Ọgụngụn 3 - Ika

Isi Nke Ẹtọ Ebọn Livaị

¹ Ọnwan wụ ẹbozo Ẹrọnụ lẹ nke Mozizi ogẹn Osolobuẹ gi gwa Mozizi oku elu Ugu Saịnaị.

² Ẹfan ụmụ-ikẹnnyẹ Ẹrọnụ wụ Nadabụ nwa ibuzọ a lẹ Abihu lẹ Ẹliẹza lẹ Itama.

³ Ịya wụ ẹfan ụmụ-ikẹnnyẹ Ẹrọnụ wẹ gi udẹn-nsọ tumẹ ndị nchụn-ẹjan, ndị wẹ tumẹ nị wẹ a rụn ọrụn ịchụn-ẹjan.

⁴ Kanị Nadabụ lẹ Abihu nwụntọ ihun Osolobuẹ ogẹn wẹ gi mụyen'ẹ nsẹnsi ọkụn ọ gwalẹni wẹ imẹ atụ Saịnaị. Amụnị wẹ ikẹnnyẹ; Ẹliẹza lẹ Itama sụọ rụn nwan ọrụn ịchụn-ẹjan ogẹn Ẹrọnụ nẹdi wẹ gi rị ndụn.

⁵ Osolobuẹ sị Mozizi,

⁶ “Wẹhẹ ndị ebọn Livaị, y'e we wẹ ye Ẹrọnụ, nị wẹ hụn ụzọ e yen'ẹ ẹka.

⁷ Wẹ k'a gha a rụnnị ịya lẹ ndị Izrẹlụ ile ọrụn imẹ Ọdụ-ozuzu ghahanị ịrụn ọrụn ya lẹ Ọdụ-nsọ wị.

⁸ Wẹ jẹnkọ d'a rịzị e lepụ ihiẹn ile rị imẹ Ọdụ-ozuzu ẹnya, a rụnnị ndị Izrẹlụ ogbo wẹ ghahanị ịrụn-ọrụn Ọdụ-nsọ.

⁹ We ndị Livaị ye Ẹrọnụ lẹ ụmụ a; uwẹ wụ ndị Izrẹlụ wẹ sikọ d'e yechanrịn Ẹrọnụ.

¹⁰ Tumẹ Ẹrọnụ lẹ ụmụ a nị wẹ rụnma ọrụn ịchụn-ẹjan; wẹ k'e gbu onyẹ ọzọ ọwụlẹ nọkunmẹ Ọdụ-ozuzu hụ.”

¹¹ Osolobuẹ sị Mozizi;

¹² “E werigụọ m ndị Livaị imẹ ndị Izrẹlụ, gi wẹ nọkin ẹnya ikẹnnyẹ ibuzọ ile ikpoho Izrẹlụ mụ. Ndị Livaị wụ nke m,

¹³ makẹni ikẹnnyẹ ibuzọ ile wụ nke m. Ogẹn m gi gbuchanrịn ikẹnnyẹ ibuzọ ile rị imẹ Ijiptu, m nọ bu ikẹnnyẹ ibuzọ Izrẹlụ tọnị enwẹn m, kẹ ịhịan kẹ anụ. Wẹ k'a wụ nke m. Mmẹ wụ Osolobuẹ.”

¹⁴ Imẹ atụ Saịnaị hụ, Osolobuẹ sịzị Mozizi,

¹⁵ “Gụn ndị ebọn Livaị ikp'ụlọ-ikp'ụlọ lẹ ẹbozo-ẹbozo. Gụn ikẹnnyẹ ile rị gha ifọn ohu shi elu.”

¹⁶ Ya Mozizi nọ gụn wẹ k'o dọn nụ ọnụ Osolobuẹ.

¹⁷ Ndịnị wụ ẹfan ụmụ Livaị: Gẹshọnụ, Kohatị lẹ Mẹrari.

¹⁸ Ndịnị wụ ẹbozo Gẹshọnụ, ụmụ Gẹshọnụ: Libni lẹ Shimei.

¹⁹ Ebozo Kohatị, ụmụ Kohatị: Amram, Iziha, Hibrọnụ lẹ Uziẹlụ.

²⁰ Ebozo Mẹrari: Mali lẹ Mushi. Wẹ ile wụ ebozo Livaị — ikp'ụlọ-ikp'ụlọ.

