Ọgụngụn 18 - Ika

Isi Nke Mmẹsatọ Ọrụn Ndị Nchụn-ẹjan Lẹ Ndị Livaị

¹ Osolobuẹ nọ sị Ẹrọnụ, “Ịyụ lẹ ụmụ ị lẹ ebọn ụnụ ile wụ ebọn Livaị kẹ wẹ k'a jụ ihiẹn ọwụlẹ mẹ Ọdụ-nsọ, kanị ịyụ lẹ ụmụ ị sụọ kẹ wẹ k'a jụ ihiẹn ọwụlẹ mẹ ọrụn ịchụn-ẹjan.

² Wẹhẹ ndị Livaị ibe i, ndị ebọn ụnụ, nị wẹ d'e du ụnụ rụn ọrụn, e jẹnni ịyụ lẹ ụmụ ị ozi ụnụ gha a rụn ọrụn imẹ Ọdụ Ashịa-ẹri.

³ Okpuru i kẹ wẹ k'a rị; wẹ k'a gha a rụn ọrụn ile rị imẹ Ọdụ-nsọ — kanị anọkunmẹkọ wẹ ihiẹn Ọdụ-nsọ ọwụlẹ mọbụ ukpo nchụn-ẹjan, amamgbe ịyụ lẹ wẹ a nwụnhụn.

⁴ Wẹ k'e sọn i rụn ọrụn ilepụ Ọdụ-nsọ ẹnya, ọrụn ile hụn rị imẹ Ọdụ ahụn; onwọnni onyẹ ọzọ k'a nọkunmẹ ebe ụnụ rị.

⁵ “Ụnụ nwọn e lepụ Ọdụ-nsọ lẹ ukpo nchụn-ẹjan ẹnya, makẹ m ghazị e gi ọnụma e sọn ndị Izrẹlụ.

⁶ Mmẹ lẹ enwẹn m a ghagụọ imẹ ndị Izrẹlụ họye i ndị Livaị ibe i nị wẹ wụrụ ihiẹn m ye i, hụn wẹ gi kwanị Osolobuẹ kẹni w'a rụn ọrụn imẹ Ọdụ-nsọ.

⁷ Kanị ịyụ lẹ ụmụ ị sụọ k'a wụ ndị a chụn ẹjan rịn'a hụn ihiẹn ile rị ukpo nchụn-ẹjan lẹ azụụn Ẹkwa-mgbọnkin rị imẹ Ọdụ-nsọ sikọ d'a rị ẹka wẹ. M rị e ye ụnụ ọrụn ịchụn-ẹjan n'ọ wụrụ ihiẹn m ye ụnụ. Onyẹ ọzọ nọkunmẹ Ọdụ-nsọ hụ, wẹ k'e gburịrị a.”

Ihiẹn W'e Ye Ndị Nchụn-ẹjan Lẹ Ndị Livaị

⁸ Osolobuẹ nọ sị Ẹrọnụ, “E bugụọ m oyiye ile w'e ye m che i ẹka; oyiye ile rị nsọ hụn ndị Izrẹlụ e ye m, e wegụọ m'a ye ịyụ lẹ ụmụ ị, n'ọ wụrụ nke ụnụ, wụrụ ihiẹn hụn e ru ụnụ ẹka ogẹn ile.

⁹ Ụnụ nwọn hụn wẹ dụnlẹni ọkụn imẹ ẹjan ndị ahụn rịchanrịn nsọ. Ịya wụ nke ịyụ lẹ ụmụ ị imẹ ihiẹn ile w'e wẹhẹ d'e ye m oyiye rị nsọ — kẹ oyiye-ọka kẹ ẹjan-njọ kẹ ẹjan onyẹ ikpe ma.

¹⁰ Ri n'ẹ nọkẹ ihiẹn rịchanrịn nsọ; ikẹnnyẹ ile rị imẹ ụnụ nwọn e ri ẹ. Werikwọ n'a kẹ ihiẹn rị nsọ.

¹¹ “Ọnwan wụzịkwọ nke ụnụ: ihiẹn ọwụlẹ wẹ wepụ che ụsụọ imẹ oyiye ile ndị Izrẹlụ finfinghọsị m. M rị e we wẹ e ye ịyụ lẹ ụmụ ị ikẹnnyẹ lẹ ikpoho, n'ọ wụrụ ihiẹn e ru ụnụ ẹka ogẹn ile. Onyẹ ọwụlẹ hụn rị ikpụlọ ị hụn rụlẹni nwọn ikẹn rị ẹ.

¹² “E yegụọzị m ụnụ udẹn-olivu ile kachanrịn mma lẹ manya ọhụn ile kachanrịn mma lẹ ọka ile wẹ gi e ye Osolobuẹ oyiye-ọka ibuzọ.

¹³ Ụnụ nwọn mkpụrụ ibuzọ ile alị mịpụha hụn wẹ wẹhẹni Osolobuẹ. Onyẹ ikpụlọ ị ọwụlẹ hụn rụlẹni nwọn ikẹn ri ẹ.

¹⁴ Ihiẹn ọwụlẹ rị imẹ Izrẹlụ wẹ gi kwachanrịnnị Osolobuẹ wụ nke ụnụ.

¹⁵ “Nwa ibuzọ gha ẹkpa-nwa ọwụlẹ pụha — kẹ ịhịan kẹ anụ — hụn wẹ ye Osolobuẹ wụ nke ụnụ. Kanị ụnụ k'a gbarị okẹnnyẹ ibuzọ ọwụlẹ lẹ okẹn ibuzọ anụ ọwụlẹ rụnị mụ.

