Ọgụngụn 28 - Ika

Isi Nke Ẹsatọ Kwasị Ọgụn Ẹjan Alị Izrẹlụ A Chụnye Ụhụọhịn-ụhụọhịn

¹ Osolobuẹ sị Mozizi,

² “Ye ndị Izrẹlụ iwuni, ‘Hụnn'a nị ụnụ e wẹhẹsọnmẹni m ihiẹn-oriri m w'e gi ọkụn e ye m hụn ishin ẹ a sụọ m, hụn ọwụlẹ lẹ ogẹn wẹ tumẹn'ẹ.’

³ “Sị wẹ: Ọnwan wụ oyiye ahụn wẹ gi ọkụn e ye hụn ụnụ sikọ d'a gha e wẹhẹni Osolobuẹ: ụhụọhịn-ụhụọhịn ụnụ sikọ d'e gi atụnrụn ẹbụọ rịsọnmẹ nwa ahụa ohu-ohu ẹhụ zu oke chụn ẹjan w'a dụn ọkụn —

⁴ chụnyeni nwa-atụnrụn ohu ụtụntụn, ọhị gbama ṅẹnrẹn-ṅẹnrẹn ụnụ a chụnye hụn ẹbọ.

⁵ Wẹ ni oyiye-ọka cheni nwa-atụnrụn ohu-ohu, ọka wẹ gweriẹn hụn k'e jun mkpu kọstadị-nta ẹbụọ hụn wẹ gi ofugbọn-olivu k'e jun mkpu kọstadị-nta ohu gwọ.

⁶ Ọhụn wụ ẹjan w'a dụn ọkụn wẹ nọ Ugu Saịnaị tumẹ nị w'a chụ a ụhụọhịn-ụhụọhịn, kẹni ishin ẹ sụọ Osolobuẹ, wụrụ oyiye wẹ gi ọkụn ye Osolobuẹ.

⁷ Oyiye-manya e sọnn'ẹ k'a wụ manya wẹ bama hụn k'e jun mkpu kọstadị-nta ohu; ịya k'e sọn nwa-atụnrụn ohu-ohu. “Hu ni oyiye manya ahụn yeni Osolobuẹ imẹ Ebe Ahụn Rị Nsọ.

⁸ Chụnye nị nwa-atụnrụn hụn ẹbọ ọhị gbama ṅẹnrẹn-ṅẹnrẹn, ụnụ a chụnyezi oyiye-ọka lẹ oyiye-manya ohu hụ ụnụ gi chụnye ẹjan ụtụntụn chen'ẹ. Oyiye wẹ gi ọkụn e ye hụn ishin ẹ a sụọ Osolobuẹ rọ.

Ẹjan Alị Izrẹlụ A Chụn Ụhụọhịn Ezumikẹn

⁹ “O ru Ụhụọhịn Ezumikẹn, ụnụ e gi ụmụ-atụnrụn ẹbụọ rịsọnmẹ nwa ahụa ohu-ohu ẹhụ zu oke chụn ẹjan, cheni oyiye manya a lẹ oyiye-ọka a, ọka wẹ gweriẹn k'e jun mkpu kọstadị-nta ẹnọ hụn wẹ gi ofugbọn-olivu gwọ.

¹⁰ Ọhụn wụ ẹjan w'a dụn ọkụn Ụhụọhịn Ezumikẹn ile, cheni hụn w'a dụn ọkụn ụhụọhịn-ụhụọhịn lẹ oyiye-manya sọnn'ẹ.

Ẹjan Alị Izrẹlụ A Chụn Ifọn-ifọn

¹¹ “O ru ụhụọhịn ibuzọ imẹ ifọn ọwụlẹ, ụnụ e gi okoro-efin ẹbụọ lẹ ebulu ohu lẹ ụmụ-ebulu ẹsa rịsọnmẹ ahụa ohu-ohu chụnyeni Osolobuẹ ẹjan w'a dụn ọkụn. Ẹhụ wẹ ile sikọ d'e zuchanrịn oke.

¹² Ihiẹn sikọ d'e sọn okoro-efin ọwụlẹ wụ oyiye-ọka wẹ gweriẹn k'e jun mkpu kọstadị-nta isin hụn wẹ gi ofigbọn-olivu gwọ; nke ebulu ọwụlẹ k'e jun mkpu kọstadị-nta ẹnọ;

¹³ nke nwa-atụnrụn ọwụlẹ k'e jun mkpu kọstadị-nta ẹbụọ. Wẹ k'e gi wẹ ile chụn ẹjan w'a dụn ọkụn hụn e shin ọhụnma, oyiye wẹ gi ọkụn e ye Osolobuẹ.

