Ọgụngụn 22 - Ika

Isi Nke Ẹbụọ Kwasị Ọgụn Oku Balakị Kpọ Balaam D'a Bụ Ndị Izrẹlụ Ọnụ

¹ Ya ndị Izrẹlụ nọ jẹnshi ihun. Omẹgụ, wẹ nọ ziẹntọ alị-aradan Mụabụ, mkpẹnrẹn Iyi Jọdanị. Jẹriko rị nfetu Iyi Jọdanị ebẹhụ.

² Balakị nwa Zipọ a hụngụọ ihiẹn ile Izrẹlụ mẹ ndị Amọ;

³ egun hụ a tụ ndị Mụabụ makẹni ndị Izrẹlụ e bukẹ ọda — egun ndị Izrẹlụ a tụkẹnmẹkẹ ndị Mụabụ.

⁴ Ya ndị Mụabụ nọ sị ndị-isi Midianị, “Igunrunni k'e buchanrịn ihiẹn ile nọkunmẹni ẹnyi ripụ kẹ efin dọn e richanpụ ẹfịfịa rị imẹ ogige.” Balakị nwa Zipọ ya rị a kị Mụabụ ogẹn ahụn.

⁵ Ọ nọ han ụkọ d'a kpọ Balaam nwa Bioru, hụn rị alị a wụ Pẹtọ, ẹhụ iyi Yufretisi. Balakị sị wẹ sị a: “D'e lee, alị ohu a ghagụọ alị Ijiptu pụha! D'e lee wẹ kẹ wẹ jun ụzọ ile! A bịagụọ wẹ d'e biri ihun m ebeni!

⁶ Bịa nwan d'a bụ ndịnị ọnụ, n'a karịka wẹ m ẹka! Ikẹnkwọ ị bụgụ wẹ ọnụ, ọ nị m mẹri wẹ chụpụ. Makẹni, a marịnghọ m nị ị gọzi ịhịan, ọ wụrụ onyẹ wẹ gọzi; ị bụ ịhịan ọnụ, ọ wụrụ onyẹ wẹ bụ ọnụ.”

⁷ Ndị-isi alị Mụabụ lẹ ndị-isi alị Midianị nọ jẹnmẹ; wẹ gihụ egho wẹ gi e fi ẹfa hụn w'e sikọ d'a kụ Balaam. E ru wẹ nke Balaam, wẹ nọ gwa a ihiẹn Balakị ku.

⁸ Balaam nọ sị wẹ, “Ranhịn nị ebeni cheri, m sikọ d'a gwa ụnụ ihiẹn Osolobuẹ k'a gwa m.” Ya ndị-isi Mụabụ hụ nọ sọn ẹ nọdị.

⁹ Osolobuẹ nọ bịa d'e kunrun Balaam, sị a, “Elee ndị wụ ndịnị yụ lẹ wẹ rị?”

¹⁰ Balaam nọ sị Osolobuẹ, “Eze ndị Mụabụ wụ Balakị nwa Zipọ zihẹni m ozi, sị:

¹¹ ‘D'e lee alị ohu gha Ijiptu pụha hụn jun ụzọ ile! Bịa nwan d'a bụnị m wẹ ọnụ. Ikẹnkwọ ị bụgụ wẹ ọnụ ọ nị m lụsọn wẹ ọgụn chụpụ.’ ”

¹² Kanị Osolobuẹ nọ sị Balaam, “Y'e esọnkọ wẹ; y'a bukọ ndị ahụn ọnụ, makẹni wẹ wụ ndị wẹ gọzi agọzi.”

¹³ Eki e fọn Balaam nọ lihi, ọ nọ sị ndị-isi hụ Balakị zihẹ, “Lama nị, nị Osolobuẹ ekweni nị m sọnjẹn ụnụ.”

¹⁴ Ya ndị-isi alị Mụabụ nọ laburu Balakị, sị a, “Balaam ekweni sọnhẹn ẹnyi.”

¹⁵ Ya Balakị nọ hanjẹn ndị ọzọ ka ndị ibuzọ ọda ka wẹ ọghọ e nwọn.

¹⁶ Wẹ nọ bịa d'e kunrun Balaam, sị a, “Balakị nwa Zipọ sị, ‘Anịlẹ ihiẹn ọwụlẹ mẹ i abịalẹ

¹⁷ makẹni m k'a kụ ị ụgwọ ọhụnma-ọhụnma, mẹ ihiẹn ọwụlẹ i ku. Bịa d'a bụnị m ndịnị ọnụ.’ ”

¹⁸ Kanị Balaam nọ shịarị wẹ sị, “Ọsụọn'a nị Balakị kpọn siliva lẹ goru kpọnjun obi-eze ẹ, we obi-eze ẹ ye m, emẹkọ m ihiẹnanaị karị ihiẹn Osolobuẹ wụ Chuku m sị m mẹ, kẹ ihiẹn-uku kẹ ihiẹn-nta.

¹⁹ Nọdị nị nwan ebeni uhinhinni kẹ ndị ibuzọ dọn mẹ, m sikọ d'a gwa ụnụ ihiẹn Osolobuẹ k'a gwazị m.”

²⁰ Ya Osolobuẹ nọ bịa d'e kunrun Balaam uhinhin ahụn, sị a, “Hụnnị ndịnị bịa d'a kpọ ị, sọnmẹ wẹ nwan; ka mẹhụ ihiẹn m sị ị mẹ.”

