Ọgụngụn 26 - Ika

Isi Nke Isin Kwasị Ọgụn A Gụndọnzi Wẹ Ndị Izrẹlụ

¹ Ogẹn ọnwụn ahụn gi gbugụ ndị o gbu, Osolobuẹ nọ sị Mozizi lẹ Ẹliẹza nwa Ẹrọnụ onyẹ nchụn-ẹjan,

² “Gụn nị ndị Izrẹlụ ile; gụn nị wẹ ikp'ụlọ-ikp'ụlọ. Ndị ile rị ahụa ọgụn shi elu — ndị ile k'a s'ẹka jẹn agha.”

³ Ya kẹ Mozizi lẹ Ẹliẹza onyẹ nchụn-ẹjan nọ gwa ndị Izrẹlụ oku imẹ alị-aradan Mụabụ ebẹhụ, ẹhụ Iyi Jọdanị, ebẹhụ bu ihun zinmẹ Jẹriko, sị wẹ,

⁴ “Gụn nị ikẹnnyẹ rị nwa ahụa ọgụn shi elu, nọkẹ kẹ Osolobuẹ dọn gwa Mozizi.” Ndịnị wụ ndị Izrẹlụ gha Ijiptu pụha hụn wẹ gụn ogẹnni:

⁵ Ụmụ Rubẹni nwa ibuzọ Izrẹlụ wụ ndịnị: ndị Hanọkụ mụ, ndị Palu mụ,

⁶ ndị Hẹzrọnụ mụ lẹ ndị Kami mụ.

⁷ Uwẹ wụ ebozo ndị rị ebọn Rubẹni. Ndị wẹ gụn imẹ wẹ rị iri kwasị ọgụn-isin kwasị nnụ-itenẹi kwasị nnụ-uku ọgụnnaị (43,730).

⁸ Onyẹ hụn Palu wụ Ẹliabụ:

⁹ ụmụ Ẹliabụ wụ Nemuẹlụ lẹ Datanị lẹ Abiram. Datanị lẹ Abiram wụ ndị-isi hụ uwẹ lẹ itu Kora gba sọn Mozizi lẹ Ẹrọnụ dọ ogẹn hụ Kora wẹ gi sọn Osolobuẹ dọ,

¹⁰ ogẹn hụ alị gi kpupụ, luepụ wẹ lẹ Kora, ogẹn ahụn ndị itu wẹ gi nwụn, ogẹn hụ ọkụn gi ripụ ikẹnnyẹ iri kwasị ọgụn-mmẹbụọ. Wẹ nọ wụrụ ihiẹn wẹ gi a dọ ẹka-ntịn.

¹¹ Kanị ẹlẹ ebozo Kora ile nwụn ụhụọhịn hụ.

¹² Ụmụ Simiọnụ, ẹbozo-ẹbozo wụ ndịnị: ndị Nemuẹlụ mụ, ndị Jamini mụ, ndị Jakini mụ,

¹³ ndị Zẹra mụ lẹ ndị Shaulu mụ.

¹⁴ Uwẹ wụ ẹbozo ndị rị ebọn Simiọnụ. Ndị wẹ gụn imẹ wẹ rị ọgụn-iri kwasị nnụ-uku ẹbụọ-kwasị-ọgụn (22,200).

¹⁵ Ụmụ Gadị, ẹbozo-ẹbozo, wụ ndịnị: ndị Zẹfọnụ mụ, ndị Hagi mụ, ndị Shuni mụ,

¹⁶ ndị Ozni mụ, ndị Ẹri mụ,

¹⁷ ndị Arodi mụ lẹ ndị Areli mụ.

¹⁸ Uwẹ wụ ebozo ndị rị ebọn Gadị. Ndị wẹ gụn imẹ wẹ rị nnụ-uku ọgụnnaị lẹ nkirishi (40,500).

¹⁹ Nke ebọn Juda, Eri lẹ Ọnanị wụ ụmụ Juda, kanị wẹ nwụntọ alị Kenaanị mbụ-mbụ.

²⁰ Ụmụ Juda họdụnị, ẹbozo-ẹbozo, wụ ndịnị: ndị Shẹla mụ, ndị Pẹrẹzi mụ lẹ ndị Zẹra mụ.

²¹ Ụmụ Pẹrẹzi wụ ndịnị: ndị Hẹzrọnụ mụ lẹ ndị Hamulu mụ.

