Ọgụngụn 29 - Ika

Isi Nke Itenẹi Kwasị Ọgụn Mmẹmmẹ Igbu-opi

¹ “O ru ụhụọhịn ibuzọ imẹ ifọn nke ẹsa, ụnụ e zu ozuzu rị nsọ. Arụnlẹ ni ọrụn ụnụ ụhụọhịn ahụn. Ụhụọhịn ụnụ sikọ d'e gbu opi (ọdụn) k'ọ wụ.

² Ihiẹn ụnụ k'e gi chụn ẹjan ishin ẹ a sụọ Osolobuẹ wụ nwa-efin ohu, ebulu ohu lẹ ụmụ-atụnrụn ẹsa rịsọnmẹ ahụa ohu-ohu. Wẹ ile sikọ d'a wụchanrịn anụ ẹhụ zu oke.

³ Oyiye-ọka wẹ sikọ d'e wecheni okẹn-efin ọwụlẹ wụ ọka wẹ gweriẹn k'e jun mkpu kọstadị-nta isin hụn wẹ gi ofugbọn-olivu gwọ; nke ebulu ohu-ohu k'e jun mkpu kọstadị-nta ohu-lẹ-mkpikpi,

⁴ nke nwa-atụnrụn ohu-ohu imẹ wẹ ẹsa k'e jun mkpu kọstadị-nta ohu;

⁵ ụnụ e gizi mkpịn ohu chụn ẹjan-njọ gi gbarị isi ụnụ.

⁶ A chụn nị ndịnị e cheni ẹjan w'a dụn ọkụn ifọn-ifọn lẹ oyiye-ọka a lẹ hụn w'a chụn ụhụọhịn-ụhụọhịn lẹ oyiye-ọka a, uwẹ lẹ oyiye-manya sọnni wẹ, kẹ wẹ dọnsọnmẹ kaye wẹ — ẹjan wẹ gi ọkụn chụnyeni Osolobuẹ hụn ishin ẹ a sụọ a.

Ụhụọhịn Ịgbarị-isi Ndị Izrẹlụ Ile

⁷ “Ifọn nke ẹsa rị akpọhịn iri, ụnụ e zu ozuzu rị nsọ. Ụnụ sikọ d'e bu ọnụ; ụnụ arụnkọ ọrụn ọwụlẹ ụhụọhịn hụ.

⁸ Ụnụ a chụn ẹjan w'a dụn ọkụn ishin ẹ a sụọ Osolobuẹ: nwa-efin ohu, ebulu ohu ka ẹhụ lẹ ụmụ-ebulu ẹsa rịsọnmẹ ahụa ohu-ohu. Wẹ ile k'a wụrịrị anụ ẹhụ zu oke.

⁹ Oyiye-ọka wẹ sikọ d'e wecheni okẹn-efin hụ wụ ọka wẹ gweriẹn k'e jun mkpu kọstadị-nta isin hụn wẹ gi ofugbọn-olivu gwọ; nke ebulu hụ ka ẹhụ k'e jun mkpu kọstadị-nta ohu-lẹ-mkpikpi;

¹⁰ nke nwa-atụnrụn ohu-ohu imẹ ụmụ-atụnrụn ẹsa hụ k'e jun mkpu kọstadị-nta ohu.

¹¹ Gi ni mkpịn ohu chụn ẹjan-njọ cheni ẹjan-njọ ụnụ gi a gbarị isi ụnụ lẹ ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

Mmẹmmẹ Ibi-imẹ-ọdụ

¹² “Ifọn nke ẹsa rị akp'ọhịn mmisẹn, ụnụ e zu ozuzu rị nsọ. Arụnlẹ ni ọrụn ụnụ ụhụọhịn hụ. Ụnụ sikọ d'e mẹni Osolobuẹ mmẹmmẹ akpọhịn ẹsa gha ụhụọhịn hụ jẹnmẹ.

¹³ Chụnye ni ẹjan w'a dụn ọkụn ụhụọhịn hụ, oyiye wẹ gi ọkụn ye hụn ishin ẹ a sụọ Osolobuẹ: okoro-efin mmẹtọ, ebulu ẹbụọ lẹ nwa-atụnrụn mmẹnọ rịsọnmẹ ahụa ohu-ohu. Wẹ ile k'a wụrịrị anụ ẹhụ zu oke.

¹⁴ Oyiye-ọka wẹ sikọ d'e wecheni okẹn-efin ohu-ohu imẹ wẹ mmẹtọ wụ ọka wẹ gweriẹn k'e jun mkpu kọstadị-nta isin hụn wẹ gi ofugbọn-olivu gwọ; nke ebulu ohu-ohu imẹ ebulu ẹbụọ hụ k'e jun mkpu kọstadị-nta ohu-lẹ-mkpikpi;

¹⁵ nke nwa-atụnrụn ohu-ohu imẹ ụmụ-atụnrụn mmẹnọ ndị hụ k'e jun mkpu kọstadị-nta ohu;

¹⁶ Gi ni mkpịn ohu chụnye ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

¹⁷ Nke akp'ọhịn ẹbụọ rịn'a, okoro-efin mmẹbụọ, ebulu ẹbụọ lẹ ụmụ-ebulu mmẹnọ rịsọnmẹ ahụa ohu-ohu kẹ ụnụ sikọ d'e gi a chụn ẹjan w'a dụn ọkụn; wẹ ile k'a wụrịrị anụ ẹhụ zu oke.

