Ọgụngụn 33 - Ika

Isi Nke Mmẹtọ Kwasị Ọgụn Ebe Ndị Izrẹlụ Ziẹntọsọnmẹ Nị Wẹ D'e Ru Kenaanị

¹ Alị ndịnị kẹ Izrẹlụ ziẹntọsọnmẹ kẹ wẹ gha alị Ijiptu pụla nọkẹ ndị-agha — okpuru Mozizi lẹ Ẹrọnụ.

² Mozizi detu ebe ile wẹ ziẹntọsọnmẹ kẹ wẹ jẹnkọ; Osolobuẹ gwa a detu ẹ. Alị ndịnị wẹ kẹ wẹ ziẹntọsọnmẹ:

³ Ifọn ibuzọ rị akp'ọhịn mmisẹn kẹ ndị Izrẹlụ gha alị Ramsisi buli; w'a kpọ a ụnyanhụn wẹ mẹ Mmẹmmẹ-nghafe kẹ wẹ buli. Wẹ dọnpụha ndụn-ndụn idẹnya ndị Ijiptu ile,

⁴ ebe ndị Ijiptu rị e li ikẹnnyẹ ibuzọ wẹ ile, ụmụ wẹ ndị Osolobuẹ gbu imẹ igunrun wẹ gi hangbu mmọn lẹ iyi ndị Ijiptu eṅẹn.

⁵ Ndị Izrẹlụ nọ gha Ramsisi buli, ziẹntọ Sukọtụ;

⁶ a gha wẹ Sukọtụ buli, ziẹntọ Ẹtam, mkpẹnrẹn atụ;

⁷ a gha wẹ Ẹtam buli, kin azụụn shi Pi-Hahirọtụ, hụn rị ẹbamịn ọwụwa-ẹnyanwụn Baalụ-Zẹfọnụ, ya wẹ nọ ziẹntọ ẹhụ Mig'dọlụ.

⁸ A gha wẹ Pi-Hahirọtụ buli, wẹ nọ gha imẹ Ohimin Ufie hụ kewanị nị wẹ, ya wẹ nọ pụhazị atụ, e jẹnpụ wẹ akpọhịn ẹtọ imẹ Atụ Ẹtam, wẹ nọ ziẹntọ Mara.

⁹ A gha wẹ Mara buli, ya wẹ nọ shi Ẹlim, ebe isi-mirin mmẹbụọ lẹ nkụ iri kwasị ọgụn-ẹtọ rị, wẹ nọ ziẹntọ ebẹhụ.

¹⁰ A gha wẹ Ẹlim buli, wẹ nọ ziẹntọ ẹhụ Ohimin-ufie.

¹¹ A gha wẹ Ohimin-ufie buli, wẹ nọ ziẹntọ Atụ alị-ọkpọnkụn Sini.

¹² A gha wẹ Atụ Sini buli, wẹ nọ ziẹntọ Dọf'ka;

¹³ a gha wẹ Dọf'ka buli, e ziẹntọ wẹ Alushi;

¹⁴ a gha wẹ Alushi buli, ziẹntọ Rẹfidim, ebẹhụ wẹ nọlẹni hụn mirin ra.

¹⁵ A gha wẹ Rẹfidim buli, ziẹntọ alị ọkpọ-nkụn Atụ Saịnaị.

¹⁶ A gha wẹ alị ọkpọ-nkụn Atụ Saịnaị buli, ziẹntọ Kibrọtụ-Hatava;

¹⁷ gha Kibrọtụ-Hatava buli, ziẹntọ Hazẹrọtụ;

¹⁸ gha Hazẹrọtụ buli, ziẹntọ Ritima.

¹⁹ A gha wẹ Ritima buli, ziẹntọ Rimọnụ-Pẹrẹzi;

²⁰ gha Rimọnụ-Pẹrẹzi buli, ziẹntọ Libna;

²¹ gha Libna buli, ziẹntọ Risa.

²² A gha wẹ Risa buli, ziẹntọ Kẹhẹlata;

²³ gha Kẹhẹlata buli, ziẹntọ Ugu Shẹfa;

²⁴ gha Ugu Shẹfa buli, ziẹntọ Harada.

²⁵ A gha wẹ Harada buli, ziẹntọ Mak'hẹlọtụ.

²⁶ A gha wẹ Mak'hẹlọtụ buli, ziẹntọ Tahatị;

²⁷ gha Tahatị buli, ziẹntọ Tẹra;

²⁸ gha Tẹra buli, ziẹntọ Mit'ka;

²⁹ gha Mit'ka buli, ziẹntọ Hash'mona.

