Ọgụngụn 32 - Ika

Isi Nke Mmẹbụọ Kwasị Ọgụn Ebọn Ẹtọ Wẹ Ye Alị Ẹbamịn Ọwụwa-ẹnyanwụn Iyi Jọdanị

¹ Ebọn Rubẹni lẹ ebọn Gadị nwọn efin lẹ atụnrụn lẹ ewu ọda-ọda. Ogẹn wẹ gi hụn nị alị Jaza lẹ Gilẹdị a rịka mma w'a nọ kpa anụ,

² wẹ nọ bịa d'e kunrun Mozizi lẹ Ẹliẹza onyẹ nchụn-ẹjan lẹ ndị-isi alị, sị,

³ “Alị Atarọtụ, Dibọnụ, Jaza, Nimra, Hẹsh'bọnụ, Ẹlialẹ, Sẹbam, Nebo lẹ Bionu —

⁴ hụn rịsọnmẹ alịnị Osolobuẹ mẹrini ẹnyi wụ ndị Izrẹlụ arịka mma wẹ a nọ kpa anụ, bụ ẹnyi ụmụ ị e nwọnghọ anụ.

⁵ Omẹni ihiẹn ẹnyi a sụọghọ ị, dodo ye ẹnyi wụ ụmụ ị alịnị n'ọ wụrụ nke ẹnyi, anịlẹ ẹnyi nfetu Iyi-Jọdanịnị d'e biri.”

⁶ Mozizi nọ sị ebọn Gadị lẹ Rubẹni, “Ya wụ ụnụ jẹnkọ d'a dịnọ ebeni, ndị Izrẹlụ ibe ụnụ e shi agha?

⁷ Kị ụnụ rị e kuni ndụn ọgụgụ e che ndị Izrẹlụ obi, ọ nọbe tan ekwekọzị wẹ fetu banye alị Osolobuẹ yegụ wẹ?

⁸ Ihiẹnni kẹ ndị nẹdi ụnụ mẹ ogẹn m gi gha Kadẹshi-Bania zi wẹ d'e lehunmẹ alị ahụn.

⁹ E jẹngụ wẹ Ọdanmgbugbu Ẹsh'kọlụ d'e lele alị ahụn, wẹ nọ mẹ ihiẹn ndụn gi gụ ndị Izrẹlụ, ndị Izrẹlụ nọzilẹni banye alị ahụn Osolobuẹ yegụ wẹ.

¹⁰ Olulu nọ bu Osolobuẹ ụhụọhịn ahụn, ọ nọ kun ẹfan a, sị,

¹¹ ‘Makẹni ewepụhanị wẹ obi sọnchanrịn m, onwọnni okẹnnyẹ ọwụlẹ rị nwa ahụa ọgụn shi elu hụn gha alị Ijiptu pụha hụn k'a hụn alị hụ m kun enwẹn ẹ kwe Ebraham lẹ Aziki lẹ Jekọpụ nkwa a —

¹² mmanị Kalẹbụ nwa Jefunẹ onyẹ Kẹnizi lẹ Joshụa nwa Nọnụ, makẹni wẹ wepụha obi sọnchanrịn mmẹ wụ Osolobuẹ.’

¹³ “Olulu ndị Izrẹlụ bu Osolobuẹ ọda-ọda, ọ nọ mẹ wẹ wahunmẹmẹ imẹ atụ ọrọgbọ ahụa ọgụnnaị d'e runi agbọ hụ ile mẹ Osolobuẹ eje-ihiẹn hụ a nwụnchanrịn.

¹⁴ “Lee nwan ụnụ, agbọ ndị-njọ! Ụnụ a nọkingụọ ẹnya ndị nẹdi ụnụ, e mẹ ihiẹn ize Izrẹlụ e gi zekarịdẹ Osolobuẹ k'o zehan a mbụ!

¹⁵ Ụnụ gbakịtọ a nwan azụụn, ọ lazị Izrẹlụ tọgbọ imẹ atụnị, ndịnị ile a nwụntọ ụnụ ẹka!”

¹⁶ Ya wẹ nọ nọkunmẹ Mozizi, sị a, “Nị ẹnyi rụntọsọnmẹni anụmanụ ẹnyi lẹ ikpoho ẹnyi lẹ ụmụ ẹnyi ụlọ biri imẹ obodo ndịnị,

¹⁷ ẹnyi nwẹn e kọnrin agha, buruni ndị Izrẹlụ ibe ẹnyi ụzọ d'e ru mgbe ẹnyi duru wẹ ebe wụ nke wẹ; ẹnyi jẹnkọ d'a tụnhunmẹ obodo-obodo ikpoho ẹnyi lẹ ụmụ ẹnyi wẹ k'e birisọnmẹ mgbọn, makẹ ndị ọzọ bi alịnị.

¹⁸ Ẹnyi ekinhẹnkọ iwe ẹnyi ebeni d'e ru ni onyẹ Izrẹlụ ọwụlẹ e nwọnringụ alị nke ẹ.

¹⁹ Ẹnyi nwẹn ewerikọ alị ọwụlẹ azụụn Jọdanị hụn ẹbọ hụ ẹnyi shikọ, ebe o mẹni nke ẹnyi e rugụọ nwan ẹnyi ẹka azụụnnị, nkọ ọwụwa ẹnyanwụn Iyi Jọdanị.”