Kẹ Jaki Balaam Dọn Ku Oku

²¹ O ru ụtụntụn, Balaam nọ lihi ọtọ, kwademẹ jaki ẹ, sọnmẹ ndị-isi alị Mụabụ.

²² Kanị okẹn olulu nọ bu Osolobuẹ n'o jẹn ejẹn; mmọn-ozi Osolobuẹ nọ nọkin Balaam ụzọ. Balaam nyinkọ jaki ẹ; ịya lẹ idibo ẹ ẹbụọ wị.

²³ Ogẹn jaki ẹ gi hụn mmọn-ozi Osolobuẹ k'o bu ọpịa-agha o sepụhagụ wuzo ụzọ, ọ nọ gha ụzọ pụ, kụye ugbo rị ebẹhụ, Balaam nọ fịan a ihiẹn, kẹn'ọ pụhazị ụzọ.

²⁴ Ya mmọn-ozi Osolobuẹ nọ wuzo ebe ụzọ nọ mẹ warara ẹgbata alị vaịnị ẹbụọ nwọnsọnmẹ mgbọn: mgbọn rị azụụnnị lẹ azụụnnị.

²⁵ Ogẹn jaki ahụn gi hụnzị mmọn-ozi Osolobuẹ, ọ nọ nyankụnma mgbọn, bịan Balaam ụkụ limẹn'ẹ. Ya Balaam nọ fịanzị a ihiẹn.

²⁶ Ya Mmọn-ozi Osolobuẹ nọ shizi ihun d'e wuzo ebe ụzọ nọ mẹ warara ọda-ọda, w'a fagha afagha.

²⁷ Jaki ahụn a hụn mmọn-ozi Osolobuẹ, o nọ gbu osekpu, hụn ahụn o bu Balaam. Ya kẹ Balaam nọ gi iwe fịan a ọkpọ o bu.

²⁸ Osolobuẹ nọ shịapụ jaki ahụn ọnụ, ọ nọ sị Balaam, “Kị m mẹ i, i gi fịan m ihiẹn mgbe ẹtọnị?”

²⁹ Balaam nọ sị jaki ahụn, “Y'a kparigụọ m! Omẹni m te bu ọpịa, nkẹ e gbu m'i kikẹnni.”

³⁰ Jaki ahụn nọ sị Balaam, “Mmẹ wụ jaki i nụ — ẹlẹ mmẹ? Jaki i hụn i rị e nyin kete y'e nwọnlẹ m d'e rukwọ tannị? Ẹnịna kẹ m'e mẹ i mbụ?” Balaam nọ sị a, “Mba.”

³¹ Osolobuẹ nọ shịapụ Balaam ẹnya, ọ nọ hụn mmọn-ozi Osolobuẹ k'o bu ọpịa-agha o sepụhagụ ẹka, wuzo ọkpụzọ, ya Balaam nọ gbu osekpu, bu ihun kpumẹ alị.

³² Mmọn-ozi Osolobuẹ ahụn nọ sị a, “K'i fịannị jaki i ihiẹn mgbe ẹtọnị? M bịa d'e chekin i ụzọ makẹni ijẹnni i jẹnkọ jọgbu enwẹn ẹ ẹnya m.

³³ Mmẹ kẹ Jaki i hụn chọma ụzọ ọzọ mgbe ẹtọnị. Omẹni o te chọmanị ụzọ, nkẹ e gbugụọ m'ị, la ya nwẹn tọ.”

³⁴ Balaam nọ sị mmọn-ozi Osolobuẹ, “E mẹọlẹ m njọ. Amarịn m n'ị chekin m ụzọ. O mẹ nwan nị ize rị e ze i, m k'e kin azụụn lama.”

³⁵ Mmọn-ozi Osolobuẹ ahụn nọ sị Balaam “Sọnmẹ ndị hụ, ka kuhụ ihiẹn m gwa ị.” Ya Balaam nọ sọnmẹ ndị-isi hụ Balakị zihẹ.

³⁶ Ogẹn Balakị eze Mụabụ gi nụ nị Balaam lala, ọ nọ shikwọrị obodo ohu rị mkpẹnrẹn alị a wụ Mụabụ, ẹhụ Iyi Anọnụ, d'e kunrun Balakị.

³⁷ Ya Balakị nọ sị Balaam, “Ẹlẹ m rị e zi wẹ d'a sị ị bịa ozigbo-ozigbo? Kị haịn i gilẹni bịa d'a za m? Ya wụ asa m ẹka kụdẹ ị ụgwọ ra?”

³⁸ Balaam nọ sị a, “E lee m nwan, n'a bịagụọ m d'e kunrun i! Kanị, nị m sa nwan ẹka ku ihiẹn ọwụlẹ? Ihiẹn Osolobuẹ buche m ọnụ sụọ kẹ m sikọ d'e ku.”

³⁹ Omẹgụ, Balaam nọ sọnmẹ Balakị shi Kiriatị-Huzotu.

⁴⁰ Balakị nọ gi efin lẹ atụnrụn chụn ẹjan, weri anụ imẹ ẹ ye Balaam lẹ ndị-isi Mụabụ Balakị wẹhẹ.

⁴¹ Eki e fọn, Balakị nọ weri Balaam, shi elu ugu Bamotu Baalụ, ọ nọ gha ebahụn legha ụfọdụ ndị rị imẹ igunrun Izrẹlụ.