Ọgụngụn 5 - Ika

Isi Nke Isẹn Kẹ Wẹ E Mẹ Omẹni Ịhịan Rụ Arụ

¹ Osolobuẹ sị Mozizi,

² “Gwa ndị Izrẹlụ wepụ ndịnị ebe ụnụ bi: onyẹ ọwụlẹ bu emu akpụkpọ-ẹhụ e feni mọbụ onyẹ ọwụlẹ ihiẹn ọwụlẹ rị e hupụha ẹhụ mọbụ onyẹ ọwụlẹ hụatụ ozun mẹrụ enwẹn ẹ.

³ Wepụ nị wẹ, kẹ ikẹnnyẹ kẹ ikpoho; wẹ wepụ wẹ ebe ịhịan ile bi amamgbe w'e mẹrụ ebe wẹ bi, hụn o mẹ ni m bi imẹ igunrun wẹ.”

⁴ Ndị Izrẹlụ nọ mẹ ẹrịra — wepụ ndị hụ ebẹhụ wẹ ile ziẹntọ. Ihiẹn Osolobuẹ gwa Mozizi kẹ wẹ mẹhụ.

Ịkụ-ụgwọ Eje-ihiẹn I Mẹ Ibe I

⁵ Osolobuẹ sị Mozizi,

⁶ “Sị ndị Izrẹlụ: okẹnnyẹ mọbụ okpoho mẹ ibe ẹ eje-ihiẹn, gi ẹ mẹ Osolobuẹ njọ, ikpe a magụọ a;

⁷ hụnyẹ k'a kụrịrị ụgwọ eje-ihiẹn o mẹ ibe ẹ. O k'a kụzurịrị ụgwọ ihiẹn o mẹ ibe ẹ, gi ụzọ ohu imẹ ụzọ isẹn dụ a, we wẹ ile ye hụn o mẹ eje-ihiẹn.

⁸ Kanị omẹni onyẹ hụ o mẹ eje-ihiẹn a nwụnhụngụọ n'o nwọnni onyẹ ẹhụ a rịn'a wẹ k'a kụye ụgwọ ahụn, Osolobuẹ kẹ wẹ sikọ d'a kụ ụgwọ hụ; wẹ k'a kụ a ye onyẹ nchụn-ẹjan, we ebulu o k'e gi chụnn'a ẹjan o gi gbarị isi ẹ chen'ẹ.

⁹ Oyiye ile rị nsọ ẹnịna hụn ndị Izrẹlụ e wẹhẹni onyẹ nchụn-ẹjan wụ nke onyẹ nchụn-ẹjan hụ.

¹⁰ Oyiye nsọ onyẹ-onyẹ wụ nke ẹ, kanị hụn wẹ ye onyẹ nchụn-ẹjan wụ nke onyẹ nchụn-ẹjan hụ.”

Kẹ Wẹ Dọn A Marịn Okpoho Zọ Ụkụ Ye Ọfịa

¹¹ Osolobuẹ sị Mozizi,

¹² “Gwa ndị Izrẹlụ oku, sị wẹ: Omẹni nwunyẹ ịhịan zọ ụkụ ye ọfịa, n'o dọnmẹnini di ẹ ẹhụ a,

¹³ kama o sọn okẹnnyẹ ọzọ ranhịn, bụ di ẹ amarịn ihiẹn rị e mẹni, amarịn wẹ n'ọ rụgụọ makẹni ọshẹri arịa lẹni anwụnnị w'a,

¹⁴ kanị ẹnya a fụmagụọ di ẹ, ọ hụ e gi ẹnya ahụn e lee nwunyẹ ẹ, bụ ọ rụgụọ nke-esi, mọbụ nị ẹnya rịhụ a fụ hụn okẹnnyẹ, ọ hụ e gi ẹnya hụ e lee ẹ bụ okpoho hụ arụnị.

¹⁵ Hụn okẹnnyẹ sikọ d'e we nwunyẹ ẹ jẹnni onyẹ nchụn-ẹjan. O jẹnkọnị, o weri ọka-bali wẹ gweriẹn hụn k'e jun mkpu kọstadị nta ẹbụọ hụn o k'e gi chụnnị nwunyẹ ẹ hụ ẹjan-ọka. O huyekọkwọ a ofigbọn-olivu; o buchekọ nsẹnsi elu ẹ, makẹni ẹjan-ọka onyẹ ẹnya rị a fụ rọ, ẹjan wẹ gi a nyanhan njọ ịhịan.

¹⁶ “Onyẹ nchụn-ẹjan sikọ d'e wezụhan okpoho hụ, mẹ ẹ wuzo ihun Osolobuẹ.

