Ọgụngụn 2 - Ika

Isi Nke Ẹbụọ Ebe Ebọn-Ebọn E Tumẹsọnmẹ Ọdụ Wẹ

¹ Osolobuẹ sị Mozizi lẹ Ẹrọnụ:

² “Ndị Izrẹlụ sikọ d'e tumẹsọnmẹ ọdụ wẹ ghahunmẹ Ọdụ-nsọ, kanị wẹ k'a nọtezi. Onyẹ ọwụlẹ k'e bi ebe wẹ zumẹ ahịma ebọn wẹ lẹ ahịma wẹ gi marịn ikpụlọ wẹ.”

Ẹbamịn Ọwụwa-ẹnyanwụn

³ Ẹbamịn ọwụwa-ẹnyanwụn, anwụn gha a wa, kẹ itu ndị ebọn Juda k'a nọdị, e zumẹ wẹ ahịma wẹ ebẹhụ. Nashọnụ nwa Aminadabụ wụ onyẹ-isi ndị Juda.

⁴ Ndị itu ẹ rị ikẹnnyẹ nnụ mmanaị-lẹ-mkpikpi kwasị nnụ-uku mmẹnọ-kwasị-ọgụn-ẹtọ (74,600).

⁵ Ebọn Isaka k'a nọkunmẹ wẹ. Natanẹlụ nwa Zụa wụ onyẹ-isi ndị Isaka.

⁶ Ndị itu ẹ rị ikẹnnyẹ nnụ kwasị nnụ-uku mmẹnọ-kwasị-ọgụnnaị (54,400).

⁷ Ebọn Zẹbulọnụ e sọn ẹ azụụn hụ. Onyẹ-isi ndị Zẹbulọnụ wụ Ẹliabụ nwa Hẹlọnụ.

⁸ Ndị itu ẹ rị ikẹnnyẹ nnụ kwasị-nnụ-uku mmẹsa kwasị-ọgụnnaị (57,400).

⁹ Ikẹnnyẹ ile rị itu ẹtọ ndịnị, ikẹnnyẹ ndị jẹnkọ d'e bi azụụn nke Juda, wụ madụ nnụ kwasị nnụ-uku isin-kwasị-nnụ ọgụn-itenẹi (186,400). Uwẹ e buligụ ndị ọzọ kebe buli.

Ẹbamịn Ndịdan-mirin

¹⁰ Ndị itu ebọn Rubẹni k'a nọdị ẹbamịn ndịdan-mirin, e zumẹ wẹ ahịma wẹ ebẹhụ. Ẹlizuru nwa Shẹdiọ wụ onyẹ-isi ndị Rubẹni.

¹¹ Ndị itu ẹ wụ ikẹnnyẹ nnụ-uku isin kwasị-ọgụnnaị lẹ mkpikpi (46,500).

¹² Ndị ebọn Simiọnụ k'a nọsọn wẹ. Shẹlumiẹlụ nwa Zurishadaị wụ onyẹ-isi ndị Simiọnụ.

¹³ Ndị itu ẹ rị ikẹnnyẹ ọgụn-mmisẹn kwasị-nnụ-uku mmitenẹi-kwasị-ọgụnnaị (59,300).

¹⁴ Ebọn Gadị e sọn ẹ azụụn hụ. Onyẹ-isi ndị Gadị wụ Ẹliasafụ nwa Rẹwuẹlụ.

¹⁵ Ndị itu ẹ rị ikẹnnyẹ iri kwasị-ọgụn-ẹsa kwasị nnụ-uku isẹn-kwasị-ọgụnnaị-lẹ-mkpikpi (45,650).

¹⁶ Ikẹnnyẹ ile rị itu ẹtọ ndịnị k'e bi azụụn nke Rubẹni rị iri-kwasị-ọgụnnaị kwasị nnụ kwasị nnụ-uku mmanaị kwasị ọgụn-ẹsa (151,450). Uwẹ wụ ndị nke ẹbụọ k'e bulini.

