Ọgụngụn 35 - Ika

Isi Nke Mmisẹn Kwasị Ọgụn Obodo Ndị Wẹ Sikọ D'e Ye Ndị Livaị

¹ Kẹ wẹ rị alị-aradan Mụabụ ebẹhụ, mkpẹnrẹn Iyi Jọdanị, ihun Jẹriko, kẹ Osolobuẹ gwa Mozizi, sị a,

² “Gwa ndị Izrẹlụ wẹ gha alị Izrẹlụ k'e weri ye ndị Livaị obodo ndị wẹ k'e biri; wẹ yezikwọ wẹ ọfịa nọhunmẹ obodo ndị hụ n'ọ wụrụ ebe w'a nọ a kpa anụ wẹ, ihiẹn-uriri wẹ.

³ Ogẹn hụ, e nwọnrin wẹ obodo ndị wẹ k'e bi lẹ ọfịa ndị w'a nọ a kpa efin wẹ, atụnrụn wẹ lẹ ihiẹn-uriri wẹ ndị ọzọ.

⁴ “Ọfịa ndị w'a nọ a kpa anụ hụn nọhunmẹ obodo-obodo ụnụ k'e ye ndị Livaị k'a wụ amụkụ iri kwasị ọgụn-mmẹtọ kwasị nnụ (670) gha mgbọn obodo jẹnmẹ; ẹrịra k'o k'a nọ obodo hụ ẹbamịn ẹnịnọ.

⁵ Mapụhazị nị amụkụ ọgụn-iri kwasị nnụ-ẹtọ (1,400) ẹbamịn ẹnịnọzị cheni ebe ụnụ bu ụzọ mapụha: obodo sikọ d'a rị etintinnaị. Ndịnị wẹ mapụha wụ ọfịa ndị bi obodo ndịnị a nọ a kpa anụ.

Ebe Ndị Kpachanpụlẹni ẹnya Gbu Ịhịan K'a Gha A Gbajẹn

⁶ “Obodo isin imẹ obodo ndị ụnụ ye ndị Livaị k'a wụ obodo w'a gbaban, ebe onyẹ gbu ịhịan k'a gbashi makẹ wẹ gha e gbu ẹ. Wezi ni obodo ẹbụọ kwasị ọgụnnaị ọzọ cheni wẹ ya.

⁷ Ya wụ, obodo ile ụnụ k'e ye ndị Livaị k'a wụ ẹsatọ kwasị ọgụnnaị, obodo-obodo lẹ ọfịa rịsọnmẹn'ẹ w'a nọ a kpa anụ.

⁸ Wẹ gha e ye ndị Livaị obodo imẹ ndị hụn Izrẹlụ sikọ d'e weri, wẹ sikọ d'e lee kẹ hụn ru ebọn ọwụlẹ ẹka han, e gi w'ẹ marịn hụn w'e werisọnmẹ e ye ndị Livaị: nọ nị ebọn hụn nwọn obodo bu ọda weri obodo bu ọda ye ndị Livaị, ụnụ a nọ ebọn nwọnlẹni ọda weri hụn bulẹni ọda ye wẹ.”

⁹ Ya kẹ Osolobuẹ nọ sị Mozizi,

¹⁰ “Gwa ndị Izrẹlụ, sị wẹ: Ụnụ fetu Iyi Jọdanị banyegụ alị Kenaanị,

¹¹ họrịsọnmẹ ni obodo ndị sikọ d'a wụ obodo mgbaban, ebe ịhịan k'a gbashi omẹni o gbu ịhịan bụ ọ kpachanpụnị ẹnya mẹ ẹ.

¹² Wẹ k'a wụrụ ebe ịhịan a nọ wanahịn onyẹ e gbugwarịnị ebọn, makẹ ọ gha e gbu hụnyẹ bụ wẹ eke kin ẹ ikpe idẹnya ịhịan ile.

¹³ Obodo isin ụnụ k'a họrị jẹnkọ d'a wụrụnị ụnụ obodo w'a gbaban.

¹⁴ Ẹtọ k'a rị azụụnnị nfetu Iyi-Jọdanị, ẹtọ k'a rị imẹ alị Kenaanị. Uwẹ sikọ d'a wụ obodo ndị w'a gbaban.

¹⁵ Obodo isinni k'a wụrụnị ndị Izrẹlụ lẹ abịamabịa lẹ ndị ile bi imẹ igunrun wẹ obodo ndị w'a gbaban, kẹni onyẹ hụn gbu ịhịan bụ ọ kpachanpụnị ẹnya mẹ ẹ hụn ụzọ gbashi ebẹhụ.

¹⁶ “Ịhịan kụ ibe ẹ igwe, nị onyẹ wẹ kụ a a nwụnhụn, izighẹ k'ọ wụ; wẹ k'e gburịrị izighẹ hụ.

¹⁷ O mẹzikwọ nị ịhịan gi ọmụma hụn k'a s'ẹka gbu ịhịan ẹka, n'ọ kụ ịhịan ya mọbụ ma a ya, nke wụnị onyẹ hụ a nwụnhụn, izighẹ k'ọ wụ; wẹ k'e gburịrị izighẹ hụ.

