Ọgụngụn 16 - Ika

Isi Nke Mmisin Kora, Datanị Lẹ Abiram

¹ Kora nwa Iziha hụn wụ nwa Kohatị nwa Livaị weri ndị ebọn Rubẹni wụ Datanị lẹ Abiram ụmụ Ẹliabụ lẹzi Ọọnị nwa Pẹlẹtị

² pụha d'e kujama oku Mozizi; uwẹ lẹ madụ iri kwasị ọgụn-mmẹbụọ ndị wẹ marịn-amarịn, ndị-isi ndị-isi imẹ Izrẹlụ.

³ Wẹ nọ zuni Mozizi lẹ Ẹrọnụ eje-umẹ, sị wẹ, “Ụnụ rị e mẹkarị enwẹn ụnụ! Ndị Izrẹlụ ile rị nsọ, onyẹ ọwụlẹ imẹ wẹ; Osolobuẹ nọyezikwọnị wẹ anọyeni! Kị ụnụ rịzị e bushini enwẹn ụnụ elu a karị ndị nke Osolobuẹ ile?”

⁴ Ogẹn Mozizi gi nụ ihiẹnni, ọ nọ tụha enwẹn ẹ alị, bu ihun kpumẹ alị.

⁵ Ya ọ nọ sị Kora lẹ ndị ile sọnkọn'a, “O ru ụtụntụn ekile, Osolobuẹ a ghọsị onyẹ hụn wụ nke ẹ lẹ onyẹ hụn rị nsọ — mẹ onyẹ ahụn nọkunmẹ ẹ. Onyẹ hụn ọ họrị k'o k'a nị nọkunmẹ ẹ.

⁶ Ịyụ wụ Kora lẹ ndị ile sọnkọn'ị, lee ihiẹn ụnụ jẹnkọ d'e mẹ: werisọnmẹ ni sẹnsa wẹ gi a mụ nsẹnsi;

⁷ o ru eki ụnụ e bu ọkụn lẹ nsẹnsi cheni Osolobuẹ imẹ wẹ: onyẹ hụn Osolobuẹ sikọ d'a họrị ịya wụ onyẹ hụn rị nsọ. Nke ụnụ ndị Livaị a karị ẹka!”

⁸ Mozizi nọzị sị Kora, “Gọn ni nwan ntịn ụnụ ndị Livaị!

⁹ Owepụha hụn Osolobuẹ wepụha ụnụ ndị Livaị imẹ ndị Izrẹlụ ile, wezụnhan ụnụ ebe ọ rị d'a rụn ọrụn imẹ Ọdụ-Osolobuẹ e hini ụnụ — hụn ahụn ụnụ e wuzo ihun ndị Izrẹlụ ile a rụnnị wẹ ọrụn wẹ gi e fe Osolobuẹ?

¹⁰ O wegụọlẹ ụnụ lẹ ndị Livaị umunẹ ụnụ ile nọkunmẹ enwẹn ẹ; ụnụ rị nwan a chọ nị ụnụ wụrụ ndị nchụn-ẹjan?!

¹¹ Osolobuẹ kẹ ịyụ lẹ ndị ile sọnkọn'ị zuni nwan izuni! Onyẹ wụ Ẹrọnụ hụn ụnụ k'a kọrịanị?”

¹² Mozizi e zi wẹ d'a kpọ Datanị lẹ Abiram — ụmụ Ẹliabụ, kanị wẹ nọ sị, “Ẹnyi abịakọ!

¹³ Hụnnị ị gha alị Ijiptu mirin-ẹran lẹ mirin-ẹnwụn rị e hu wepụha ẹnyi d'a nwụntọ imẹ alị ọkpọ-nkụnnị eke hi? Ị chọ nwan n'ị kị ẹnyi che okpuru i?

¹⁴ Y'e ke weru ẹnyi nwan alị nwẹn mirin-ẹran lẹ mirin-ẹnwụn rị e hu hụn i ku oku ẹ mọbụ ye ẹnyi ugbo lẹ alị vaịnị ndị nwẹn i ku. N'ị gụpụdẹ nwan ndịnị akp'ẹnya ra? Mba, ẹnyi abịakọ!”

¹⁵ Ya iwe nọ we Mozizi ọda-ọda, ọ nọ sị Osolobuẹ, “Anarịnlẹ oyiye wẹ. Anarịntudẹni m wẹ jaki mmakalaka; emẹtuni m onyẹ ọwụlẹ imẹ wẹ njọ.”

¹⁶ Mozizi nọ sị Kora, “Ịyụ lẹ ndị ile sọnkọn'ị k'a pụha ihun Osolobuẹ ekile — ịyụ lẹ wẹ lẹ Ẹrọnụ.

