Ọgụngụn 23 - Ika

Isi Nke Ẹtọ Kwasị Ọgụn Amụma Ibuzọ Balaam Bu

¹ Balaam nọ sị, “Mẹmẹni m ukpo ẹsa w'a nọ chụn ẹjan ebeni, ụnụ a kwademẹni m efin ẹsa lẹ ebulu ẹsa.”

² Balakị nọ mẹ kẹ Balaam dọn ku, wẹ ẹbụbụọ nọ nọ elu ukpo nchụn-ẹjan ohu-ohu gi efin ohu lẹ ebulu ohu chụnyesọnmẹ ẹjan w'a dụn ọkụn.

³ Ya Balaam nọ sị Balakị, “Nọdị ebeni, nọkunmẹ ụsụọ anụ ndịnị ị gi chụn ẹjan wẹ dụn ọkụn, nị m jẹnzụkazị. Ikẹnkwọ Osolobuẹ a bịa d'e kunrun m. Ihiẹn ọ ghọsị m, a gwa m'ị.” Ya Balaam nọ shi ebe jẹnzi elu, nwọnlẹni ihiẹn rịn'a.

⁴ Chuku nọ bịa d'e kunrun ẹ; Balaam nọ sị, “E mẹmẹgụọ m ukpo nchụn-ẹjan ẹsa, gi efin ohu lẹ ebulu ohu chụnyesọnmẹ ẹjan w'a dụn ọkụn elu ukpo nchụn-ẹjan ohu-ohu.”

⁵ Osolobuẹ nọ ye Balaam ihiẹn o jẹnkọ d'e ku, sị, “Jẹn d'e kunrun Balakị, n'i ku ẹ.”

⁶ Ya Balaam nọ kin azụụn d'e kunrun Balakị: e lee Balakị k'o rịkwọ ebe o wuzoyeni ẹjan ahụn ọ chụn, ịya lẹ ndị-isi Mụabụ ile!

⁷ Ya Balaam nọ ku ihiẹn ọ hụn, sị, “Eze wụ Balakị gha Aram wẹhẹ m; ẹghẹẹ, eze alị Mụabụ gha alị-ugu rị ẹbamịn ọwụwa-ẹnyanwụn wẹhẹ m. Ọ sị m, ‘Bịa d'a bụnị m Jekọpụ ọnụ; bịa d'a kpọ Izrẹlụ iyi.’

⁸ “Ndị Osolobuẹ bụlẹni ọnụ — nanị m'a dọn bụ wẹ ọnụ? Ndị Osolobuẹ kpọlẹni iyi, nanị m'a dọn kpọ wẹ iyi?

⁹ “M rị ugu ndịnị mẹ ọmụma-ọmụma e legha wẹ; m rị ebeni jẹn elu e lecheni wẹ. M rị a hụn ndị nọdị nke wẹ, ndị sị nị wẹ lẹ alị ndị ọzọ ẹlẹ ohu.

¹⁰ “Onyẹ k'a s'ẹka gụngụ ẹjannị wụ ebọn Jekọpụ? Wẹ kebedẹ Izrẹlụ ụzọ ẹnọ, onyẹ k'a saẹka gụngụdẹ azụụn ohu?! “Dodo, ni m nwụndẹ kẹ ndị ezi-omumẹni! Dodo, njẹndemẹ m ya nọ kẹ nke wẹ!”

¹¹ Balakị nọ sị Balaam, “K'i wụ ihiẹnni i mẹ m? M wẹhẹ i ebeni n'i d'a bụ ndị-iṅẹnrẹn m ọnụ, kanị onwọnni ihiẹn i mẹ karị igọzini wẹ!”

¹² Ọ nọ sị a, “Ị sị m ekulẹ ihiẹn Osolobuẹ buche m ọnụ?”

Amụma Nke Ẹbụọ Balaam Bu

¹³ Ya Balakị nọ sị a, “Dodo, bịa nị ẹnyi jẹn ebe ọzọ ị k'a nọ hụn wẹ; ndị rị ụsụọ-ụsụọ sụọ k'i sikọ d'a hụn ebẹhụ, ẹlẹ wẹ ile. Nọ ebẹhụ bụnị m wẹ ọnụ.”