¹⁸ “O mẹzikwọnị ịhịan gi osisi hụn k'a s'ẹka gbu ịhịan ẹka, kụ ịhịan ya, nị onyẹ hụ a nwụnhụn, izighẹ k'ọ wụ; wẹ k'e gburịrị izighẹ hụ —

¹⁹ onyẹ hụn e gbugwarịnị ebọn hụ wẹ gbu nwẹnẹ wẹ k'e gburịrị izighẹ hụ; o kunrun izighẹ hụ, o k'e gburịrị a.

²⁰ Omẹni ịhịan nu ibe ẹ, n'ọ rụ a ẹhụ, nke wụ nị ọ nwụnhụn, mọbụ kpachanpụ ẹnya ma a ihiẹn, nke wụ nị ọ nwụnhụn,

²¹ mọbụ dụ ibe ẹ ịkpa n'ọ rụ a ẹhụ, nke wụnị ọ nwụnhụn, wẹ k'e gburịrị onyẹ hụ; izighẹ k'ọ wụ. Onyẹ e mẹgwarịnị ebọn hụn wẹ gbu kunrun izighẹ ahụn, o sikọ d'e gbugwarịrịrị a.

²² “Kanị, omẹni ịhịan fịan ibe ẹ ihiẹn bụ ẹlẹ n'o romẹ njọ fịan a ya; omẹni ihiẹn ịhịan ma tụ ibe ẹ bụ ọ kpachanpụnị ẹnya ma a ya;

²³ mọbụ nị ịhịan e leghanị ibe ẹ tụha ọmụma k'a s'ẹka gbu ịhịan kwasị a, nke wụnị ọ nwụnhụn — ebe omẹni ẹlẹ eṅẹnrẹn ẹ, ebe o mẹ ni ọ rịnị a chọ a njọ,

²⁴ wẹ sikọ d'e gi iwu ndịnị hannị onyẹ hụn e gbugwarịnị ebọn lẹ hụn gbu ịhịan eṅẹn.

²⁵ Wẹ k'a narịrị hụn wẹ rị e kpe ikpe ọchụn ye azụụn, wekin ẹ obodo w'a gbaban hụn ọ gbashi, makẹ hụn e gbugwarịnị ebọn gha e gbu ẹ. O k'a nọdịrịrị ebẹhụ d'e ru ni onyẹ-isi nchụn-ẹjan rị ogẹn hụ a nwụnhụn, onyẹ hụn wẹ gi udẹn-nsọ tumẹ onyẹ-isi nchụn-ẹjan.

²⁶ “Kanị, onyẹ hụ wẹ rị e kpe ikpe ọchụn ma-ama ghafe okẹn obodo hụ w'a gbaban ọ gbashi,

²⁷ nị hụn k'e gbugwarịnị ebọn a hụn a ụzọ ọzọ wụlẹni obodo hụ w'a gbaban ọ gbashi, hụn e gbugwarịnị ebọn nwọn ikẹn gbu ẹ, ikpe igbu-ọchụn amakọ a.

²⁸ Onyẹ wẹ rị e kpe ikpe ọchụ sikọ d'a nọdịrịrị obodo mgbaban hụ o shi d'e rukwọ mgbe onyẹ-isi nchụn-ẹjan rịnị nwụnhụn; onyẹ-isi nchụn-ẹjan nwụnhụngụ k'ọ nọ lakin iwe ẹ.

²⁹ “Iwu ndịnị kẹ ụnụ sikọ d'e gi bi ebe ọwụlẹ ụnụ bi — agbọ ụnụ ile lalanị.

³⁰ “Mmanị ndị o mẹ ẹnya pụha ọshẹri, egbukọ wẹ onyẹ gbu ọchụn n'ọ wụ izighẹ; egikọ wẹ ẹri onyẹ ohu shịa gbu ịhịan.

³¹ “Anịlẹ ni wẹ gi ihiẹn ọwụlẹ gbarị ndụn izighẹ wẹ magụ ikpe ọnwụn; wẹ k'e gburịrị a.

³² “Anịkwọlẹ ni onyẹ hụn gbu ịhịan gbashi obodo w'a gbaban gi ihiẹn ọwụlẹ gbarị enwẹn ẹ, hụn w'e gi nị a lakin alị a d'e biri omẹni onyẹ-isi nchụn-ẹjan rịnị eke nwụn.

³³ “Emẹrụlẹ ni nwan alị ụnụ rị. Igbu-ịhịan e mẹrụ alị, bụ w'a ra saẹka gi ịchụn-ẹjan hịan alị wẹ nọ gbu ịhịan wepụ njọ; isi onyẹ gbu ịhịan sụọ kẹ wẹ gi a hịan a.

³⁴ Ẹghẹẹ, emẹrụlẹ ni alị ụnụ bi, hụn mmẹ nwẹn bi, makẹni mmẹ wụ Osolobuẹ bi imẹ igunrun ụnụ ndị Izrẹlụ.”