¹⁷ Onyẹ-onyẹ sikọ d'e weri sẹnsa o k'e gi mụ nsẹnsi, kpọn nsẹnsi ye imẹ ẹ — ya wụ, wẹ k'a rị sẹnsa iri kwasị ọgụn-mmẹbụọ; onyẹ-onyẹ jẹnkọ d'e wẹhẹ nke ẹ ihun Osolobuẹ; kẹ ịyụ kẹ Ẹrọnụ sikọ d'e wẹhẹzikwọ sẹnsa ụnụ.”

¹⁸ Ya onyẹ-onyẹ nọ werisọnmẹ sẹnsa o k'e gi mụ nsẹnsi, bu ọkụn lẹ nsẹnsi che imẹ ẹ, sọn Mozizi lẹ Ẹrọnụ wuzo ọnụmụzọ Ọdụ-nsọ.

¹⁹ Ogẹn Kora gi kpọkwamagụ ndị Izrẹlụ ile nị wẹ zuni wẹ eje-umẹ Ọnụ-mgbọn Ọdụ-nsọ, Osolobuẹ nọ gi ọghọ a pụha ihun igunrun ahụn ile.

²⁰ Osolobuẹ nọ sị Mozizi lẹ Ẹrọnụ,

²¹ “Gha nị imẹ igunrun ahụn pụha nị m gbupụ wẹ mgbe ohu.”

²² Kanị Mozizi lẹ Ẹrọnụ nọ tụha enwẹn wẹ alị bu ihun kpumẹ alị, kwanma ẹkwan, sị, “Euu Osolobuẹ, Chuku hụn gi ndụn ịhịan ile, n'i busọn ịhịan ile olulu bụ onyẹ ohu sụọ mẹ njọ?”

²³ Ya Osolobuẹ nọ sị Mozizi,

²⁴ “Sị nị nwan wẹ ile gha ọdụ Kora, Datanị lẹ Abiram pụ.”

²⁵ Mozizi nọ lihi ọtọ, jẹnburu Datanị lẹ Abiram, ndị-isi alị Izrẹlụ e sọn ẹ;

²⁶ ọ nọ gba ịhịan ile mkpịnsịn-ẹka, sị, “Gha nị ebe ọdụ ndị-ejẹni rị pụ! Emẹtụkwọlẹ ni ihiẹn wẹ ọwụlẹ ẹka, makẹ ụnụ gha a nwụn yeni njọ ile wẹ mẹ!”

²⁷ Wẹ nọ gha iwe Kora lẹ Datanị lẹ Abiram lẹ ebe ile nọhunmẹ iwe wẹ pụchanrịn. Ya Datanị lẹ Abiram nọ pụha, wẹ lẹ inyẹnmẹ wẹ lẹ ụmụ wẹ lẹ ndị wẹ kwọndọn ẹka nọ turusọnmẹ ọnụmụzọ ọdụ wẹ.

²⁸ Mozizi nọ sị wẹ, “Ẹnịna kẹ ụnụ e gi marịn nị Osolobuẹ zi m rụn ihiẹn ndịnị ile m rị a rụn, nị ẹlẹ uche m kẹ m gi a rụn wẹ:

²⁹ ndịnị nwụn ọnwụn-ẹhi — wẹ nwụnhụn bụ ẹlẹ n'o nwọn ihiẹn mẹni wẹ, ụnụ a marịn nị ẹlẹ Osolobuẹ zi m.

³⁰ Kanị, Osolobuẹ mẹ ahụnlele — nị alị a shịapụ ọnụ, bu wẹ lue, uwẹ lẹ ihiẹn wẹ ile, a rị wẹ ndụn shi alị-mmọn — ụnụ e gi ẹ marịn nị a kpariọlẹ wẹ Osolobuẹ.”

³¹ Hụn o gihụ kugụ ihiẹnni ile, alị ebahụn Datanị lẹ Abiram rị nọ gbawa;

³² alị nọ shịapụ ọnụ bu wẹ lue, kẹ wẹ kẹ ikpụlọ wẹ, uwẹ lẹ itu Kora ile lẹ ihiẹn ile wẹ nwọn.

³³ Wẹ ile nọ kpọban alị ebe wẹ rị ndụn nọkẹ ebe wẹ nọ li ịhịan lẹ ndụn, uwẹ lẹ ihiẹn ile wẹ nwọn; alị nọ kpumẹ wẹ ye, a la wẹ iwi, pụ imẹ igunrun ahụn.

³⁴ Ogẹn ndị Izrẹlụ gi nụ oro wẹ, wẹ ile nọkunmẹ ebẹhụ nọ gbama ọsọ, yikọ, “Makẹ alị gha e buzikwọ ẹnyi nwẹn lue!”

