Ọgụngụn 25 - Ika

Isi Nke Isẹn Kwasị Ọgụn Kẹ Ndị Mụabụ Dọn Dọ Ndị Izrẹlụ Ye Imẹ Njọ

¹ Kẹ ndị Izrẹlụ rị Shitim, ikẹnnyẹ wẹ nọ ghẹrẹsọn ikpoho alị Mụabụ.

² Ikpoho ndị hụ nọ wejẹnmẹ wẹ ebe wẹ nọ a rụa mmọn wẹ. Ndị Izrẹlụ ahụn hụ e sọn wẹ e ri, a kụnị mmọn ndị ahụn isi alị.

³ Ẹrịra kẹ Izrẹlụ dọn banyeni wẹ femẹ Baalụ ndị Pioru; Osolobuẹ nọ gi olulu sọn wẹ.

⁴ Osolobuẹ nọ sị Mozizi, “Weri ndị-isi ndị Izrẹlụ ile, n'i nọ ihun Osolobuẹ hogbu wẹ ebe eki rị elu, kẹni olulu Osolobuẹ rọ ebe ndị Izrẹlụ rị.”

⁵ Ya Mozizi nọ kpọ ndị-isi Izrẹlụ, sị, “Onyẹ-onyẹ imẹ ụnụ ya gbu ndị nke ẹ sọn wẹ rụa Baalụ alị Pioru.”

⁶ Ogẹn ahụn hụra, onyẹ Izrẹlụ ohu nọ webanhan okpoho onyẹ Midianị iwe wẹ idẹnya Mozizi lẹ igunrun ndị Izrẹlụ ile ebe wẹ ile rị Ọnụ-mgbọn Ọdụ-ozuzu a kwan.

⁷ Ogẹn Finẹhasị nwa Ẹliẹza nwa Ẹrọnụ onyẹ nchụn-ẹjan gi hụn ihiẹnni, ọ nọ gha imẹ igunrun ahụn pụha, buru obo,

⁸ sọnmẹ okẹnnyẹ Izrẹlụ ahụn, jẹn d'e kunrun ẹ imẹ ọdụ o bi. Ọ nọ gi obo ahụn zupu wẹ ẹbụbụọ: ọ gha ẹhụ hụn okẹnnyẹ wụ onyẹ Izrẹlụ banye d'e zupu hụn okpoho ẹfọ. Ebahụn kẹ ọnwụn gbumẹgụ ndị Izrẹlụ nọ kụsị —

⁹ kanị ọnwụn hụ e gbuọlẹ madụ nnụ-uku ẹnọ kwasị ọgụn (24,000).

¹⁰ Ya Osolobuẹ nọ sị Mozizi,

¹¹ “Finẹhasị nwa Ẹliẹza nwa Ẹrọnụ onyẹ nchụn-ẹjan a rọgụọ olulu m rị e busọn ndị Izrẹlụ, makẹni o giọlẹ ụdị ẹnya rị a ụfụnị m shi ọnwụn kẹni wẹ ye m ọghọ m; ịya haịn m gizilẹni gi ẹnya-ụfụ gbupụ wẹ.

¹² Gwa a nwan nị m rị e kwe ẹ nkwa m pụ-ichẹn n'o jẹnkọ d'a rịn'a mma.

¹³ Ya lẹ ebozo ẹ sikọ nwan d'e nwọnrin ọrụn ndị nchụn-ẹjan jẹnrin ejẹn, makẹni ẹnya a fụghọ a n'e yeni wẹ Chuku ẹ ọghọ, ihiẹn ahụn o mẹ k'o gi gbarị isi ndị Izrẹlụ.”

¹⁴ Ẹfan onyẹ Izrẹlụ hụ wẹ gbugbama ya lẹ okpoho Midianị wụ Zimri nwa Salu, hụn wụ onyẹ-chẹn ikpụlọ imẹ ebọn Simiọnụ.

¹⁵ Ẹfan okpoho Midianị hụ wẹ gbu wụ Kọz'bi nwa Zọ. Zọ nẹdi ẹ wụzị onyẹ-ndu ebọn imẹ ndị Midianị.

¹⁶ Osolobuẹ nọ sị Mozizi,

¹⁷ “Mẹmẹ ni ndị Midianị kẹ ndị-iṅẹnrẹn; e gbu ni wẹ —

¹⁸ makẹni wẹ mẹ ụnụ kẹ ndị-iṅẹnrẹn ebe wẹ nọ dufie ụnụ d'e fe mmọn-Baalụ alị Pioru lẹ imẹ oku Kọz'bi nwẹnẹ wẹ, hụn nẹdi ẹ wụ onyẹ-ndu alị wẹ Midianị, okpoho hụ wẹ gbu ogẹn hụ ọnwụn gi rị e gbu ndị Izrẹlụ yeni oku Pioru.”