbe ohuni, y'e mẹ ekpere rịọ Osolobuẹ wụ Chuku ụnụ n'o wepụnị m nsọngbuni.”

¹⁸ Ya kẹ Mozizi nọ gha ebe eze rị pụ; ọ nọ mẹ ekpere jẹnni Osolobuẹ.

¹⁹ Osolobuẹ nọ mẹ ufere ọwụwa ẹnyanwụn hụ hutọ, ọ nọ ghama ọdịdan ẹnyanwụn, buru igurube ndị hụ shi Ohimin-ufie. Kaka akpụ igurube ohu ahọdụnị imẹ alị Ijiptu!!

²⁰ Kanị Osolobuẹ nọ kpọkin Fẹro obi, o kwerini hatu ndị Izrẹlụ nị wẹ lama.

Ube-mkpịnsịn Nke Itenẹi: Ọhịhị A Gbakpuru Alị Ijiptu

²¹ Osolobuẹ nọ sị Mozizi, “Tịnpụ ẹka zinmẹ igwere, kẹni ọkịkị gbakpuru alị Ijiptu, okẹn ishi hụn e mẹtụdẹ ịhịan.”

²² Ya Mozizi nọ tịnpụ ẹka zinmẹ igwere, ishi nọ gbakpuru alị Ijiptu ile, ọrọgbọ akpọhịn ẹtọ.

²³ Onwọnni onyẹ sa ẹka legha ibe ẹ mọbụ gha ebe ọ rị pụ, ọrọgbọ akpọhịn ẹtọ; kanị ukpẹ hụ ebe lẹ ebe ndị Izrẹlụ bi.

²⁴ Ya kẹ Fẹro wụ eze nọ kpọ Mozizi, sị, “Jẹn ni; d'e fe ni Osolobuẹ. Weridẹ ni ikpoho ụnụ lẹ ụmụ ụnụ; ka la nị atụnrụn lẹ ewu ụnụ lẹ efin ụnụ tọ.”

²⁵ Mozizi nọ sị, “I k'a nịrịrị ẹnyi weri anụ ẹnyi e gi chụn kẹ ẹjan wẹ ghalẹni a kpọ ọkụn kẹ hụn w'a kpọ ọkụn hụn ẹnyi k'a chụnyeni Osolobuẹ, Chuku ẹnyi.

²⁶ Ẹnyi k'e werirịrị anụ ẹnyi jẹn; onwọndẹni kaka akpụkụ anụ ohu ẹnyi k'a latọ ebeni! Imẹ wẹ kẹ ẹnyi a nọ weri hụn ẹnyi jẹnkọ d'e gi fe Osolobuẹ wụ Chuku ẹnyi. Ẹnyi k'e rugụ ebẹhụ ẹnyi kebe marịn hụn ẹnyi k'e gi fe Osolobuẹ.”

²⁷ Kanị Osolobuẹ nọ kpọkin obi Fẹro, ọ jụ n'ọ hatukọ wẹ.

²⁸ Fẹro nọ sị Mozizi, “Gha m ihun pụ! Lee ẹnya, hụnkwọ a nị y'a bịazịnị ebeni d'a hụn m! M hụnzị ị ebeni, ị k'a nwụnrịrị!”

²⁹ Mozizi nọ sị, “Y'e gigụọ ọnụ ị ku ẹ, y'a hụnkọzị m ebeni.”