²² Uwẹ wụ ebozo ndị rị ebọn Juda. Ndị wẹ gụn imẹ wẹ rị nnụ-uku mmisin-kwasị-ọgụn-ẹtọ lẹ mkpikpi (76,500).

²³ Ụmụ Isaka, ẹbozo-ẹbozo wụ ndịnị: ndị Tola mụ, ndị Pụa mụ,

²⁴ ndị Jashubu mụ lẹ ndị Shimrọnụ mụ.

²⁵ Uwẹ wụ ebozo ndị rị ebọn Isaka. Ndị wẹ gụn imẹ wẹ rị ọgụn-mmisẹn kwasị nnụ-uku ẹnọ-kwasị ọgụn-ẹtọ (64,300).

²⁶ Ụmụ Zẹbulọnụ, ẹbozo-ẹbozo, wụ ndịnị: ndị Seredi mụ, ndị Ẹlọnụ mụ lẹ ndị Jaliẹlụ mụ.

²⁷ Uwẹ wụ ẹbozo ndị rị ebọn Zẹbulọnụ. Ndị wẹ gụn imẹ wẹ rị nnụ-uku ọgụn-ẹtọ lẹ mkpikpi (60,500).

²⁸ Ụmụ Josẹfụ, ẹbozo-ẹbozo, wụ ndịnị: ndị Manasẹ mụ lẹ ndị Ifrem mụ.

²⁹ Ndị nke Manasẹ wụ ụmụ Makiri; Makiri mụ Gilẹdị; Gilẹdị mụ Ndị Gilẹdị.

³⁰ Ụmụ Gilẹdị wụ ndịnị: ndị Iyẹza mụ, ndị Hẹlẹki mụ,

³¹ ndị Asriẹlụ mụ, ndị Shẹkẹm mụ,

³² ndị Shẹmida mụ lẹ ndị Hẹfa mụ.

³³ (Zẹlofẹhadị nwa Hẹfa amụnị ikẹnnyẹ; ikpoho sụọ k'ọ mụ. Ẹfan wẹ wụ Mala, Nụa, Họg'la, Mil'ka lẹ Tẹza).

³⁴ Uwẹ wụ ẹbozo ndị rị ebọn Manasẹ. Ndị wẹ gụn imẹ wẹ rị ọgụn-iri kwasị nnụ-uku mmẹbụọ-kwasị-ọgụnnaị lẹ mkpikpi (52,700).

³⁵ Ụmụ Ifrem, ẹbozo-ẹbozo, wụ ndịnị: ndị Shutẹla mụ, ndị Bẹkẹri mụ lẹ ndị Tahanị mụ.

³⁶ Ndị nke Shutẹla wụ ndị Ẹranị nwa a mụ.

³⁷ Uwẹ wụ ebozo ndị rị ebọn Ifrem. Ndị wẹ gụn imẹ wẹ rị nnụ-uku mmẹbụọ-kwasị-ọgụn lẹ mkpikpi (32,500). Ọhụn wụ ụmụ Josẹfụ, ẹbozo-ẹbozo.

³⁸ Ụmụ Bẹnjamini, ẹbozo-ẹbozo wụ ndịnị: ndị Bẹla mụ, ndị Ashibẹlụ mụ, ndị Ahiram mụ,

³⁹ ndị Shufam mụ lẹ ndị Hụfam mụ.

⁴⁰ Ndị nke Bẹla wụ ndịnị ndị Aridi mụ lẹ ndị Naamanị mụ.

⁴¹ Uwẹ wụ ẹbozo ndị rị ebọn Bẹnjamini. Ndị wẹ gụn imẹ wẹ rị nnụ-mmẹnọ kwasị nnụ-uku ọgụnnaị (45,600).

⁴² Ụmụ Danị ndị Shuham mụ. Uwẹ wụ ẹbozo rị ebọn Danị;

⁴³ Ndị ebozo Shuham wẹ gụn rị nnụ-mmanaị kwasị nnụ-uku ọgụn-ẹtọ (64,400).

⁴⁴ Ụmụ Asha, ẹbozo-ẹbozo, wụ ndịnị: ndị Imna mụ, ndị Ish'vi mụ lẹ ndị Bẹrịa mụ.

⁴⁵ Ndị nke Bẹrịa wụ ndịnị: ndị Hẹba mụ lẹ ndị Mal'kiẹlụ mụ.

⁴⁶ (Asha mụzị okpoho, ẹfan a wụ Sẹra.)