¹⁶ Wẹ zu ifọn ohu, ụnụ e gi ọnụ-egho wẹ gi a gbarị wẹ gbarị wẹ — akpụrụ siliva isẹn. Akpụrụ siliva wẹ gi gbarị a lẹ akpụrụ siliva ụlọ Osolobuẹ hụn wụ akpụrụ nta ọgụn k'a hanrịrị.

¹⁷ K'a gbarịkwọlẹ ni nwa-ibuzọ efin, atụnrụn mọbụ ewu; wẹ rị nsọ. Gi nị wẹ chụnyeni m ẹjan: Fe ni ẹdeke wẹ ye elu ukpo nchụn-ẹjan, ụnụ a dụn ụtọrọ a ọkụn, n'ọ wụrụ oyiye wẹ gi ọkụn ye, ishin hụn a sụọ Osolobuẹ ụsụọ.

¹⁸ Anụ wẹ sikọ d'a wụ nke ụnụ, nọkẹ kẹ ẹran anụ hụn wẹ e wepụha e finfinghọsị Osolobuẹ lẹ ọrụ anụ wẹ gi chụn ẹjan dọn wụ nke ụnụ.

¹⁹ Ẹghẹẹ, e wegụọ m ihiẹn ọwụlẹ w'e wepụ e che ụsụọ imẹ oyiye ile rị nsọ ndị Izrẹlụ e ye Osolobuẹ ye ịyụ lẹ ụmụ ị ikẹnnyẹ lẹ ikpoho, n'ọ wụrụ ihiẹn k'a gha e ru ụnụ ẹka ogẹn ile. Nkwerigbama nnu rị imẹ ẹ hụn ghalẹni e gbehutọ lẹ hụn k'a rịnị yụ lẹ ụmụ ị jẹnrin ejẹn k'ọ wụ ebe Osolobuẹ rị.”

²⁰ Osolobuẹ nọ sị Ẹrọnụ, “Y'e nwọnkọ alị imẹ alị wẹ, y'e nwọnkọ ukuu imẹ igunrun wẹ; mmẹ wụ ihiẹn run'i lẹ ukuu i imẹ ndị Izrẹlụ.

²¹ “Nke ndị Livaị, m rị e we ụzọ-ohu imẹ ụzọ-iri ile rị Izrẹlụ e ye ndị Livaị, n'ọ wụrụ nke wẹ hụn wẹ gi a kụ wẹ ụgwọ ọrụn wẹ rị a rụn imẹ Ọdụ-ozuzu.

²² Ndị Izrẹlụ a nọkunmẹkọzị Ọdụ-ozuzu ahụn gha kikẹnni jẹnmẹ: wẹ nọkunmẹ ẹ, e gi wẹ isi wẹ buru njọ wẹ, nwụnhụn.

²³ Ụnụ ndị Livaị nwọn a rụn ọrụn rị imẹ Ọdụ-nsọ, ụnụ kẹ wẹ k'a jụ ihiẹn ọwụlẹ mẹ Ọdụ-ozuzu. Iwuni k'a rịferi agbọ ile lalanị. Enwọnkọ wẹ alị imẹ Izrẹlụ.

²⁴ Kama, e wegụọ m ụzọ-ohu imẹ ụzọ-iri hụ ndị Izrẹlụ a tụnị Osolobuẹ ye ndị Livaị n'ọ wụrụ ihiẹn wẹ. Ịya haịn m gi ku ihiẹn m ku banyeni wẹ, nị ‘Enwọnkọ wẹ alị imẹ Izrẹlụ.’ ”

²⁵ Osolobuẹ nọ sị Mozizi,

²⁶ “Gwa ndị Livaị, sị wẹ: Ụnụ narịngụ ndị Izrẹlụ ụzọ-ohu imẹ ụzọ-iri kẹ m dọn ku ẹ nị e wegụọ m'a ye ụnụ, ụnụ sikọ d'e nọ imẹ ẹ tụnị m ụzọ-ohu imẹ ụzọ-iri.

²⁷ Osolobuẹ sikọ d'a gụn a yeni ụnụ kẹ ọka ụnụ rụnpụha imẹ ugbo lẹ manya-vaịnị ụnụ pịnpụha.

²⁸ Ẹrịra kẹ ụnụ nwẹn k'e dọn gha ụzọ-ohu imẹ ụzọ-iri ile ụnụ narịn ndị Izrẹlụ tụnị Osolobuẹ ụzọ-ohu imẹ ụzọ iri. E we ni hụnnị wụ nke Osolobuẹ e ye onyẹ nchụn-ẹjan wụ Ẹrọnụ.

²⁹ Imẹ ihiẹn ile wẹ ye ụnụ, a tụnị nị Osolobuẹ hụn kachanrịn mma, kachanrịn nsọ.

³⁰ Sị ndị Livaị, ‘Ụnụ tụgụnị Osolobuẹ hụn ka mma, Osolobuẹ e weri nwan hụn họdụnị kẹ ọka ụnụ rụnpụha imẹ ugbo mọbụ manya-vaịnị ụnụ pịnpụha;

³¹ ụnụ lẹ ikpụlọ ụnụ nwọn ikẹn nọ ebe ọwụlẹ ri ẹ, makẹni ụgwọ ọrụn ụnụ rị a rụn imẹ Ọdụ-nsọ rọ.

³² Ikpe amakọ ụnụ, ebe o mẹ ni ụnụ a tụgụọnị Osolobuẹ hụn ka mma. Emẹrụlẹ ni oyiye-nsọ ndị Izrẹlụ rị e ye, amamgbe ụnụ a nwụn.’ ”