Ọgụngụn 4 - Ika

Isi Nke Ẹnọ Osolobuẹ A Kọwa Ọrụn Ụmụ Kohatị Ru Alị

¹ Osolobuẹ sị Mozizi lẹ Ẹrọnụ,

² “Gụn nị ụmụ Kohatị rị ebọn Livaị, gụn nị wẹ ẹbozo-ẹbozo lẹ ikp'ụlọ-ikp'ụlọ.

³ Gụn nị ikẹnnyẹ ile rị gha nwa ahụa iri kwasị ọgụn d'e ru ahụa iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu.

⁴ “Ọnwan wụ ọrụn ndị Kohatị k'a rụn imẹ Ọdụ-ozuzu: wẹ nwọn e lepụ ihiẹn ndị kachanrịn nsọ ẹnya.

⁵ Ogẹn ọwụlẹ ndị Izrẹlụ jẹnkọ d'a gha ebe wẹ ziẹntọ buli, Ẹrọnụ lẹ ụmụ a a banye d'e kọntu Ẹkwa-mgbọnkin, gi ẹ kpumẹ Ẹkpẹti Ashịa-ẹri.

⁶ E gizi wẹ akpụkpọ efin-ohimin kpumẹ hụn ahụn; gizi ẹkwa e nwun bru-bru kpumẹ elu wẹ; a bịa wẹ d'a fa akp'osisi ẹbụọ ndị hụ wẹ gi e bu ẹ ye ọnọdị wẹ.

⁷ “E gi wẹ ẹkwa bru gbama elu teburu hụ w'e butọnị m brẹdi, bu mmụ-afẹrẹ lẹ ugbẹgbẹ-nta lẹ ugbẹgbẹ-uku ndị rị ebẹhụ che elu ẹ, wẹ lẹ afẹrẹ lẹ mkpu ndị wẹ gi e huye manya oyiye-manya; brẹdi hụ a rị elu teburu hụ ogẹn ile k'a rịsọnmẹ ọnọdị a elu teburu hụ.

⁸ A bịa wẹ d'e gi ẹkwa e nwun ufie-ufie gbama elu ihiẹn ndịnị, gi akpụkpọ efin-ohimin kpumẹ ẹkwa hụ, bu akp'osisi ndị hụ wẹ gi e bu ẹ che ọnọdị wẹ.

⁹ “Wẹ k'e weri ẹkwa bru kpumẹ obu-ukpẹ, hụn wẹ gi a mụye ukpẹ, ya lẹ ụmụ-ukpẹ ndị rị elu ẹ, nwa-mbu wẹ gi a fị a lẹ mgbadọn ndị rịn'a, lẹ ẹkpoko ẹ ile wẹ gi a gbaye ofigbọn-olivu wẹ gi a mụ ukpẹ hụ,

¹⁰ a bịa wẹ d'e gi akpụkpọ efin-ohimin fụma obu-ukpẹ hụ lẹ ihiẹn ile sọnn'ẹ, dọ a ye elu ihiẹn w'e gi e bu ẹ.

¹¹ “Nke ukpo goru hụ w'a nọ a mụ nsẹnsi, wẹ k'e gi ẹkwa bru gbama elu ẹ, gi akpụkpọ efin-ohimin kpumẹ ẹ, bu akp'osisi ndị hụ wẹ gi e bu ẹ che ọnọdị wẹ.

¹² “Wẹ k'e kpọnrin ihiẹn ile họdụnị wẹ gi a rụn ọrụn imẹ Ọdụ-ozuzu lẹ enwẹn ẹ, gi ẹkwa bru fụma wẹ, gi akpụkpọ efin-ohimin kpumẹ ẹkwa hụ, dọ wẹ ye elu ihiẹn wẹ gi e bu ẹ.

¹³ “Wẹ k'e kpọnpụ ntụn rị elu ukpo igwe-bronzu ahụn rị ihun-ezi wẹ nọ a dụn ẹjan ọkụn, gi ẹkwa e nwun pọpụ kpumẹ elu ẹ.

¹⁴ A bịa wẹ d'e bu ihiẹn ile wẹ gi a rụn ọrụn gbashịarị ukpo hụ che elu ẹ: kẹ ibe ihiẹn ndị wẹ gi e bi ọkụn, ndụndụn ndị wẹ gi a dụn anụ, ọsẹkẹ wẹ gi e kpọnpụ ntụn, afẹrẹ ndị hini. Wẹ k'e gi akpụkpọ efin-ohimin kpumẹ elu ẹ, bu akp'osisi ndị wẹ gi e bu ẹ che ọnọdị wẹ.