¹⁴ Ọ nọ w'ẹ shi ogige Zofim hụn rị mkpọnụnụ ugu Pisga, nọ ebẹhụ mẹmẹ ukpo nchụn-ẹjan ẹsa, gi efin ohu lẹ ebulu ohu chụnyesọnmẹ ẹjan elu ukpo nchụn-ẹjan ndị ahụn.

¹⁵ Balaam nọ sị Balakị, “Turu ebeni ẹjannị ị chụn rị, nị m jẹnzụka ebẹhụ kẹni mmẹ lẹ Osolobuẹ d'a hụn.”

¹⁶ Osolobuẹ lẹ Balaam nọ hụn, ọ nọ ye Balaam ihiẹn o k'e ku, sị a, “Kin azụụn d'e kunrun Balakị, n'i ku ẹ.”

¹⁷ Ya ọ nọ kin azụụn d'e kunrun Balakị; ọ hụn k'o turuyeni ẹjan hụ ọ chụn, ịya lẹ ndị-isi Mụabụ. Balakị nọ sị a, “Kị Osolobuẹ ku?”

¹⁸ Ọ nọ ku ihiẹn Osolobuẹ gwa a, sị, “Balakị, lihi ọtọ n'i gọn ntịn; gọn m ntịn, nwa Zipọ:

¹⁹ “Osolobuẹ ẹlẹ ịhịan hụn o gi tụ ntụ; ẹlẹ ịhịan mụ a hụn o gi rohutọ. N'o ku oku bụ o mẹn'ẹ? N'o kwe nkwa bu o mẹzun'ẹ?

²⁰ Ngọzi k'o ye m gọzi; ọ gọzigụọ — asa m ẹka hutọ a.

²¹ Onwọnni eje-isi wẹ hụn ebọn Jekọpụ ẹhụ; onwọnni ụya wẹ hụn Izrẹlụ ẹhụ. Osolobuẹ wụ Chuku wẹ nọyeni wẹ anọyeni; Eze e yiọlẹ oro n'ọ hụ imẹ igunrun wẹ!

²² “Osolobuẹ gha Ijiptu wepụha wẹ; wẹ nwọn ndụn ọda-ọda nọkẹ efin-ọfịa.

²³ Onwọnni ọnụ wẹ k'a bụ ebọn Jekọpụ; onwọnni ịgba-ẹfa hụn w'e gi chọ Izrẹlụ njọ. Wẹ sikọ nwan d'e kumẹ oku wẹ: oku ebọn Jekọpụ, oku Izrẹlụ, a sị, ‘Lee ihiẹn Osolobuẹ mẹ-o!!’

²⁴ “Ndịnị k'e heli nọkẹ onyẹnnyẹ-ẹwọrọ; wẹ k'e lihi nọkẹ ẹwọrọ — ẹwọrọ hụn ghalẹni e zu ikẹn d'e ru mgbe o rigụ ihiẹn o gbu, ragụ ẹdeke ihiẹn hụ o gbu.”

²⁵ Ya kẹ Balakị nọ sị Balaam, “O higụọ! Abụlẹ wẹ ọnụ; agọzilẹ wẹ!”

²⁶ Balaam nọ sị a, “Agwanị m'ị nị ihiẹn Osolobuẹ gwa m kẹ m sikọ d'e ku?”

Amụma Nke Ẹtọ Balaam Bu

²⁷ Balakị nọ sị Balaam, “Bịa nị m wejẹn i ụzọ ọzọ; ikẹnkwọ n'ọ sụọ Osolobuẹ n'ọ nị ị gha ebẹhụ bụnị m wẹ ọnụ.”

²⁸ Balakị nọ weri Balaam shi elu Ugu Pioru, hụn wẹ a nọ e leghachanrịn alị ọkpọ-nkụn.

²⁹ Balaam nọ sị, “Mẹmẹ ni m ukpo nchụn-ẹjan ẹsa ebeni, y'a kwademẹni m efin ẹsa lẹ ebulu ẹsa.”

³⁰ Balakị nọ mẹ ihiẹn Balaam ku, gi efin ohu lẹ ebulu ohu chụnyesọnmẹ ẹjan elu ukpo nchụn-ẹjan ndị ahụn.