Ebozo Gẹshọnụ

²¹ Ndị nke Gẹshọnụ wụ ndị Libni lẹ ndị Shimei; ndịnị wụ ebozo Gẹshọnụ.

²² Ikẹnnyẹ ile wẹ gụn, hụn ri gha ifọn ohu shi elu rị madụ nnụ-uku ẹsa lẹ mkpikpi (7,500).

²³ Ndị ẹbozo Gẹshọnụ nwọn e ziẹntọ ibe azụụn Ọdụ-ozuzu, ẹbamịn ọdịdan-ẹnyanwụn.

²⁴ Ẹliasafụ nwa Laẹlụ wụ onyẹ-isi ndị rị ebozo Gẹshọnụ.

²⁵ Imẹ Ọdụ-ozuzu, nke ndị Gẹshọnụ wụ ilepụ ihiẹn ile wẹ gi kpu Ọdụ-nsọ ẹnya, kẹ okpukpu ẹ ile kẹ ẹkwa wẹ gi tankin ọnụmụzọ Ọdụ-ozuzu,

²⁶ kẹ ẹkwa ndị wẹ gisọnmẹ a tanhunmẹ ezi ẹ lẹ hụn wẹ gi a tankin ọnụ-mgbọn ezi ẹ — ezi hụn ghahunmẹ Ọdụ-nsọ lẹ ukpo wẹ n'a dụn ẹjan ọkụn, kẹ eriri kẹ ihiẹn ile ya lẹ ẹkwa ndịnị wị.

Ebozo Kohatị

²⁷ Ndị nke Kohatị wụ ndị Amram, ndị Iziha, ndị Hibrọnụ lẹ ndị Uziẹlụ; ndịnị wụ ẹbozo Kohatị,

²⁸ Ikẹnnyẹ ile rị gha ifọn ohu shi elu rị madụ ọgụn-isẹn kwasị nnụ-uku ẹsatọ lẹ mkpikpi (8,600). Nke ndị Kohatị wụ ilepụ Ọdụ-ozuzu ẹnya.

²⁹ Ndị Kohatị k'e ziẹntọ ẹkụnkụn Ọdụ-ozuzu, ẹbamịn ndịdan-mirin.

³⁰ Ẹlizafanị nwa Uziẹlụ wụ onyẹ-isi ebozo Kohatị.

³¹ Hụn wẹ e lepụ ẹnya wụ Ẹkpẹti-Osolobuẹ, teburu, obu-ukpẹ, ukpo ichẹn-ichẹn wẹ nọ a chụn ẹjan, ihiẹn ndị ọzọ wẹ gi a rụn ọrụn ebẹhụ lẹzi ẹkwa-mgbọnkin; wẹ ile lẹ ihiẹn ile wẹ gi wẹ a rụn.

Onyẹ Kị Ndị Livaị Ile Ọrụn

³² Ẹliẹza nwa Ẹrọnụ onyẹ nchụn-ẹjan kịchanrịn ndị-isi ndị Livaị. Ịya a kị ndị hụn e lepụ Ọdụ-nsọ Osolobuẹ ẹnya.

Ebozo Mẹrari

³³ Ndị nke Mẹrari wụ ndị ebọn Mali lẹ Mushi; ndịnị wụ ebozo Mẹrari.

³⁴ Ikẹnnyẹ ndị rị gha ifọn ohu shi elu wẹ gụn rị madụ ọgụn-iri kwasị nnụ-uku isin (6,200).

³⁵ Onyẹ-isi ikpụlọ ndị rị ebozo Mẹrari wụ Zuriẹlụ nwa Abihailu. Ndị Mẹrari sikọ d'e ziẹntọ ẹkụnkụn Ọdụ-ozuzu, ẹbamịn-ugu.

³⁶ Hụn ndị Mẹrari k'e lepụ ẹnya wụ ihiẹn ile kwọndọn Ọdụ-nsọ: kẹ ibe-osisi ndị wẹ gi rụn ẹhụ Ọdụ-nsọ kẹ akp'osisi ndị wẹ gi fiẹnbepụ wẹ kẹ adansụn a ile kẹ ụkụ wẹ ile ihiẹn ile ya lẹ wẹ wị;

³⁷ kẹ adansụn ndị wẹ gi tuhunmẹ ezi Ọdụ-nsọ lẹ ụkụ adansụn ndị hụ kẹ mkpụkpọ lẹ eriri ile wẹ gi e kwọndọn Ọdụ-nsọ.

