Ọgụngụn 6 - Ika

Isi Nke Isin Iwu Ndị Nazịraịtị

¹ Osolobuẹ sị Mozizi,

² “Gwa ndị Izrẹlụ oku, sị wẹ: Okẹnnyẹ mọbụ okpoho kwe nkwa n'o k'e we enwẹn ẹ kwanị Osolobuẹ ọkwụkwa pụ-ichẹn, wụrụ Nazịraịtị,

³ o k'a sọ manya ọwụlẹ: kẹ manya ọhụn kẹ hụn wẹ bama abama; ọ rakọ viniga — kẹ nke manya ọhụn kẹ nke manya wẹ bama; ọ rakọ mirin vaịnị, o rikọ vaịnị — kẹ ogbe ẹ kẹ hụn wẹ kikọ.

⁴ Ogẹn hụ ile o gi wụ Nazịraịtị, o rikọ ihiẹn ọwụlẹ gha osisi vaịnị pụha — kẹ mkpụrụ a kẹ agbụgba a.

⁵ “Onwọnni ẹbeke-isi jẹnkọ d'a hụarị a isi ọrọgbọ hụ ile o gi we enwẹn ẹ kwanị Osolobuẹ ọkwụkwanị pụ-ichẹn; o k'a rịrịrị nsọ d'e runi ogẹn o kwe nkwa e zuchanrịn; o k'a nị ntutu rị a isi suesọnmẹ.

⁶ Ọ nọkunmẹkọ ozun ọrọgbọ hụ ile o gi we enwẹn ẹ kwanị Osolobuẹ ẹrịra.

⁷ Ọsụọn'a nẹdi ẹ mọbụ nnẹ ẹ mọbụ nwẹnẹ ẹ okẹnnyẹ mọbụ nwẹnẹ ẹ okpoho nwụnhụn, y'e gikwọlẹ ufiri wẹ mẹ ihiẹn ọ sọ mẹrụ enwẹn ẹ, makẹni ọkwụkwa pụ-ichẹn Chuku ẹ rị isi ẹ.

⁸ O jẹnkọ d'a rịsọnmẹni Osolobuẹ nsọ ọrọgbọ hụ ile o gi we enwẹn ẹ kwanị Osolobuẹ ọkwụkwanị.

⁹ “Ịhịan nwụnhụn idẹnmizi ebe ọ rị, nị ntutu o gi kwanị Osolobuẹ e gi ẹ rụ, o k'a kọrịrị ntutu ẹ ụhụọhịn wẹ sikọ d'e fe ẹ ẹhụ kẹ Chuku dọn ku, hụn wụ nke akpọhịn ẹsa rịn'a.

¹⁰ Nke akpọhịn ẹsatọ, o sikọ d'e wẹhẹrịrịnị onyẹ nchụn-ẹjan nduri ẹbụọ mọbụ ụmụ oluikuku ẹbụọ ọnụ-mgbọn Ọdụ-ozuzu.

¹¹ Onyẹ nchụn-ẹjan k'e gi ohu chụn ẹjan-njọ, gi ohu chụn ẹjan w'a dụn ọkụn, gi ẹ gbarị isi onyẹ ahụn yeni iwu ọ dan ebe ọ nọ rị ebe ozun rị. Ụhụọhịn ohu hụ, o k'e gi ntutu k'e rupụha isi ẹ kwadọnzini Osolobuẹ.

¹² O k'e we enwẹn ẹ kwadọnzini Osolobuẹ ọkwụkwanị pụ-ichẹn; o wẹhẹgụ ebulu rị nwa ahụa ohu d'a chụn ẹjan onyẹ ikpe ma, ọ ghazị isi gụnma, nọzu ọrọgbọ hụn o kwe nkwa mbụ. Ya wụnị agụnyekọzị wẹ ọrọgbọ ile ọ nọpụ — makẹni o mẹrụọlẹ enwẹn ẹ hụn o te gi kwanị Osolobuẹ.

Kẹ Wẹ Dọn A Wụbehi Nazịraịtị

¹³ “Lee nwan ihiẹn onyẹ we enwẹn ẹ kwanị Osolobuẹ ọkwụkwanị pụ-ichẹn Nazịraịtị sikọ d'e mẹ ọ nọzugụ ogẹn ọkwụkwanị: o k'e jẹn ọnụ-mgbọn Ọdụ-ozuzu.