¹⁸ We ni oyiye-ọka lẹ oyiye-manya hụ iwu ku cheni kẹ okẹn-efin kẹ ebulu kẹ ụmụ-efin ndị ahụn,

¹⁹ Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

²⁰ “Nke akp'ọhịn ẹtọ rịn'a, okoro-efin mmanaị, ebulu ẹbụọ lẹ ụmụ-ebulu mmẹnọ rịsọnmẹ ahụa ohu-ohu kẹ ụnụ sikọ d'e gi a chụn ẹjan w'a dụn ọkụn; wẹ ile k'a wụrịrị anụ ẹhụ zu oke.

²¹ We ni oyiye-ọka lẹ oyiye-manya hụ iwu ku cheni kẹ okẹn-efin kẹ ebulu kẹ ụmụ-efin ndị ahụn,

²² Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

²³ “Nke akp'ọhịn ẹnọ rịn'a, okoro-efin iri, ebulu ẹbụọ lẹ ụmụ-ebulu mmẹnọ rịsọnmẹ ahụa ohu-ohu kẹ ụnụ sikọ d'e gi chụn ẹjan w'a dụn ọkụn; wẹ ile k'a wụrịrị anụ ẹhụ zu oke.

²⁴ We ni oyiye-ọka lẹ oyiye-manya hụ iwu ku cheni kẹ okẹn-efin kẹ ebulu kẹ ụmụ-efin ndị ahụn,

²⁵ Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

²⁶ “Nke akp'ọhịn isẹn rịn'a, okoro-efin itenẹi, ebulu ẹbụọ lẹ ụmụ-ebulu mmẹnọ rịsọnmẹ ahụa ohu-ohu kẹ ụnụ sikọ d'e gi chụn ẹjan w'a dụn ọkụn; wẹ ile k'a wụrịrị anụ ẹhụ zu oke.

²⁷ We ni oyiye-ọka lẹ oyiye-manya hụ iwu ku cheni kẹ okẹn-efin kẹ ebulu kẹ ụmụ-efin ndị ahụn,

²⁸ Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

²⁹ “Nke akp'ọhịn isin rịn'a, okoro-efin ẹsatọ, ebulu ẹbụọ lẹ ụmụ-ebulu mmẹnọ rịsọnmẹ ahụa ohu-ohu kẹ ụnụ sikọ d'e gi chụn ẹjan w'a dụn ọkụn; wẹ ile k'a wụrịrị anụ ẹhụ zu oke.

³⁰ We ni oyiye-ọka lẹ oyiye-manya hụ iwu ku cheni kẹ okẹn-efin kẹ ebulu kẹ ụmụ-efin ndị ahụn,

³¹ Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

³² “Nke akp'ọhịn ẹsa, okoro-efin ẹsa, ebulu ẹbụọ lẹ ụmụ-ebulu mmẹnọ rịsọnmẹ ahụa ohu-ohu kẹ ụnụ sikọ d'e gi chụn ẹjan w'a dụn ọkụn; wẹ ile k'a wụrịrị anụ ẹhụ zu oke.

³³ We ni oyiye-ọka lẹ oyiye-manya hụ iwu ku cheni kẹ okẹn-efin kẹ ebulu kẹ ụmụ-efin ndị ahụn.

³⁴ Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

³⁵ “Nke akp'ọhịn ẹsatọ rịn'a, zu ni ozuzu rị nsọ; arụnlẹ ni ọrụn ụnụ ụhụọhịn hụ.

³⁶ Chụn ni ẹjan w'a dụn ọkụn, oyiye wẹ gi ọkụn ye hụn ishin ẹ a sụọ Osolobuẹ: okẹn-efin ohu, ebulu ohu lẹ ụmụ-ebulu ẹsa rịsọnmẹ ahụa ohu-ohu. Wẹ ile k'a wụrịrị anụ ẹhụ zu oke.

³⁷ We ni oyiye-ọka lẹ oyiye-manya hụ iwu ku cheni okẹn-efin lẹ ebulu lẹ ụmụ-efin ndị ahụn.

³⁸ Gi ni mkpịn ohu chụn ẹjan-njọ cheni ẹjan w'a dụn ọkụn ụhụọhịn-ụhụọhịn lẹ oyiye-ọka lẹ oyiye-manya sọnn'ẹ.

³⁹ “Ihiẹn ndị hụ ile kẹ ụnụ sikọ d'a gha e ye Osolobuẹ, ogẹn wẹ ru — cheni ndị hụ ụnụ gi e mẹzu nkwa ụnụ kwe Osolobuẹ lẹ oyiye ndị hụn gha ụnụ obi a pụha; uwẹ kẹ ụnụ e gi chụn ẹjan w'a dụn ọkụn lẹ oyiye-ọka lẹ oyiye-manya lẹ ẹjan-ekele.”

⁴⁰ Ya Mozizi nọ gwachanrịn ndị Izrẹlụ ihiẹn ile kẹ Osolobuẹ dọn gwa a.