Ọgụngụn 20 - Ika

Isi Nke Ọgụn Mirin Hụn Gha Imẹ Ọmụma Pụha

¹ Imẹ ifọn ibuzọ, ndị Izrẹlụ ile nọ ru atụ Zini, ya wẹ nọ dịnọ ẹgbẹrẹ Kadẹshi. Ebahụn kẹ Miriam nwụntọ, wẹ nọ li ẹ tọ ebẹhụ.

² Mirin wẹ k'a ra arịa, wẹ ile nọ zuni Mozizi lẹ Ẹrọnụ.

³ Wẹ nọ sọn Mozizi kpemẹ, sị, “K'o furu ẹnyi lẹ mmunẹ ẹnyi gba nwụnhụn ogẹn hụ Osolobuẹ gi gbu wẹ!

⁴ K'i wẹhẹni ndị nke Osolobuẹ imẹ atụnnị alị a kpọgbu enwẹn ẹ nkụn kẹni ẹnyi lẹ anụ ẹnyi nwụntọ ebeni?

⁵ Kị ụnụ ghanị Ijiptu wẹhẹ ẹnyi ebeni jọgbu enwẹn? Kẹ ọka kẹ figi kẹ mkpụrụ-osisi vaịnị kẹ mkpụrụ-osisi pomegraneti, onwọnni hụn rịn'a; mirin ịhịan k'a ra arịd'a!”

⁶ Mozizi lẹ Ẹrọnụ nọ gha ihun wẹ pụ, shi ọnụ-mgbọn Ọdụ-ozuzu, fiẹnrin alị; ya Osolobuẹ nọ gi ọghọ a pụha d'e kunrun wẹ ẹbụbụọ.

⁷ Osolobuẹ nọ sị Mozizi,

⁸ “Weri ọkpọ ahụn; ịyụ lẹ Ẹrọnụ nwẹnẹ i kpọkikomẹ igunrun ahụn ile. Nọ idẹnya wẹ gwa ọmụma hụ rị ebẹhụ oku. O k'e hupụha mirin ẹ, kẹni ụnụ gha imẹ ọmụma hụ wepụhanị wẹ mirin, ye wẹ lẹ anụ wẹ ra.”

⁹ Ya kẹ Mozizi nọ weri ọkpọ hụ ihun Osolobuẹ, k'o dọn gwa a.

¹⁰ Ya lẹ Ẹrọnụ nọ kpọkwama wẹ ile ye ihun ọmụma hụ, Mozizi nọ sị wẹ, “Lee n'ẹ, ndị nnupụ-isi, omẹni ẹnyi e wepụhanị nị ụnụ mirin imẹ ọmụmanị, ọzọba rọ?”

¹¹ Mozizi nọ weshi ọkpọ ahụn elu, fịan ọmụma ahụn mgbe ẹbụọ, mirin nọ gbapụha, igunrun ahụn lẹ anụ wẹ nọ ra.

Oku Wẹ A Napụ Mozizi Alị Osolobuẹ Kwe Wẹ Nkwa

¹² Kanị Osolobuẹ nọ sị Mozizi lẹ Ẹrọnụ, “Makẹni ụnụ egini m dọn ẹnya gi ufiri ẹ ye m ọghọ idẹnya ndị Izrẹlụ nọkẹ onyẹ rị nsọ, ụnụ ewebankọ ndịnị alị hụ m ye wẹ.”

¹³ (Ọnwan wụ mirin Mẹriba, ebẹhụ ndị Izrẹlụ nọ du Osolobuẹ kpe, ọ nọ ghọsị igunrun hụ n'ọ rị nsọ.)

Ndị Ẹdọm Anịnị Izrẹlụ Gha Alị Wẹ

¹⁴ Ya Mozizi nọ nọ Kadẹshi zi ozi jẹnni eze ndị Ẹdọm, sị: “Lee ihiẹn Izrẹlụ nwẹnẹ i ku: ‘Ya marịnghọ ụya ile ẹnyi hụnpụ.