³⁰ A gha wẹ Hash'mona buli, ziẹntọ Mọsẹrọtụ;

³¹ gha Mọsẹrọtụ buli, ziẹntọ Bẹnẹ-Jaakanị;

³² gha Bẹnẹ-Jaakanị buli, ziẹntọ Họ-Hagid'gadị;

³³ gha Họ-Hagid'gadị buli, ziẹntọ Jọt'bata.

³⁴ A gha wẹ Jọt'bata buli, ziẹntọ Ab'rọna;

³⁵ gha Ab'rọna buli, ziẹntọ Eziọnụ-Gẹba;

³⁶ gha Eziọnụ-Gẹba buli, ziẹntọ Kadẹshi, Atụ alị ọkpọ-nkụn Zini;

³⁷ gha Kadẹshi buli, ziẹntọ Ugu Họ, mkpẹnrẹn Ẹdọm.

³⁸ Ẹrọnụ nọ shi elu Ugu Họ kẹ Osolobuẹ dọn gwa a, ọ nọ nwụntọ ebẹhụ ụhụọhịn ibuzọ imẹ ifọn nke isẹn imẹ ahụa nke ọgụnnaị ndị Izrẹlụ gha Ijiptu pụha.

³⁹ Ẹrọnụ rị nwa ahụa ẹtọ kwasị ọgụn-isin k'ọ nwụntọ Ugu Họ.

⁴⁰ Ogẹnni kẹ eze ndị Kenaanị alị Aradị hụn bi alị ọkpọ-nkụn Nẹgẹvụ gi nụ nị ndị Izrẹlụ lala.

⁴¹ A gha wẹ Ugu Họ buli, ziẹntọ Zalụmona;

⁴² gha Zalụmona buli, ziẹntọ Punọnụ;

⁴³ gha Punọnụ buli, ziẹntọ Obotu.

⁴⁴ A gha wẹ Obotu buli, ziẹntọ Iye-Abarim, mkpẹnrẹn alị Mụabụ;

⁴⁵ gha Iyim wụ Iye-Abarim buli, ziẹntọ Dibọnụ-Gadị;

⁴⁶ gha Dibọnụ-Gadị buli, ziẹntọ Al'mọnụ-Diblataịm.

⁴⁷ A gha wẹ Al'mọnụ-Diblataịm buli, ziẹntọ Ugu ndị hụ nọgbamanị rị Abarim, ẹhụ Nebo.

⁴⁸ A gha wẹ Ugu ndị hụ nọgbamanị rị Abarim buli, ziẹntọ alị-aradan Mụabụ mkpẹnrẹn Iyi Jọdanị, ihun Jẹriko.

⁴⁹ Ebẹhụ wẹ ile ziẹntọsọnmẹ alị-aradan Mụabụ hụ mkpẹnrẹn Iyi Jọdanị gha Bẹt-Jẹshimọtụ rukwọrị Ebẹlụ-Shitim.

⁵⁰ Ebẹhụ wẹ rị alị-aradan Mụabụ, mkpẹnrẹn Iyi Jọdanị, ihun Jẹriko, Osolobuẹ nọ sị Mozizi,

⁵¹ “Gwa ndị Izrẹlụ, sị: Ụnụ fetugụ Jọdanị, banye alị Kenaanị,

⁵² chụpụchanrịn nị ndị bin'ẹ; tikpọ nị mmọn lẹ iyi ile wẹ kọma — kẹ ndị wẹ pịn kẹ ndị wẹ kpụ; kụtu ni ukpo-mmọn wẹ ile.

⁵³ Weri ni alị ahụn biri, nị e yegụọ m ụnụ ya weri.

⁵⁴ Gi ni utẹn-Osolobuẹ han alị ahụn — ebọn-ebọn; ndị ka ọda, wẹ weri hụn kanị, ndị mẹ ẹkẹrẹ e weri hụn mẹ ẹkẹrẹ. Ebe ọwụlẹ utẹn-Osolobuẹ gwa onyẹ weri k'o jẹnkọ d'e weri; ebọn-ebọn kẹ ụnụ k'e ke ẹ.

⁵⁵ “Kanị, omẹni ụnụ achụpụnị ndị alị ahụn, ndị ụnụ latọ k'a wụrụ ntu k'a dụnsọnmẹ ụnụ ẹnya lẹ ogun k'a dụnsọnmẹ ụnụ ẹkụnkụn; wẹ k'e ye ụnụ nsọngbu imẹ alị ahụn ụnụ sikọ d'e bi —

⁵⁶ ogẹn ahụn, e mẹ m ụnụ ihiẹn m te k'e mẹ wẹ.”