Ọgụngụn 31 - Ika

Isi Nke Mmanaị Kwasị Ọgụn E Mẹgwarị Wẹ Ndị Midianị

¹ Osolobuẹ sị Mozizi,

² “D'e mẹgwarịnị ndị Izrẹlụ: d'e mẹgwarị ndị Midianị ihiẹn wẹ mẹ ndị Izrẹlụ. I mẹgụ a, y'a nwụnhụn laburu ndị nẹdi i.”

³ Ya Mozizi nọ sị ndị Izrẹlụ, “Han nị ikẹnnyẹ imẹ ụnụ nị ụnụ kwademẹ wẹ agha, nị wẹ jẹn d'a lụsọn ndị Midianị agha, mẹgwarị wẹ mmẹgwarị Osolobuẹ.

⁴ Họrị nị madụ nnụ-uku ebọn ohu-ohu rị Izrẹlụ zijẹn aghanị.”

⁵ Ya wẹ nọ gha Izrẹlụ ile họrị madụ nnụ-uku mmẹbụọ: ebọn-ebọn nnụ-uku ohu-ohu; wẹ nọ kwademẹ wẹ agha, kịpụha wẹ.

⁶ Ya kẹ Mozizi nọ zi wẹ agha, madụ nnụ-uku ebọn ohu, nnụ-uku ebọn ohu ahụn, uwẹ lẹ nwa Ẹliẹza onyẹ nchụn-ẹjan wụ Finẹhasị hụn kị opi-agha lẹ ihiẹn ndị wẹ weri imẹ Ọdụ-nsọ.

⁷ Wẹ nọ lụsọn ndị Midianị agha hụ Osolobuẹ gwa Mozizi, gbuchanrịn ikẹnnyẹ ile.

⁸ Wẹ gbuzikwọ ndị-nze Midianị ndịnị cheni ikẹnnyẹ wẹ gbu: Ẹvi, Rẹkẹm, Zọ, Họ lẹ Reba — ndị-nze Midianị isẹn; wẹ gi ọpịa-agha gbuzikwọ Balaam nwa Bioru.

⁹ Ndị-agha Izrẹlụ nọ nwụnrụn ikpoho lẹ ụmụ-ẹka Midianị, kpụnrụnchanrịn efin wẹ lẹ ewu lẹ atụnrụn wẹ, kwarị ihiẹn wẹ ile, e họnrin wẹ ihiẹn wẹ welụa agha.

¹⁰ Wẹ dụnchanrịn obodo wẹ ọkụn: kẹ ndị wẹ bi kẹ ebe ile wẹ ziẹntọhụ eziẹntọ.

¹¹ Wẹ nọ buru ihiẹn ndị ahụn ile wẹ gbukwarị, kẹ ịhịan kẹ anụ:

¹² Wẹ nọ we ndị ahụn wẹ nwụnrụn lẹ ihiẹn ndị ahụn wẹ kwalụa d'e kunrun Mozizi lẹ Ẹliẹza onyẹ nchụn-ẹjan lẹ Izrẹlụ ile ebẹhụ wẹ rị alị-aradan Mụabụ, mkpẹnrẹn Iyi Jọdanị, ihun Jẹriko.

¹³ Mozizi lẹ Ẹliẹza lẹ ndị-isi Izrẹlụ ile nọ gha ebẹhụ Izrẹlụ ziẹntọ pụha d'e kunrun wẹ.

¹⁴ E ru w'ẹ, Mozizi nọ bumẹni ndị-isi ndị-agha ahụn lụaha agha olulu — ndị kịsọnmẹ madụ nnụ-uku lẹ ndị kịsọnmẹ madụ ọgụn-isẹn.

¹⁵ Ọ sị wẹ, “Kị ụnụ dọnmẹni ikpoho wẹ ndụn?!

¹⁶ Lee ẹnya, uwẹ gi ọdụn Balaam dụn wẹ mẹ Izrẹlụ gbakịtọ Osolobuẹ azụụn imẹ alị Pioru, hụn ọnwụn gi gbu ndị o gbu imẹ igunrun ndị nke Osolobuẹ!!

¹⁷ Gbuchanrịn nị nwan ụmụna ikẹnnyẹ ile, ụnụ e gbu okpoho ọwụlẹ sọngụ okẹnnyẹ ranhịn.

¹⁸ Kanị nwata-okpoho ọwụlẹ kelẹni sọn okẹnnyẹ ranhịn sikọ d'a wụ nke ụnụ.