¹⁴ Ọ nọ ebẹhụ ye Osolobuẹ oyiye ndịnị: ebulu ahụa ohu ẹhụ zu oke o k'e gi chụn ẹjan w'a dụn ọkụn, onyẹnyẹ-atụnrụn ahụa ohu ẹhụ zu oke o k'e gi chụn ẹjan-njọ, ebulu ohu ẹhụ zu oke o k'e gi chụn ẹjan-ekele;

¹⁵ lẹzi ihiẹn ndịnị o sikọ d'e buche imẹ ụkpalị wẹhẹ: brẹdi wẹ buchelẹni yisti lẹ donọtụ wẹ gi ọka wẹ gweriẹn mẹmẹ hụn wẹ gi ofigbọn-olivu gwọ lẹ biskiti wẹ te ofigbọn-olivu lẹzi oyiye ọka lẹ oyiye manya ya lẹ wẹ wị.

¹⁶ Onyẹ nchụn-ẹjan k'e wẹhẹ wẹ ihun Osolobuẹ, gi wẹ chụn ẹjan njọ lẹ ẹjan w'a dụn ọkụn.

¹⁷ O k'e gi ebulu ahụn chụnyeni Osolobuẹ ẹjan-ekele, ịya lẹ ụkpalị brẹdi hụ wẹ buchelẹni yisti, chụnyezikwọ oyiye ọka lẹ oyiye manya ahụn wẹ lẹ ẹjannị wị.

¹⁸ “Hụn we enwẹn ẹ kwanị Osolobuẹ ọkụkwanị pụ-ichẹn k'a nọ ọnụ-mgbọn Ọdụ-ozuzu ebahụn kpụnpụ ntutu hụ rị a isi o gi kwanị Osolobuẹ. O we ntutu hụ che ọkụn ahụn rị okpuru ẹjan-ekele ahụn.

¹⁹ Hụnyẹ kpụnpụgụ ntutu ẹ hụ o gi kwanị Osolobuẹ, onyẹ nchụn-ẹjan sikọ d'e weri ẹka ebulu ahụn wẹ shi che ẹ ẹka, gha imẹ ụkpalị hụ weri donọtụ lẹ biskiti ohu-ohu wẹ buchelẹni yisti, buzi wẹ che ẹ ẹka.

²⁰ Onyẹ nchụn-ẹjan sikọ d'e finfin wẹ nwan ghọsị Osolobuẹ, nị wẹ wụrụ ẹjan wẹ finfin. Wẹ rị nsọ, ọhụn wụ nke onyẹ nchụn-ẹjan, ịya lẹ ẹran a hụ wẹ finfin lẹ ọrụ a hụ wẹ weshini Osolobuẹ elu. Wẹ mẹgụ ihiẹnni, onyẹ hụ gi enwẹn ẹ kwanị Osolobuẹ ọkwụkwanị pụ ichẹn nwọn ikẹn rama manya.

²¹ Ọnwan wụ iwu rịnị onyẹ gi enwẹn ẹ kwanị Osolobuẹ ọkwụkwa pụ-ichẹn wụ Nazịraịtị lẹ oyiye o sikọ d'e ye. Omẹni o kwezighọ nkwa cheni hụn iwu nazịraịtị chọ, o sikọ d'e mẹrịrị a, mẹ ẹ kẹ ẹka han a.”

Ngọzi Ndị Nchụn-ẹjan

²² Osolobuẹ sị Mozizi,

²³ “Gwa Ẹrọnụ lẹ ụmụ a, ‘Lee kẹ ụnụ a dọn a gọzi ndị Izrẹlụ: sị nị wẹ,

²⁴ Osolobuẹ ya gọzi ụnụ, chemẹ ụnụ;

²⁵ Osolobuẹ ya gi ẹnya rị mma lee ụnụ, mẹni ụnụ ọhụnma;

²⁶ Osolobuẹ ya lee ụnụ ẹnya ihun, ye ụnụ udọn.’

²⁷ “Ẹnịna kẹ wẹ k'a dọn a kpọ ẹfan m e ye ndị Izrẹlụ isi, a gọzi m wẹ.”