¹⁵ “Ẹrọnụ lẹ ụmụ a kpumẹchanrịngụ Ebẹhụ rị nsọ lẹ ihiẹn ile rị imẹ ẹ, nị ndị Izrẹlụ a kwademẹgụ hụn w'e gi buli, ndị Kohatị a bịa nwan d'e buru ihiẹn ndị hụ. Kanị ẹka wẹ a hụarịkọkwọ ihiẹn ndị hụ rị nsọ, kaka, amamgbe w'a nwụn. Ndị Kohatị nwọn e bu ihiẹn ndị hụ ile rị imẹ Ọdụ-nsọ lẹ enwẹn ẹ.

¹⁶ “Ẹliẹza nwa Ẹrọnụ onyẹ nchụn-ẹjan k'e lepụ ofigbọn-olivu wẹ gi a mụ ukpẹ ẹnya, ya lẹ nsẹnsi e shi ọhụnma, ọka wẹ gi e ye oyiye ụhụọhịn-ụhụọhịn lẹ udẹn-nsọ. Ẹka a kẹ Ọdụ-nsọ hụ lẹ ihiẹn ile rị imẹ ẹ k'a rịchanrịn, kẹ Ọdụ-nsọ lẹ enwẹn ẹ lẹ ihiẹn ẹ ile.”

¹⁷ Osolobuẹ sị Mozizi lẹ Ẹrọnụ,

¹⁸ “Anịkwọlẹ nị m gbupụ ndị ebọn Kohatị imẹ ebọn Livaị —

¹⁹ lee nwan ihiẹn ụnụ jẹnkọ d'e mẹ makẹ wẹ gha a nwụn ebe wẹ rị a nọkunmẹ ihiẹn ndị ahụn rịchanrịn nsọ: Ẹrọnụ lẹ ụmụ a k'a banye d'a ghọsịgụ onyẹ-onyẹ ọrụn a lẹ ihiẹn o k'e bu.

²⁰ Kanị ndị Kohatị abanyekọkwọ d'e gi ẹnya hụn ihiẹn ndị hụ rị nsọ, kaka — ọsụọn'a njube-ẹnya ohu, amamgbe w'a nwụn.”

Osolobuẹ A Kọwa Ọrụn Ụmụ Gẹshọnụ Ru Alị

²¹ Osolobuẹ nọ sị Mozizi,

²² “Gụn ụmụ Gẹshọnụ rị ebọn Livaị ẹbozo-ẹbozo lẹ ikp'ụlọ-ikp'ụlọ.

²³ Gụn ikẹnnyẹ ile rị gha nwa ahụa iri kwasị ọgụn d'e ru iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu.

²⁴ “Ọnwan wụ ọrụn ebozo Gẹshọnụ, ihiẹn wẹ sikọ d'a rụn lẹ ihiẹn wẹ k'e bu lẹ kẹ w'a dọn e bu ẹ;

²⁵ Wẹ nwọn e bu ẹkwa ndị wẹ gi tan Ọdụ-nsọ lẹ enwẹn ẹ lẹ ihiẹn ndị wẹ gi kpu elu ẹ lẹ akpụkpọ efin-ohimin hụ wẹ gi kpukwasị wẹ lẹ ẹkwa wẹ gi tankin ọnụmụzọ Ọdụ-nsọ

²⁶ lẹ ẹkwa ndị wẹ gi tanhunmẹ ezi Ọdụ-ozuzu lẹ ukpo nchụn-ẹjan hụn rị imẹ ẹ lẹ ẹkwa wẹ gi tankin ọnụ-mgbọn ẹ lẹ eriri lẹ ihiẹn ile wẹ gi a rụn ọrụn a. Ndị Gẹshọnụ nwọn a rụn ọrụn ile gbashịarị ihiẹn ndịnị.

²⁷ Okpuru ụmụ Ẹrọnụ kẹ w'a nọ rụn ọrụn wẹ ile, kẹ ibu-ibu kẹ ọrụn ndị ọzọ họdụnị. I k'e we ihiẹn ile wẹ k'a gha e bu che wẹ ẹka.

²⁸ Hụnnị wụ ọrụn rịnị ebozo Gẹshọnụ imẹ Ọdụ-ozuzu; wẹ k'a rụn ọrụn wẹ okpuru Itama nwa Ẹrọnụ onyẹ nchụn-ẹjan.

Osolobuẹ A Kọwa Ọrụn Ụmụ Mẹrari Ru Alị

²⁹ “Gụn ụmụ Mẹrari rị ebọn Livaị ẹbozo-ẹbozo lẹ ikp'ụlọ-ikp'ụlọ.

³⁰ Gụn ikẹnnyẹ ile rị gha nwa ahụa iri kwasị ọgụn d'e ru iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu.