¹⁹ “Onyẹ ọwụlẹ imẹ ụnụ hụn gbu ịhịan imẹ aghanị mọbụ hụn ẹhụ a mẹtụ ozun y'a banhanlẹ ebeni ịhịan ile bi d'e ru akp'ọhịn ẹsa. Nke akp'ọhịn ẹtọ lẹ nke akp'ọhịn ẹsa rịn'a ụnụ e mẹ ihiẹn ụnụ lẹ ndị ụnụ nwụnrụn e gi rị ọchan.

²⁰ Mẹzikwọ nị ẹwuru ọwụlẹ lẹ ihiẹn ọwụlẹ wẹ gi akpụkpọ lẹ ẹṅẹnrẹn-ewu mẹmẹ lẹ ihiẹn-osisi ile ẹrịra.”

²¹ Ya Ẹliẹza onyẹ nchụn-ẹjan nọ sị ndị-agha ahụn ile jẹn ọgụn hụ, “Lee ni iwu Osolobuẹ ye Mozizi:

²² Nke goru, siliva, igwe-bronzu, igwe-mmaka, igwe-ogbogoro lẹ igwe-lẹdi

²³ lẹ ihiẹn ndị ọzọ ghalẹni a dụn ọkụn, ụnụ sikọ d'e bu wẹ che ọkụn; wẹ buchegụ wẹ ọkụn, a rị wẹ ọchan; kanị wẹ sikọ d'e fezi wẹ mirin hụ wẹ gi e mẹ ihiẹn arịzị ọchan. Kanị ihiẹn ọwụlẹ a dụn ọkụn, mirin hụ wẹ gi e mẹ ihiẹn a rịzị ọchan sụọ kẹ wẹ sikọ d'e gi mẹ wẹ wụbehi ndị rụnị.

²⁴ Nke akpọhịn ẹsa rịn'a, ụnụ a sụ ẹkwa ụnụ, ụnụ a wụbehi ndị rụnị. Ụnụ mẹgụọ a, ụnụ nwọn nwan ikẹn banhan ebe ịhịan ile bi.”

E Ke Wẹ Ihiẹn Wẹ Welụa Agha

²⁵ Osolobuẹ nọ sị Mozizi,

²⁶ “Ịyụ lẹ Ẹliẹza onyẹ nchụn-ẹjan lẹ ndị-isi ikpụlọ Izrẹlụ, gụn nị ịhịan lẹ anụ ile wẹ welụa agha.

²⁷ Kebeni ihiẹn ndị hụ wẹ bulụa agha ẹbụọ — ohu wụ nke ndị hụn jẹn agha, ohu wụ nke Izrẹlụ ile.

²⁸ “Na nị ndị hụ jẹn agha ụtụ ye Osolobuẹ: imẹ ọgụn-isẹn kwasị nnụ ọwụlẹ rị ndụn wẹ bulụa, nanị wẹ ohu: kẹ ịhịan kẹ efin kẹ jaki kẹ atụnrụn.

²⁹ Nọ nị azụụn nke wẹ weri ẹ, ụnụ e we ẹ ye Ẹliẹza onyẹ nchụn-ẹjan, n'ọ wụrụ ihiẹn wẹ tụnị Osolobuẹ.

³⁰ Ụnụ a nọ azụụn hụn wụ nke ndị Izrẹlụ werisọnmẹ ohu-ohu imẹ iri kwasị ọgụnnaị ọwụlẹ, kẹ ịhịan kẹ efin kẹ jaki kẹ atụnrụn kẹ anụ ndị ọzọ ile. We ni hụnnị ye ndị Livaị hụn e lepụ Ọdụ Osolobuẹ ẹnya.”

³¹ Ya Mozizi lẹ Ẹliẹza onyẹ nchụn-ẹjan nọ mẹ kẹ Osolobuẹ dọn gwa Mozizi.

³² Hụn họdụ imẹ wẹ ile ndị-agha gbukwarị wụ atụnrụn nnụ-uku mmịsẹn-kwasị-ọgụn-ẹtọ kwasị nnụ-uku nnụ (675,000),

³³ efin nnụ ọgụn-itenẹi (72,000),

³⁴ jaki nnụ-uku ohu-kwasị-ọgụn-ẹtọ (61,000)

³⁵ lẹ ụmụna ikpoho nnụ ọgụn-ẹnọ (32,000) kelẹni marịn okẹnnyẹ.