¹⁴ “Oyiye-manya k'e jun mkpu kọstadị-nta ẹbụọ kẹ wẹ sikọ d'e wecheni okẹn-efin ọwụlẹ; nke ebulu ọwụlẹ k'e jun mkpu kọstadị-nta ohu-lẹ-mkpikpi; nke nwa-atụnrụn ọwụlẹ k'e jun mkpu kọstadị-nta ohu. Ọhụn wụ ẹjan wẹ k'a gha a dụn ọkụn ifọn ọwụlẹ — hụn ifọn gihụ pụ.

¹⁵ Wẹ k'a gha e gi mkpịn ohu a chụnyeni Osolobuẹ ẹjan-njọ cheni ẹjan w'a dụn ọkụn hụn w'a chụnye ụhụọhịn-ụhụọhịn lẹ oyiye-manya sọnn'ẹ.

Ẹjan Mmẹmmẹ-nghafe

¹⁶ “Ifọn ibuzọ rị akpọhịn mmẹnọ wụ Mmẹmmẹ-nghafe Osolobuẹ.

¹⁷ Nke akp'ọhịn mmisẹn imẹ ifọn ibuzọ hụ, mmẹmmẹ jẹnkọ d'a rị; gha ụhụọhịn hụ jẹnmẹ, ụnụ sikọ d'e ri brẹdi wẹ buchelẹni yisti ọrọgbọ akpọhịn ẹsa.

¹⁸ Zu ni ozuzu rị nsọ ụhụọhịn ibuzọ rịn'a; arụnlẹ ni ọrụn ụnụ ụhụọhịn hụ.

¹⁹ Ye ni Osolobuẹ oyiye wẹ gi ọkụn e ye, oyiye w'a dụn ọkụn hụn k'a wụ okoro-efin ẹbụọ, ebulu ohu ka ẹhụ lẹ ụmụ-ebulu ẹsa rịsọnmẹ ahụa ohu-ohu ẹhụ zu oke.

²⁰ We ni oyiye-ọka e sọnni wẹ cheni wẹ: ọka wẹ gweriẹn wẹ gi ofugbọn-olivu gwọ cheni wẹ: nke okẹn-efin ọwụlẹ k'e jun mkpu kọstadị-nta isin, nke ebulu ohu-ohu k'e jun mkpu kọstadị-nta ohu-lẹ-mkpikpi,

²¹ nke nwa-atụnrụn ohu-ohu imẹ ụmụ-atụnrụn ẹsa hụ k'e jun mkpu kọstadị-nta ohu-ohu.

²² Wezi ni mkpịn ohu cheni wẹ ile gi chụn ẹjan-njọ nị wẹ gi ẹ gbarị isi ụnụ.

²³ “Chụn nị ẹjan ndịnị cheni ẹjan w'a dụn ọkụn ụtụntụn ile.

²⁴ Ẹrịra kẹ ụnụ sikọ d'e mẹmẹsọnmẹ ihiẹn-oriri hụ ụhụọhịn-ụhụọhịn ọrọgbọ akpọhịn ẹsa hụ, ẹjan ndị hụ wẹ gi ọkụn a chụnye hụn ishin ẹ a sụọ Osolobuẹ. A chụn nị wẹ e cheni ẹjan ndị hụ w'a dụn ọkụn ụhụọhịn-ụhụọhịn lẹ oyiye-manya sọnn'ẹ.

²⁵ “Nke akpọhịn ẹsa rịn'a, ụnụ e zu ozuzu rị nsọ; arụnlẹ ni ọrụn ụnụ ụhụọhịn hụ.

Mmẹmmẹ Ihiẹn-ugbo Ibuzọ

²⁶ “O ruzi Ụhụọhịn Ihiẹn-ugbo ibuzọ, hụn ụnụ gi e ye Osolobuẹ oyiye-ọka ọhụn ogẹn mmẹmmẹ Izuka-nke-ẹsa, zu ni ozuzu rị nsọ; arụnlẹ ni ọrụn ụnụ.

²⁷ Gi ni ụmụ-efin ẹbụọ lẹ ebulu ohu lẹ ụmụ-atụnrụn ẹsa rịsọnmẹ ahụa ohu-ohu chụn ẹjan w'a dụn ọkụn hụn ishin ẹ a sụọ Osolobuẹ.

²⁸ We ni oyiye-ọka cheni okẹn-efin ọwụlẹ, ọka k'e jun mkpu kọstadị-nta isin hụn wẹ gi ofugbọn-olivu gwọ;

²⁹ nke ebulu ohu-ohu k'e jun mkpu kọstadị-nta ohu-lẹ-mkpikpi;

³⁰ ụnụ e gi mkpịn ohu chụn ẹjan mgbarị-isi chen'ẹ.

³¹ Chụnyesọnmẹ ni ẹjan ndịnị lẹ oyiye manya sọnni wẹ cheni ẹjan ndị hụ w'a dụn ọkụn ụhụọhịn-ụhụọhịn lẹ oyiye-ọka sọnn'ẹ. Hụnkwọ n'a nị ẹhụ zu anụ ndị ahụn oke.