Ọgụngụn 30 - Ika

Isi Nke Iri Kwasị Ọgụn Okẹnnyẹ Kwe Osolobuẹ Nkwa

¹ Mozizi gwa ndị-isi ebọn ichẹn-ichẹn rị Izrẹlụ oku, sị wẹ, “Ọnwan wụ ihiẹn Osolobuẹ ku:

² Okẹnnyẹ kwe Osolobuẹ nkwa mọbụ kun ẹfan Osolobuẹ n'o sikọ d'e mẹ ihiẹn, ọ kagbukọkwọ nkwa hụ; o jẹnkọ e mẹrịrị ihiẹn ile o kwe nkwa a.

Nwata-okpoho Kwe Osolobuẹ Nkwa

³ “Nwata-okpoho rị iwe nẹdi ẹ kwe Osolobuẹ nkwa mọbụ kun ẹfan Osolobuẹ n'o sikọ d'e mẹ ihiẹn,

⁴ nị nẹdi ẹ a nụ nkwa hụ o kwe mọbụ ihiẹn ọ sị o k'e mẹrịrị, bụ ọ gwanị nwa a ihiẹn ọwụlẹ, nwata-okpoho ahụn k'e mẹrịrị ihiẹn o kwe Osolobuẹ nkwa lẹ ihiẹn ile ọ sị o k'e mẹ.

⁵ Kanị, nẹdi ẹ sị mba ogẹn ahụn o gi nụ a, a kagbugụọ wẹ kẹ nkwa kẹ ihiẹn ile ọ sị o k'e mẹ; Osolobuẹ k'a hatu ẹ ye, makẹni nẹdi ẹ a jụgụọ.

Okpoho Hụn Nwọn Di Kwe Osolobuẹ Nkwa

⁶ “Nwata-okpoho hụ lụrụ di ebe o kwegụ nkwa mọbụ ẹhụ tụgụ a d'e ku n'o k'e mẹrịrị ihiẹn,

⁷ nị di ẹ a nụ nị ihiẹn nọ ẹnịna rị alị bụ onwọnni ihiẹn o ku, hụn okpoho k'e mẹrịrị ihiẹn o kwe Osolobuẹ nkwa a lẹ ihiẹn ile ku.

⁸ “Kanị, di ẹ nụ a sị mba ogẹn ahụn o gi nụ a, di ẹ a kagbugụọ kẹ nkwa kẹ ihiẹn hụ ile ẹhụ tụ a d'e ku; Osolobuẹ k'a hatu ẹ ye.

Okpoho Nwọnzilẹni Di

⁹ “Kanị, okpoho di ẹ nwụn mọbụ okpoho ya lẹ di ẹ kpechan kwe Osolobuẹ nkwa mọbụ kwe nkwa n'o sikọ d'e mẹ ihiẹn ọwụlẹ, o k'e mẹzurịrị a.

¹⁰ “Omẹni ya lẹ di ẹ bi k'o kwe nkwa mọbụ kun ẹfan Osolobuẹ n'o k'e mẹ ihiẹn,

¹¹ nị di ẹ a nụ a, kanị onwọnni ihiẹn ọ gwa nwunyẹ ẹ, okpoho hụ k'e mẹrịrị ihiẹn o kwe Osolobuẹ nkwa a lẹ ihiẹn ile o ku.

¹² “Kanị di ẹ sị mba ogẹn o gi nụ wẹ, di ẹ a kagbugụọ ihiẹn ile gha a ọnụ pụha, kẹ nkwa o kwe Osolobuẹ kẹ ihiẹn ile o ku. Di ẹ a kagbugụọ wẹ; Osolobuẹ k'a hatu okpoho hụ ye.

¹³ Di ẹ nwọn ikẹn kwadọn mọbụ kagbu nkwa ọwụlẹ o kwe Osolobuẹ lẹ ihiẹn ọwụlẹ ọ sị o k'a napụ enwẹn ẹ mọbụ mẹ.

¹⁴ Kanị di ẹ gbasọnmẹ nkịtịn, ya wụ nị ọ kwadọngụọ nkwa ile okpoho hụ kwe Osolobuẹ lẹ ihiẹn ile o ku. Ọ kwadọngụọ wẹ makẹni ọ nụgụọ wẹ gba nkịtịn.

¹⁵ Ọ nụgụ a, gba nkịtịn, kanị o mẹgụ ọ kagbuzi ẹ, ịya k'e gi isi ẹ buru, ẹlẹzi hụn okpoho.”

¹⁶ Iwu ndịnị kẹ Osolobuẹ ye Mozizi hụn sikọ d'a rị ẹgbata okẹnnyẹ lẹ nwunyẹ ẹ lẹ ẹgbata nẹdi lẹ nwa a wụ nwagbọọ hụn rị iwe nẹdi ẹ.