Ọgụngụn 36 - Ika

Isi Nke Mmisin Kwasị Ọgụn Kẹ W'e Mẹ Alị Wẹ Keye Ikpoho

¹ Ndị-ichẹn kịsọnmẹ ẹbozo Gilẹdị, nwa Makiri nwa Manasẹ, ndị ebozo Josẹfụ, bịa d'e kunrun Mozizi lẹ ndị-isi, ndị-ichẹn ebozo ichẹn-ichẹn rị Izrẹlụ,

² sị wẹ, “Ogẹn Osolobuẹ gi gwa Diọkpa Mozizi ya gi utẹn-Osolobuẹ keyesọnmẹ ndị Izrẹlụ alị k'a wụ ukuu wẹ, ọ sị Diọkpa we hụn ru Zẹlofẹhadị nwẹnẹ ẹnyi nwụnhụnnị ye ụmụ a ikpoho.

³ Wẹ lụrụ nwan ndị ebọn ọzọ imẹ Izrẹlụ, e weri wẹ alị ru wẹ ẹka imẹ ihiẹn ndị ebọn ẹnyi d'e cheni nke ebọn wẹ nọ lụ di, a narịn wẹ ẹnyi alị wẹ keye ẹnyi.

⁴ O ruhụ Ahụa Iwekin-ihiẹn imẹ alị ẹnyi wụ Izrẹlụ, e we wẹ ukuu wẹ cheni nke ndị ebọn hụ wẹ nọ lụ di, e wepụ wẹ ukuu wẹ imẹ nke ndị ebọn ẹnyi.”

⁵ Ya Osolobuẹ nọ gwa Mozizi ihiẹn o k'e mẹ, Mozizi nọ yini ndị Izrẹlụ uhini: “Ihiẹn ndị ebọn Josẹfụ ri e ku wụ ezioku.

⁶ Lee ni ihiẹn Osolobuẹ ku banyeni ụmụ Zẹlofẹhadị ikpoho: ‘Wẹ lụrụ onyẹ ọwụlẹ sụọnị wẹ, kasị a mẹni onyẹ Manasẹ, ebọn nẹdi wẹ, kẹ wẹ lụrụ.

⁷ Onwọnni alị ndị Izrẹlụ k'a gha ebọn fe ebọn; alị ọwụlẹ hụn wụ ukuu onyẹ Izrẹlụ sikọ d'a wụferi nke ebọn wẹ.

⁸ Okpoho Izrẹlụ ọwụlẹ alị ru ẹka imẹ ebọn Izrẹlụ ọwụlẹ sikọ d'a lụrịrị onyẹ ebọn nẹdi ẹ wẹ, ebọn ọ gha ru ẹ ẹka, kẹni alị ọwụlẹ onyẹ Izrẹlụ nwọnhẹn ẹka ndị nẹdi wẹ hụn ụzọ wụferi nke ebọn hụ;

⁹ onwọnni alị k'a gha ebọn fe ebọn, alị ebọn ọwụlẹ imẹ Izrẹlụ sikọ d'a wụferi nke ebọn hụ.’ ”

¹⁰ Ụmụ Zẹlofẹhadị mẹ kẹ Osolobuẹ dọn gwa Mozizi:

¹¹ wẹ isẹn: Mala, Tẹza, Họg'la, Mil'ka lẹ Nụa nọ lụrụsọnmẹ ụmụ umunẹ-nẹdi wẹ ikẹnnyẹ,

¹² ya wụ, ebọn wẹ, ebọn Manasẹ nwa Josẹfụ, kẹ wẹ nọsọnmẹ lụrụ di, alị ru wẹ ẹka nọ wụferi nke ebọn nẹdi wẹ.

¹³ Ọhụn wụ iwu lẹ ọdịnalị Osolobuẹ yesọnmẹ Mozizi ye ndị Izrẹlụ kẹ wẹ ziẹntọ alị-aradan Mụabụ, mkpẹnrẹn Iyi Jọdanị, ihun Jẹriko.