¹⁷ Wẹ buligụ, Ọdụ-ozuzu lẹ itu ndị Livaị bun'ẹ e buli, sọnmẹ wẹ, wụrụ ndị rịchanrịn etintinnaị. Usọnrọn wẹ gi ziẹntọ kẹ wẹ k'e gi buli, itu ọwụlẹ lẹ ọnọdị a lẹ ahịma a.

Ẹbamịn Ọdịdan Ẹnyanwụn

¹⁸ Ndị Ifrem k'a nọdị ẹbamịn ọdịdan-ẹnyanwụn, e zumẹ wẹ ahịma wẹ ebẹhụ. Ẹlishama nwa Amihudu wụ onyẹ-isi ndị Ifrem.

¹⁹ Ndị itu ẹ rị ikẹnnyẹ nnụ-uku ọgụnnaị lẹ mkpikpi (40,500).

²⁰ Ebọn Manasẹ k'a nọsọn wẹ. Gamaliẹlụ nwa Pẹdazọ wụ onyẹ-isi ndị Manasẹ.

²¹ Ndị itu ẹ rị ikẹnnyẹ ọgụn-iri kwasị nnụ-uku mmẹbụọ-kwasị-ọgụn (32,200).

²² Ebọn Bẹnjamini k'a nọsọn wẹ. Abidanị nwa Gidiọni wụ onyẹ-isi ndị Bẹnjamini.

²³ Ndị itu ẹ rị ikẹnnyẹ nnụ kwasị nnụ-uku-mmisẹn-kwasị-ọgụn (35,400).

²⁴ Ikẹnnyẹ ile rị itu ẹtọ ndịnị k'e bi azụụn nke Ifrem wụ madụ ọgụn-isẹn kwasị nnụ-uku-ẹsatọ-kwasị-ọgụn-isẹn (108,100).

Ẹbamịn Ugu

²⁵ Itu Danị k'a nọdị ẹbamịn-ugu, e zumẹ wẹ ahịma wẹ ebẹhụ. Ahiẹza nwa Amishadaị wụ onyẹ-isi ndị Danị.

²⁶ Ndị itu ẹ rị ikẹnnyẹ ọgụn-iri kwasị nnụ-uku ẹbụọ kwasị-ọgụn-ẹtọ-lẹ-mkpikpi (62,700).

²⁷ Ebọn Asha k'a nọsọn wẹ. Pagiẹlụ nwa Ọkranị wụ onyẹ-isi ndị Asha.

²⁸ Ndị itu ẹ rị ikẹnnyẹ nnụ-uku ohu-kwasị-ọgụnnaị lẹ mkpikpi (41,500).

²⁹ Ebọn Naf'tali k'a nọsọn wẹ. Ahira nwa Ẹnanị wụ onyẹ-isi ndị Naf'tali.

³⁰ Ndị itu ẹ rị ikẹnnyẹ nnụ kwasị nnụ-uku mmẹtọ-kwasị-ọgụnnaị (53,400).

³¹ Ikẹnnyẹ ile rị itu ndịnị k'e bi azụụn nkẹ Danị rị nnụ-mmẹnọ kwasị nnụ-ọgụn-mmitenẹi (157,600). Uwẹ k'e buli ikpanzụụn, sọnkọ ahịma wẹ.

³² Ndịnị ile wụ ndị Izrẹlụ wẹ gụn ikp'ụlọ-ikp'ụlọ detu. Wẹ ile rịsọnmẹ itu wẹ ndịnị gba madụ iri-kwasị-ọgụnnaị lẹ nnụ-uku ẹtọ-lẹ-mkpikpi kwasị nnụ-uku ọgụn-iri-kwasị-nnụ (603,550).

³³ Wẹ mẹ kẹ Osolobuẹ dọn gwa Mozizi, agụnnị wẹ ndị Livaị, ndị Izrẹlụ ibe wẹ sụọ kẹ wẹ gụn.

³⁴ Ya ndị Izrẹlụ nọ mẹchanrịn ihiẹn ile Osolobuẹ gwa Mozizi: e ziẹntọsọnmẹ wẹ ẹrịra, ebọn-ebọn e ziẹntọ ebe wẹ zumẹ ahịma wẹ; ẹrịra kẹ w'e bulizikwọ — onyẹ lẹ ẹbozo ẹ lẹ ebọn wẹ.