Ọgụngụn 17 - Ika

Isi Nke Mmẹsa Ọkpọ Ẹrọnụ A Gbọrị

¹ Osolobuẹ nọ sị Mozizi,

² “Gwa ndị Izrẹlụ oku, y'a nahan wẹ ọkpọ mmẹbụọ: nahansọnmẹ onyẹ-isi ebọn ohu-ohu ọkpọ ohu-ohu. De ẹfan onyẹ-onyẹ ye ọkpọ a.

³ Nke ebọn Livaị, de ẹfan Ẹrọnụ ye ẹ — nị ọkpọ onyẹ-isi ebọn ọwụlẹ k'a rịrịrị a.

⁴ Bụ wẹ che imẹ Ọdụ-nsọ, ihun Ẹkpẹti-Ashịa-ẹri, ebẹhụ mmẹ lẹ ịyụ nọ e zu.

⁵ Ọkpọ onyẹ hụn m họrị sikọ d'a gbọrị, nị m hụn ụzọ kụsị ndẹnwịnnwịnnị ndị Izrẹlụ rị e dẹnnwịnwịnnị ị ogẹn ile.”

⁶ Ya Mozizi nọ gwa ndị Izrẹlụ, ndị-isi wẹ nọ y'ẹ ọkpọ mmẹbụọ, onyẹ-isi ebọn ohu-ohu nwọnsọnmẹ ohu-ohu; ọkpọ Ẹrọnụ rị imẹ wẹ.

⁷ Mozizi nọ kị ọkpọ ndị ahụn tọ ihun Osolobuẹ imẹ Ọdụ Ashịa-ẹri.

⁸ Eki e fọn, Mozizi a banye imẹ Ọdụ Ashịa-ẹri, ọ nọ hụn nị ọkpọ Ẹrọnụ, hụn nọkin ẹnya ebọn Livaị a gbọrị — ẹlẹdẹ ọgbọrị sụọ k'ọ gbọrị, o mẹmẹgụọ mkpụkpụma, o mịgụọdẹ obobo, mị mkpụrụ amọndụ.

⁹ Mozizi nọ gha ihun Osolobuẹ kịpụhachanrịn ọkpọ ndị ahụn, nị ndị Izrẹlụ ile hụn a. E lee wẹ wẹ, onyẹ onyẹ nọ weri nke ẹ.

¹⁰ Osolobuẹ nọ sị Mozizi, “Wekin ọkpọ Ẹrọnụ shi ihun Ọdụ Ashịa-ẹri, n'ọ wụrụ ihiẹn wẹ gi a gwa ndị nnupụ-isi oku. Ọnwan kẹ w'e gi dẹnnwịnwịnbehini m, makẹ wẹ gha a nwụn.”

¹¹ Mozizi nọ nwan mẹ kẹ Osolobuẹ dọn gwa a — ihiẹn Osolobuẹ gwa a k'o mẹ.

¹² Ndị Izrẹlụ nọ sị Mozizi, “Ẹnyi jẹnkọ d'a nwụnhụn maị! Nke ẹnyi a gụgụọkwọ! Ẹnyi ile a gụgụọkwọ!

¹³ Onyẹ nọkunmẹdẹ Ọdụ-nsọ Osolobuẹ ọnwụn e gbu ẹ! Nị ẹnyi ile nwụnchanrịn nwan ra?”