³⁵ Ọkụn nọ gha ebe Osolobuẹ rị bịa, dụnpụ wẹ madụ iri kwasị ọgụn-mmẹbụọ hụ rị a mụ nsẹnsi.

³⁶ Osolobuẹ nọ sị Mozizi,

³⁷ “Gwa Ẹliẹza onyẹ nchụn-ẹjan nwa Ẹrọnụ onyẹ nchụn-ẹjan wepụha sẹnsa ndị ahụn ebẹhụ ọkụn nọ dụn ndị ahụn, ya jẹnte d'a bụọhu ikeke unyin họdụsọnmẹ imẹ sẹnsa ndị hụ — makẹni sẹnsa ndị ahụn rị nsọ —

³⁸ sẹnsa ndị ahụn mẹ njọ, hụn wẹ gi mụ nsẹnsi isi wẹ a tọ a. Tipịa nị sẹnsa ndị ahụn nị wẹ rịsọnmẹ ibe-ibe, ụnụ e gi wẹ gbama elu ukpo nchụn-ẹjan, makẹni e wegụọ wẹ wẹ ye Osolobuẹ, wẹ nọ rị nsọ. Sẹnsa ndị hụ sikọ d'a wụrụnị ndị Izrẹlụ ihiẹn wẹ gi dọ wẹ ẹka-ntịn.”

³⁹ Ya Ẹliẹza onyẹ nchụn-ẹjan nọ kịrị sẹnsa igwe-bronzu ile ikẹnnyẹ ndị ahụn ọkụn dụnpụ wẹhẹ, sị wẹ tipịa wẹ gi gbama elu ukpo nchụn-ẹjan —

⁴⁰ nọkẹ kẹ Osolobuẹ dọn zi Mozizi zi ẹ. Ọnwan nwọn a nyanhannị ndị Izrẹlụ n'o nwọnni onyẹ ọzọ k'a bịa d'a mụyeni Osolobuẹ nsẹnsi — wezụka ụmụ Ẹrọnụ; onyẹ ọzọ mụ a, ihiẹn mẹ Kora lẹ ndị sọnn'ẹ e m'ẹ.

⁴¹ Eki e fọn ndị Izrẹlụ ile nọ dẹnnwịnwịnmanị Mozizi lẹ Ẹrọnụ, a sị, “Ụnụ e gbugụọ ndị nke Osolobuẹ.”

⁴² Kanị, ogẹn wẹ ile gi zu nị wẹ maye Mozizi lẹ Ẹrọnụ, e lee wẹ ẹnya Ọdụ-nsọ, e lee orukpu k'o kpumẹ ẹ, Osolobuẹ e giọlẹ ọghọ a pụha!

⁴³ Mozizi lẹ Ẹrọnụ nọ jẹnmẹ ihun Ọdụ-nsọ ahụn d'e turu,

⁴⁴ Osolobuẹ nọ sị Mozizi,

⁴⁵ “Gha nị ebe ndịnị rị pụ, nị m gbupụ wẹ ozigbo.” Mozizi lẹ Ẹrọnụ nọ tụha enwẹn wẹ alị bu ihun kpumẹ alị, rịọma a.

⁴⁶ Mozizi nọ sị Ẹrọnụ, “Weri sẹnsa ị, n'i kpọn nsẹnsi ye imẹ ẹ; nọ ukpo nchụn-ẹjan bụọrị ikeke ọkụn buche imẹ ẹ, y'e buru ẹ gbaban imẹ igunrunni ozigbo d'a gbarị isi wẹ. Osolobuẹ e giọlẹ ọnụma mẹmẹ wẹ ihiẹn; ọnwụn e gbumẹgụọ wẹ.”

⁴⁷ Ya Ẹrọnụ nọ weri sẹnsa hụ kẹ Mozizi dọn gwa a, gbaban imẹ igunrun wẹ. Ọnwụn e gbumẹgụọlẹ imẹ igunrun hụ! Ẹrọnụ nọ bu nsẹnsi che elu ikeke ọkụn rị sẹnsa ahụn, chụnnị wẹ ẹjan — gi ẹ gbarị isi wẹ.

⁴⁸ O wuzo ẹgbata ndị rị ndụn lẹ ndị nwụnnị, ọnwụn nọ gbubehi wẹ.

⁴⁹ Kanị ọ kẹrẹgụọlẹni ọnwụn hụ gbupụ mmadụ ọgụn-iri kwasị nnụ-uku mmẹnọ lẹ mkpikpi (14,700) cheni ndị oku Kora gbu.

⁵⁰ Ya Ẹrọnụ nọ kinhẹn d'e kunrun Mozizi Ọnụ-mgbọn Ọdụ-nsọ. Ẹrịra kẹ ọnwụn hụ dọn kụsị.