¹⁷ Onyẹ nchụn-ẹjan a bịa d'e mẹrin mirin-nsọ rị imẹ ẹgbo wẹ gi ụrụa mẹmẹ, han ẹjan rị alị imẹ Ọdụ-nsọ ye imẹ mirin hụ.

¹⁸ O mẹgụ okpoho hụ e wuzo ihun Osolobuẹ, ọ tọpụ a ihiẹn o gi fụma isi, bu oyiye hụ w'e gi a nyanhan njọ ịhịan, oyiye-ọka ẹnya-ụfụ hụ, che ẹ ẹka, ya nwẹn wụ onyẹ nchụn-ẹjan e kwọndọn mirin hụ hụn e buhẹ ọnụ-ẹsọn.

¹⁹ Ọ bịa d'a ghọyen'ẹ, sị a, ‘Omẹni ịyụ lẹ okẹnnyẹ ọzọ aranhịntuni, y'a zọtuni ụkụ ye ọfịa, rụ, kete ịyụ lẹ di i a lụmalẹ, mirinni e buhẹ ọnụ-ẹsọn y'e mẹlẹ i ihiẹn ọwụlẹ;

²⁰ kanị, omẹni y'a zọgụọ ụkụ ye ọfịa kete yụ lẹ di i a lụmalẹ, nị y'e mẹrụgụọ enwẹn i ghahanị isọn okẹnnyẹ ọzọ ranhịn wezụka di i,

²¹ Osolobuẹ ya gi i họnrin ihiẹn wẹ bụ ọnụ hụn w'e kuja oku ẹ imẹ igunrun ndị nke i, ogẹn o gi mẹ ọgbọdọgbọ ị sekpọ, ẹfọ ị e fun.

²² Mirinni hụn e buhẹ ọnụ-ẹsọn ya banye i ẹhụ, mẹ ẹfọ ị fun, mẹ ọgbọdọgbọ ị sekpọ.’ “O kugụ, hụn okpoho hụ a sị, ‘Isẹẹ. Isẹẹ!’

²³ “Onyẹ nchụn-ẹjan hụ k'e de ọnụ-ẹsọn ndịnị ye imẹ ẹkụkwọ, chan wẹ ye imẹ mirin hụ e lu ilu.

²⁴ O mẹ okpoho hụ ra mirin hụ e lụ ilu hụn e buhẹ ọnụ-ẹsọn. Mirin hụ jẹnkọ d'a banye ẹ imẹ ẹhụ, buhẹn'ẹ eje-afụnfụn.

²⁵ “Onyẹ nchụn-ẹjan hụ a bịa d'a narịn a oyiye-ọka ẹnya-ụfụ hụ rị a ẹka, finfin ẹ ghọsị Osolobuẹ, wẹhẹ ẹ elu ukpo nchụn-ẹjan.

²⁶ Onyẹ nchụn-ẹjan hụ k'a bụọrị ubẹka ohu imẹ oyiye-ọka hụ wẹ gi chụn ẹjan, gi ẹ nọkin ẹnya oyiye-ọka hụ ile, nọ elu ukpo nchụn-ẹjan ahụn dụn hụn ahụn o kpọnrin ọkụn; ọ dụngụ a ọkụn, o mẹ okpoho hụ ra mirin hụ.

²⁷ Omẹni ọ zọgụọ ụkụ ye ọfịa gi ẹ rụ enwẹn ẹ, wẹ yegụ a mirin ọnụ-ẹsọn hụ ra, o sikọ d'a ban a ẹhụ, buhẹn'ẹ eje-afụnfụn; ẹfọ a e fun, ọgbọdọgbọ a e sekpọ, ọ wụrụ onyẹ wẹ bụ ọnụ ebe ndị nke ẹ rị.

²⁸ Kanị, omẹkwọnị okpoho ahụn emẹrụnị enwẹn ẹ, nị o dọnmẹ enwẹn ẹ, onwọnni ihiẹn k'e mẹn'ẹ; o k'a s'ẹka mụ ụmụ.

²⁹ “Ịya wụ iwu w'e gi sọn ẹnya-ụfụ, ebe okpoho nọ zọ ụkụ ye ọfịa, mẹrụ enwẹn ẹ ebe ọ lụgụ di,

³⁰ mọbụ nị ẹnya rị a fụ okẹnnyẹ makẹni ọ rị e ro nị nwunyẹ ẹ rị a zọ ụkụ e ye ọfịa. Onyẹ nchụn-ẹjan k'e mẹrịrị okpoho hụ turu ihun Osolobuẹ, gi iwuni ile sọn ẹ.

³¹ Onwọnni iwu gi di ẹ imẹ okuni, nwunyẹ ẹ nwọn gi isi ẹ buru njọ o mẹ.”