¹⁵ Ndị nẹdi ẹnyi wẹ kanị jẹn Ijiptu, ẹnyi nọ biri ebahụn ahụa bu ọda. Ndị Ijiptu mẹja ẹnyi lẹ ndị nẹdi ẹnyi —

¹⁶ kanị mgbe ẹnyi gi kwanghọsị Osolobuẹ, ọ nọ nụ ẹkwan ẹnyi, zihẹni ẹnyi mmọn-ozi, onyẹ-ozi ẹ, d'e wepụha ẹnyi imẹ Ijiptu. Ẹnyi rị nwan alị Kadẹshi ebeni mkpẹnrẹn alị ụnụ.

¹⁷ Dodo, nị ẹnyi gha alị ị: ẹnyi aghakọ ugbo mọbụ alị vaịnị ọwụlẹ; ẹnyi arakọ mirin ọmị ọwụlẹ. Ụwaya-eze sụọ kẹ ẹnyi a ghachanrịn; ẹnyi akụyekọ ẹka-nni mọbụ ẹka-ekpẹn ẹnyi e we ghafegụ alị ị.’ ”

¹⁸ Kanị ndị Ẹdọm nọ sị: “Aghakwọlẹ ni ebeni! Ụnụ ma-ama ghaha, ẹnyi e gi ọpịa-agha pụha d'a lụsọn ụnụ ọgụn.”

¹⁹ Ndị Izrẹlụ nọ sị, “Ụwaya hụ sụọ kẹ ẹnyi sikọ d'a gha; ẹnyi lẹ anụ ẹnyi radẹ mirin ụnụ, ẹnyi a kụ ụgwọ a. Ẹnyi chọhụ nị ẹnyi ghafe — ọ gụ.”

²⁰ Ndị Ẹdọm nọ sịzị, “Mba. Aghalẹ ni ebeni.” Ya ndị Ẹdọm nọ kpọnhẹn ndị-agha bu ọda shi ikẹn d'a lụsọn wẹ ọgụn.

²¹ Ebe o mẹni ndị Ẹdọm ekweni nị wẹ gha azụụn nke wẹ, Izrẹlụ nọ ghashi ụzọ ọzọ.

Ẹrọnụ A Nwụnhụn

²² Ndị Izrẹlụ nọ gha Kadẹshi pụ, shi Ugu Họ.

²³ Ugu Họ ebẹhụ, ẹhụ alị Ẹdọm, kẹ Osolobuẹ nọ sị Mozizi lẹ Ẹrọnụ,

²⁴ “Ẹrọnụ sikọ nwan d'a nwụnhụn laburu ndị nẹdi ẹ; ọ banyekọ alị ahụn m ye ndị Izrẹlụ, makẹni ụnụ ẹbụbụọ pa oku m ebẹhụ mirin nọ pụhanị ụnụ imẹ Mẹriba.

²⁵ Kpọ Ẹrọnụ lẹ Ẹliẹza nwa a, y'e we wẹ shi elu Ugu Họ.

²⁶ Gbụpụ Ẹrọnụ ẹwuru, y'e yimẹ Ẹliẹza nwa a ya, Ẹrọnụ nkẹ a nwụnhụn buru ndị nẹdi wẹ; o k'a nọ elu ugu hụ nwụn.”

²⁷ Mozizi nọ mẹ kẹ Osolobuẹ dọn gwa a: wẹ nọ nyinrin elu Ugu Họ idẹnya ndị Izrẹlụ ile.

²⁸ Mozizi nọ gbụpụ Ẹrọnụ ẹwuru ndị hụ o yi, yimẹ Ẹliẹza nwa Ẹrọnụ ya; ya Ẹrọnụ nọ nwụntọ elu ugu ebahụn. Mozizi lẹ Ẹliẹza nọ gha elu ugu hụ hidan.

²⁹ Ogẹn ndị Izrẹlụ ile gi nụ nị Ẹrọnụ a nwụnhụn, Izrẹlụ ile nọ kwan a akpọhịn iri kwasị ọgụn.