Ọgụngụn 27 - Ika

Isi Nke Ẹsa Kwasị Ọgụn Ụmụ Zẹlofẹhadị Ikpoho

¹ Ụmụ Zẹlofẹhadị nwa Hẹfa ndị ebọn Manasẹ nwa Josẹfụ bịa d'a hụn Mozizi. Hẹfa wụ nwa Gilẹdị nwa Makiri, Makiri nwa Manasẹ. Ẹfan ikpoho ndịnị wụ Mala, Nụa, Họg'la, Mil'ka lẹ Tẹza.

² A bịa wẹ ọnụ-mgbọn Ọdụ-ozuzu d'e turu ihun Mozizi lẹ Ẹliẹza onyẹ nchụn-ẹjan lẹ ndị-isi lẹ igunrun Izrẹlụ ile, sị wẹ,

³ “Nẹdi ẹnyi nwụntọ imẹ atụ — kanị ẹlẹkwọ onyẹ itu Kora hụn zuni Osolobuẹ eje-umẹ; njọ nke ẹ gbu ẹ; ọ mụnị okẹnnyẹ n'o d'a nwụnhụn:

⁴ kị ẹfan nẹdi ẹnyi k'a gụnị nwan ebọn makẹni ọ mụnị okẹnnyẹ? Ye ni nwan ẹnyi ukuu imẹ ukuu ndị nke ẹnyi.”

⁵ Ya Mozizi nọ we okuni jẹn ihun Osolobuẹ.

⁶ Osolobuẹ nọ sị a,

⁷ “Ihiẹn ụmụ Zẹlofẹhadị rị e ku wụ ezioku. Ụnụ k'e yerịrị wẹ alị n'ọ wụrụ ukuu wẹ imẹ nke umunẹ nẹdi wẹ, we ihiẹn ru nẹdi wẹ ye wẹ.

⁸ “Sị ndị Izrẹlụ, ‘Okẹnnyẹ nwụnhụn bụ ọ mụnị okẹnnyẹ, we ni ihiẹn run'ẹ ye nwa a okpoho;

⁹ omẹni ọ mụnị okpoho, we ni ihiẹn run'ẹ ye umunẹ ẹ ikẹnnyẹ;

¹⁰ omẹni o nwọn umunẹ-ikẹnnyẹ, we ni ihiẹn run'ẹ ye umunẹ nẹdi ẹ ikẹnnyẹ;

¹¹ omẹni nẹdi ẹ e nwọn umunẹ-ikẹnnyẹ, we ni ihiẹn run'ẹ ye onyẹ kachanrịn onyẹ ẹhụ a e mẹ imẹ ebọn wẹ n'o wụrụ nke ẹ. Ya wụrụnị ndị Izrẹlụ iwu, nọkẹ kẹ Osolobuẹ dọn gwa Mozizi.’ ”

Joshụa K'a Nọkin Ẹnya Mozizi

¹² Omẹgụ Osolobuẹ nọ sị Mozizi, “Nyinrin ugu Abarim, n'ị hụn alị ahụn m ye ndị Izrẹlụ.

¹³ Ị hụngụọ a, yụ nwẹn sikọ d'a a nwụnhụn laburuzi ndị nke i nọkẹ Ẹrọnụ nwẹnẹ i.

¹⁴ Makẹni, ogẹnnẹi ndị Izrẹlụ gi nupụ isi ebahụn m nọ ye ụnụ mirin imẹ alị ọkpọ-nkụn Zini, ụnụ ẹbụọ pa oku m ebe ụnụ nọlẹni gụn agụngụn ghọsị nị m rị nsọ, gi ẹ ye m ọghọ ẹnya wẹ.” (Mirin Mẹriba ahụn rị Kadẹshi hụn rị alị ọkpọ-nkụn Zini rọ.)

¹⁵ Ya Mozizi nọ sị Osolobuẹ,

¹⁶ “Osolobuẹ, Chuku hụn marịn ihiẹn rị imẹ ịhịan ile, dodo tumẹ nwan onyẹ sikọ d'a kị ndịnị

¹⁷ onyẹ k'a gha e buruni wẹ ụzọ, onyẹ k'a gha e wejẹn wẹ, e welụa — amamgbe ndị nke Osolobuẹ a nọ kẹ atụnrụn nwọnlẹni onyẹ-ndu.”

¹⁸ Ya kẹ Osolobuẹ nọ sị Mozizi, “Weri Joshụa nwa Nọnụ, okẹnnyẹ hụn Mmọn m rị a kị, y'e bu ẹka kwasị a, tumẹ ẹ.

¹⁹ Wepụha a n'o wuzo ihun Ẹliẹza onyẹ nchụn-ẹjan lẹ Izrẹlụ ile, y'a nọ idẹnya wẹ tumẹ ẹ.

²⁰ We ụfọdụ ihiẹn rị ị ẹka che okpuru ẹ kẹni Izrẹlụ ile hụn ụzọ a gbaye ẹ.

²¹ O sikọ d'a nọ okpuru Ẹliẹza onyẹ nchụn-ẹjan a rụn. Ẹliẹza nwọn e gi Utẹn-Osolobuẹ a jụn'a Osolobuẹ ihiẹn o jẹnkọ d'e mẹ; ọ sị ‘jẹnmẹ’, e jẹnmẹ wẹ; ọ sị ‘lụaha’, a lụaha wẹ.”

²² Ya kẹ Mozizi nọ mẹ kẹ Osolobuẹ dọn gwa a, weri Joshụa, wepụha a ihun Ẹliẹza lẹ Izrẹlụ ile.

²³ Mozizi nọ bu ẹka kwasị a isi tumẹ ẹ, nọkẹ kẹ Osolobuẹ dọn ku ghahanị Mozizi.