Ọgụngụn 8 - Ika

Isi Nke Ẹsatọ Ẹrọnụ E Dọnye Obu-ukpẹ Ahụn

¹ Osolobuẹ sị Mozizi,

² “Gwa Ẹrọnụ, sị a, ‘I gha a mụye ukpẹ ẹsa ahụn, dọnyesọnmẹ wẹ hụn w'e gi nwunye ihun obu-ukpẹ ahụn buni wẹ.’ ”

³ Ẹrọnụ nọ mẹ ẹrịra: ọ mụye ukpẹ ndị ahụn nị wẹ bu ihun zinmẹ ihun obu-ukpẹ ahụn nọkẹ kẹ Osolobuẹ dọn gwa Mozizi.

⁴ Lee kẹ wẹ dọn mẹmẹ obu-ukpẹ ahụn: goru wẹ tipịa kẹ wẹ gi mẹmẹ ẹ gha ukun ẹ d'e ru obobo rị ọnụnụ a ile. Kẹ Osolobuẹ dọn ghọsị Mozizi kẹ wẹ dọnchanrịn mẹmẹ ẹ.

E Tumẹ Wẹ Ndị Livaị

⁵ Osolobuẹ sị Mozizi,

⁶ “Gha imẹ igunrun ndị Izrẹlụ wepụha ndị Livaị n'ị dọn wẹ nsọ.

⁷ Lee ihiẹn i jẹnkọ d'e mẹ gi dọn wẹ nsọ: fekpu wẹ mirin idọn-nsọ; mẹ wẹ kọchanrịn ẹṅẹnrẹn rị wẹ ẹhụ, sụ ẹkwa wẹ, gi wẹ ile dọn enwẹn wẹ nsọ;

⁸ e weri wẹ nwa okẹn-efin ohu lẹ oyiye-ọka sọnn'ẹ hụn wụ ọka wẹ gweriẹn wẹ gi ofugbọn-olivu gwọ; y'e weri nwa okẹn-efin ọzọ chen'ẹ w'e gi chụn ẹjan-njọ.

⁹ Wẹhẹ ndị Livaị ihun Ọdụ-ozuzu, y'a kpọkikomẹ ndị Izrẹlụ ile.

¹⁰ Wepụha ndị Livaị ihun Osolobuẹ ebẹhụ, ndị Izrẹlụ a kị ẹka kwasị wẹ isi;

¹¹ Ẹrọnụ e wepụhanị Osolobuẹ ndị Livaị nị wẹ wụrụ ẹjan wẹ finfin hụn ndị Izrẹlụ ye Osolobuẹ, nị wẹ hụn ụzọ rụnma ọrụn Osolobuẹ.

¹² “Ndị Livaị kịgụ ẹka kwasị okẹn-efin ndị ahụn isi, gi ohu chụnyegụnị Osolobuẹ ẹjan-njọ, y'e gi hụn ẹbọ chụn ẹjan w'a dụn ọkụn, gi gbarị isi ndị Livaị.

¹³ Y'e mẹ ndị Livaị wuzo ihun Ẹrọnụ lẹ ụmụ a; y'e we wẹ ye Osolobuẹ nị wẹ wụrụn'a ẹjan wẹ finfin.

¹⁴ Ẹnịna kẹ y'a dọn wepụha ndị Livaị imẹ ndị Izrẹlụ ibe wẹ, ndị Livaị a wụrụ nke m.

¹⁵ Ọnwan mẹgụ, ndị Livaị a banye Ọdụ-nsọ d'a rụnma ọrụn — hụn ahụn idọngụ wẹ nsọ, gi wẹ chụn ẹjan wẹ finfin.

¹⁶ Imẹ ndị Izrẹlụ, uwẹ kẹ wẹ wechanrịn ye m. E giọlẹ m wẹ nọkin ẹnya ụmụ-ibuzọ ndị Izrẹlụ, okẹnnyẹ ibuzọ gha ẹfọ okpoho Izrẹlụ ọwụlẹ pụha.

¹⁷ Nwa okẹnnyẹ ibuzọ ọwụlẹ rị Izrẹlụ wụ nke m, kẹ ịhịan kẹ anụ. Ogẹn m gi gbu ụmụ ibuzọ ile rị alị Ijiptu kẹ m gi bu wẹ tọnị enwẹn m ichẹn.

¹⁸ E weriọlẹ m nwan ndị Livaị gi nọkin ẹnya ikẹnnyẹ ibuzọ ile rị Izrẹlụ.

¹⁹ “Imẹ ndị Izrẹlụ ile, e wegụọ m ndị Livaị ye Ẹrọnụ lẹ ụmụ a, nị wẹ hụn ụzọ a rụndọnni ndị Izrẹlụ ọrụn imẹ Ọdụ-nsọ, a gbarị isi ndị Izrẹlụ — makẹ eje-nsọngbu gha a bịanị wẹ wẹ nọkunmẹ Ọdụ-ozuzu.”

²⁰ Mozizi, Ẹrọnụ lẹ ndị Izrẹlụ ile nọ mẹ ndị Livaị ẹrịra; mẹchanrịn ihiẹn ile kẹ Osolobuẹ dọn gwa Mozizi.

²¹ Ndị Livaị e dọn enwẹn wẹ nsọ, sụpụ ẹkwa wẹ. Ẹrọnụ e we wẹ ye Osolobuẹ nị wẹ wụrụ ẹjan wẹ finfinni Osolobuẹ. O gi ẹ gbarị isi wẹ, gi dọn wẹ nsọ.

²² E mẹmẹgụ wẹ, ndị Livaị nọ banye d'a rụnma ọrụn wẹ imẹ Ọdụ-ozuzu, okpuru Ẹrọnụ lẹ ụmụ a. Ihiẹn Osolobuẹ gwa Mozizi kẹ wẹ mẹchanrịn.

²³ Osolobuẹ nọ sị Mozizi,

²⁴ “Iwuni kẹ ndị Livaị k'e sọn: okẹnnyẹ ru nwa ahụa isẹn kwasị ọgụn ọ bịa d'a rụnma ọrụn imẹ Ọdụ-ozuzu,

²⁵ wẹ ru nwa ahụa iri kwasị ọgụnnaị, a rụnbehi wẹ ọrụn runi wẹ —

²⁶ Wẹ nwọn ikẹn rị e yeni umunẹ wẹ ẹka imẹ Ọdụ-ozuzu, e jẹn ozi, kanị ekeyekọzị wẹ wẹ ogbo. Ẹnịna kẹ y'e dọn nwan dọnmẹ ọrụn ndị Livaị.”