⁴⁷ Uwẹ wụ ebozo ndị rị ebọn Asha. Ndị wẹ gụn imẹ wẹ rị nnụ kwasị nnụ-uku mmẹtọ-kwasị-ọgụnnaị (53,400).

⁴⁸ Ụmụ Naf'tali, ẹbozo-ẹbozo, wụ ndịnị: ndị Jaziẹlụ mụ lẹ ndị Guni mụ,

⁴⁹ ndị Jeza mụ lẹ ndị Shilẹm mụ.

⁵⁰ Uwẹ wụ ebozo ndị rị ebọn Naf'tali. Ndị wẹ gụn imẹ wẹ rị nnụ kwasị nnụ-uku isẹn-kwasị-ọgụnnaị (45,400).

⁵¹ Ikẹnnyẹ Izrẹlụ ile wẹ gụn rị iri-kwasị-ọgụn-isin kwasị nnụ-ẹnọ kwasị nnụ-uku-ọgụn-iri-kwasị-nnụ (601,730).

⁵² Osolobuẹ nọ sị Mozizi,

⁵³ “Wẹ sikọ d'e keyesọnmẹ wẹ alị m rị e ye wẹ kẹ wẹ hansọnmẹ ọda:

⁵⁴ keye ebọn ka ọda alị ka ogbe, y'e keye hụn ka ntịn alị ka ntịn — ebọn-ebọn sikọ d'e nwọnhẹn alị kẹ wẹ buhan ọda.

⁵⁵ Hụnkwọ n'a nị Utẹn-Osolobuẹ kẹ wẹ gi keyesọnmẹ wẹ ya; keyesọnmẹ wẹ ya ebọn-ebọn kẹ ndị nẹdi wẹ dọnsọnmẹ dịan.

⁵⁶ Utẹn-Osolobuẹ kẹ wẹ sikọ d'e gizi keye ebọn ọwụlẹ nke wẹ: ndị ka ọda, kẹ wẹ han ọda; ndị ka ntịn, kẹ wẹ mẹhan ntịn.”

⁵⁷ Ndịnị wụ ndị Livaị hụn wẹ gụn, ẹbozo-ẹbozo: ụmụ Gẹshọnụ, ụmụ Kohatị lẹ ụmụ Mẹrari.

⁵⁸ Ebozo ndịnị wụzị ndị Livaị: ụmụ Libni, ụmụ Hibrọnụ, ụmụ Mali, ụmụ Mushi, ụmụ Kora. Kohatị wụ nẹdi Amram;

⁵⁹ ẹfan nwunyẹ Amram wụ Jokẹbẹdi nwa onyẹ ebọn Livaị hụn wẹ mụ kẹ wẹ rị alị Ijiptu. Ịya mụnị Amram Ẹrọnụ lẹ Mozizi lẹ nwẹnẹ wẹ okpoho wụ Miriam.

⁶⁰ Ẹrọnụ wụ nẹdi Nadabụ lẹ Abihu, Ẹliẹza lẹ Itama —

⁶¹ kanị Nadabụ lẹ Abihu nwụnhụn ogẹn wẹ gi mụye ọkụn nsẹnsi chụnyeni Osolobuẹ ẹjan ọ gwalẹni wẹ.

⁶² Ikẹnnyẹ Livaị ile hụn rị nwa ifọn ohu shi elu rị madụ nnụ-uku ẹtọ-kwasị-ọgụn (23,000). Agụngbamanị wẹ wẹ lẹ ndị Izrẹlụ ibe wẹ makẹni ekeyeni wẹ wẹ alị ahụn wẹ keni wẹ.

⁶³ Ndịnị ile wụ ndị Izrẹlụ hụn Mozizi lẹ Ẹliẹza onyẹ nchụn-ẹjan gụn ogẹn ahụn wẹ gi gụn ndị Izrẹlụ alị-aradan Mụabụ, ẹhụ Iyi Jọdanị, ebẹhụ bu ihun zinmẹ Jẹriko.

⁶⁴ Imẹ ndịnị ile, onwọnni hụn rị ndị ibuzọ hụ wẹ gụn ogẹn ahụn Mozizi lẹ Ẹrọnụ gi gụn ndị Izrẹlụ imẹ atụ Saịnaị.

⁶⁵ Makẹni Osolobuẹ a gwatọgụọ ndị Izrẹlụ ahụn nị wẹ sikọ d'a nwụntọrịrị atụ; onwọnni nwan onyẹ họdụ imẹ wẹ karị Kalẹbụ nwa Jefunẹ lẹ Joshụa nwa Nọnụ.