³¹ Ọnwan wụchanrịn ọrụn wẹ k'a gha a rụn imẹ Ọdụ-ozuzu, ibu ihiẹn ile kwọndọn Ọdụ-ozuzu, kẹ ibe-osisi ndị wẹ gi mẹmẹ ẹhụ Ọdụ-nsọ lẹ enwẹn ẹ kẹ akp'osisi ndị wẹ gisọnmẹ fiẹnbepụ wẹ kẹ adansụn a ile kẹ ụkụ adansụn ile

³² kẹ adansụn ndị wẹ gi tanhunmẹ ezi Ọdụ-ozuzu lẹ ụkụ wẹ kẹ mkpụkpọ lẹ eriri ile wẹ gi e kwọndọn Ọdụ-ozuzu lẹ ihiẹn ile wẹ lẹ ndịnị wị. Gwa onyẹ-onyẹ imẹ wẹ ihiẹn ọ k'a gha e bu.

³³ Ọnwan wụchanrịn ọrụn ebozo Mẹrari, ịya kẹ wẹ k'a gha a rụn imẹ Ọdụ-ozuzu, okpuru Itama nwa Ẹrọnụ onyẹ nchụn-ẹjan.”

A Gụn Wẹ Ẹbozo Ndị Rị Ebọn Livaị

³⁴ Ya Mozizi lẹ Ẹrọnụ lẹ ndị-isi ndị Izrẹlụ nọ gụn ụmụ Kohatị ẹbozo-ẹbozo lẹ ikp'ụlọ-ikp'ụlọ.

³⁵ Ikẹnnyẹ ile hụn rị gha nwa ahụa iri kwasị ọgụn d'e ru iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu;

³⁶ wẹ ile hụ wẹ gụn ẹbozo-ẹbozo rị iri kwasị ọgụn-mmẹsa kwasị nnụ-isin (2,750).

³⁷ Ọnwan wụ mmadụ ole ụmụ Kohatị ru hụn a rụn ọrụn imẹ Ọdụ-ozuzu hụn Mozizi lẹ Ẹrọnụ gụn kẹ Osolobuẹ dọn gwa Mozizi rị.

³⁸ Wẹ gụnzịkwọ ụmụ Gẹshọnụ ẹbozo-ẹbozo lẹ ikp'ụlọ-ikp'ụlọ:

³⁹ ikẹnnyẹ ile hụn rị gha nwa ahụa iri kwasị ọgụn d'e ru iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu,

⁴⁰ hụn wẹ gụn ẹbozo-ẹbozo lẹ ikp'ụlọ-ikp'ụlọ, rị madụ iri-kwasị-ọgụn-isin kwasị nnụ-uku ẹbụọ-lẹ-mkpikpi (2,630).

⁴¹ Ẹrịra kẹ ụmụ Gẹshọnụ ru hụn a rụn ọrụn imẹ Ọdụ-ozuzu han ọda, ndị Mozizi lẹ Ẹrọnụ gụn mgbe Osolobuẹ gwa wẹ.

⁴² Wẹ gụnzịkwọ ụmụ Mẹrari ẹbozo-ẹbozo lẹ ikp'ụlọ-ikp'ụlọ:

⁴³ ikẹnnyẹ ile rị gha nwa ahụa iri kwasị ọgụn d'e ru iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu,

⁴⁴ hụn wẹ gụn ẹbozo-ẹbozo, rị madụ nnụ-ẹsatọ (3,200).

⁴⁵ Ẹrịra kẹ ụmụ Mẹrari han ọda. Mozizi lẹ Ẹrọnụ gụn wẹ kẹ Osolobuẹ dọn gwa Mozizi.

⁴⁶ Ya wụ, Mozizi, Ẹrọnụ lẹ ndị-isi ndị Izrẹlụ gụn ndị Livaị ile ẹbozo-ẹbozo lẹ ikp'ụlọ-ikp'ụlọ:

⁴⁷ ikẹnnyẹ ile rị gha nwa ahụa iri kwasị ọgụn d'e ru iri kwasị ọgụnnaị, ndị ile ru hụn a rụn ọrụn imẹ Ọdụ-ozuzu, kẹ wẹ gụn;

⁴⁸ ndị wẹ gụn, rị ọgụn-itenẹi kwasị nnụ kwasị nnụ-uku ẹsatọ (8,580).

⁴⁹ Wẹ nọ mẹ ihiẹn Osolobuẹ gwa Mozizi, yesọnmẹ onyẹ-onyẹ ọrụn a, gwa a ihiẹn o k'a gha e bu. Kẹ Osolobuẹ dọn gwa Mozizi kẹ wẹ dọn gụn wẹ.