Ọgụngụn 34 - Ika

Isi Nke Mmẹnọ Kwasị Ọgụn Ebe Alị Osolobuẹ Ye Izrẹlụ Ghasọnmẹ

¹ Osolobuẹ sị Mozizi,

² “Sị ndị Izrẹlụ: Ụnụ e d'a banye alị Kenaanị, alị hụn wẹ sikọ d'e keni ụnụ weri; Lee ni ebe o k'a ghasọnmẹ:

³ “Ẹbamịn ndịdan-mirin, o sikọ d'e bidọn okẹn Ohimin Nnu lẹ Ẹdọm, ghasọnmẹ mkpẹnrẹn alị Ẹdọm, pụ alị ọkpọ-nkụn Zini —

⁴ ẹbamịn ndịdan-mirin Ugu Akrabim k'o k'a gha pụ Alị ọkpọ-nkụn Zini hụ; Kadẹshi-Bania ile jẹnkọ d'a rị azụụn nke ụnụ. Ọ gha ebe Kadẹshi ru, o jẹnru Haza-Ada, pụha Az'mọnụ;

⁵ o k'a nọ Az'mọnụ gbugizi, jẹnru Ọdanmgbugbu Iyi udu-mirin Ijiptu, gha ebẹhụ pụ Ohimin-uku Mẹditerenia ibe ọdịdan-ẹnyanwụn hụ.

⁶ “Ohimin-uku Mẹditerenia lẹ mkpẹnrẹn ẹ k'a wụchanrịn okẹn ibe ẹbamịn ọdịdan-ẹnyanwụn.

⁷ “Ẹbamịn ugu, nke ụnụ k'a gha Ohimin-uku Mẹditerenia ghasọnmẹ ozigbo-ozigbo d'e ru Ugu Họ rị nkọ hụ,

⁸ ghasọnmẹzi nkọ hụ d'e ru Lebo-Hamatị, ebe alị Hamatị gha, ruzi Zẹdadị,

⁹ jẹnsọnmẹzi d'e ru Zifrọnụ, jẹnsọnmẹzi: Haza-ẹnanị k'o k'e jẹndemẹ. Ọhụn k'a wụ okẹn ụnụ lẹ ndị rị ụnụ ẹbamịn-ugu.

¹⁰ “Okẹn ụnụ lẹ ndị rị ẹbamịn ọwụwa-ẹnyanwụn k'a gha Haza-Ẹnanị jẹnsọnmẹ d'e ru Shẹfam;

¹¹ ọ ghazị Shẹfam jẹnru Ribla rị ẹbamịn ọwụwa-ẹnyanwụn alị Aini, ghasọnmẹ mkpọtu ugu rịsọnmẹ mkpẹnrẹn ẹbamịn ọwụwa-ẹnyanwụn Ohimin Kinẹrẹti, Ohimin Galili;

¹² o k'a gha ebẹhụ ghasọnmẹ mkpẹnrẹn Iyi Jọdanị, jẹndemẹ Ohimin Nnu, Ohimin Nwụnnị. “Ọhụn k'a wụ alị ụnụ lẹ ebe o k'a ghasọnmẹ ẹbamịn ẹnịnọ.”

¹³ Mozizi nọ sị ndị Izrẹlụ, “Gi ni utẹn-Osolobuẹ keri alị hụ n'ọ wụrụ ukuu ụnụ. Osolobuẹ sị wẹ w'ẹ ye ebọn itenẹi lẹ nkirishi họdụnị,

¹⁴ makẹni ebọn Rubẹni lẹ ebọn Gadị lẹ mgbube ebọn Manasẹ e werigụọ nke wẹ.

¹⁵ Ebọn ẹbụọ lẹ nkirishi hụ weri nke wẹ ẹbamịn ọwụwa-ẹnyanwụn Iyi Jọdanị, ihun Jẹriko.”

¹⁶ Osolobuẹ nọ sị Mozizi,

¹⁷ “Ọnwan wụ ẹfan ikẹnnyẹ ndị k'e keni ụnụ alị hụ: Ẹliẹza onyẹ nchụn-ẹjan lẹ Joshụa nwa Nọnụ.

¹⁸ Tumẹsọnmẹ ni onyẹ-isi ohu-ohu imẹ ebọn ọwụlẹ nị wẹ yeni Ẹliẹza lẹ Joshụa ẹka keni ụnụ alị hụ.

¹⁹ Lee ẹfan ndị-isi hụ: nke ebọn Juda wụ Kalẹbụ nwa Jefunẹ;

²⁰ ebọn Simiọnụ — Shẹmuẹlụ nwa Amihudu;

²¹ ebọn Bẹnjamini — Ẹlidadị nwa Kis'lọnụ;

²² ebọn Danị — Buki nwa Jọgli;

²³ ebọn Manasẹ nwa Josẹfụ — Haniẹlụ nwa Ẹfọdụ;

²⁴ ebọn Ifrem nwa Josẹfụ — Kẹmuẹlụ nwa Shif'tanị;

²⁵ ebọn Zẹbulọnụ — Ẹlizafanị nwa Panakị;

²⁶ ebọn Isaka — Pal'tiẹlụ nwa Azanị;

²⁷ ebọn Asha — Ahihudu nwa Shẹlomi;

²⁸ ebọn Naf'tali — Pẹdahẹlụ nwa Amihudu.”

²⁹ Uwẹ wụ ndị-isi Osolobuẹ sị keni ndị Izrẹlụ alị Kenaanị.