Ọgụngụn 9 - Ika

Isi Nke Itenẹi Mmẹmmẹ-nghafe

¹ Osolobuẹ gwa Mozizi oku imẹ atụ Saịnaị ifọn ibuzọ imẹ ahụa mẹ ẹ ẹbụọ ndị Izrẹlụ gha alị Ijiptu pụha, sị a,

² “Hụn a nị ndị Izrẹlụ mẹ mmẹmmẹ-nghafe ogẹn ẹ.

³ Mẹn'ẹ ogẹn ẹ: ọhịhị gbama ṅẹnrẹn-ṅẹnrẹn nke akpọhịn mmẹnọ imẹ ifọnni, gichanrịn nị iwu lẹ usọnrọn ile rịn'a mẹ ẹ.”

⁴ Ya Mozizi nọ sị ndị Izrẹlụ mẹ Mmẹmmẹ-nghafe,

⁵ wẹ nọ mẹ Mmẹmmẹ-nghafe imẹ atụ Saịnaị, nke akp'ọhịn mmẹnọ imẹ ifọn ibuzọ ahụa nke ẹbụọ hụ, ogẹn ọhị gi gbama ṅẹnrẹn-ṅẹnrẹn. Wẹ mẹhụ wẹ ile kẹ Osolobuẹ dọn gwa Mozizi.

⁶ Kanị o nwọnghọ ndị rị imẹ wẹ mẹlẹni Mmẹmmẹ-nghafe ụhụọhịn ahụn makẹni a nọkunmẹọlẹ wẹ ozun ịhịan mẹrụ enwẹn wẹ. Ya wẹ nọ bịa d'e kunrun Mozizi lẹ Ẹrọnụ ụhụọhịn ohu ahụn,

⁷ sị Mozizi, “Ẹhụ ẹnyi a hụarịọlẹ ozun, mẹrụ enwẹn ẹnyi — kanị nị wẹ gi nwan ọhụn gbọndọn ẹnyi esọnlẹ ndị Izrẹlụ ibe ẹnyi ye oyiye Osolobuẹ ogẹn oyiye hụ?”

⁸ Mozizi nọ sị wẹ, “Cheri ni nị m nụgụ ihiẹn Osolobuẹ sikọ d'e ku banyeni ụnụ.”

⁹ Osolobuẹ nọ sị Mozizi,

¹⁰ “Sị ndị Izrẹlụ: Ịhịan gi ozun rụ imẹ ụnụ mọbụ imẹ ebozo ụnụ mọbụ n'ọ rị ụzọ-ijẹn, nị wẹ mẹghọ Mmẹmmẹ-nghafe Osolobuẹ.

¹¹ Ifọn nke ẹbụọ ru, e mẹ w'ẹ, nke akpọhịn mmẹnọ, ọhịhị gbama ṅẹnrẹn-ṅẹnrẹn. E gi wẹ brẹdi wẹ buchelẹni yisti lẹ ẹhụhụọ elu-ilu ri Oriri-nghafe.

¹² Erihọdụkọ wẹ hụn ọwụlẹ imẹ ẹ hụn eki e gi fọnkunrun ẹ mọbụ kpagi ọkpụkpụ a ọwụlẹ. Wẹ sikọ d'e gichanrịn iwu mmẹmmẹ-nghafe mẹ ẹ.

¹³ Kanị omẹni ịhịan enwọn ihiẹn o gi rụ, omẹni onwọnni ebe ịhịan jẹn, bụ o mẹni Mmẹmmẹ-nghafe, wẹ k'e bepụ onyẹ hụ imẹ ndị nke ẹ, makẹni o yeni oyiye Osolobuẹ ogẹn oyiye hụ. Onyẹ hụ k'e gi isi ẹ buru njọ a.

¹⁴ “Abịamabịa bi imẹ igunrun ụnụ chọzịkwọ n'o mẹni Osolobuẹ Mmẹmmẹ-nghafe jẹnkọ d'e gizi iwu lẹ usọnrọn rịn'a mẹ ẹ. Kẹ abịamabịa kẹ nwa-di-alị, usọnrọn ohu rọ.”

Orukpu Hụn Duni Wẹ

¹⁵ Ụhụọhịn wẹ zumẹ Ọdụ-nsọ, orukpu hụ Osolobuẹ gi a bịa nọ kpumẹ Ọdụ-nsọ rịn'a, Ọdụ Ashịa-Ẹri. O ru ẹnyasị, orukpu hụ rị elu Ọdụ-nsọ nọ rị kẹ ọkụn d'e ru ụtụntụn.

¹⁶ Ẹrịra k'ọ rịsọnmẹ: orukpu ahụn kpumẹ ẹ, ọhịhị gba orukpu hụ a nọ kẹ ọkụn.

¹⁷ Ogẹn ọwụlẹ orukpu ahụn gha elu Ọdụ ahụn buli, ndị Izrẹlụ e buli; ebe ọwụlẹ orukpu ahụn nọ kụsị, ndị Izrẹlụ e ziẹntọ ebẹhụ.

¹⁸ Osolobuẹ sị ndị Izrẹlụ buli, e buli wẹ; ọ sị wẹ ziẹn, e ziẹn wẹ. Mmanị orukpu ahụn gha elu Ọdụ ahụn buli, wẹ sikọ d'a rịsọnmẹ ebe wẹ ziẹntọ.

¹⁹ Orukpu ahụn nọbie elu Ọdụ-nsọ, ndị Izrẹlụ a gbaye ihiẹn Osolobuẹ ku, ebulikọ wẹ.

²⁰ Mgbe ndị hụ, orukpu ahụn anọkarịkọ akpọhịn ole. Kẹ Osolobuẹ dọn ku, e ziẹntọ wẹ; o kuzi nwan, e buli wẹ.

²¹ Mgbe ndị hụ, orukpu ahụn a nọdịhụ gha ẹnyasị d'e ru ụtụntụn; o buli ụtụntụn, e buli wẹ. Ọsụọn'a eki rị elu, ọsụọn'a ọhịhị gba agba — orukpu ahụn buliọlẹ, e buli wẹ.

²² Ọsụọn'a akp'ọhịn ẹbụọ mọbụ ọrọgbọ ifọn mọbụ ahụa kẹ orukpu ahụn nọ elu Ọdụ ahụn, ndị Izrẹlụ sikọ d'a nọdị ebe wẹ ziẹntọ, ebulikọ wẹ; kanị o buli, e buli wẹ.

²³ Osolobuẹ sị wẹ ziẹn, e ziẹn wẹ; ọ sị wẹ buli, e buli wẹ. Ihiẹn Osolobuẹ sị wẹ mẹ kẹ w'e mẹ: ihiẹn ile Osolobuẹ gi Mozizi gwa wẹ.