³⁶ Ahanmahan wẹ ile ru ndị-agha hụ ẹka, hụn wụ nnụ-uku mmẹsa lẹ mkpikpi kwasị nnụ-uku ọgụn-mmisin (337,500);

³⁷ hụn wụ nke Osolobuẹ imẹ ẹ nọ wụrụ mmisẹn-kwasị-ọgụn-mmẹtọ kwasị nnụ (675),

³⁸ Imẹ ahanmahan hụ, efin wụ nnụ-uku mmisin-kwasị-ọgụn (36,000); hụn wụ nke Osolobuẹ nọ gba mmẹbụọ kwasị ọgụn-ẹtọ,

³⁹ jaki rị nnụ-uku iri-kwasị-ọgụn lẹ mkpikpi (30,500); nke Osolobuẹ nọ wụrụ ohu kwasị ọgụn-ẹtọ.

⁴⁰ Ụmụna ikpoho rịn'a rị nnụ-ọgụnnaị (16,000), nke Osolobuẹ nọ wụrụ mmadụ mmẹbụọ kwasị ọgụn.

⁴¹ Ya Mozizi nọ mẹ kẹ Osolobuẹ dọn gwa a, we hụn wụ nke Osolobuẹ ye Ẹliẹza onyẹ nchụn-ẹjan.

⁴² Ahanmahan hụn ru ndị Izrẹlụ wụlẹni ndị-agha ẹka ogẹn Mozizi gi kegụ ihiẹn ndị hụ wẹ bulụa agha, wepụgụ nke ndị-agha hụ,

⁴³ wụ ndịnị: atụnrụn nnụ-uku mmẹsa lẹ mkpikpi kwasị nnụ-uku ọgụn-mmisin (337,500);

⁴⁴ Imẹ wẹ, efin rị nnụ iri-kwasị-ọgụn-ẹnọ (36,000);

⁴⁵ jaki rị nnụ-uku iri-kwasị-ọgụn lẹ mkpikpi (30,500);

⁴⁶ ịhịan rịn'a wụ nnụ-uku mmisin (16,000).

⁴⁷ Ya Mozizi nọ mẹ kẹ Osolobuẹ dọn gwa a, gha azụụn hụn ru ndị Izrẹlụ họdụnị ẹka wepụhasọnmẹ ohu-ohu imẹ iri kwasị ọgụnnaị ọwụlẹ — kẹ ịhịan kẹ anụ, we wẹ ye ndị Livaị hụn e lepụ Ọdụ Osolobuẹ ẹnya.

⁴⁸ Ya kẹ ndị-isi agha hụ kị itu-itu jẹn agha hụ nọ jẹn d'e kunrun Mozizi, kẹ ndị kịsọnmẹ madụ nnụ-uku kẹ ndị kị madụ ọgụn-isẹn,

⁴⁹ wẹ nọ sị Mozizi, “Diọkpa, ẹnyi a gụngụọ ndị ẹnyi kịjẹn agha, onwọnni onyẹ pụn'a.

⁵⁰ Ẹnyi nọ nwan wẹhẹsọnmẹni Osolobuẹ ihiẹn-goru onyẹ-onyẹ nwọnhẹn agha d'a gbarị isi ẹnyi ihun Osolobuẹ, kẹ ihiẹn-ẹka ichẹn-ichẹn kẹ ọla mkpịnsịn-ẹka wẹ gi e biye ẹka kẹ ihiẹn-ntịn kẹ ihiẹn-olu.”

⁵¹ Mozizi lẹ Ẹliẹza onyẹ nchụn-ẹjan nọ narịn wẹ goru ndị ahụn, ihiẹn ile wụ ihiẹn wẹ kpụ.

⁵² Goru ile hụn ndị ọkị-agha kanị lẹ ndị ọkị-agha nta wẹhẹni Osolobuẹ, hụn Mozizi lẹ Ẹliẹza gi ye Osolobuẹ oyiye wụ akpụrụ goru iri-kwasị-ọgụn-mmẹbụọ kwasị nnụ-uku-mmisin-lẹ-nkrishi (16,750), kilo iri-kwasị ọgụn-itenẹi (190kg).

⁵³ Onyẹ-onyẹ imẹ ndị-agha rị okpuru ndịnị e nwọnzighọ ihiẹn o weri imẹ agha hụ cheni ndịnị wẹ ile gba kpọnpụha.

⁵⁴ Mozizi lẹ Ẹliẹza onyẹ nchụn-ẹjan nọ narịn ndị ọkị-agha kanị lẹ ndị ọkị-agha nta goru hụ, bubanhan wẹ imẹ Ọdụ-ozuzu — n'ọ wụrụ ihiẹn Osolobuẹ gi a nyanhan ndị Izrẹlụ.