Ọnọdị Mozizi Gi Kweri

²⁰ Ya kẹ Mozizi nọ sị wẹ, “Omẹni ụnụ e mẹghọ ẹrịra, omẹni o ru ogẹn hụ ụnụ e kọnrin d'a lụnị Osolobuẹ agha,

²¹ omẹni ndị nke ụnụ ile ru ogo agha e kọnrin agha, fetu Iyi Jọdanị kẹ Osolobuẹ dọn chọ d'a lụ agha, d'e ru n'ọ chụpụgụ ndị-iṅẹnrẹn ẹ ihun ẹ,

²² ya wụ nị, Osolobuẹ mẹrigụ alị hụ, ụnụ nwọn nwan ikẹn lụakin ebeni makẹni ụnụ a rụngụọ ogbo wẹ ye ụnụ rụnnị Osolobuẹ lẹ Izrẹlụ — alịnị e họnrin nke ụnụ nke-esi ẹnya Osolobuẹ.

²³ Kanị, omẹni ụnụ emẹn'ẹ, njọ kẹ ụnụ rị e mẹ Osolobuẹ; marịnkwọ nị nị njọ ụnụ jẹnkọ d'e sepụha ụnụ.

²⁴ “Tụnnị nị nwan ikpoho ụnụ lẹ ụmụ ụnụ ebe w'e bi imẹ alị ndịnị, ụnụ a tụnrụnsọnmẹ ụlọ-anụ anụ ụnụ k'e bi: ka mẹkwọ nị ihiẹn ụnụ gi ọnụ ụnụ ku!”

²⁵ Ndị ebọn Gadị lẹ ebọn Rubẹni nọ sị Mozizi, “Ẹnyi wụ ụmụ ị jẹnkọ d'e mẹ kẹ i dọn ku, Diọkpa:

²⁶ ụmụ ẹnyi lẹ inyẹnmẹ ẹnyi lẹ ewu lẹ atụnrụn ẹnyi lẹ efin ẹnyi jẹnkọ d'a nọdị obodo ndịnị rị Gilẹdị ebeni.

²⁷ Kanị, ẹnyi ụmụ ị, onyẹ ọwụlẹ wụ okẹnnyẹ imẹ ẹnyi, k'e kọnrin agha, fetu Iyini wụ Jọdanị d'a lụnị Osolobuẹ agha hụ k'i dọn ku, Diọkpa.”

²⁸ Mozizi nọ gwatọ Ẹliẹza onyẹ nchụn-ẹjan lẹ Joshụa nwa Nọnụ lẹ ndị-ichẹn ebọn-ebọn rị Izrẹlụ oku wẹ,

²⁹ sị, “Omẹni ebọn Gadị lẹ ebọn Rubẹni, ikẹnnyẹ wẹ ile, e kọnringhọ agha, sọn ụnụ fetu Iyi Jọdanị kẹ Osolobuẹ dọn chọ, ụnụ mẹrigụ alị hụ, ụnụ e we alị Gilẹdịnị ye wẹ weri.

³⁰ Kanị, omẹni ekọnrinni wẹ agha sọn ụnụ fetu d'a lụ agha hụ, ya wụ nị wẹ k'e sọnrịrị ụnụ banye alị Kenaanị hụ ụnụ shikọ, sọn ụnụ keri alị ebẹhụ.”

³¹ Ndị ebọn Gadị lẹ ebọn Rubẹni nọ za, sị, “Ụmụ ị jẹnkọ d'e mẹ ihiẹn Osolobuẹ ku.

³² Ẹnyi jẹnkọ d'e kọnrin agha fetu Iyi Jọdanị kẹ Osolobuẹ dọn chọ, banye alị Kenaanị d'a lụ agha hụ, kanị alị wẹ k'e keye ẹnyi wụ azụụnnị.”

³³ Ya Mozizi nọ we alị hụ ye ebọn Gadị, ebọn Rubẹni lẹ mgbube ebọn Manasẹ nwa Josẹfụ, alị hụn te wụ alị-eze Sihọnụ eze Amọ lẹ alị-eze Ọgụ eze Bashanị. O yechanrịn wẹ alị hụ ile lẹ obodo ndị rịn'a lẹ alị ndị nọhunmẹni wẹ.

³⁴ Ebọn Gadị nọ tụn obodo ndịnị: Dibọnụ, Atarọtụ, Arụa,

³⁵ Atrọtụ-Shọfanị, Jaza, Jog'bẹha,

³⁶ Bẹt-Nimra lẹ Bẹt-Haranị; wẹ tụnhunmẹsọnmẹ wẹ mgbọn. Wẹ tụnsọnmẹzi ebe anụ wẹ a nọdị.

³⁷ Ebọn Rubẹni nkẹ dọnzi Hẹsh'bọnụ, Ẹlialẹ lẹ Kiriataim,

³⁸ Nebo, Baalụ-Miọnụ. (Wẹ nọ ye obodo ndịnị ẹfan ọhụn); e dọnzighọ wẹ Sibma. Wẹ dọnzi obodo, e ye w'ẹ ẹfan.

³⁹ Ẹbozo Makiri nwa Manasẹ shi Gilẹdị, gi agha weri ẹ, chụpụ ndị Amọ bi ebẹhụ.

⁴⁰ Ya kẹ Mozizi nọ we Gilẹdị ye ẹbozo Makiri hụn rị imẹ ụmụ Manasẹ, wẹ nọ biri ebẹhụ.

⁴¹ Jaịrị hụn rịzị ụmụ Manasẹ nọ gi agha werisọnmẹ ụmụ-alị rị ẹgbẹrẹ Gilẹdị, kpọ wẹ “Havọtụ-Jaịrị” hụn wụ “Ụmụ-alị Jaịrị”

⁴² Noba nkẹ nọ gi agha weri alị Kẹnatị lẹ ụmụ-alị nọhunmẹn'ẹ, kpọ wẹ ẹfan ya lẹ enwẹn ẹ “Noba”.