Ọgụngụn 24 - Ika

Isi Nke Ẹnọ Kwasị Ọgụn Balaam E Gi Nwan Obi Ẹ Ile Ku Ezioku

¹ Balaam a hụn a nwan nị ngọzi kẹ Osolobuẹ chọ n'ọ gọzi Izrẹlụ, ọ gbazịnị ẹfa k'ọ dọn rị a gba, kama, o bu ihun zinmẹ atụ.

² O lee ẹnya, ọ hụn ndị Izrẹlụ kẹ wẹ ziẹntọsọnmẹ ebọn-ebọn, Mmọn Osolobuẹ nọ ban imẹ ẹ,

³ ọ nọ kumẹ ihiẹn o ye ẹ ku, sị, “Amụma Balaam nwa Bioru bu; amụma onyẹ hụn a hụn ụzọ ọhụnma-ọhụnma bu;

⁴ amụma onyẹ hụn a nụ ọnụ Osolobuẹ, a hụn ọhụn gha ẹka Onyẹ Nwọn ikẹn ile a bịa; onyẹ hụn a dann'a alị hụn ẹnya a shịapụ:

⁵ “Euu ebọn Jekọpụ, ọdụ ị ile a maka mma! Euu ndị Izrẹlụ, ebe ile ụnụ ziẹntọsọnmẹ a maka mma!

⁶ A shịshịapụ wẹ nọkẹ odoro-ọkẹtẹ rị ọdanmgbugbu; rịkẹ ugbo rịsọnmẹ mkpẹnrẹn mirin; nọkẹ alo-vẹra Osolobuẹ lẹ enwẹn ẹ kụn; nọkẹ osisi sida rịsọnmẹ mkpẹnrẹn mirin!

⁷ “Mirin k'a gha ẹkpoko wẹ e hupụha, mirin akọkọ ụmụ wẹ. Eze wẹ k'a ka Agagị; alị-eze wẹ k'e nwọn ọghọ.

⁸ Osolobuẹ gha nwan alị Ijiptu e wepụha Izrẹlụ; Izrẹlụ nwọn ndụn ọda-ọda kẹ efin-ọfịa. Izrẹlụ k'e tikpọchanrịn alị ichẹn-ichẹn lụsọnni wẹ, tigungwọn wẹ ọkpụkpụ, gi obo zugbu wẹ.

⁹ Izrẹlụ a makpuru, o dinẹ, nọkẹ ẹwọrọ, rịkẹ onyẹnnyẹ-ẹwọrọ: onyẹ kẹ egun a nị kpọtiẹn ẹ?! Ngọzi ya rịnị ndị gọzini ụnụ, ịbụ-ọnụ ya rịnị ndị bụ ụnụ ọnụ!”

¹⁰ Ya kẹ Balakị nọ bumẹni Balaam olulu ọda-ọda: ọ kpọ ẹka, sị Balaam, “M kpọ ị d'a bụ ndị-iṅẹnrẹn m ọnụ, kanị ngọzi k'i gọzi wẹ mgbe ẹtọnị!

¹¹ Gha ebeni pụ ozigbo; lama! M te ku ni m k'a kụ ị ụgwọ ọhụnma-ọhụnma, kanị Osolobuẹ anịnị ị nwan nwọnrin ụgwọ-ọrụn.”

¹² Balaam nọ sị Balakị, “A gwagụọnị m ndị i zihẹni m ya, sị wẹ,

¹³ ‘Ọsụọn'a nị Balakị kpọn siliva lẹ goru kpọnjun obi-eze ẹ, we obi-eze ẹ ye m, egikọ m uche m mẹ ihiẹnanaị — kẹ mma kẹ njọ, emẹkarịkọ m ihiẹn Osolobuẹ ku; ihiẹn Osolobuẹ ku sụọ kẹ m k'e ku’?

¹⁴ “M laburukọ nwan ndị nke m; ka gọn nwan ntịn nị m gwatọ ị ihiẹn ndị Izrẹlụ jẹnkọ d'e mẹ ndị nke i ihun.”

Amụma Nke Ẹnọ Balaam Bu

¹⁵ Ya Balaam nọ bu amụma: “Amụma Balaam nwa Bioru bu; amụma onyẹ hụn a hụn ụzọ ọhụnma-ọhụnma bu;

¹⁶ amụma onyẹ hụn a nụ ọnụ Osolobuẹ lẹ enwẹn ẹ, onyẹ hụn gha ẹka Onyẹ Ahụn kachanrịnnị a marịn ihiẹn; onyẹ hụn Onyẹ Nwọn ikẹn ile a ghọsị ihiẹn; onyẹ hụn a dann'a alị hụn ẹnya a shịapụ:

¹⁷ M hụ a hụn a — kanị ẹlẹ ihiẹn kikẹnni; m hụ e legha a — kanị ẹlẹ ihiẹn ẹhụ nsue. Kokisẹ ohu k'a gha ebọn Jekọpụ pụha; Ọkpọ-eze k'a gha imẹ Izrẹlụ pụha. O k'a kụkpụkpọ alị Mụabụ ezimezi ihun, kụkpụkpọ wẹ ile wụ ndị Shẹti okpokomisi.

¹⁸ O k'e mẹri ndị Ẹdọm; o k'e mẹri wẹ wụ ndị alị Sẹẹ, ndị-iṅẹnrẹn ẹ, kanị Izrẹlụ k'a kawaye ẹhụ.

¹⁹ Onyẹ-ọkịkị k'a gha imẹ Jekọpụ pụha tikpọ ndị họdụ imẹ obodo ahụn.”

Amụma Ikpanzụụn Balaam Bu

²⁰ Balaam e legha alị Amalẹki, ọ nọ bu amụma ihiẹn k'e mẹn'ẹ: “Alị Amalẹki te ka alị ile, kanị o mẹgụ o k'e tikpọpụ.”

²¹ Balaam e legha alị ndị Kẹni, ọ nọ bu amụma ihiẹn k'e mẹn'ẹ: sị, “Ebẹhụ ụnụ bi, onwọnni ihiẹn e ru ụnụ ẹhụ, elu okẹn-ọmụma hụ hụn ụnụ kụye ẹkụ ụnụ.

²² Kanị wẹ k'e tikpọ ụnụ ndị Kẹni, ogẹn ndị Asiria k'e gi mẹri ụnụ kpụnrụn.”

²³ Balaam buzi amụma ọzọ sị “Euu, onyẹ k'a hụn isi wanahịn ogẹn Osolobuẹ e gi mẹ ihiẹnni?!

²⁴ Ụgbọ-mirin k'a gha alị Kitim bịa. Wẹ k'e mẹshi Asiria nkẹ ikẹn, mẹshi alị Ẹba ikẹn; wẹ nwẹn k'a dankpọzịkwọ.”

²⁵ Ya Balaam nọ lihi, lama; Balakị nkẹ nọ jẹnmẹ nke ẹ.