Ebe Mozizi Lẹ Ẹrọnụ A Nọdị

³⁸ Mozizi lẹ Ẹrọnụ lẹ ụmụ Ẹrọnụ k'e ziẹntọ ihun Ọdụ-ozuzu hụ, azụụn anwụn gha a wa. Uwẹ kẹ ọrụn ilepụnị ndị Izrẹlụ Ọdụ-nsọ ẹnya rịchanrịn ẹka. Onyẹ ọzọ buche ẹka, ọnwụn a rọ.

³⁹ Ndị Livaị ile Mozizi lẹ Ẹrọnụ gụn ẹbozo-ẹbozo kẹ Osolobuẹ dọn gwa wẹ, ikẹnnyẹ ile rị gha ifọn ohu shi elu, rị madụ nnụ-uku ẹbụọ kwasị ọgụn (22,000).

Osolobuẹ E Gi Ndị Livaị Nọkin Ẹnya Ikẹnnyẹ-ibuzọ Izrẹlụ

⁴⁰ Osolobuẹ nọ sị Mozizi, “Gụn ikẹnnyẹ ibuzọ Izrẹlụ ile rị gha ifọn ohu shi elu, y'e detu ẹfan wẹ.

⁴¹ Gi ndị Livaị nọkinni m ẹnya ikẹnnyẹ-ibuzọ ndị Izrẹlụ ile, y'e gi anụ ndị Livaị nọkinni m ẹnya okẹn ibuzọ ile anụ ndị Izrẹlụ mụ. Mmẹ wụ Osolobuẹ.”

⁴² Ya Mozizi nọ gụnkwama ụmụ-ibuzọ ndị Izrẹlụ kẹ Osolobuẹ dọn gwa a.

⁴³ Ikẹnnyẹ ibuzọ ile hụn rị gha ifọn ohu shi elu wẹ detu ẹfan wẹ rị madụ mmẹtọ kwasị ọgụn-mmẹtọ kwasị nnụ-uku ẹbụọ kwasị ọgụn (22,273).

⁴⁴ Osolobuẹ nọzị sị Mozizi,

⁴⁵ “Gi ndị Livaị nọkinni m ẹnya ụmụ-ibuzọ Izrẹlụ ile, y'e gi anụ ndị Livaị nọkinni m ẹnya anụ wẹ. Ndị Livaị k'a wụ nke m. Mmẹ wụ Osolobuẹ.

⁴⁶ “Igi gbarị ikẹnnyẹ mmẹtọ kwasị ọgụn-mmẹtọ (273) hụn ikẹnnyẹ-ibuzọ ndị Izrẹlụ gi karị ndị Livaị,

⁴⁷ narịnsọnmẹ akpụrụ egho siliva isẹn-isẹn isi onyẹ-onyẹ imẹ wẹ, akpụrụ egho siliva wẹ k'e gi a kụ a k'a han kẹ nke Ọdụ-nsọ hụn wụ akpụrụ egho nta ọgụn.

⁴⁸ We egho hụ ye Ẹrọnụ lẹ ụmụ a, egho hụ wẹ gi gbarị madụ mmẹtọ kwasị ọgụn-mmẹtọ hụ ndị Izrẹlụ gi ka ndị Livaị.”

⁴⁹ Ya Mozizi nọ narịn egho wẹ gi gbarị ikẹnnyẹ-ibuzọ mmẹtọ kwasị ọgụn-mmẹtọ họdụnị ndị Livaị kelẹni gbarị.

⁵⁰ Ihiẹn ọ narịn ụmụ-ibuzọ ndị Izrẹlụ wụ akpụrụ siliva isẹn kwasị ọgụn-mmẹsatọ kwasị nnụ-uku (1,365), ihiẹn wẹ gi e lele siliva Ọdụ-nsọ kẹ wẹ gi lele siliva hụ.

⁵¹ Mozizi nọ we egho hụ wẹ gi gbarị wẹ ye Ẹrọnụ lẹ ụmụ a, kẹ Osolobuẹ dọn gwa a.